الثلاثاء، أغسطس 16، 2005

كان عايز يكتب



بعد ما إدا وبعد ما خد.. بعد ما هد وبنى وإحتد
شد لحاف الشتا م البرد

الدنيا ضلمة وفكره مشوش. وراه ميت حاجة نفسه يعملها ومفيش وقت وإن قرر متلقيش نفس. صوت أمه بينادى يساعدها وأخوه مستعجل يخرج وعايز يستلف جذمته. أبوه بيقرأ الجرنال وقت ما ناس ع "الجزيرة" بتتكلم.. كلام منتشر فى الجو وكإنه نفثات دخان بيتشتت فى الجو كدواير مفرغة..

بعد ما لف وبعد ما دار.. بعد ما هدا وبعد ما سار
بعد ما داب وإشتاق وإحتار
حط الدبلة وحط الساعة.. حط سجايره والولاعة
علق حلمه على الشماعة

جواه خناقة تمنعه من إنه يشوف أو حتى يفكر فى أى ناحية يخطى..
وإن سألوه مالك يجاوب: الجو حر و مخنوق..
سماعة التليفون مطرحها أكتر من إسبوع ولا إشتاق يقول لحد إزيك وإزى أخبارك. يمكن لأنه عارف الرد من قبل ما يسمعه ويمكن لأنه مش عايز يسمعه. كل الكلام زى بعض، وكل الحروف شبه بعض وكل الأيام واحد.
وسأل: إيه يفرق النهاردة عن بكرة غير الإسم؟

الغبار ملى صفحات الكتب وحبر القلم جف م الركنة فى جزيرة بعيدة لوحده. حتى صوت الراديو أصبح فجأة بيإن من سُكات بدموع بيشفها من ورا إزاز مشروخ.
وخرج للبلكونة.. لكن أزهار الربيع كانت خلاص دبلت....

شد لحاف الشتا على جسمه.. دحرج حلمه وهمه وإسمه
دارا عيون عايزين يبتسموا
إللى قضى العمر هذار.. واللى قضى العمر بجد
شد لحاف الشتا م البرد
حط الدبلة وحط الساعة.. حط سجايره والولاعة
علق حلمه على الشماعة


سلاماتى
--------------
إهداء لشخص عزيز فكرنى بالأغنية..

هناك 12 تعليقًا:

أحمد يقول...

مبروك اصلاح الكمبيوتر
و عودة الروح الجميلة الينا

Eman M يقول...

Ra2e3 ya Blue :)

sydalany-وش مكرمش يقول...

حلو موضوع النت إسكاب ده
:0P

كلام جميل

غير معرف يقول...

أنا دايما كنت بقول إن "لست أدرى" دى موهبة غير عادية.
و فعلا أثبتت الأيام إن وجهة نظرى لم تخب.
الموهبة فى وجهة نظرى هى تعبير و أدوات.
و "لست أدرى" تملك الأثنين.
"لست أدرى" كلامها يخش القلب, من أوسع أبوابه و حتى من أضيقها.
أنا لما أقرا أي حاجه لها بحس بهويتى و مصريتى.
بحس بالبساطة و الجمال و الطيبة.
"لست أدرى" هى حتمًا تدرى,
هى تعرف كيف تتسلل الى قلوب الآخربن,
و لكنها يا سادة لا تدرى أنها تدرى

free soul يقول...

I can't find words to describe how I felt when I read this one!

All I can say is you described things that happen everyday with me, even some of the words I used to answer when I don't really want to explain whay I am sad, that is so deep and so pure

lasto, you are the best, really you are :)

Lasto-adri *Blue* يقول...

Ebles:
ممكن أقولك شكراً ومن غير سبب وجيه؟

Eman m:
:$ .. its my pleasure

Sydalany:
نت إسكيب؟؟؟

Anonymous:
أظنك دلوقتى عارف ردى عليك.. بس نفسى فى كلمة واحدة أقولهالك وح أمشى:
الله يكرمك

Freesoul:
وإن تعددت الأشكال وتنافرت الألوان.. كلنا هذا الرجل
u the one who made my day :)

شريوس يقول...

انا مش خاقول رأير علشان انا خلاص قولتوه.. :(

btw: i got VERONIKA DECIDES TO DIE - evil laughs :)-, n' my pc is down for gooood !!

Mr-Biboooo يقول...

و عادت لست ادرى.... الحمد لله على سرعة العودة و هااااايل

Lasto-adri *Blue* يقول...

Sheryos:
heee2.. he2... *thats my comment*

Saydalany:
ALLAH yesalemak

hesterua يقول...

شوفى يا لست ادرى حاولى تكتبى عن نفسك و مجتمعك مش كتابة تحريضية لأ
بس انا شايفك متميزة فى الكتابة من general view
يعنى تعلقى على اللى بيحصللك و بيحصل حواليكى و الى الأمام

Lasto-adri *Blue* يقول...

تؤمر يا دكتور زيفاجو بجد.. وإحنا ننفذ على طول
بس موضوع الكتابة دى... مش متأكدة
أصلى لما بكتب حاجة مش برتب أفكارى أو أقول أنا ح أكتب النهاردة فى كذا..
هى بتيجى لوحدها..

لسا مش مرتبة أفكارى زى الكتاب الكبار
عموما ح أحاول.. وربنا يستر

غير معرف يقول...

Looking for information and found it at this great site... »