.jpg)
طول عمرى وأنا بؤمن بالمثل اللى يقول: ولكل جواد كبوة.. لإنى شايفة إنه مستحيل تقدر تقاوم تمشى على خط مستقيم طول حياتك. لازم ح يجى وقت وتنحرف عن الطريق لكن ف الآخر ح ترجع تانى. ولو حصل وقاومت طول عمرك، ح تيجى قبل آخر العمر بشوية و ح تنحرف برضو. وكإنه شئ أشبه بنواميس الكون. وإلا إيه يكون معنى الدنيا لو كلنا مشينا قدامنا من غير ما نقع مرة ونتزحلق مرة تانية.
و وقوع عن وقوع يفرق. فى وقوع يوصل معاك لكسر وأسبوعين ف الجبس. وفى وقوع ينتهى بقضية حجر من أولادك. وفى وقوع لذيذ بقى، لو طبيت يا حلو ومحدش سمى عليك. ساعتها قول على نفسك السلام وإشرب.
ولكن الكبوة اللى أقصدها مش بس مقتصرة علينا فى الحياة العادية بالعكس تلاقيها بوضوح فى الحياة العملية. عمركش سمعت عن الدكتور اللى قتل مريض؟ ولا المهندس اللى وقع عمارة؟ ولو قربت من الحياة السياسية... يووووه.. متعدش.. *لكنه يحظر الإقتراب أو التصوير من تلك المنطقة لتكون المرة دى كبوتى أنا*
والشئ اللى ينرفزنى بقى لما الواحد يقع بإرادته، لاء وكمان يسيب الناس تضحك عليه. يعنى مثلاً لما عجوز خرفان يحب واحدة قد أحفاده. أو حاكم عاملي شرم برم وشعبه بيشحت مش لاقى ورق الشجر. أو ست بتموت وتلبس سوارية آل عملة سبور حضرتها. ساعتها يبقى نفسى أروح وأشخط فى الناس دى نفر نفر *على رأى الست شادية فى رية وسكينة*.
والحقيقة أنا بكتب المقدمة العريضة دى لأنى وأنا بقلب فى المحطات الفضائية شفت بالصدفة "فيديو كليب".. دققت النظر حبة ولما مصدقتش نفسى ندهت على والدتى تتأكد معايا. وتصوروا طلعت الشحرورة سابقاً أو الزعرورة حالياً.. قال إيه عاملة "فيديو كليب".. !!
منكرش إن لو جينا للفن والفنانين ياما كان عندهم تفانين غريبة على أواخر أيامهم. مثلا آخر أغانى أم كلثوم واللى مش طيقاهم لحد دلوقتى.. ولا إيه رأيكم فى فيلم "أبى فوق الشجرة"..؟! وغيرهم أمثلة عجب.
لكن كله كوم واللى شفته دة كوم تانى.. لا عرفت أفهم كلمة من اللى إتقال أقصد إتغنى.. ولا عرفت الكليب دة بيحكى عن إيه أصلا.. ولا حتى –ركزوا معايا فى "حتى" دى- ولا حتى شفت مغنية أساساً.. أنا حسيت إنه سبحان الله الدش بدأ إرسال من الأنتيك خانة..!
وعجبى عليك يازمن
ماليش شينان لشلاماتى..
هناك 14 تعليقًا:
انها صحوة الموت يالست أدرى
تفتكر؟
the woman said in a tv show that she is expecting a happy event soon :D
do you think she is pregnant??
ok, I hate the one that don't realize it is enough, I hope I will know that in time or even before time because feeling needed is good, but feeling refused when you go on while no one is willing to listen, it is worse than death I think
I hope before people hate to read what I write, I will understand and keep writing for my self only :)
ااااااااااااه مش ده اللى بتبقى راكبه فيه مرجيحه او قاعده على كنبه باين ولابسه فستان احمر حاجه كده
والله انا لو مكانها كنت عملت اكتر من كده.. مالناس بتسقف وتقول كمان هو حد بيقول لا على حاجه فى الزمن ده
والله أنا عادة في موقف زي ده كنت هأكون ناقد لاذع جداً
بالذات إني مش بأحب الشحرورة من أساسه
لكن لسبب ما حسيت بالتعاطف
وصعبت عليَّ اللي كانت في يوم نجمة
وحسيت قد إيه الواحد ممكن يعمل علشان يقاوم الإحساس بالوحدة وبقرب النهاية
حسيت إن كل الاختيارات الغلط في حياتها كانت نابعة من الرغبة في الإحساس إنها لسه جميلة وإنه لسه فيه ناس بتحبها
يارب أموت قبل ما أضطر أهين نفسي علشان أشحت الحب من الناس
وساعات ساعات...أحب نفسي، وأعشق الحاجات
انتوا بتتكلموا عن مين
دي ماتت بقالها قد إيه
اصل ما فيش حد حيقدر يقنعني إنها لسة عايشة
كل ما باشوفها بافتكر أوبريت الليلة الكبيرة
الغريب إنها مش مكسوفة من نفسها
Free soul:
she could b going married! ;)
AZ:
aywa this clib.. bas sa3et-ha.. wala a3rafk ;) :PPPP
ghandy:
عندك حق أكيد فى اللى بتقوله..
وآمين يارب ما نهين نفسنا بالشك دة
Alaa:
ما تخدش فى بالك
Saydalany:
لاء هى لسا عايشة وتتمتع بصحة جيدة والحمد لله
زمن الدنيا فيه
ماشيه اتجاه معاكس دايما
الشحرورة بتغنى
تعاطفك لوحده مش كفاية
التعليق بتاع تعاطفك وحده مش كفاية ده أقوى سطرين ما بعد حداثة شفتهم على المدونات
لووول صحيح
بس برضه انتم بتتكلموا عن مين؟
alaa i mean "saba7" el sha7rora ..
:)
يا جماعة هو إحنا ليه مش قادرين نقبل طريقة حد تانى مختلف مع اللى إحنا متعودين عليه ؟ ليه مانحترمش حبها للحياة و إختيارها للطريقة اللى عايزة تعيش بيها حتى لو مش عجبانا ؟ ليه عايزين الناس يعيشوا زى ما احنا عايزين مش زى ما هما عايزين ،مع إننا كل يوم بنتكلم عن القهر اللى بنتعرضله و إحنا أول ما تجيلنا الفرصة إننا نقهر الأخرين بنشبعهم قهر
إرسال تعليق