الخميس، أغسطس 25، 2005

كلام فى الحب والصبر


وللحب عند العرب منازل ومراتب متعددة، وأول مراتبه الهوى وهو الميل إلى المحبوب، ويليه الشوق وهو نزوع المحب إلى لقائه، ثم الحنين وهو شوق ممزوج برقة، ويليه الحب وهو أول الألفة، ثم الشغف وهو التمنى الدائم لرؤية المحبوب، ويليه الغرام وهو التعلق بالمحبوب تعلقا لا يستطيع المحب الخلاص منه، ثم العشق وهو إفراط فى الحب ويغلب أن يلتقى فيه المحب والمحبوب، ثم التتيم وهو استعباد المحبوب للمحب، ويليه الهيام وهو شدة الحب حتى يكاد يسلب المحب عقله، ثم الجنون وهو استيلاب الحب لعقل المحب.

كنت بفكر أنزل أتمشى شوية وكسلت كالعادة. قعدت ع الكومبيوتر أشوف أحوال الناس.. وطلع لى واحد يقنعنى لازم أنزل أتمشى شوية. بينى وبنكم الفكرة بدئت تلف فى دماغى، خصوصاً وإنى كنت عايزة أجيب الديوان اللى نزل فى مكتبة الأسرة لـــ"حسن إسماعيل". وقلت فى عقلى يالا يابنت قومى إلبسى وإنزلى.
وفعلاً نزلت أتمشى فى الهواء الطلق وكما هو سابق التحديد، أنزل وأدخل من البوابة الخلفية للنادى، وأتمشى فى شارع طويل –سموه شارع الحب عندنا- ، ثم أعطف للشمال قليلاً وألاقى المكتبة فى وشى على طول. وكالمخطط برضو أمد إيدى لآخر رف ع الشمال، أقعد أدور نص ساعة كدة وأطلعلى بكام حاجة.. أخرج لصاحب المكتبة وأدفع الفلوس وهو يدينى الكتب فى شنطة وعلى وشه منطبعة نفس الإبتسامة الساحرة.

وتستفيض الأخبار بذلك عن بنى عذرة وغيرهم من الأعراب فى هذا العصر الإسلامى عصر مجنون ليلى وجميل بثينة وقيس بن ذريح،
سئل رجل فى عذرة: ممن أنت؟
قال: من قوم إذا عشقوا ماتوا.
وقال رجل لعروة بن حزام العذرى: ياهذا بالله أصحيح ما يقال عنكم: أنكم قوم أرق الناس قلوباً؟
قال: نعم والله لقد تركت ثلاثين شابا قد خامرهم الموت، مالهم داء إلا الحب.
وقيل لبثينة: هذا جميل يتعذب فى حبك فهل عندك شئ تنفسين به وجده؟
فقالت: ما عندى أكثر من البكاء إلى أن ألقاه فى الدار الآخرة أو أزوره وهو ميت تحت الثرى
.

خرجت من المكتبة وإكتشفت فى إيدى أربع كتب حتة واحدة.. "سيدة المنام" لــ"سحر الموجى"، "يوسف إدريس وعالمه" لــ"عبد الرحمن أبو عوف"، "شئون وشجون تاريخية" لــ"د. يونان لبيب رزق"، و "الحب العذرى عند العرب" لــ"د. شوقى ضيف"..
ومخبش عليكم الكتاب الأخير دة حاجة كدة من عالم تانى.. شدنى من أول صفحة. حكايات من زمن فات لمجنون ليلى وجميل وبثينة وكثير وعزة... ولايمكن يعود الزمان دة تانى. ومستحيل يعود تانى. حتى ولا فى الأغانى..
ولما تعبت قفلت الأباجورة وحاولت أنام، لكنى فقت على صوت فرامل عربية فى الشارع.

ويظهر أن القصاص لم يدركوا سبب هذا الغزل المحروم وأن مثالية الإسلام الخليقة هى التى دفعت إليه، فوضعوا من عند أنفسهم سببا ظنوا أنهم به يستطيعون أن يوجدوا العقدة النفسية التى أحدثت هذا الحرمان، وهو أنهم يروون أن العرب فى هذا العصر الإسلامى الذى ظهر فيه ذلك الغزل العذرى أبدا كانوا يكرهون أن يزوجوا فتياتهم من عشاقهم الذين ينظمون فيهم أشعارهم، فيفضحونهن ويفضحون عشائرهن، وهى فضيحة كبرى لم يكن بد من أن يعاقب عليها العاشق، فيحرم من معشوقته.


سلاماتى
-------
العنوان إستلفته من كتاب "كلام فى الحب والصبر" لــ"إبراهيم نافع"
والكلام اللى بالرمادى من كتاب "الحب العذرى عند العرب"

هناك 19 تعليقًا:

شريف يقول...

اللى نفسه افهمه, ليه على نهايات الصيف كده, تلاقى منسوب الاحساس بالحب, عااااااااالى اوى ؟

Ahmed Shokeir يقول...

إيه الرومانسيه دى كلها ... دي لو خليتى البلوج بتاعك كله كده .. هايكون أقوى بلوج رومانسى عجبتنى أوى

ما عندى أكثر من البكاء إلى أن ألقاه فى الدار الآخرة أو أزوره وهو ميت تحت الثرى

بس ياترى إيه أخبار الكتب ال3 التانيين

free soul يقول...

nice :)

sure at that time they didn't have unemployment problem to think of so they had all the chance to dedicate time for love :D

Pianist يقول...

انا مش شايف ان الموضوع رومانسي
انت مجرد بتتكلمي عن كتاب عن الرومانسية
علي فكرة الكتب القديمة دي اللي بتتكلم عن الرومانسية بتبقي حلوة اوي
حاولي تقري كتاب
طوق اليمامة لو انتي ماكنتيش قريتيه

Lasto-adri *Blue* يقول...

شريف:
إحم بتسألنى أنا ؟
روح إسأل السبب يقولك الجواب

ahmed shokier:
والله لسه ما جربتش باقى الكتب .. لو لقيتها حاجة تستاهل.. أكيد ح أتب عنها

Free soul:
لووووووول

Pianist:
سمعت عن الكتاب دة.. مش دا بتاع إبن حزم؟
بس لو لقيته أكيد ح أقولك رأيي فيه إن شاء الله

free soul يقول...

ya lasto ana mesh bahazar walai batkalem begad :(

In the materialistic life we life with all the stress the youth have it is rare to find a chance for real romance

bemonasbet ketab ebn hazm, law 3erefty tela2eeh, olely because i am interested to read it but don't know where to get it, it has been selling much 5 years ago in the book fair but at that year i didn't attend :(

Lasto-adri *Blue* يقول...

مش عارفة والله.. بس ممكن تشوف صور الأزبكية.. أو ممكن تشترك فى مكتبة مبارك.. هى مش جانبك؟
ممكن تلاقى فيها الكتب دى
على ما أعتقد

أحمد يقول...

مش ممكن كمية الكتب المتناقضة اللى انتى بتقرأيها مع بعض

تعرفي أنك تقريباً اول مواطن مصرى اقابله بيقرأ كتب لابراهيم نافع؟!؟؟

santakarim يقول...

لا كتب ولا مقالات !! ابراهيم نافع !!!! يا لهوى

انا اتفق مع freesoul
دول كانو ناس فاضية

اكيد البيه اللى كتب الكلام ده مكنش بيشتغل صبح وليل ولا بيدفع أقساط شقة فى الشيخ زايد ولا نزل دمياط يدور على أوضة سفرة و نيش ( مهم أوى النيش ده على فكرة)

وبعدين قال ايه شاف 30 واحد بيموتوا من الحب ، طب ما أنا أعرف 30 ألف واحد بيموتوا على شقة

anyway, nice post :-))

Lasto-adri *Blue* يقول...

Ebles:
وإيه فى الدنيا مش متناقض فى رأيك؟
بس العتب مش عاليا.. العتب على والدى اللى بيجيب المحظورات دى البيت.. وألاقى إيدى تتمد تطولها لوحدها وأبدأ أقرا!!!

Lasto-adri *Blue* يقول...

santakarim
واضح إنك عريس جديد
ربنا يعينك ع الشقة والنيش الدمياطى

أما حكاية إنهم ناس فاضية.. تعرف أنا دلوقتى *وأنا فى نص الكتاب* بموت من الضحك من الحكايات دى

غالبا دا ح يكون البوست الجاى!

santakarim يقول...

لا أبداٌ .. بعد الشر عليا ...ثم أنا برضه أجيب نيش

بس أدينا بنسمع الكلام اللى يغم النفس ده كل يوم ، قرفونا من الحب والجواز

شوفتى اهو الكتاب قلب كوميدى

Lasto-adri *Blue* يقول...

ربنا معاكم والله بدعلكم من كل قلبى..
الرجالة فعلا بيصعبوا عليا قوى ساعات كتير.. ومن ضمنها ساعة النيش ديه..

free soul يقول...

I have the most odd group of friends you may see :)

The first got married while he had nothing, no money at all :)

his father took the costs of marriage its self and he then rented a flat neer his work and in 6 months he got married, sobhan allah!!

The other one spend a whole year with his fiancee refusing that his family help him until they left each other :(

The third decided to marry someone from any other country not to hear that nonsense about "ana benty lazem teskon gamby " and that kind of stuff :)

The last one is me, I will keep my mouth shut until life reveal my plans :)

littilemo يقول...

والله ليكي قراءات دمها خفيف

بس طريقه الكتابه المره دى مبتكره خالص

والف حمد الله على سلامه الهارد

Lasto-adri *Blue* يقول...

lol at your friends..
ma3lish ya free soul.. this ear no body knows anything about

and i dearly wish you luck from all of my heart in your future life isA :)

Lasto-adri *Blue* يقول...

الله يسلمك يا مو..
هههه.. لما دى دمها خفيف أمال اللى لسا بعتاها بقى يكون دمها إيه تفتكر؟!

Bent Masreya يقول...

عايزين كتاب بن حزم طوق الحمامة

طيب من غير ما تدوروا وتلفوا وتروحوا هنا وهناك

هتلاقوه فى موقع الوراق
فى المكتبة التراثية قسم الأدب
انا كمان لسه قرياه من فترة بسيطة

بس محتاجين الأول تسجلوا فى الموقع قبل ما تقدروا تقروا الكتاب

The Prince Of The Dark يقول...

رائع جدا اكثر من رائع كمان لو هتكلم من هنا للصبح اخاف لموافقكيش حقك كتاباتك عن جد رائعه جدا والله يباركلك وان شاء الله تستمرى فبالتوفيق والى الامام