الثلاثاء، ديسمبر 20، 2005

من ذكريات الطفولة

بقلب الصفحة ورا الصفحة فى كتاب جديد اشتريته امبارح وأنا بتمشى
عينى وقعت ع الكلمات فافتكرت وقلت أفكركم معايا..

ميمو: اوعى سيبى اللعبة بتاعتى
ميمى: لأ دى بتاعتى
ميمو: ....... ياسلام ياختى
ميمى: ما تشـــدش
ميمو: ....... طب يالله سيبيها
ميمى: لأ دى بتاعتى
ميمى: ما تشــدش
ميمو: ....... ما تشديــش انتى
(( تتمزق اللعبة ))
الاتنين: يـــاه...
(( تخرج من داخلهل نيللى ))
نيللى: سكر مرشوش فى طبق منقوش.. العبوا مع بعض ما تتخانقـــوش

..

كالعادة (( اللعبة )) من ابداعات عمى الكبير... جاهين
سلاماتى

هناك 12 تعليقًا:

Bent Masreya يقول...

يا خبر يا لستُ
انتى فكرتينى بالذى مضى، ولحد دلوقت الصراحة :)))

اقف انا واختى نقلد الأغنية بالظبط، هى البنت وانا الولد او العكس
ونعمل احنا الاتنين نيللى

بس وانا صغيرة اوى معرفش ليه كنت بخاف لما اللعبة تتشق وبحس اناه بتقول سر خطير وجامد لما بتقول "ما هو انا اصل اللعبة"
مكنتش بفهم يعنى ايه

هى يعنى اصل اللعبة؟؟

ماشى الطريق يقول...

يااااااااااااااااه
أول مرة أعرف إنها كلمات جاهين
الكبير كبير فعلا

سامية يقول...

أيوة أيوة!! أنا كمان كنت باقلَّق قوي م الحتة بتاعت "أنا أصل اللعبة" دي وعمري ما فهمتها

من ضمن الحاجات الكتير اللي كان نفسي أسأله عليها

تعيشوا وتفتكروا

Mr-Biboooo يقول...

يااااااااااااااه


و بحب كمان اغنية كان فيه فراشة صغيرة بتاعة نيللى

عبدالله النديم يقول...

أنت عارف أنت فكرتنى بحاجة غريبة أمبارح واحد صاحبى بيقوللى خلى عندك أمل قلتله أمل وعمر
ياترى لسه فاكرين كتاب القراءة الغبى ده

Lasto-adri *Blue* يقول...

Bent masrye:
مبسوطة إنك إفتكرتى ذكريات جميلة زى ما إفتكرتها


كتابة
أهلا بيك أول مرة تزورنا... أنا كمان كان أول مرة أعرف إمبارح


سامية
سامية عندنا.. يامرحبا يا مرحبا
أولا إسمحيلى ألقب والدك بعمى الكبير.. متعرفيش هو مأثر فيا بشكل كبير إزاى

عموما أعتقد إنه يقصد بأصل العبة الروح الحقيقة.. يعنى عارفة فى فيلم زى
little princess
كان فى حتة ان العرايس ليها روح وبتحس وبتتحرك.. بس بتبان انها صامتة لما نقرب
يمكن يكون يقصد كدة
بس أنا بحب المسرحية دى مهما كانت

Lasto-adri *Blue* يقول...

Mr-Biboo
هى أغنية الفراشة بتاعة جاهين؟


عبد الله النديم
أهو دا اللى أقول عليه.. يااااااه
وقطتى نميرة... يااااااه

والله العظيم لو كانوا باتو يفكرونى ما كنت ح فتكر

أهلا بيك أول مرة تزورنى.. بس على الله متقطعش بينا

Steliano Ponticos يقول...

I didn't know this one. I only know ruba2eyat jahine and a few songs for Om Kolthoom...anywho..I am leaving for a few days for Xmas. I left a new music and my best wishes for a last post. If you want.

Ahmed Shokeir يقول...

هما كان إسمهم .. ميمو وميمي ... ؟؟؟
إنت بتجيبي الحاجات دي منين ؟

محمد هشام عبيه يقول...

زي زي غيري كنت ادندن الأغنية الرائعة دي كتير وأنا صغير..لما كنت صغير يعني..بس أول مرة أعرف أن العبقري صلاح جاهين هو اللي كاتبها برضه..الراجل ده زرع في قلوبنا البهجة بشكل مقدرش اي حد تاني يعمله..وياريت بقى تسيبي اللعبة بتاعتي!

Lasto-adri *Blue* يقول...

Slo:
I might send it to u sometime later isA.. its lovely..
وترجع بالسلامة


Ahmed Shokeir
تخيل طلع إسمهم كدة فعلا.. وعلى فكرة أنا ذات نفسى معرفش بجيب الحاجات دى إزاى.... بس هى بتيجى كدة
;)


محمد هشام
إنت ح تقول لى... ما شكلك لاحظت قد إيه الراجل دة مأثر فيا.. إن ماكنش فى جيل كامل...
ياااااه
واللى مصدقتوش كمان إن هو اللى كتب: أنا أنا إبريق الشاى..
فاكر دى كمان؟
أنا كنت بحبها جدا

محمد هشام عبيه يقول...

ومين يقدر ينسى أنا أنا أبريق الشاي..
طبعا لاحظت تأثير عم صلاح جاهين فيك..وحد يطول..أن يكون بداخه تأثير من هذه العجينة المصرية الفريدة..الله يرحمه..ويبقى لنا فنه دائما