الخميس، ديسمبر 14، 2006

تعيش بلوجروبيا حرة مستقلة

الذين تحول بعضهم الى قيادات سياسية تريد ان تكون لها كلمتها وتظهر على شاشات الفضائيات لتتحدث باسم المعارضة لمجرد تأسيس موقع على الانترنت يجمع السلبيات ليتراجع الدور "النبيل" لتلك المدونات فى البداية.
[.....]
يقول معتز عبد الرحمن صاحب مدونة "طالب مصرى" أن هناك عدة سمات تلازم المدونات السيئة، منها عدم وضوح الهدف. بمعنى أن المدون لا يدرى بوضوح لماذا أصبح مدونا؟ أى أن قراره بالتدوين أصلا كان قرارا عاطفيا حماسيا وليس ناتجا عن دراسة وتفكير. فترى الموضواعت ممزقة ان لم تكن متناقضة أحيانا، وعدم وضوح الهدف يلاحظ على مستوى المدونة بشكل عام او على مستوى الموضوع الواحد.
[.....]
ويوضح صاحب مدونة "طالب مصرى" هذه النقطة بقوله هناك مدونات تظهر لأشخاص لمجرد أنهم أخوة أو أصدقاء لمدونين، وتجد فى افتتاحية مدونته يقول انهم واجهوا الحاحا شديدا من أخيه او صديقه او كذا ليقوم بعمل مدونة، وفى الواقع هو لا يحب الكتابة ولا صاحب رأى ولا يريد ان يضيف شيئا جديدا، ولذلك غالبا لا يستمر وينتج عن ذلك انخراط غير هاو او غير محب للكتابة فيها.
[.....]
ويشدد آخرة كلامه على السلبيات ان هناك من يقول بان المدونة أمر شخصى ومن حق صاحبها أن يكتب ما يشاء. ولكن هل لابد أن يكون التعبير عن الرأى وملء الفراغ فى أمور غير مفيدة.
[.....]
لهذا لا أفهم كيف يخرج المدون ليتظاهر فى الشوارع ليحتج بفمه ويده. بينما يمكنه ان يفعل ذلك بطريقة متحضرة عن طريق الكتابة. طبعا أنا ضد ان يخرج المدون عن دوره ككاتب ويقوم بهذه الأفعال التى تسئ الى جموع المدونين.
[.....]
وبالطبع سيستمر انتشار المدونات أكثر وأكثر ولن تقف أيه رقابة أمام هذا الطوفان الالكترونى. لهذا من المهم ان يكون هناك ميثاق شرف والاتفاق على مبادئ عامة تجعل المدونات نوافذ مفتوحة امام كل المصريين يتنفسون منها هواء نقيا بدون عنف او الفاظ خادشة للحياء.

وبعد الاستفادة من المادة العلمية المقدمة فى مقال مجلة "صباح الخير" واللى لقيته بالصدفة عند د. مشيل حنا فى مدونته مستنقعات الفحم...
أطالب المدونين والمدونات.. الأحياء منهم و الغير أموات... باجراء اجتماع طارئ وعاجل، لتشكيل لجنة، ينبثق منها لجنة، ويتفرع من نهاية دورانها لجنة، تعمل فى طريق موازى للجنة على ايدك الشمين، لتحضير الجلسة الختامية لسفراء البلوجات فى جمهورية بلوجروبيا الغير متحدة... لسن القوانين ثم الغائها و تعديل الدساتير ثم الغائها برضو.. وتحديد (وبدقة) اللى معانا فى هدف البلوجاوية النبيل، واللى معاهم من السيئين..
على أنه، أنه.. أنه... يجوز العقوبة بالحرمان من التدوين لمدة قد تزيد او تقصر على حسب رأى زعيم المبلوجية المنتخب من اللجنة المنشقة عن اللجنة المنبثقة للجنة الموازية للدوران الشمين...


بى اس:
حقيقى، أول مرة أعرف ان للتدوين "هدف نبيل"! لذلك رجائى الآخير.. ان عشت وشوفت جمهورية بلوجروبيا. ياريت تسرعوا فى عروض المصايف والرحلات للمبلوجين... والا ح عتذر عن الهوية، اعتصم فى بلوجى... وأنضم "للمدونين اخوان"...

بجد بجد... ضحكتونى وأنا عندى ميكرووفز...
سلاماتى!

هناك 22 تعليقًا:

Lasto-adri *Blue* يقول...

اللى مكتوب فوق هو مجرد حق مشروع –على حسب المكتوب فى المقالة- للاعتراض على بعض الافكار المنشورة. ولا يأخذ باى حال من الأحوال بمحمل شخصى!
فليس لى اى خلافات شخصية او قبلية حتى، مع الأشخاص المكتوب أسمائهم فوق... وانما ذكرتهم للأمانة العلمية فى نقل الخبر...

غير معرف يقول...

هدف نبيل ... هدف سامي
انا رأيي كل اللي عايز يكتب يكتب و مش معقول نطلب رقابه علينا !! كل واحد حر في اللي عايز يقوله و برضه اللي عايز يقرا يقرا
ربنا معاكي فالمايكرويفز

Aladdin يقول...

بما أن المصري هو اللي اخترع كلاً من النبيذ والإله، فشيء طبيعي لما يلاقي حاجة هوا ماخترعهاش وهي "البلوج" انه مايطمنلوش غير لما يكون ليه "هدف نبيل"!!

يا ترى إيه رأي إخواننا في فلسطين والشيشان عن الأهداف العليا للبلوجوربيا (معلش اضطريت أغير شوية في الاسبلينج بغرض الحنتفة مش أكتر) هههه

غير معرف يقول...

مين نبيل ده؟

abderrahman يقول...

على فكرة اي حد بيعمل تحقيق مهما كانت حرفيته لازم يقع في فخ الانتقائية في الاختيار.

غير معرف يقول...

ياريت حد يقوللهم ما يعقدوهاش
فعلا
مين نبيل ده؟

غير معرف يقول...

صحيح يا بلو هو هدف نبيل و هدف سامي قرايب و لا تشابه أسماء بس

و هادون و أهرتل لآخر مدى

فعلا بالتدوين لقينا مكان نكتب فيه بدون
قيود و يقوموا يقسموا المدونين إلى مدونين أي كلام و مدونين درجة أولى تكييف

و تعيش بلوجروبيا حرة مستقلة
و كل حركات التحرر الوطني

غير معرف يقول...

الله ليه يا مدونين مش عايزيين تعترفوا بأخطائكم؟

و بعدجين فيها ايه يعني لما تعملوا ميثاق شرف؟ متتعلموا من أخواتكم الصحافيين و الدكاترة و الصيادلة و المهندسين ما دول عندهم ميثاق شرف برضه و مع ذلك مش حارمين نفسهم من حاجة، مشكلة كبيرة يعني أننا نعمل ميثاق شرف عشان نبله و نشرب ميته؟

لا لا لا بجد ملكمش حق.

و بعدين العملية لمت خالص من بعد الجزيرة ما جابت سيرتكم و بقوا كل من هب و دب بيعلوا مدونة.

3rby يقول...

يا صبااح الدماغ العالية جدا
قوليلي يا بلو انتي بتجيبي الجوينت منين
تعالي قدام مدرسة عباس العقاد هاتلاقي طشط فيه واحد اسمه عم عبده
قوليله انا تبع عزت وهو هايديكي صنف لا يعلا عليه
بس انتي طبعا مش محتاجة...انتي مهيسة طبيعي

بالنسبة للبوست اللي فات
مين الاول الفرخة ولا الكتكوت؟

تعتعة أزهرى يقول...

اخينا اللى فوق خالص دا كلامه زى الفل بصراحه .. بأمانة شديدة يا بلو كلامه فعلا فى الجول .. خاصة فى تحديد الهدف, وللأسف يا بلو معظم المدونين فاقدى الهدف اللى من اجله بيدونوا .. من لا يوجد له هدف فى كل خطوة يخطوى بها فى الحياة .. فليقل للدنيا سلام .. ربنا يكرمك يابنى ومشكورة على الأمانة العلمية نصيا يا بلو, اتعودنا جميعا منك كدا وربنا يوفقك وتكونى صاحبة هدف أسمى ومنه ان شاء الله جميعنا نفخر بيكى ونكون فعلا سعداء إنك مننا

3rby يقول...

3awz asalek ya blue
eltasmem beta3 blogeg enty ely 3amlah wala wa7'dah me hetah
rody bosr3a fo emergency

غير معرف يقول...

بجد فى حد قال كدة .. أنا شخصيا واحدة صاحبتى بعتت لى البلوج بتاعها عشان اقول رأيى فيه .. وبعدين قلت أقول اللى جوايا وبأكتبه لنفسى من وأنا عندى 10 سنين .. ولما لقيت حد بيهتم فرحت جدا .. هو دة برضه مش هدف نبيل .. إنى أفرح :)

ألِف يقول...

هم مش قادرين يفهموا أن بلوجروبيا حرة مستقلة بالفعل.

أنا بقول فعلا نعمل ميثاق و بعدين نعمل عليه حفلة خوشاف كبيرة.

Aladdin يقول...

يا سلام عليك يا ألِف!

حكومة "ذكية" بس مستقلة

"الويل لكم أيها الفوضويون السيبريون" هذا لسان الدكتور أحمد نظيف!

ممكن نعزمه على حفلة الخوشاف بقى عشان نشكل "حكومة وحدة وطنية" نكون احنا فيها "الثلث المعطل"!

غير معرف يقول...

لست أدري ... أنا عايز أطلب منك طلب هاخرج برا الموضوع شويه ... في موضوع عند أبيتاف أنت كنت علقتي فيه
و هي كمان علقت فيه بتاع البنت اللي سابت خطيبها
نفسي أشوف في مدونه كلنا ليلي
arabesque shaimaa Epitaph كلنا ليلى
أو في بنات
حـدوتـة Dido's^^^ YouSy serooo Nerro Eman M Ghada Nour

تحليل أعم و أشمل عن ليه ممكن بنت تسيب خطيبها ... مش نفس الموضوع يتنقل أكيد
يا ريت الواحد يقدر يستفيد و يفهم من الليلات أو البنوتات أيه ممكن يكون بيضايقهم و أيه اللي يخليهم ينهوا العلاقه مع شخص كان المفترض أنه يكون شريك حياه ... ليه .. أزاي .. امتي
تحليل و تشخيص من بنات المفروض أنهم مثقفين و علي وعي و درايه بدرجه عاليه
يا ريت لو ينفع و في وقت أنا عارف أنها أيام امتحانات لكن أتمني أن تتناول هذه المدونات المواضيع ديه

Lasto-adri *Blue* يقول...

كراكيب
مش عارفة امكانيتى فى كتابة تدوينة كهذه.
خصوصا وان:
1. الاسباب بتتفاوت من انسانة للتانية، ومن خطيب للآخر
2. لم يسبق لى الارتباط بعد
:D

بس عموما ح كلم ابيتاف ونشوف ممكن نقول لمين فى الموضوع دا
:)

غير معرف يقول...

مش لازم يكون سبق لك الأرتباط من قبل علشان تعرفي أيه ممكن يضايق واحده من شخص من المفترض أنه كان هيبقي شريك حياه
يا ريت أنت و أبيتاف تتكلموا و باقي الليلات كمان ... هتبقي حاجه حلوه بجد
و شكرا لتفاعلكم يا فندم


هاني جورج
انتوك

Lasto-adri *Blue* يقول...

انا ممكن اتكلم عن نفسى
انما عن غيرى، ماظنيش ممكن اتطوع لشئ مش متخصصة فيه

عموما ح فكر ايه اللى بيضايقنى واجمعه مرة واحدة
:D

غير معرف يقول...

مطلوب عمل بحث وتمحيص وسؤال لكل إمرأة هجرت شخص ارتبطت بيه وحبته .. الأسباب والمسببات ..وعلينا أنا نراقب ونسجل .. هو دة دورنا .. سيبولى أنا الموضوع دة

3rby يقول...

انا سالتك سؤال يا بلو
ردي بقه

Lasto-adri *Blue* يقول...

مابردش يا عربى عشان انت بتسأل كتير ومش بتتعب نفسك عشان تشوف الاجابة
بص، بابا مرة قال لى، السؤال اللى ماتعرفيش تجيبى اجابته او حاسة انك ح تتوهى لحد ما توصلى، او صعب عليكى... هو بس اللى تسأليه.. غير كدة اتعبى للاجابة


لاء يا سيدى مش انا اللى عملت التصميم، وهو فعلا فى نسخة منه على الورد بريس
انا أخدت التصميم اللى معمول للبلوجر، وظبطته فى الالوان و الصور اللى فوق والحركات دى... بس


ولو كنت دورت تحت، كنت ح تلاقى انى حاطة
button
لصاحب التصميم الأصلى

روح ذاكر يا ولد وسبنى اذاكر انا كمان بقى
:@

Lasto-adri *Blue* يقول...

هنيالك يا كراكيب، ياسمين تولت الموضوع خلاص بقى
;)