السبت، سبتمبر 30، 2006

.. بقى له زمن

لفترة من الزمان، ارتبط اسم "لست ادرى" بلاعب القانون..

يمكن حكيت القصة دى قبل كدة كتير.. ومش لسبب غير لانى بحب ذكرها.. بس كان شباكى لعالم "مارسيل" بالنسبة لى أغنية "أمى" على اذاعة صوت روسيا VOR. كنت بسمعها مرة واذا بى ألحق جملتين "أحن الى أمى.. وخبز أمى.. وقهوة امى"..
الكلام ذات نفسه رائع، ومليئ بالتفاصيل.. والصوت فيه شجن ورقة وهدوء ولمحات صدق..
لقتنى زى المجنونة بجرى عليها فى كل مكان واى مكان.. عايزة الاغنية دى..

كانت "امى" هى السبب انى اعرف مارسيل، ولو متأخر شوية.. وزيها كان "عازف القانون" السبب ورا ان بعض المتابعين للبلوج المتواضع يعرفوا مارسيل ويتابعوه.. ياما وصلنى ايميلات من افراد، مصريين او غير، طلبوا انى ابعت لهم المقطوعة الموسيقية.. وارشح أعمال أخرى .. وحصل..
اذكر منها "سلام عليكى".. "جواز سفر".. "تصبحون على وطن".. "يانسيم الريح" و"شجر البن" .. وأه، للذكر، الأخيرة وجدت لها الصورة دى بالصدفة.. ..



واللى فكرنى النهاردة انه وصلنى ايميل من كام يوم لواحد بيرجعنى لزمن "بقى له زمن" لما بعت لى يطلب مقطوعة "عازف القانون" وكانت السبب فى حبه الحالى لمارسيل...
ولجله، ولجل كل اللى أحبه زى "لست أدرى".. ح يفضل "عازف القانون" يعلب مقطوعته، طول ما فينا و فيكم نفس
يدينا طولة العمر..

سلاماتى

هناك 15 تعليقًا:

Ghada يقول...

لست حبيبتي.. أوعي تقولي لي إنك ماسمعتيسش "رِِتا" ..
ولا "شجر البن" بصوت كاميليا جبران..
عندي استعداد أعمل فيكي معروف وابعتهوملك.. :))
بس قوليلي :)

Abdelhalim يقول...

"Ya Nasim" link on Pianolla is not valid.

3rby يقول...

انتي مابترديش ليه علي سؤالي يا بلو اللي في موضوع رمضان ده؟

karakib يقول...

الراجل ده جامد فعلا ... للاسف قليلين اللي يعرفوه
انتوك

Dananeer يقول...

علمنى احب مارسيل
سمعنى جدل و وقعت فى هواها و وقعت فى هوا امى
و كنت باحب افتح البلوج بتاعك و انا باشتغل و اسمع عازف القانون
ياه يا بلو
كنت اتمنى نحضر الحفله
ان شاء الله لما يجى نتقابل انا و انتى بقى

Lasto-adri *Blue* يقول...

ghada
ياريت.ز اكسبى فيا ثواب
مش فاكرة تقريبا قرأت الموضوع بتاع كامليا جبران عند تجربة ولا فين بالظبط، ومن ساعتها مش لاقية اى شئ ليها عشان اجربها يعنى
:D

abdelhalim
لاء اتصلح دلوقتى... ممكن تجرب هنا او فى بيانولا
هو سؤال.. انت بتاع السدوكو؟؟

3rby
اصل ما عنديش فكرة عن موضوع عمارة يا عربى بجد
اما موضوع الاقاليم دة فا ماظنيش صح
الدفعة مش كبيرة قوى للدرجة الفظيعة دى.. عادى
همم، لما اشوف اخويا مرة ابقى اسألهولك
:D

karakib
همم.. اه حاجة كدة
معرفش، بس مش كتير بيحبوا الكلام اللى بالفصحى
ماما ذات نفسها مش بتحب اغنية "امى" بتقول عليها كئيبة

dananeer
اه يا بيبو انا اتجننت لما سمعت عن الحفلة.. بس تقولى لمين يا بنتى
حفلات مافيش بأوامر فرمانات القيادات العلية
بس احم بيبو... حاولت اسمع جدل بس ما قادرتش اكملها.. انتى تقصدى انهى حركة فيها؟؟

Captain L.J.Silver يقول...

3la fekra ya lasto ana 3agbetny awi elmaktoo3a beta3et 3azef el qanoon deeh geddan ,,,we fe3lan kont nawy ab3atlek as2alek law te3rafy ay links le 7agat tanya leeeh 3shan a3mellaha download...ya rait law la2ety 7agat kaman eb3ateeha ok ???

Salam

انى راحلة يقول...

لست أدرى..انتى ذوقك رائع بجد..و بتسمعى بمزاج عالى أوى..أغانى مش مألوفة للقاعدة العريضة من الناس..مش غريبة أبدا انك أديبة و فنانة زى مابيبان من كتاباتك..لاعب القانون رائعة..أول مرة أسمعها فى مدونتك..مستنين ترشيحات أخرى لأغانى مميزه

Gid-Do - جدو يقول...

عزيزتى بلو
اشكرك جدا انك سمعتينى وعرفتنى على فنان رائع زى مارسيل فانا لم اعرف عنة شئ الا من كتابتك عنه وطبعا مش لان مارسيل غير معروف ولكن انا اللى مش عارف ـ تحياتى واشكرك مرات ومرات

Lasto-adri *Blue* يقول...

captin
ok, 7ab3atlak 7abt links ;)
bas afdalak shewaya


انى راحلة
متشكرة يا بنتى
:)
وعينى طول ما الواحد فيه ودان تسمع،، ح تلاقينى بحط اغانى تانية


giddo
انا اللى شاكرة ليك انه عجبك
تعرف انى كان نفسى يكون لى جد.... هممم
لو كان عندى... اظنه كان ح يبقى زيك تمام.. وكنا ح نقعد نتبادل الاغانى مع بعض
كان ح يبقى احساس تانى... ربنا ما يحرم منه حد
:)

Abdelhalim يقول...

you call me now "Beta3 el Sudoku" :-)

All of that for just a mail :D ?
You didn't tell me eeh a7'bar el solver.

Dananeer يقول...

الحركه التالته يا بلو
صحيح رجعتى السايد بار يتاع الاغانى ازاى
انا بايظ عندى؟؟

غير معرف يقول...

شكرا يا ايمان انك حسيستينى انى فى بنات قدى بيحبوا مارسيل وبيسمعوله..عشان ابتديت احس انى فى صحرا كل ما اكلم حد من اصحابى عنه

نفسى يجى فى حفلة تانى فى الساقية بس مايكنش ايام امتحانات زى المرة اللى فاتت

ولا يكون :dهى السنة دى وهنخلص من الامتحانات خلاص

دمتى بخير يا بلو-لو

walaaz

Noran يقول...

بجد بجد مارسيل خليفه رائع لدرجه يخلى الواحد فى كل لحظه يغنى ليه ده بيأخذ الواحد للأحساس فوق أى وصف
بجد أنا بحس أن المسمعش ميارسل أنه ماسمعش أغانى قبل كده !!

3ola يقول...

مارسيل خليفة من الناس الي يصح ان نطلق عليهم لقب موسيقار ,,

الحان جميلة تخاطب الروح ,, وكلمات رقيقة تدخل القلب والعقل ,,

منذ ايام استوقفني في الراديو صوت موسيقى جميلة ,, ظننت انها مقطوعة موسيقية سادة ,, وبعد لحظات بدأت نوتات اغنية مألوفة تدخل على الخط ,,

اه ,, سمعت هذا اللحن من قبل ,, ووجدتني اغني معه ,, تصبحون على وطن ..

تعرفي ,, حسيت اني اكتشفت الموسيقى من جديد ,, واليوم مع اول زيارة لمدونتك ومع اول كزا نوتة ,, حسيت باحساسي يوم ما اكتشفت الموسيقى ,,

واستغربت ان اذني عرفت لوحدها ان الموسيقى التي اسمعها هي لمارسيل خليفة,,

كل الشكر لكِ ولمحبي الموسيقى الجميلة