لما كنت صغيرة

من زمان ومعروف عن والدتى حبها للنباتات والأشجار على إختلاف أنواعهم. وكان أملها إن حد من أولادها يشاركها نفس الهواية. ولكن للأسف طلعت أنا وأخويا ما لنا فى حاجة. حتى والدى –مع إن له علاقة مباشرة بالزراعة- طلع مش بيحب نباتات الزينة. بيقول إنه بيحب النبات اللى يديه على قد ما ياخد، مثلا شجر المشمش أو البرتقال والرمان. يحب الشجر اللى يقدر تعب وسهر صاحبه.

أنا فاكرة فى بيتنا القديم والدى زرع شجرة رمان فى الجنينة تحتينا يوم ما وصلنا هناك. وكبرت معنا يوم ورا يوم وسنة ورا سنة. ما تتصورش البهجة لما كنت أنزل معاه ونبدأ نسقى الزرع. كنت أتنطط حوله وأقف على سور الجنينة عشان أطول شجرة الرمان، وأزعل لما ألاقيها أطول منى. فأمسك خرطوم المية وأبدأ أغرقها.
كان بيسعدنى منظر تلألؤ أوراقها بنقط المية تحت ضوء أعمدة النور ويا القمر. وساعتها كنت بحس إنى بمتلك كنز محدش غيرى يعرفه. وريحة الطين المبلول لما تهفهف عليا وأشمها فى كل المكان.. بطير.. كإنى ماسكة الأرض بين إيدي.
ويوم ما تبدأ الشجرة تطرح، كان يبقى عندى عيد أسمع فيه ضحكتها. تخيل منظر الغصن وهو بيتهادى ويميل عشان يديك الثمرة اللى أثقلت عليه لحد ما بقت حلوة بس علشانك. بفتكر دلوقتى لما كنت أقف وأزعق من البلكونة لبتوع الجرايد اللى كانوا يقفوا على السور ويمدوا إديهم يقطفوا الثمر حتى قبل ما ينضج!

وكبرنا وإحتجنا أوضة زيادة لبيتنا.. فعزلنا.
وما أنسى لحظة ما كنت بنزل آخر حاجة. إترددت أدخل لأسمع صدى صوتى يرجع لى بين الأركان الفاضية والحيطان المسهمة، فقعدت على السلم، دفنت وشى بين إيديا وبدأت أبكى من غير دموع.
ع السلمة دى أنا وقعت فى صباح عيد وإيدى إتجبست. والباب دة أنا دهنته مع والدى وأخويا فى آخبر بياض للشقة. وفى الركن اللى على إيدك الشمال فى الدور التانى زغرطتت لى جارتى العزيزة لما نجحت فى الثانوية العامة ودخلت الهندسة. و أطباق العشورة والفتة والكحك وزيارات الفاكهة اللى تناقلتها عتبات بيتنا بين سكان العمارة فى الأعياد والمناسبات كلها. وسبوع أخويا ورجوع والدتى م الحج. و أول عربية نشتريها ودخول أخويا الحضانة وبعدها المدرسة ولعبنا فى الشارع مع جيرنا فى شلل حينا وسوبر ماركت حمادة اللى إتسكعنا حوليه لسنين عمرنا...
يــــــــاه
كل دا جه فى دماغى لحظة ما بكيت على السلم قدام باب بيتنا القديم.

وجينا بيتنا الجديد
ورغم مرور أكتر من سنة ونص إلا إنى لازلت أحس إنى فى مصيف وأكيد رجعين لبيتنا من تانى. راجعة لللعب مع جيرنا فى الشارع وراجعة أعافر أنطت على السور وأقيس طولى مع شجرة الرمان.

و اللى فكرنى بكل دا لما والدتى طلبت منى أروح أسقى الزرع بتاعنا فى البلكونة لأنها مش فاضية. مسكت رشاش المية وبدأت أسقى الزرع. تصور من يوم ما عزلنا وأنا ما سألت عن أحواله مع إنه صاحبى من بيتنا القديم!
فجرحنى الصبار عيتاب خفيف ما بين الأصحاب.

وبعد ما خلصت طليت لبرة من سور البلكونة وقت الغروب.. وعجزت عن وصف الإحساس اللى ملانى لما وصلت لى ريحة الطين المبلول و يا الريحان..


سلاماتى