الجمعة، سبتمبر 15، 2006

..لسا فاكر كان زمان


بلادى بلادى بلاااادى ... لكى حبى وفؤادى

يااه.. لسا فاكرة ايام ماكنت بغنيها فى طابور المدرسة..
اصحى كل يوم على حوالى الساعة ستة ونص كدة، الاقى ماما عملت لى ولاخويا الفطار وشوب الشاى باللبن.. نغسل وشنا ونصلى الصبح. غالبا الجدول بيكون متحضر من قبلها بليل، والا كلكسات بابا –ايام عربيتنا الحمرة السوبر فيورا، يديلك طولة العمر- تصبح علينا بخناقة فى الشارع..

اول يوم فى المدرسة دايما كان يبقى يوم مقدس كدة، وله ترتيباته الخاصة.. اولا الجزمة الجديدة متلمعة والشنطة فيها أقلام وكام كشكول كدة برو عتب.. بحب قوى اشترى الادوات المكتبية.. للدرجة اللى اصبحت فيها شبه هواية، زى هواية تجميع الطوابع.. انا هوايتى تجميع الاقلام والاساتيك والكشايل ذات الاوراق الملونة..
بس بقى بعد مانلبس، نحط الشنطة على ضهرنا و نتصور فى البلكونة.. برضو بلكونة بيتنا القديم –يديلك طولة العمر-.. وحتى تلاحظ فى خلفية الصور الجنينة -اللى قدام البيت- كانت صحراء جرداء لما كنت فى ابتدائى.. وبالتدريج بدء اللون يميل للاخضرار.. شيئا فشيئا بقت اجمل جنينة عرفتها لحد النهاردة..
وبعدين نجرى على السلم انا و اخويا عشان ماما وبابا يوصلونا للمدرسة.. لازم ماما تركب معانا اول يوم وتوصلنا للباب و توصى عم "محمد" وعم "ابراهيم" علينا. عشان لو بابا اتأخر ولا حاجة فى المرواح.. وبرضو لازم نتصور وسط اصحابنا صباح أول يوم، بعدها نترص فى طابور الصباح... اهم حاجة كنت بستناها –فى الطابور- كانت "اذكار الصباح" ... وبعدها تحية العلم، والاذاعة.. أظن ماجبتش سيرة قبل كدة انى كنت المسؤولة عن الاذاعة الانجليزية لمدة سنة على الاقل؟!..
فى طريقنا اليومى دايما كانت "اذاعة القرآن الكريم" شغالة.. وغالبا بتكون قراءة الشيخ محمد رفعت.. وبرنامج تانى مش فاكرة اسمه قوى، بس كانت مقدمته بتقول "اللهم صلى على سيدنا محمد.. وعلى آل سيدنا محمد"..

لحد لما دخلت الجامعة..

أول يوم فى الجامعة بقى كان حكايته حكاية!! البنت المفعوصة دى كبرت كل دة ودخلت الجامعة!! انا فاكرة اول يوم جامعة بجد ماما دمعت، وانا كنت كإنى من عالم آخر.. مش فاهمة هو فيه ايه بيحصل بالظبط.. اول مرة انزل لسنة دراسية من غير مريلتى الرمادى وجزمتى السوداء وطرحتى البيضا!!...
انا فاكرة.. اكيد اكيد كنت لابسة شئ ازرق.. اصل هى عادة عندى، استفتح اى حاجة باللون الازرق... امتحانات بقى خروجات.. دراسة... وات افر ماى دير... واكيد برضو كنت لابسة جينز وكوتشى.. عادتى ومش ح شتريها... بس كان يوم زحمة بغباء، وانا داخلة من الباب الكبير، الرجل اللى على الباب سالنى على بطاقة الترشيح.. زى العبيطة كدة قعدت سنة ادور عليها فى شنطتى.. آه نسيت أقول.. كانت اول مرة اشيل شنطة ايد.. هههههه.. واظنها كانت الاخيرة لمدة سنتين –على ما اتذكر-.. هى عقدة وبدئت تتفك من قريب لما لقتنى على وش تخرج –عقبال عندكم-..

انما كله كوم والسنة دى كوم تانى.. كلها يوم بالتمام والكمال –ان شاء الله- واكون رايحة انام عشان اول يوم دراسى من أول وجديد. بس معناها انى ح ودع آخر أجازاتى الصيفية وستقبل آخر "اول يوم" فى الدراسة.. وايه بقى لاول مرة مش لوحدى!.... اخويا السنة دى داخل معايا "اعدادى هندسة" –عقبال الحبايب-.. يعنى انا بودع وهو لسا بيقول يا هادى –والله صعبان عليا-.. والمرة دى كمان مش ح نتصور فى شقتنا القديمة.. عزلنا... ومعتقدش بابا يهتم اصلا يودينا الكلية بالعربية الجديدة.. هو رمى طوبتنا من زمان.. وفاتكرش ماما ح تدمع.. اظنها أخدت مناعة من اول يوم كلية عدى عليا.. بس رغم كل دة، انا لسا متحمسة جدا...
أول مرة احس انى مش لوحدى فى الكلية... معايا اخويا.. يعيش اخويا يا يعيش.. –ربنا يحفظه لى يا رب-
مع انى معرفش ليه السنة دى بالذات -مع انى كنت بكره الفسح فى المدرسة وحصص الالعاب- بس مفتقدة ايام المدرسة قوى قوى.. الجزمة والشنطة الجديدة.. والقلم والمسطرة.. والمريلة.. و تحية العلم.. "بلادى بلادى.. لكى حبى وفؤادى...".. يااه مفتقدة لمة اصحابى.. ومفتقدة طرقات المدرسة والاذاعة الصباحية.. ومفتقدة قوى قوى صوت الشيخ محمد رفعت..

بقولكم ايه..... كدة ولا كدة.. يجعله عامر
وكل سنة وانتم طيبين

بى اس: البوست دة اهداء مخصوص للست دبدوبة هانم، المدعوة حبيبة ;)
ربنا يكرمك فيها يا كلام.. وتعيش معاها اجمل حظات زى اللى فوق

وسلاماتى

هناك 37 تعليقًا:

غير معرف يقول...

فكرتييينى بالذى مضى يخرب بيت عقلك .... بس على فكرة, لو إنت كنت المسئولة عن إذاعة الإنجليزى فوق عند البنات, انا كنت النجم المتوج عالرش تحت فى إذاعة الإنجليزى و الفرنساوى كمان :P

Lasto-adri *Blue* يقول...

epitaph
وماله.. زيادة الخير خيرين... اكتبى عن ايام المدرسة... لاممكن تتعوض ابدا
يااا رب الزلطة دة تطلع على خير ان شاء الله
متشكرة يا بنوتة


sherif
هههههههه.. مازعتش غير
and now
فاكر يوم الولكم
لول.. لو ان الاذاعة كانت بالنظام دة.. يبقى بقولك اهوه
بعيد بقى... آل وحش وبتاع
ماشفتش انت ابداعاتى هناك
:P

abderrahman يقول...

I always hate the first day of school.
:(

غير معرف يقول...

جميلة هي ذكريات الماضي الغنية بتفاصيل تمس أرواحنا و تثير فيها ذلك الشوق الأثير
أظن أن الذكريات المتعلقة بفترة مرت على غالبية من يقرأ الآن، كفترة المدرسة ، تملك تأثيرا أكبر في النفوس و تعيد كل منا ولو للحظات فيتذكر ما كان ، فترتسم على شفتيه ابتسامة أو تزور مقلتيه عبرات حنين

NoOR يقول...

فين ايام المدرسه يا ريت ترجع تاني انا بردو اخر سنه ليا في هندسه بس بعد معناه ست سنين بس ربنا يكرم ونخلص

طريقتك خلتني احس اني لسه رايح المدرسه بكره بس انا طول عمري مابحبش اول يوم دراسه حتي في الجامعه كنت بتعمد ماروحش غير تاني اسبوع

Lasto-adri *Blue* يقول...

abdu basha
really?! :|

blue
ياه
حقيقى

noor
انت كمان؟
كل الناس بكره اول يوم ليه بس
يلا يارب الاخيرة بجد بقى
وخلينا نشوف نفسنا بقى
:D

M. El-Hajj يقول...

ياااه تصدقي أنا عندي نفس هواية الأدوات المكتبية في الغالب وارثها عن أمي و مقلمتي كانت أكبر مقلمة في المدرسة و كانت محتوياتها بتقدر بمبلغ محترم بمقاييس الأيام دي

أيام و بنعيشها بقي
:D

Lasto-adri *Blue* يقول...

يا سلام
زيي بقى
بس اعتقد انا ورثاها من جدى لامى لانه كان رسام.. فا الادواب المكتبية كانت عنده بالهبل يعنى
ولسا عندى بعض ادواته لحد دلوقتى، كان تخصص شيراء من الدول اللى بيسافرها وبتاع

امسك انا بقى كل قلم واقعد اجرب سنونه وخطوطه وقدرته على رسم المنحنيات
لول

كانت ايام،،،، خصوصا ايم الرسم الهنسدى لما كنت باخده

ماعلينا، واضح انى عايزة ارغى، منور يا زنجى

غير معرف يقول...

Education Is Nothing But Shit !!

karakib يقول...

:) اول يوم مدرسه كنت باروح نايم و اول اسبوع باحاول اقنع نفسي اني استحاله هتكيف للوضع المقمع لحريتي لان اجلس دون اي كلمه لمده ثلاث حصص كامله قبل ان تجيء الفسحه الاولي التي ستنتهي بالحبس مره اخري !!!
و ابدأ في اختراع الالعاب الجديده التي ساهون بها علي نفسي هذا السجن المرييع
احيانا كنت اهرب من الفصل الي اماكن مختلفه في المدرسه .. اما دلوقتي فالكليه فمبقاش ينفع اهرب عامل زي اللي مربوط في رجل الدولاب :)
انتوك

Captain L.J.Silver يقول...

yaaaaaah ya Lasto..wallahy fakrteena be2ayyam gameela mesh hatet3awwad .....ana bardo nawy akteb post 3an mawdoo3 2oarayeb ...eb2y check it out b2a ...

P.S : ya3ny ana rady zemmetek b2a yenfa3 yeb2a fe 7ad fe handsa we ye3`lat nafs el 3`alta tany m3a a7`ooh el so3`ayyer ..wallahy 7aram 3leko !

Captain L.J.Silver يقول...

aaah by the way....ana men rab3a ebteda2y le 7ad talta thanawy kont ba2rah el quraan fe 2eza3et el madrsa ...we ta2reeban 3addet 3leya kol 7aga fe el eza3a ....zomol ya3ny ! : ))))))

Mongey يقول...

يااه انا كمان عندي اول يوم مدرسة بكرة بس عارفة كل الانسان ما بيمر عليه سنة اهتمامة باول يوم في المدرسة ده بيقل بيقل لغايت ما ينتهي يعني انا كنت ناسي ان بكرة اول يوم ... بصراحة هو بيبقي اجمل يوم في الدراسة كلها كل الناس مستحمية و فايقة كدا زمان لما كنا صغيريين انما دلوقتي اول يوم الواحد بيبقي مطبق و بيروح المدرسة مدروخ ويقعد يهييس هناك ... الخلاص مبقاش في مدرسة اصلا محدش بيروح ما دام بقي ثانوي المدرسة فقدت قيمتها بسبب الدروس اصلا يعني المفروض الدراسة تبداء بكرة و هي بدات من تلت اسابيع اصلا
كله افتكاس اصلا

غير معرف يقول...

You reminded me of the good old days, Blue. I will have to quote Salah Gahin....elli 2al:


معقول يا ولاد بنقول باي باي؟


و خلاص المدرسة فايتينها


شوفوا الأيام بتمر ازاي


مش لسه يادوبك داخلينها


يادوب عرفنا أسماء بعضينا


لحقت تعدي سنين علينا


و خلاص بنقول باي باي على طول


يا مدرستنا يا حبيبتنا


باي باي .. باي باي



باي باي يا أحلى أيام حياتنا


باي باي يا أغلى ذكرياتنا


فُتناكِ بخير يا وش الخير


يا مدرستنا يا حبيبتنا


باي باي .. باي باي



فُتناكِ بعافية يا شبابيك .. عقلنا كان يسرح برّاها


ودّينا من المجهول مزازيك .. تنادينا و ادينا طاوعناها


و انتَ يا دي الملعب .. و انتِ يا دي التوتة


كانت حدوتة .. و توتة توتة


و خلاص بنقول باي باي على طول


يا مدرستنا يا حبيبتنا


باي باي .. باي باي



رايحين و جايين سوا صحبة تلات سنوات


في المدرسة الطيبة ندرس ولاد و بنات


عرفنا نحسب شعاع الشمس بالخطوة


لكن أوان الوداع .. ما عملنالوش حسابات


خلّصنا بدري .. و قالولنا يلا


حنروح الجامعة .. يا رب انشالله


و خلاص بنقول باي باي على طول


يا مدرستنا يا حبيبتنا


باي باي .. باي باي



ياما غيرنا اتجمعوا قبلينا


و اتفرقوا تاني و نسيوا زمان


بس احنا خصوصي لوحدينا


لازم نفضل أهل و خلان


دي عِشرة حلوة .. حرام تضيع


مرت يا عيني .. سريع سريع


و خلاص بنقول باي باي على طول


يا مدرستنا يا حبيبتنا


باي باي .. باي باي

--Mo3taz

admelmasry يقول...

ههههههههه
ربنا معاكي ياجميل
ادعيلنا بقي

m_elsewedy يقول...

رائعة كالعادة يا لست ادرى
عايز اقولك انى حلمت ان انا رجعت خمسة ابتدائى تانى ههههههههههههه
اه والله وحلمت بأصحابى بالشكل بالظبط اللى كانوا عليه ايامها وكان اول يوم دراسة وقعدت لوحدى فى اخر ديسك جمب الحيط ومستنى حد من صحابى يجى يقعد جمبى
:D
جت قعدت جمبى واحدة ما كنتش بطيقها
مش عارف انا ايه الرخامة دى
انا شفتها من هنا وبعيد عنك صحيت مفزوع من هنا
:D
فكرتينا بالذى مضى

Unknown يقول...

awel yom y3dy 3lya mn 3'ey ra amdrsa wala kolia :( e7sas 3'reb awe ..malesh d3wa ana 3yza el gaw da tany :'( ana lesa so3'yaraaaa
shedy 7eleky ya banota el sana de wel mashoro3 w bta3 rabna m3aky ya raaaaaaaab :)))

3rby يقول...

انا قبل ماكتب تعليقي هاكتب طلب علشان تهتمي بيه...ياريت تنزلي اللينك بتاع التعليقات في اخر الموضوع علشان باتعب لما باطلع...اصلي عندي املاح في المطبخ:)
بايخة مش كده؟...اصل الواحد كل مابيقرب من الدراسة دمه بيتقل وبنبدأ موسم الالش.....والنهارده المدرسة بقه كمان والنبي ماتبقيش تكتبي فصحي وانجليزي في وسط العامية ...علشان باتعب علي مافهم انك كاتبه حاجة...بافتكر اني مش شايف





البوست ده جامد جدا...صحيح انتي في عين شمس؟....اصل اخويا في عين شمس اعدادي برضه.....انا رجعت من السفر انا والعائلة الخنيقة الدهر....واخويا كان محسسني انه اول يوم في كي جي(انا بس اللي اكتب بالانجليزي)كان ناقص يعيط اننا ماروحناش امبارح....وقال ايه عاوز يعرف الجدول:)....مش عارف انا ايه الناس الدحاحة ديه........انما انتي مالك بقالك كام بوست(من غير ليلي الله يرحمها)عايشة في ايام ابتدائي....انا عاوز اعرف اشمعني بتحبي اخوكي كده...دانا اختي بتكرهني.....باعذبها(علي رايها يعني)ايه الحب ده يا بنتي...يا ريتك كنتياختي والله بدل الحرب المشتعلة ديه(ماتخفيش مش باؤر...كنت باهزر لما قلت كده)عالعموم لو شوفتي زينب قوليلها احمد هاطج طجيج من التنفيض ده

3rby يقول...

صحيح فيه موضوع هاكتبه عاوزك تقريه

kalam يقول...

حبيبه بتقولك شكرا يا طانط
وربنا يخليكي وتنجحي السنه دي وتبقي باشمهندثه زي الثكر

ام العيال يقول...
أزال أحد مشرفي المدونة هذا التعليق.
ام العيال يقول...

انا لما قريت البوست كنت حعيط احلى ايام ايام الجامعه عيشي احلى اخر سنه دراسيه فهي لن تتكرر يارب كل يوم يكون احلى من التاني انا الجامعة كانت احلى سنين عمري عرفت ابو العيال في سنه اولى و اتجوزنا اول ما اتخرجنا سنة 2000 مش من زمان و الله العظيم شوية عيال في الكوشه و شلةالجامعة كانو بيتنططو حوالينا
loooooooool

Ahmed Shokeir يقول...

كل سنة وانتي طيبة

بكره هاتفتكري ايام الجامعة زي مابتفتكري ايام ابتدائي
وهتلاقيها احلي ايام

انا فاكر اني رحت الجمعة بتاعتي من سنتين اطلع صورة من شهادات التخرج
لقيت زمايلي والمعدين بقوارؤساء اقسام ولقيت مدرس الميكانيكا بتاع إعدادي بقا رئيس الجامعة والساعية بعد العمر ده كله لسه زي ماهيا الايام دي من سبعتاشر سنة

كل سنة وانتي طيبة

Aladdin يقول...

معك يا شقير! الجامعة بها ذكريات كثيرة ومتنوعة خاصة لو كنتي في جامعة بجد زي عين شمس!! أنا كنت في كلية فريدة في القاهرة عشان كده الواحد عاش ذكريات كتير مع زملاء بألوان الطيف الجغرافي والسياسي اللي موجودة في البلد دي!

آخر مرة زرت فيها الكلية لقيت أمناء وأمينات المكتبة و"الدادات" زي ما هما بس بان عليهم كبر السن (سمايلي حزينة).

...دنيتي يقول...

كل سنة وانتي طيبة ورمضان كريم:)

غير معرف يقول...

على فكرة الكلية ديه جاية علينا بخسارة. إنت بطلتي تدوين و إختفيتي من الروم. مش معقول أبدا. مافيش حد أرخم عليه يعني

Nouran يقول...

انتم السابقون ونحن اللاحقون
كلشوية اتوه جوه الكلية اعدادي وسذج بقى يالله ربنا معاكي السنة دي

Nesrina يقول...

فكرتينى بأيام المدرسة و استعدادات أول يوم، ربنا يوفقك فى الكلية و بجد دى أيام جميلة حاولى تستمتعى بيها :)

Lasto-adri *Blue* يقول...

ayman
i 2nd you in that

krakib
وانهى رابطة يابنى
ربنا يستر علينا بس

captin
من الواضح اننا زومل فى حاجات كتير على فكرة
وللعلم انا نصحت اخويا كتير وهو اللى اصر على رايه
براحته
اللى بيشيل قربة مخرومة
لول

mongey
ما انا مش من العصر الحجرى برضو
هههههه
كان فى دروس على ايامى، بس عادى المهم انك اللى تمتع نفسك، ما تستناش الامتاع من حد
مش كدة ولا ايه؟
;)


mo3taz
هممم، كلامك خلانى افكر اقول "باى باى" لحد تانى
:)
كل شء بيعدى ويفوت قوام،، المهم الذكرى تفضل عايشة جوانا

Lasto-adri *Blue* يقول...

adam
ربنا معايا
:P

swedy
ياااااه
كنت ح تكلم عن القعاد فى الديسكات على فكرة، بس قلت حرام البوست يطول عن كدة
دى بقى ك انت حكاية، واللى كل سنة قبل المدرسة باسبوعين ولا حاجة، اربط مع واحدة اقعد معاها بعد ما اتقرصت من بنى آدماية قعدت جامبى طلعت عليا كل القديم والجديد
هههه ولا كمان اول يوم لما كنا بنجرى عشان نلحق الديسكات الاولى
كان مخنا مخ فاصوليا صحيح


moai
اه دعوتين م القلب كدة وحياتك

3rby
هههه، اصلا فى الــ
design
الاصلى، التعليقات كانت تحت وانا رفعتها فوق، تناكة هى بقى
:P
اما موضوع الانجليزى ح حاول اكتب الترجمة جانبها يا سيدى، بس الفصحة بقى،، احم،، انا اساسا بحاول ازود الجرعة بالتدريج،،، بقى مفيش عربى عندى اساسا
اخوك اعدادى، ياهلا
قول لى على اسمه، ممكن والله يتعرف على اخويا على فكرة، بس موضوع الجدول دة مش للناس الدحاحة ولا حاجة، دا العادى فى هندسة
واصبر صبرا جميلا على اخوك، لسا لسااااا ح يتعدى من الدح اللى على اصله
لول
أبدا، بس لما اختك تكبر شوية ح تحس انها بتحبك قوى، لانكم ح تكونوا اكتر ناس بتخاف على بعض
اصبر تانى حبة صغننة كمان وربنا معاك ان شاء الله

Lasto-adri *Blue* يقول...

kalam
ربنا يبارك لك فيها يا كلام يارب

ام العيال
ياسلام؟
من زمان وانا نفسى اشوف قصة من قصص الحب الجامعية دى، عمرى ما صدقت انها بتحصل اساسا
بس ايه، ما تقولينا عنها بقى
;)

ahmed shokier
وانت طيب
انت كنت فين من زمان، مختفى بقى ليك حبة كدة
هو بينى وبينك، عارفة بينى وبينى انها اجمل ايام، بس انت عارف بقى اللى فيها
ربنا يسهل بقى وافضى
هههه وعقبال ما اروح استخرج صورة التخرج بعد 17 سنة كدة ان شاء الله زيك
;)

alladin
تعرف حاجة يا علاء
انا اساسا بحاول اعمل ذكريات على قد ما اقدر
اروح واشترك مع دول واعمل مع دول... وفى كل لحظة بحاول آخد اكبر قدر من الصور اقدر عليه
بيبقى شئ محزن انك تودع مكان من غير ذكرايات تفضل تحكى وتتحاكا عليها
سميلى كبييييرة قوى

دنيتى
وانت طيبة يا قمر

tarek
ممكن ابعتلك قرينى لول
بس ايه صبرا جميلا انت كمان، افضى بس من بعض الامور الملخبطة دلوقتى وح نرجع للرخامة تانى
;)

nouran
ههههههههه اعدادى دى اجدع سنة تتوهى فيها
بس صدقينى اجمل سنة ممكن تمر عليكى فى حياتك
توهى على قد ما تقدرى

nesrina
آمين يارب

ensanbey7ess يقول...

على فكرة احنا طلعنا زمل و فى دفعة واحدة كمان

بس الفرق انى فى رابعة ميكانيكا

فكرتينى بالراجل اللى بيشوف بطايق الترشيح على الباب لانى لسة معدى عليه النهاردة و لاقيته موقف كام بنت شكلهم من اعدادى و بيسألهم على البطاقات و كل واحدة واقفة و بتحاول تطلع بطاقة الترشيح و البطاقة الشخصية فى الايد التانيه

يللا كانت ايام

بجد مبسوط اننا زمل فى كليه واحدة

ربنا يوفقك

Mongey يقول...

ما تستناش الامتاع من حد
مش كدة ولا ايه؟


مش فاهم يعني ايه او ييمكن مش واصلي المعني لغويا مش عارف
بقي
يعني ايه الامتاع من حد
مش كده ولا ايه

اسف في الاخر كنوع من الادب
لو في ادب اصلا في الحياة
هااهااا

Lasto-adri *Blue* يقول...

mongey
ماهو لقيتك بتقول ان المدرسة فقدت قيمتها عشان الدروس وكدة
كان فى دماغى انك تستمتع بالمدرسة عشان انت فيها
مش عاشان حاجة تانية يعنى
;)


ensan by7s
ياااااه
نفس الدفعة
دى دفعة %$#&*^*#*)#)
اقول ايه بس، انما انا اشجع اصحاب العقول المستنيرة اللى بيدخلوا البلوجز وكدة، مش زى باقى البشر هناك
فرصة سعيدة قوى على فكرة، البلوج نور

Lasto-adri *Blue* يقول...

mongey
ماهو لقيتك بتقول ان المدرسة فقدت قيمتها عشان الدروس وكدة
كان فى دماغى انك تستمتع بالمدرسة عشان انت فيها
مش عاشان حاجة تانية يعنى
;)


ensan by7s
ياااااه
نفس الدفعة
دى دفعة %$#&*^*#*)#)
اقول ايه بس، انما انا اشجع اصحاب العقول المستنيرة اللى بيدخلوا البلوجز وكدة، مش زى باقى البشر هناك
فرصة سعيدة قوى على فكرة، البلوج نور

3rby يقول...

محمد عزت

Eman M يقول...

انتى سُكر :)