تجليات

ولما أشوفك يروح منى الكلام وأنساه
من فرحة القلب ساعة ما يلاقيك وياه

لستُ أدرى ليه السطرين دول نطوا فى دماغى بعد ما المذيعة البديعة "منى الشاذلى" أنهت حوارها الممتع مع الكاتب "جمال الغيطانى" بمناسبة حصول كتابه "تجليات" على جائزة رفيعة الشأن *إعذرونى حاولت أدور عليها على الإنترنت وللأسف فشلت*

دلوقتى وبعد مرور ساعتين على أول تقديم بشكل شخصى *ع الأقل بالنسبة ليا* لجمال الغيطانى المفكر والإنسان.. بعيش حالة من معمعة فكرية شديدة البأس.. مش عارفة أفكر.. مش عارفة أتكلم.. ومش عارفة أعبر عن ما يداخلى من شعور بالإمتنان والحيرة. الإمتنان لأنى بلتقى بالأشخاص اللى فعلا بيثروا الحياة الأدبية والثقافية المصرية بعمق.. وأصبح البرنامج الرائع "العاشرة مساء" على قناة "دريم" هو الشباك اللى بيطلوا علينا منه.. ممتنة لأنى أخيرا بكتشف بعض الوجوه اللى حُجبَت عنى لسبب أو لآخر.. سواء جهل منى لإبتعادى عن الحياة الثقافية الحديثة أو حتى للحَجب المتعمد.

ولما إتكلم عن علاقة الإنسان بالزمن.. فرحت.
"الآن"..
دلوقتى وإنت بتقرأ الكلمات دى.. "الآن" بقت ماضى.. وإحنا ماضى فى يوم من الأيام.. وياترى من ح يخلد الذكرى.
قبلنا ناس عبروا من نفس البوابة,, وقبلنا ناس شربوا من نفس النيل..
قبلنا ناس دفنوا فى سيناء وفى معاركنا اليومية.. مين منهم راح نفتكره..
ولحظات الزمن المتسللة.. إيه يربطها بالحاضر إلا الأدب والفن على إختلاف أنواعه..

آه.. لما إتكلم عن علاقة الإنسان بالزمن فرحت لأن أخيراً حد إتكلم عن مشكلة جوايا من زمان ومعنديش إجابة عنها.. "أنا ببحث رغم علمى إنى مش ح وصل للحقيقة.. لكن أبحث لعلى أفهم.."

وبعد إمتنانى شعرت بالحيرة.. ليه كل جميل نتركه عُرضى لغبار الزمن وبعدين نجرى للغريب ينفض غبارنا عننا!؟
آثارنا.. تاريخنا.. تراثنا.. وحتى هويتنا..
بعد الأركان الثقافية إللى فى طريقها للإندثار، مين ح يحل مكانهم؟
وفين مكننا دلوقتى من غيرنا؟!
هو إحنا أمة مستضعفة؟!
إحنا فعلا عجزنا عن إننا نثبت للوجود وجودنا؟
فى التاريخ.. أحفاد أحفدنا راح يفتكرونا بإيه لو مرينا على خاطرهم مرة... وإن إتكلموا عنا مع أولدهم.. تفتكروا ممكن يحكوا عننا إيه؟!

"أنا ميهمنيش الإصلاح فى الحياة السياسية بقدر ما يهمنى أقضى ع الفساد والبطالة.. وأول خطوة: المُساءلة... من أين لك هذا؟"
"لما بكلم عربى.. أنا بواصل معاه الحوار مش ببدؤه من الأول"
"العروبة باظت من ساعة ما المال أصبح مع الجغرافيا مش التاريخ.."

ودمتم لى على كل خير
سلاماتى


-----------
أولا بعتذر عن غلطاتى الإملائية.. والله بحاول أرجع العربى بتاعى من الأول.. بس محتاجة إرادة.. وإيد تساعدنى.
أما السطرين اللى فى أول البوست فمن أغنية "هلت ليالى القمر" كلمات "أحمد رامى" وغناء أم كلثوم.. والأغلب تلحين "القصبجى"