الأحد، ديسمبر 17، 2006

طب ايه دا بقى دا بقى

لا لا.. ودى فيها كلام تانى؟ أمال ايه... أنا فعلا فخورة.. واقول مصر هى أمى وتيكلم تيلكم...
فى جو عائلى بهيج ساعة استجمام، قعدت أتفرج على منى الشاذلى فى العاشرة مساء... وألاقيها ايـــه بقى... تعلن عن خبر فوز مصر بالمركز التالت فى مونديال الأندية...
وبقى ايه.. أبوتركة يا عظيييم.. ومنظر الجماهير العريضة ع القهاوى يا ناس، شئ يشرح القلب.... خصوصا الرجل اللى قال "قدمت اليوم أجازة عشان الماتش.. مش مهم الشغل، دا عالمى والله"... وبقى بقى اللى زادنى بهجة و انبعاج قلبى، على انشراحه خلقة، الولد اللى قال "أنا غبت النهاردة م المدرسة مخصوص عشان أشوف الأهلي.. خلينا نرفع اسم مصر عالياً"... (واخد بالك انت من عالياً دى؟)

نحن – وبلا فخر- شعارنا: "كل ما اتفرجت وشجعت أكتر.. فرصتك فى الاعلاء تكبر وتكبر"... وانا وانت... واديها.... "طب ايه؟ ايه دا.. دا بقى .. دا بقى دا"..

تصبحوا على كل انبعاج قلبى...
سلاماتى

هناك 25 تعليقًا:

غير معرف يقول...

يا بلو أنا الحمد لله في الكورة لا أعرف مين ماجاش و لا فين ماراحش يمكن كويس أوي إني أعرف إن الأهلي بيلبس أحمر بس النهاردة لقيت إعلان حالة الطوارئ و الأحكام العرفية في البيت و مين رايح يتفرج فين و حاجات كده و كل شوية هييييييييييييية إيه يا جماعة اللي بيحصل الأهلي جاب جون المهم لقيت و احد قريبي بيكلمني إمبارح ( السبت يعني بيقوللي ) إنت مش جاي فبقوله جاي فين بيقوللي إيه إنت مش وطني فقلتله وبرائة العيال في عيني لأ مظاهرة كفاية كانت يوم التلات فراح أفحمني لأ دانا رايح أنا و أخويا نتفرج ع الماتش ع القهوة يللا ما علينا مبروك ع اللي بيحبوا الكورة و خلي مصر آل إيه تعلى بأقدام أبو تريكة إحنا خسرانين حاجة

غير معرف يقول...

الحقيقه هو أنجاز تاريخي و بكره تلاقي أهداء من النادي الأهلي لهذا الأنجاز التاريخي الغير مسبوق طبعا أهداء ليا أنا أكيد مش لحد تاني
--------------------
تعودت فالأخبار المشابهه المضحكه المبكيه علي حالنا أن أقرأ التعليقات و أسمحي لي أعرض بعضها
في هنا واحد قال الي متي سنظل هكذا ندفن رؤوسنا فالرمال قلت يا سلام في واحد هيقول يا جدعان البلد فيها حاجات غريبه و مش معقوله يعني اللي بتقولوه ده لكنه خذلني و ها هو تعليقه كاملا
"الي متي سنظل هكذا ندفن راسنا في الرمل كالنعام رغم ما نلاقيه من عنصريه وظلم من جانب الاتحاد الدولي ورئيسه سيب بلاتر العنصريه التي ظهرت في عدم نيل لبوتريكه لقب احسن لاعب في البطوله ولا حتي الثاني ولا الثالث ايه دا؟انتو مبتفهموش كوره ولا ايه ؟بقا دي لجنه فيها حد بيفهم ولا هما بيقولو احنا بنفهم بس بردو مش هتاخدهاوالله بجد حرام بس بردو لازم نفرح بفريقنا العالمي وانشاءالله تتعوض يا ابوتريكه بس هوا دا البيزنس"""
---------------------

:) و معلق أخر أكتشف سر المؤامره و الجايزه المشبوهه فا بيقول
يا جماعه لو لاحظتوا ان الشركه اللي مقدمه جوايز احسن اللاعبين هي شركة اديداس والاهلي بيلبس فانلات مصنوعه بشركة بومه puma ممكن يكون هو ده السبب وحسبي الله ونعم الوكيل

----------------------
ولا اللي بعتني ده و بيقول حمله لنصرة ... ابو تريكه :) و هنا تصل الكوميديا السوداء عندما يقرر أن يبعث أكثر من مليون رساله الكترونيه و يطالب بحمله كامله لأنقاذ أبو تريكه من الأستبعاد الظالم

عزيزي جمهور الاهلي العظيم الف مبروك فانت كنت و مازلت وسوف تكون ابدا ان شاء الله اللاعب رقم واحد في فريق الاهلي العالمي و لكن هيا بنا الان نبدا حملة لرفع الظلم عن ابوتريكة. هيا بنا نبعث جميعا اكثر من مليون رسالة الكترونية الى موقع الاتحاد الدولي مبينين استنكارنا لعدم اختيار ابو تريكة من احسن لاعبي البطولة و لنبين لهم اننا نحس بالعنصرية نتيجة هذا الاستبعاد الظالم. هيابنا نسمعهم صوتنا فالساكت عن الحق شيطان اخرس. لا تقلل ايها الجمهور العظيم من اثر هذه الرسائل فقد تدعم فرصته في استفتاء الاتحاد الافريقي لاحسن لاعب فسوف يحسون اننا لن نصمت عن الظلم بعد الان. و اخيرا مبروك للاهلي ومبروك لمصر
----------------------
يا سلام .. حقيقي حاجه تفرح أوي
الف الف مبروك
مش عارف أقول أيه
علي فكره أنا مش زملكاوي و لا أهلاوي و ما بلعبش كوره أصلا حتي لا يتهمني أحد بمعاداة الأهلي و يطلب محكمه دوليه بالذات الأخ صاحب التعليق الأخير

غير معرف يقول...

إحنا فشلنا في كل حاجة
و مش فالحين غير في التشجيع و الفرجة

Dananeer يقول...

انا جالى تخلف النهارده من الاهداءات اللى فى كل حته تليفزيون راديو
و ام تفيده بتبعت اهداء لبتها و بتقول مبروك للأهلى و يارب فى ازدهار على طول!!
لمعرفش مين
لسعد الصغير و الاغانى الاجباريه اللى اضريت اسمعها و هم بيشوفوا تغطيه دريم

و بالرغم من انى اهلاويه و باتفرج على الماتشات و فرحت بالفوز
الا انها بجد لعبه
مش اكتر من لعبه

وحاجه تحزن اوى اللى بنعمله عشان خاطر اللعبه دى

Abdou Basha يقول...

عايزين يثبتوا ان لسه فيه حاجة بتربطهم ببعض، ومش كارهين بعض وبيعطلوا مصالح بعض، ويزبأوا في بعض، فيمثلوا التفاني والحب، والوحدة الوطنية عشان مصر .
ويعد المولد ده كله.. كل واحد يرجع يركب عربيته ويكسر على اللي جبنه
:-S .
**
على فكرة أنا أهلاوي لتفتكري اني زملكاوي مدسوس
:)

مختار العزيزي يقول...

كنت أتمني أن تخرج فتوي بتحريم ترك الأعمال والدراسة للفرجة علي الماتش وأن مصالح العباد أهم من الأهلي والكورة وأن الله يحث الناس علي العمل... الخ لكن الدين أصلا مغيب ... في كثير من الشركات يأخذ الموظفين إذن ساعتين لمشاهدة المباراة!!!! كفاية كده بقي عشان ضغطك ما يعلاش

3rby يقول...

احنا شعب بينزل بالملايين علشان كاس الامم الافريقية وبنتريق علي اللي بيروحوا مظاهرات

كنت في المدرسة امبارح
والله بعد الماتش بخمس دقايق(الناس كانت بتتفرج في كوفي شوب جنب المدرسة)الناس زادت عشر مرات


التصميم بتاع البلوج ده تصميمك
ولا واخداه من"وورد بريس"؟
علشان لقيت حد عامله

mano يقول...

انا كنت لسة بتكلم فى الموضوع دة لأنه بعيد عنك مجننى
انا مرة هيحصلى حاجة بجد
الناس شايفة الماتش انجاز
و هو دة اللى هيرفع اسم مصر
و سايبين كل حاجة
انا هسكت احسن

غير معرف يقول...

بلو ألف مبروك ع التلج اللي بيقع في المدونة
شكله جميل أوي

غير معرف يقول...

بالطبع مبروك للأهلى

ولكن للأسف انحسر شعورنا بالإنتماء لهذا الوطن فى مظاهر قليله مثل المباريات و المسابقات

غير معرف يقول...

ده هو الشىء الوحيد اللى نقدر نتكلم فيه بصراحة ويتنشر فى الإعلام
الكورة والماتشات
ده البديل عن الهدف القومى
بديل عن التقدم والتحضر
بيلهونا فى الكلام الفاضى
............
غطونا وصوتوا

غير معرف يقول...

هههههههههه
متزعليش يا لست أدرى
هيه دى مصر للأسف
بس هنعمل إيه ؟
عادى بقة
أودى

غير معرف يقول...

يابنتي عادي قال ايه هايحاربوا بقلبهم مش بمجهوده مدي سذاجه الشعب بس اهه من طيبته وحلاوته
واهه الحمد لله خدنا التالت
وربنا يسترها

yara يقول...

طيب ي آنسة
blue
ياللى مش مذكر
ماهو انتى لازم تبقى فاهمة إن مصر ما بقاش فيها حاجة تفرح غير النادى الأهلى هو لحظات الإبتسام فى أيامنا
يعنى مش كتير بقى إن نشجعه
و الغريب إن والواحد بيشجعه وهو ممثل مصلا لسة بيفرح إن فى حاجة بتعلى إسم مصر
إظاهر لسة بحبها

shababik يقول...

مع ان اللي بتقوليه تماام ياعني ومعروف احنا شعب نحب نهيص ودي حاجة معروفة من زمااان
بس بيني وبينك
هو النادي الاهلي بقي مصدر الفرحة الوحيد ف حياة الشعب الغلباان دة
سلامو عليكوو بقي

حائر في دنيا الله يقول...

للأسف صارت الكرة هي مصدر البسمة لهذا الشعب
ووللأسف صارت شغلهم الشاغل, الرياضة مهمة في حياة الشعوب نعم
ولكن الحرية مطلب مهم أكثر
وأن يحضر لاستقبال الأهلي مئات الألوف هو شعور نبيل ويحضر أجدعها مظاهرة لكفاية عشرات فتلك بصراحة
مسخرة
!!

غير معرف يقول...

الشعب قلبه بيوجعه
و عايز ماتش يشجعه
او الحكومة تدلعه
و عجبي
---
تحياتي

أحمد المصري يقول...

الله يخليكي 0بلاش تقليب مواجع وحرق دم 0حتى الكورة والرياضة بقت للتخريب..اللي ساب شغلع واللي ساب مدرسته عشات حته ماتش..
الرحمة يارب0!!

أمير الفردوس المفقود يقول...

سلام
منذ فترة وانا أتابع مدونتك الرشيقة
ذات الإيقاع السريع كإذاعة الشباب والرياضة تلك التي أفتقدها كثيرا جدا...
العزيزة "لست أدري"
كان من أسعد الأيام هنا في الغربة يوم ما الأهلى فاز ببطولة أفريقيا
وأسعد اللحظات لحظة ما جاب ابو تريكة الجون
كان في داخلنا شوق للفرحة
نفسنا حاجة تلمنا
نفسنا حاجة تخلينا كلنا نفرح مع بعض..

أقولك على حاجة ,..
أنا هنا في السعودية
لم أستطع أن أشاهد مباراة الأهلي والفريق البرازيلى
بينما شاهده أحد اصدقائي في أحد المقاهي والمعروف أن السعودية بلد متعدد الجنسيات ومعظم الجنسيات العربية متواجدة فيه
قال لي صاحبي كان السعوديون وهم المنافس الأول لنا في الكرة العربية كانوا من أشد المشجعين للأهلي والسوريون واللبنانيون والمغاربة
لقد كان يقول" كنت في حلم, كنا كلنا على قلب رجل واحد, حتى المذيع من المغرب العربي كان يتكلم بصيغة الجمع - احنا - في لحظة واحدة شعرنا بالقومية وبعد الماتش كان الكل بيهني الكل رغم ان الأهلي خسر"
حقيقي كنا فرحانين هنا في الغربة
برغم السلبيات
برغم إن في ناس سابت الشغل وعيال ماراحتش المدرسة
برغم كل شي فرحنا كلنا لحد ما دمعت عيونا...
سلام

Lasto-adri *Blue* يقول...

أستاذ أمير الفردوس المفقود
أولا أهلا بك منور فى البلوج.. وعود أحمد ان شاء الله عن قريب
بس انا كنت عايزة اوضح انى مش ضد الفرح، بالعكس... انا سعيدة جدا لو ان البطل هذه المرة هو "ابو تريكة".... حقيقى فخورة به من كل قلبى
انما المشكلة لما ما تعرفش توصل كليتك فى معاد مهم عشان الشوارع كلها مقفولة احتفالا بالفريق العائد
والمشكلة الاكبر ان الناس بتصدق حالة الالهاء المتعمد
المشكلة الاكبر والاكبر لما ولد يشوف والده قاعد ع القاهوة يتفرج، وهو ساب مدرسته عشان حتت ماتش لا راح ولا جه وفاكر ان هو دا الاعلاء باسم مصر
!!!!!

مع تحفظى على كل شئ الحقيقة، بس معلش..... يروح هذه الاعلاء وسنينه لو في المقابل مصر غرقانة فى ديونها، والبطالة، الجهل، ومشاكل اقتصادية وتحرشات اجتماعية... وسكة حديد.. وعنوسة...الخ

جايز حضرتك عشان مش فى مصر معانا مش شايف قد ايه، اى حد يجيب سيرة الفرح للفوز، يتبعها بجملة.. مش مهم بقى اى حاجة تانية.. الكورة هى سبب التقدم للامم

على اى حال، متشكرة جدا على اطراءك الجميل
وتعالى مصر بقى
;)

Hechkok يقول...

Mabrouk lelAhly
Congratulations to ElAhly for his extraordinory victory , it is not easy to be the third in a world ranking and we will be always the third in every thing because we love it and cheer for it.
Another MABROUUUUUUUUUUUUUUK

3rby يقول...

واحد صاحبي كان جاي من المدرسة يوم الاتنين وبيقول ان الطريق كان مقفول علشان الكبير رايح يستقبل ابطال مصر


انتي نفضتي لسؤالي لحد دلوقتي خمس مرات وفي الخمس مرات كنت هاقولك حاجة مهمة
بس خلاص
انسي

Lasto-adri *Blue* يقول...

عربى!
انا رديت وانت مش بتقرأ
اعملك ايه يقى؟

غير معرف يقول...

أنا بأستغرب على الزمالكاوية اللى زعلنين أن الأهلى وصل للى وصله مع أنى زملكاوى لكن ما أوصفلكيش أد أيه أنا فرحت لما شفت الاهلى كسبان
الغريب

غير معرف يقول...

في اليوم دة كنت كالعادة في مشواري المعهود راكب رفيق الدرب كوبري 6 اكتوبر
و المشوار ما اخدش 20 دقيقة من مدينة نصر ل الكورنيش
انا قلت اكيد في انقلاب و الدبابات مستنياني في منزل الزمالك

في الاخر اكتشف
ان الشعب ستات ورجالة
و اطفال و مصابي الشلل الرعاش و سلس البول
كلهم كانو في استقبال فاتحي الكؤوس
واكبر قرن في القرن
الفريق الاهلي

و الله الناس دي لازم تتاخد علي خوانة و تتسحب علي اي مظاهرة في وسط البلد
وتترن علقة حمير
علشان يعرفو ان الله حق

واخيرا اسأل الله ماتش كل يوم
وكاس كل اسبوع