ليلى : استئناف

من الواضح ان عرض الفكرة بشكل صدامى عمل شبه فجوة بين "ليلى" والمجتمع التدوينى .. ولاجل ذلك أخذت ليلى فترة للتوقف و نقد الذات وقراءة الغير ثم تواصل بعدها الاستئناف.. [راجع "تانى مرة.. كلاكيت"]... انما الفكرة الاساسية اللى مسيطرة على تفكيرى فى هذه اللحظات، ان برضو ح نرجع لنفس عقلية (الحكم على الأشياء بمسمياتها)، والاستهزاء بالفكرة على حساب المضمون.. اللى دعى البعض الظن انه "تنظيم سري" يدعوا الى اضهاد الرجل وتحرير المرأة!!...

المهم.. بعد المقدمات ندخل فى الجد...

نفسى اسالك سؤال واحد بامانة.. مافيش ولا مرة فى حياتك سمعت بنت او سيدة قالت و بالحرف الواحد "كان نفسى اطلع ولد مش بنت"؟!
لو ماسمعتهاش يبقى قول لى عنوان كوكبك من فضلك و اقرب مطار.. ولو سمعتها يبقى اتفقنا على البداية –على الاقل-..
اذا.. فى خلل.. ايه اللى يخلى انثى –ايا كانت- انها ترفض جنسها، وتتمنى تكون رجل غير انها حاسة بشئ ناقص فى حياتها؟؟
"ليس الذكر كالانثى" لا جدال على ذالك، مش لانها آية قرآنية فقط، ولكنها حقيقة واقعة ومثبته فى كل مكان و أى وقت. التكوين البيلوجى و التكوين العاطفى و حتى الادراكى مختلف... انما نرجع فى الآخر و أقول "رغم اختلافه .. لازال واحد"... المرأة مساوية للرجل فى الحقوق و ان اختلفت الواجبات انما قدرهما واحد... مسؤوليتهما امام الله ودورهما فى المجتمع (وان اختلف)فهو واحد.. و حتى أمام نفسهما برضو واحد

فى رأيي الشخصى، لن اهتم بدعوة حق المرأة انها تخرج للديسكو ولا التأخير لحد الفجر وحدها.. بالعكس يمكن اكون على اشد الاقتناع ان فى ذلك حفاظ عليها وعلى قيمتها.. ولكن... دا عمره ما كان مبرر لفكر متعصب يقول "هو خروج البنت كتير بالساهل"!! باى منطق.. وايه المشكلة لما بنت تخرج وحدها فى طلب العلم ولا حتى لقاء زميلاتها ولا ولا ولا. (للعمل بس، احنا فى القرن الحادى و العشرين ولايزال طريقة التفكير تلك قائمة).. ؟!
تمام زى نظرة المجتمع للفتاه الغير متروجة تفرق كتير قوى عن الرجل الغير متزوج.. وزى نظرة نفس المجتمع للمرأة المطلقة و الرجل المطلق.. حتى لو كان السبب من الرجل اصلا!! فاهمين يوم ليلى بيتكلم عن ايه اصلا؟!
فى فقرة رائعة ا حب اقتبسها من مدونة زينوبيا:

"حرية المرأة فى مصر مش معناها التحرر من الانفلات الاخلاقى زى ما فى ناس فهم انا متحررة يبقى البس زى مانا عايزة و اصحب زى مانا عايزة و اخرج زى ما نا عايزة مانا حرة بقى تفكير غبى و عقيم و ضيق و بيعطى فرصة ذهبية للمتشددين من التيار الوهابى السلفى يهجم حقوق المراة . والحرية على طريقة ايناس الدغيدى و روبى مش هى الحل بالعكس الحرية دى بتسجن المرأة او تضعها فى القالب الجسد"

دى فكرة كلنا ليلى...

تعرف الصدام حصل امتى؟ لما تعالت الأصوات المنادية "بحرية المرأة" فى عصور جفاف فى الحقوق، وفى المقابل ادخلوا قوانين غربية على مجتمعنا الشرقى (مش ح قول اسلامى) ولكن الشرقى المحافظ... اصبحت المرأة فى مجتمعنا بين نارين.. الفكر المنغلق –بتاع زمان واللى لسا عايش مابينا على فكرة لحد دلوقتى- عادات و موروثات ليس لها اى اساس من الصحة لا فكريا ولا حتى دينيا .. وفى نفس الوقت مش قادرة تطول الحريات الجديدة اللى استباحتها الشعارات المطالبة بالتغير فى نمط الحياة اليومى..
والفكرة ان مش دايما الرجل هو الظالم، بالعكس، ح قتبس برضو من تدوينة آخر الحارة:

"ألاحظ أن أغلب من يقوم بنكء جراح الفتاة التي لم تتزوج بعد هن من نفس جنسها، كالمرأة المتزوجة التي تستعرض بأنها متزوجة – أو أنجبت – فتكون (في الأمان).. وتمارس ذلك مع الشابة التي لم تتزوج أو المطلقة أو الأرملة أو المرأة التي لم تنجب.. رغم أن كل هؤلاء لم يؤذونها في شيء."

المرأة اصبحت بتعمل و بتخرج الى المجتمع الاوسع، لكنها لا تزال فى نفس الشرنقة المتحجرة.. الفكر بنظرات حادة مراقبة لها فى كل همسة وحركة و انفعالة.. وتصل لحد الاجبار فى بعض الاحيان بادعاء انها الجانب الأضعف.. ولحد الاذلال فى أحيان أخرى فقط لانها امرأة..

دا يوم "كلنا ليلى" يا اصحاب العقول النيرة.. دعوة لتفكير "ليلى" بصوت عالى مع افراد المفترض فيهم العقلانية –نوعا ما- على الأقل لتقبل رأى الآخر ايا من يكون... حتى نصل لحل أو اتفاق فى قضايا المرأة المعلقة فى مجتمعنا الشرقى بداية بالمجتمع التدوينى الأصغى...

وللحديث بقية..