ورجعنا للبرد من تانى

الأوان أوان شتا

شتا.. غتت
السحب ذات نفسها
م البرودة اتكلفتت..

معرفش ليه لما الشتا يهل بأول نسماته، تملى بتزيد الهموم، والسكات يحل مكان الكلام. وتصبح الايام كلها "سنفونية شتوية أكثر مللاً". أصحى متأخرة –كالعادة- بعافر أطلع من بين البطاطين برتجف. فى لمحة أشرب فنجان الشاى باللبن، أغير هدومى وأملى الشنطة بمجموعة أوراق وأقلام رصاص، مفاتيح البيت، محفظتى البنفسجية وكتاب إستعرته من صديق بمنى نفسى أنتهى من قرايته. أمسك بلوفر –حفيف نسبيا- فى إيدى وشيل الشنطة.. أقفل ورايا الباب و أنطلق على صدى صوت أمى يرن فى ودانى: "ربنا يحفظك يابنتى".. و أول ما أخطى ف الشارع أعانق لسعته البدرية فى حفلة بعزف منفرد؛ أحياناً بيشاركنى بعض قطرات مطر ضلت طريقها من ليلة إمبارح، وأحياناُ بكمل طريقى وحدى ويا أعمدة بتنفض عن أنوارها آثار السهر. أقف ع المحطة والدنيا بتشتى عليا لكن من جوايا بتشتى أكتر، أحاول أضم إيديا ولكن كل مرة أنتهى بمحاولة أخرى فاشلة لإسترجاع إحساسى بالدفا.

من زمان -وأنا والشتا- من ألد الأعداء، بكرهه لما ليله ياخد من نهاره، وعتمته تغطى على أنواره. بكرهه لما السكك تموت والناس قافلة على نفسها البيوت وتبدأ أحلامنا البسيطة رحلة بيات. ولما يصعب عليه أنام فيتعبنى ببرد ملوش أمان حتى سحاباته تحجب عنى ضو القمر. لكن أرجع وأشم ريحة الطين المندى وافتكر ريحة كباية الشكولاتة و ريحة الشوارع المغسولة بعد المطر وأنا بجرى ويا أصحابى وسط الزحمة، نلحق أى مواصلة تحمينا من رخ السما. أشوف أوراق الشجر بتتلألأ بعد مطر إمبارح وأفتكر لمتنا جانب الدفاية فى عز فبراير وف يناير، أسمع صوت أخويا بيردد آخر نكة ويا غنوة حلوة وضحكة صافية. أبص لخيوط الفجر، أشوف نور أباجورتى الصغيرة وأنا بحاول أقرأ من تحت مليون لحاف وداخلة أمى عليا بحضنها الدافى حتى فى عز الشتا..

ساعتها –وساعتها بس- مبخفش م الشتا.. ويبقى نفسى أجرى وأجرى وأرقص تحت المطر. بفتح الشباك وأفرد إيديا فى دعوة منى لنسماته تشاركنى مكان ما بين ضلوعى.. مليان بالدفا..

دخل الشتا وقفل البيبان ع البيوت
وجعل شعاع الشمس خيط عنكبوت
وحاجات كتير بتموت فى ليل الشتا
لكن حاجات أكتر بترفض تموت
عجبى!!

سلاماتى


-----------------------------------------
(1) من شعر "الربيع رغم الشتا" لعمر نجم
(2) من رباعيات جاهين

• نشرت بتاريخ اليوم بجريدة الدستور صــ25