الوصايا العشر بتاعتى

رغم إنى نويت أطلق السياسة بالتلاتة، لكن يظهر إنها مش عايزة تسبنى فى حالى. تخيلوا أول يوم فى حياتى أركب أوتوبيس ويقف يمون من بنزينة –زيه زى باقى العربيات- كان النهاردة.. والأغرب إنه ما وقف إلا قدام مقر الحزب إياه. والصراحة كان فاصل كوميدى من النوع الجامد قوى. بدأ بــ"ما تقليش وما تعدليش.. هو ××× غيره مفيش".. –إحساس بإنى فى الصف الأول لماتش كورة- وإنتهى الفاصل بــ "نبايع ××× مدى الحياة".
وهنا قلبت على الكوميديا السوداء! لأنى ببساطة شفت يوفط تانية لناس آخرين ومع كل إحترامى –قصاد عينى- واحد جه وقطعهم!!!

طول الطريق بقى وأنا بفكر فى الوصايا العشر اللى ممكن أقولكم عليها قبل ياعينى ما حد يقرر يروح ينتخب.. وبعد ما الراس تقع على الفاس، نطلع ننعى: "حسرة عليه يا حسرة عليه"..
لذلك عزيزى الناخب و عزيزتى الناخبة برجاء إتباع التعليمات القادمة وتوخى الحذر للسلامة:


* خد الإسبوع اللى فبل الإنتخابات هدنة مع النفس ولا حتى تفكر تبص فى أى برنامج إنتخابى أو تسمع أى حوار..ريلااااكس كدة وإديها صلوات إستخارة..
* ليلة ما نويت تنتخب، أهم حاجة، تنام بدرى.. إتبع المثل اللى بيقول: نام مبكرا وإستيقظ مبكرا تعيش سعيداً.. أه وما تنساش.. بلاش أفلام مرعبة ليلة الإنتخابات.. مش كويسة ع الصحة خصوصاً وإنك إحتمال تعيشها واقع تانى يوم!
* بمناسبة النوم برضو.. نصيحة أخوية عليك بكباية لبن فاتر وإبتعد عن المنبهات –مش ناقصين تسهر وتتلخبط فى الإجابات-
* إغسل رجليك بالماء والصابون .. دا مهم جدا عشان الكوابيس.
* أول ما تصحى، صلى ركعتين شكر لله لأنك من المواطنين الأحرار فى هذا البلد، وربنا أنعم عليك وأكرمك وأمد فى عمرك لحد ما شفت اللى عمر ما أجداد أجدادك شافه.. وإللى ممكن ميتكررش قبل 1234 سنة.. -ياه.. يدينا ويديك طولة العمر-.
* إياك أسمع إن حد راجع الصبح مع زميله.. ولا مسك أى ممنوعات من الملخصات والكتب الخارجية وخلافه من مراجعة ليلة الإنتخابات وبتاع.. ياولادى كدة ح يتشتت تركزكم ومش بعيد تشيلوا الإنتخابات!
* كل ما تمسك القلم وتبدأ تعلم ع الخانة الصحيحة.. إستعيذ بالله كدة ومافيناش من غش.. تذكر: من غشنا فليس منا.. دا غير إنهم ممكن يحرموك من الإنتخاب لفترتين ورا بعض –يعنى وخدنها وخدنها وتلات فترات مش واحدة-
* أه.. متنساش الدعاء بإن ربنا يفتحها فى وشك.. والدعاء للأهل والأقارب والأقربون بالمعروف.. ويسدها فى وش كل عدوا وكل اللى ما يصلى على النبى.. ومافيش مشكلة لو إستعنت بخبرة الحاج إبليس بالرقوة بتاعته. أعتقد ح تنفع وقت الزنقة.
* لو رايح ماشى، يبقى إمشى جانب الحيط.. ولو رايح راكب، يبقى بلاش مواصلات عامة وسوق على مهلك ع الآخر لحسن تاخد مخالفة مرور ويبقى إصتباحتنا فل بإذن الله. وإعمل حسابك على بطاقة إنتخابية إحتياطى فى كبوت العربية.. الواحد مايعرفش الزمن مخبى إيه –وبطاقة فى الكبوت تنفع فى اليوم المنحوس-
* خلاص ياحلو.. وقعت فى الخيّة ، وصلت موقع الجريمة وبقى لا مفر.. بص، إدخل برجليك اليمين وماتنساش بنفس عميق: يالهــــــــــــــــوووى!


سلاماتى