الأحد، أغسطس 28، 2005

الوصايا العشر بتاعتى



رغم إنى نويت أطلق السياسة بالتلاتة، لكن يظهر إنها مش عايزة تسبنى فى حالى. تخيلوا أول يوم فى حياتى أركب أوتوبيس ويقف يمون من بنزينة –زيه زى باقى العربيات- كان النهاردة.. والأغرب إنه ما وقف إلا قدام مقر الحزب إياه. والصراحة كان فاصل كوميدى من النوع الجامد قوى. بدأ بــ"ما تقليش وما تعدليش.. هو ××× غيره مفيش".. –إحساس بإنى فى الصف الأول لماتش كورة- وإنتهى الفاصل بــ "نبايع ××× مدى الحياة".
وهنا قلبت على الكوميديا السوداء! لأنى ببساطة شفت يوفط تانية لناس آخرين ومع كل إحترامى –قصاد عينى- واحد جه وقطعهم!!!

طول الطريق بقى وأنا بفكر فى الوصايا العشر اللى ممكن أقولكم عليها قبل ياعينى ما حد يقرر يروح ينتخب.. وبعد ما الراس تقع على الفاس، نطلع ننعى: "حسرة عليه يا حسرة عليه"..
لذلك عزيزى الناخب و عزيزتى الناخبة برجاء إتباع التعليمات القادمة وتوخى الحذر للسلامة:


* خد الإسبوع اللى فبل الإنتخابات هدنة مع النفس ولا حتى تفكر تبص فى أى برنامج إنتخابى أو تسمع أى حوار..ريلااااكس كدة وإديها صلوات إستخارة..
* ليلة ما نويت تنتخب، أهم حاجة، تنام بدرى.. إتبع المثل اللى بيقول: نام مبكرا وإستيقظ مبكرا تعيش سعيداً.. أه وما تنساش.. بلاش أفلام مرعبة ليلة الإنتخابات.. مش كويسة ع الصحة خصوصاً وإنك إحتمال تعيشها واقع تانى يوم!
* بمناسبة النوم برضو.. نصيحة أخوية عليك بكباية لبن فاتر وإبتعد عن المنبهات –مش ناقصين تسهر وتتلخبط فى الإجابات-
* إغسل رجليك بالماء والصابون .. دا مهم جدا عشان الكوابيس.
* أول ما تصحى، صلى ركعتين شكر لله لأنك من المواطنين الأحرار فى هذا البلد، وربنا أنعم عليك وأكرمك وأمد فى عمرك لحد ما شفت اللى عمر ما أجداد أجدادك شافه.. وإللى ممكن ميتكررش قبل 1234 سنة.. -ياه.. يدينا ويديك طولة العمر-.
* إياك أسمع إن حد راجع الصبح مع زميله.. ولا مسك أى ممنوعات من الملخصات والكتب الخارجية وخلافه من مراجعة ليلة الإنتخابات وبتاع.. ياولادى كدة ح يتشتت تركزكم ومش بعيد تشيلوا الإنتخابات!
* كل ما تمسك القلم وتبدأ تعلم ع الخانة الصحيحة.. إستعيذ بالله كدة ومافيناش من غش.. تذكر: من غشنا فليس منا.. دا غير إنهم ممكن يحرموك من الإنتخاب لفترتين ورا بعض –يعنى وخدنها وخدنها وتلات فترات مش واحدة-
* أه.. متنساش الدعاء بإن ربنا يفتحها فى وشك.. والدعاء للأهل والأقارب والأقربون بالمعروف.. ويسدها فى وش كل عدوا وكل اللى ما يصلى على النبى.. ومافيش مشكلة لو إستعنت بخبرة الحاج إبليس بالرقوة بتاعته. أعتقد ح تنفع وقت الزنقة.
* لو رايح ماشى، يبقى إمشى جانب الحيط.. ولو رايح راكب، يبقى بلاش مواصلات عامة وسوق على مهلك ع الآخر لحسن تاخد مخالفة مرور ويبقى إصتباحتنا فل بإذن الله. وإعمل حسابك على بطاقة إنتخابية إحتياطى فى كبوت العربية.. الواحد مايعرفش الزمن مخبى إيه –وبطاقة فى الكبوت تنفع فى اليوم المنحوس-
* خلاص ياحلو.. وقعت فى الخيّة ، وصلت موقع الجريمة وبقى لا مفر.. بص، إدخل برجليك اليمين وماتنساش بنفس عميق: يالهــــــــــــــــوووى!


سلاماتى

هناك 19 تعليقًا:

Mr-Biboooo يقول...

هاهاهاهاهاهاها

يا بنت اللذينا ... سورى و الله مت من الضحك انت ايه كام موود فى اليوم حبة رومانسى وحبه ضحك للركب

بس الحقيق ده سيناريو مظبوط و صح جدا

امشكلة لو قفشونى جوه اللجنة بمنافستو و لا برشام هيدبسولى الصندوق فى ورقة الترشيح ... يا دى النيلة

عموما الامتحان متسرب و النتيجة فى الكنترول و لا انت مدريتيش

Ahmed Shokeir يقول...

هاها
طب والواحد يعمل إيه بأه لما بعد كل ده يروح اللجنه ومايلاقيش إسمه ؟
.
.
إيه مش سامع صوت ليه ؟

Ghada يقول...

لأ ماتخافش يا أحمد .. هتلاقي اسمك .. ومش بعيد تلاقي الورقة متجاوبالك جاهزة!.. ابسط يا عم!

لست أدري ..
يابنتي إيه روحك الحلوة دي .. ضحكتيني وأنا ماليش نفس أضحك بجد! .. على فكرة أنا مقاطعة السياسة زي حالاتك شرحه .. بس أعمل إيه .. هي اللي بتطاردني.. معندكيش برشام ضغط يا بنتي؟

Lasto-adri *Blue* يقول...

mr.biboo:
والله هى بتيجى كدة.. معنديش محطة معينة أظبط عليها الموود عندى
لاء دريت بموضوع تسريب الإمتحانات دة.. بس عرفت إن الحكم إتأجل؟!

Ahmed shokier:
آدى غادة جوبتك
:)

Ghada:
أولا نورتى البلوج.. خطوة عزيزة
لو كان عندى برشام ولا حقن حتى.. أكيد كنت قلتلك..
بالحاجات دى شحة من السوق اليومين دول
كله مأجل لما بعد الإنتخابات

santakarim يقول...

أنا بصراحة مش فاهم أيه الجديد، ملكو يا جماعة ؟ ما المسلسل شغال من 24 سنة
ده حتى المرة دى الحلقة أظرف، محبوكة شوية، أنتخابات ومرشحين وبرامج .. كأنها بلد وكأننا بنى أدمين

هانت، المولد قرب ينفض ويعود القطيع كما كان

0xDEADBEEF يقول...

حطيت ايدك على الجرح يا عم كريم!!

Moia يقول...

انا هنا يا لست
http://7agata7la.blogspot.com/
بدل حاجه فى نفسى مستنياكىىى

Tara يقول...

هاهاها
رهيبة
بس خفوا شوية على رئيسكم ياجماعة
على الاقل ما عمل لكم حروب من غير سبب مثل صاحبنا

Lasto-adri *Blue* يقول...

tara:
ح أخف إيه أكتر من كدة
;)

free soul يقول...

بخبرة الحاج إبليس

helwa el haag dee :)

Ana khalas da3'ty 3ely walahi bas mesh ader atoob 3an erayet we motab3et el akhbaar

by the way, there is a man called ahmed habib, he puts boards with the bob pic all over the country, WHO IS THIS MAN ????

yekonshi "ahmed habib el rayes" :(

Zeinobia يقول...

I am afraid this 10 commands won't work with me
as I don't have a voting id card
and if I want to get one I have to show them my face in next novemeber
after the elections as I was told!!!!!!

sheryos يقول...

هأأأأأو... أول مرة اشوف امتحان الكل عارف مين حينجح فيه, و برضه مستنيين النتيجة !!

Ahmad يقول...

I had a lot of fun reading your post. I find that Egyptians have a great sense of humour. Apparently you as well.

best regards,
Ahmad

Bent Masreya يقول...

انتى تحفة
اقولك ايه.. انتى تحفة

Lasto-adri *Blue* يقول...

free soul:
بص أنا معرفش من عيلة حبيب غير تلاتة
حبيب العادلى..
وفى خالد وبسمة حبيب إخوات ومذيعين فى الإذاعة المصرية
غير كدة بقى فإنت الأدرى
:)

Zeinobia:
أولا أهلا بيكى فى البلوج بتاعى المتواضع.. بس على فكرة أنا كمان معنديش بطاقة إنتخابية ولا ناوية الصراحة أتعب نفسى
هاهاهاها


Ahmed:
1st of all welcome to my blog..
2nd.. thank you for ur nice compliment :)
highly appreciated


Bent masrya:
بس أنهى متحف دة اللى رضى بيا؟

Mr.DXer يقول...

what can I do....can't stop myself from talking about Radio station ;)

بدأ البث التجريبي لراديو الإنقذ
Al-Inkaz Radio
صوت الحرية والتغيير
Hotbird
درجة شرقا
Frequency: 10971
Symbol Rate: 27500
Polarity: H
FEC: 3/4
أرسلوا لنا بآرائكم واقتراحاتكم حول الإذاعة
على البريد التالي:
radio@saveegyptfront.org

all the best guys

Mr.DXer

Lasto-adri *Blue* يقول...

إحم إحم.. مع إنت الإعلان على لستُ أدرى مدفوع الأجر يا أستاذ "دى إكس"
بس عشان إنت من الحبايب بس ح أعديها المرة دى...
;)

johny bravo يقول...

i like ur sense of humour mingled with bitter reality.You're notto be blamed cause we can do any thing but to laugh at the rude reality of election here,as the result of the game is already known before even it starts,,nonsense.

el-nos يقول...

أنا حاخد بوصيتك/وصاياكى العشر لكن أنت المسؤله قدامى وقدام إخونا المدونين عن اللى حاصل بعد أحداث 7 سبتمبر