الاثنين، سبتمبر 04، 2006

من بين كتير حكايات


ياما فى زماننا قلوب .. رسماها اعمارنا
زى النجوم حواديت .. على ضل شباكنا

زمان لما كان بابا يرجع وفى ايده حلويات المولد كنت أتنطط، أغرق فى الملبن ابو عين الجمل والهريسة بجوز الهند الأبيض مرشوش ع الوش. عمر ما جالى عروسة المولد قبل كدة وأنا ماهتمتش. عمرى ما اشتقت لعروسة، بس كنت أتنطط لما أفَصّل فستانها بإبر وخيوط.. حاجات على قدى لكن بتفرحنى.. زى ليالى الصيف لما كنت أتنطط على سور جنينة بيتنا القديم وبابا بيسقى الزرع. ريحة الأرض بعد ما تتروى كان يملانى احساس بطيبة قلوبنا، فيها نفس ريحة الخير وقت فرحنا كلنا مع بعض..
نلف فى دواير.. ادينا متشبكة وندور.. ندور ساعات ورا ساعات..
"بريلا بريلا بريليلا.." ونضحك سوا.. ونتنطط م القلب..
ساعات اتوه مرات .. القى القمر هدى
يسقى النسيم شربات .. فى ليل طويل عدى

زمان كان صوت الراديو بيفرحنى .. كان قلبى متعود يعمل "تيكيلم" فى ميعاد البرنامج م الاسبوع للتانى. اقلل صوته اخليه همسات من عالم موازى، عارفة طريقها خطوة بخطوة وشبر بشبر، وأنا تلاقينى ملفوفة تحت مليون لحاف ولحاف. واما اسمع اسمى بيتنادى عليه عبر المسافات والموجات، أنفض عنى آثار (التكتكة) وأقف أتنطط لحد ما البيت يصحى فارجع ايد ورا وايد قدام، اطفى النور واكمل السهرة مبسوطة ويا دخان شيكولاتة ماما الدافية ..
"واحد.. اتنين.. تلاتة".. نلعب اولى على رجل واحدة.. ننط خطوة.. وخناقاتنا النهاردة زى بكرة.. راح نلعب قدام عمارة مين؟.. ونرجع ونلف وندور ونتخانق.. بس نضحك.. نضحك ونتنطط على رجل واحدة قدام عمارتنا..
لو وقفت الساعات .. صوتى اكيد اعلى

زمان كنت أنط مرة واحدة وأنزل بإيدى اقول “YES!” كل لما أعمل حاجة تبهرنى.. عادة قديمة من يوم ما شفت “Home alone”.. اشوفنى المارد الجبار و ح هزم افراد العصابة الاشرار بضفايرى الصغننة، مع انى مش بحب الضفاير الا من ايد ماما بمشطها الاصفر القديم. ريحت المسك فى ايديها لسا ماليا أنوفى تلون لى رسمات حياتى وقتها ولحد دلوقت. حتى أول يوم فى المدرسة –كل سنة- كنت بتنطط، راح ارجع تانى للشلة والفسح والاذاعة و ريحة الكراريس والكتب والجزمة السودا.. وضفاير ماما بالتوكة البيضا الضغننة..
"خلاويص.. لسا"... هو يغمض عينه واحنا نستخبة بين الشجر.. ولما يقفشنا نقف تماثيل.. كل مرة يقفشنى واقول له "مش بعرف أجرى.. مش بعرف".. يضحك عليا وأقع مكانه.. نعرف ليلتها ان الدور مابينتهيش.. زى ضحكنا لما كنا صغيرين.. ما يخلص وما يتنسيش..
لو زارنى فرحى ساعات .. حواديتى ما بتخلص

زمان كنت أتنطط ورا البلونات اول يوم العيد فى بيت عمى. نعمل مسابقة بينى وبين ولاد عمى ونفضل نجرى ورا بلونتى الزرقاء.. نخبطها لفوق ما تطول الأرض.. تشيلنا سحابة بيضا بعيدة، نتنطط ما نطول الأرض. مرة زمان ايدى اتكسرت أول يوم العيد وأنا بجرى على السلم، فضلت ربطاها توجعنى. يومها ما تنططت ورا البلونة بس مازعلت. كنت فى قلبى مبسوطة لدفا قلوب اهلى يواسونى وحبهم ينط من عيونهم لعيونى ينسونى الهم..
كل ليلة قبل مانام اقولها "احكيلى حدوتة".. تضحك عليا وتغني لى دى الغنوة.. اقول لها "ماما لاء، انا عايزة الأسد والفار".. تخلينى اقول "قطة" الأول بعدين تحكيلى عن الاسد والفار.. "كان فى واحدة ست.. عندها اتناشر بنت".. ونغنى سوا.. ونبات ليلتها ضحك..
وطول هواكى معاى .. ادفا واطمن

ممم.. زمان كان مجرد ان اى حد يفتكرنى بغنوة على الراديو ولا يمسح عنى دمعة ولا حتى يقول لى "فينك من زمان؟" كنت أبات إسبوع بابتسامة واحدة ما تفارق وش لسا بشوفه فى الصور القديمة، أيام ما كان الوقت أهدى، لكن عمرك ما تمل.. زمان شيفاه دلوقتى من بعيد مستخبى.. أنادى عليه.. شوية يرجع بس ببخل.. اضحك له ضحكة من غير صوت.. وابتسم له بسمة من غير ضو.. بتطلع كدة وحدها تتطلع لايام زمان لما كان التنطيط أسهل وللكل.

والحلم ويايا .. والذكرى جوايا
من بين كتير حكايات .. حكايتنا دى حكاية

سلاماتى
الأغنية "حواديت" لمنير ومجدى نجيب

هناك 20 تعليقًا:

Unknown يقول...

الله عليكى يا بنت انتى :)
بجد قلبى عمل تيكلم تيكلم
خليكى حلوه كده على طول :))

Mongey يقول...

حلو اوي الموضوع ده جميل اوي احساس عالي جدا بس مش عارف الناس بتاكل الملبن ده ازاي ؟

Omar Mostafa يقول...

أحلى بكرة لينا.. تحلى الذكرى فينا

Dina El Hawary (dido's) يقول...

:):)
ابدعت يا لست أدري .. في احساس كده
جميلة

Mamdouh Dorrah يقول...

علي فكرة انا كمان بحب الملبن ... رجعتيني بحكايتك دي لايام جميلة اوي

ملك يقول...

وجعتيلى قلبى يا شيخة

abderrahman يقول...

عجباني حكاياتك قوي ..
أنا مبسوط بالبوست ده واللي قبله
**
تحياتي

karakib يقول...

الماضي يعيش داخلنا دائما الماضي لا يموت ابدا
انتوك

admelmasry يقول...

يا بكرة يا مستخبي
ومخبي حالي خبي
قولي حاجة وخبي
عني باقي الحاجات

ody911 يقول...

ماما بتسلم عليكى وبتقولك واحدة واحده
مش ملاحق على مواضيعك يا لست
براحة لو سمحتى

AZ يقول...

ليه يامه كده... انتى بتعجزى نفسك ليه؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
كلى يابنتى ملبن وانبسطى... لسه عين الجمل مغروز فى الملبن والسكر مطحون ومرشرش عليه من فوق..... ان مكنتيش تنبسطى دلوقتى هتنبسطى امتى امال؟

Jannah يقول...

Sad and thoughtful. Beautiful.

3rby يقول...

انتي فكرتيني بجد بابويا...زي ابوكي بالظبط...بس انا ابويا مالي البلكونة زرع....مش مخلي حته جمب السور الا وفيها زرع...وكل شوية يسافرلنا ويسبلنا واحنا نسقي ونشتل لما اتخنقنا...كويس انكوا غيرتوا البيت والله ...انا كويس كنت عايش في دور كيفين وانا صغير....كنت شقي اوي........عالعموم انا بدأت ماصدقش انك في كلية...اول مره تيجيبي بلوزه لوحدك...وبرلة برلة واستغماية...ناقص تقولي مابتكليش غير لما حد يقولك هم يا جمل:)

غير معرف يقول...

يااااااااه
بقالي كتير ما عدتش بس بجد أنا فرحان لأن الكلام ده لمس حاجة جوايا مش عارف ليه الحاجات اللي الواحد كان بيموت فيها وهو عيل صغير ما بقتش خلاص تبهره, أنا عندي تفسيرات كتير بس كلها علمية جافة فأنا هاغض الطرف عنها و أفكر بعقل طفل و لو عرفت حاجة هاكتبها

salateenoo يقول...

بصراحة أجمل شيئ هو إسترجاع الذكريات... فالذكريات مرتبطة بصغر السن...وصغر السن مرتبط بالحرية والفرح والسعادة والإنطلاق...

غير معرف يقول...

e7na mesh 2olna 7a comment badry :'( ???
el mohemm :D ana mabsoota ennik fakra 7agat 7elwa le nas keteer ;)
ana sha7'seyyan ma2darsh akteb post zayy da :D el wa7ed me7tag a7asees keteeeeeeeeeer kwayyesa 3ashan yektebo, awwelha el tasamo7...
*sa2fa le bluelue 3al post el gamed :D *

NoOR يقول...

ايه الكلام الجميل ده......الاحساس عالي والاغنيه رائعه انا كنت حاسس اني سامعها شغاله وانا بقرا البوسط

يووووووووه.......رجعتيني للذي مضي
ايام ما كان الواحد لسه بيحس بالجمال وعينه ما بيتشوفش القبح اللي دلوقتي حاسس انه مغطي الدنيا

كل يوم من ده لو سمحتي

3rby يقول...

جري ايه يا بلو...مالك بقالك بتاع سنتين مابترديش علي التعليقات؟...انتي زعلتي من الهزار ول ايه؟

الحياد لغة يقول...

طريقي طول ولف بيا
نصيبي يمكن مكانش ليا
حلمك لسه بايديك
عافر ميموتش فيك
عافر عافر
*************
بجد كلامك ناعم وجميل وصادق وبيلمس شغاف قلبي
بس زي ما منير قال حواديت
قال برده
انا عارفك يا صغير السن عارف
ياريت تفضلي بالروح والبراءة دي وتفضلي على طول
صغير السن ابو قلب فراشة للنار بتحن

3rby يقول...

يا جدعان بلو راحت فيين؟...تقريبا عيانة