السبت، يونيو 28، 2008

الحياة بعد الثانوية والجامعة

ولإن ما ينفعش كل من : بنت مصرية، بودى ومحمد سمير يدلوا بدلوهم من غير ما أنا كمان أدلو بدلوى.. قررت التعقيب على التعقيبات فى محاولة لبداية مرحلة الشفاء..
لذلك عزيزى القارئ وعزيزتى القارئة، لو فاكرين إن دى تدوينة زى ما متخيلنها منى كل مرة.. يبقى أحسنلكم تقفلوا البلوج وتروحوا حتة تانية.. عشان النهاردة مافيش لا لحمة ولا حاجة ساقعة والكلام بجد..


* * *

فى سنة 2002، للتأريخ الشخصى ليس إلا، جبت 98.8% فى الثانوية العامة. وكنت فاكرة نفسى ساعتها ياما هنا يا ما هناك.. وبالطبع، بما إن طموحى كان ينتهى عند حدود المجموع العالى وفقط، دخلت كلية الهندسة من غير ما أفكر فى أى شئ تانى! مع إنى على ما افتكر كان طموحى فى المرحلة دى أطلع مذيعة فى الراديو.
وخلصت خمس سنين الكلية، وفقدت معاها أشياء جميلة كتير.
الحياة مش بس شهادة جامعية، ولا مادة علمية دخلت إمتحانها ودلقت الكام معلومة اللى حفظتهم عن ظهر قلب. الحياة يعنى "أنا"، ثم "إنت".. ثم "مجموعة تجارب". وكل دا لا يمكن بشتى المقاييس يتوفروا فى ظل نظام تعليمى زى بتاعنا. نظام مبنى اساسا على تقيد الفكر والإبداع وإنماء الشخصية لمواجة العالم سواء فى المنظومة الحياتية العادية تماما، أو حتى العملية..

كلام كبير مش كدة؟!

المهم إنى إتخرجت السنة اللى فاتت، بتقدير عام جيد.. طبعا، الحمد لله على كل شئ، أولا وآخرا. لكن الحقيقة اللى لازم كل حد يعرفها وهو ناوى يدخل الجامعة. التعليم فى مصر بدأ يصبح شوية بشوية "منظومة متكررة للثانوية العامة"...
يعنى الطالب من دول اللى غرق دروس خصوصية فى الثانوية العامة، بيتخرج عشان يدخل الكلية، وهناك يعيد الكرة. طبعا لأنه دخل كلية مش عارف ينجح فيها، بما إنها كلية إختارها له المجتمع عشان برستيج أهله، ولأن –أيضا- فى جهات عمل غبية بتقيم الإنسان على تقديره فى الكلية، وتدى أفضلية لأبو إمتياز عن أبو جيد جدا! وبصراحة عندهم حق فى دى. يعنى عدد مهول زى اللى بيتخرج كل يوم، وممسوخ الشخصية زينا، ممكن أفرقهم إزاى عن بعض سوى بالتقدير اللى ممكن ينم عن شئ من المسؤولية. ورغم كدة، فإن طريقة "أحسن الوحشين" فى نظم الإختيارات الفردية للمتقدمين للوظائف، فاشل جدا... لإن أغلب المتقدمين مش وحشين أبدا.. إنما منتظرين مرحلة الإكتشاف الذاتى تبدأ عشان يبرعوا..
أنا إتخرجت بتقدير جيد، والحمد لله على حبة الشخصية اللى فضلولى، إشتغلت بعد الدراسة على طول. ورغم كل دا حاسة إنى ولا حد أصلا. ولا مميزة ولا بفكر ولا بفهم ولا بحب اللى درسته خمس سنين. ومقتنعة تماما إنى إشتغلت عشان لازم أتشتغل. زى ما هو لازم أتعلم، ولازم أدخل الكلية، ولازم أتفوق ولازم أتجوز وأكون أسرة ولازم ولازم..

الحياة بعد الكلية شئ تانى خالص.. بتبدأ تبان حبة حبة.. وكل ما بندخل فيها أكتر كل ما بتخنقنا أكتر
وبس الشئ الوحيد اللى ممكن يفوقنا من الدوامة دى.. إننا نكون نفسنا بجد..

الواحد بيتخرج من الكلية ويتصدم إنه ولا حاجة.. طبعا أنا مش بتكلم عن فئة قدرت تحقق نجاحات فى الحياة بمجهودها وتعبها وفهمها الصح للحياة.. لكنه بردو مش من فراغ.. فى اللى علمها، أو فهمهم بداية الطريق إزاى..
تخلفوا عن قطيع الخرفان، فسبقوه..
زى مثلا اللى اهلهم سايبنهم يدوسوا فى الحياة بحساب من بدرى، أو اللى دخلوا جامعات زى الجامعة الأمريكية بمصر. ماعرفش إيه نظام الجامعات الخاصة، لكنى متأكدة إنك لو دخلت كلية –بفلوسك- عشان مش قادر تنجح –بمجهودك- يبقى إحنا بنضحك على بعض. ولو مش ناجح من بدايات الطريق، يبقى الأحسن لك تدور على طريق تانى... (طبعا أنا مابتكلمش عن الإستثناءات)..

المرحلة الأصعب من الحياة، بتبدأ بعد الكلية بالظبط. ومش لصدمتك وإنت بتبدأ مرحلة البحث عن عمل وتكوين أسرة. إنما محاولتك للبقاء أصلا. محاولتك لمعرفة نفسك. تعرف إنت مين وبتحب إيه وعايز أيه وايه اللى فى إمكانياتك.. وأخيرا وليس بآخر.. إزاى تبدأ دلوقت. ودلوقت يعنى مش بعد يومين ولا ساعتين.

فيتبقى لك عزيزى أربع إختيارات ما لهم خامس:
1. تنضم لنفس الترس، وتدور على شغل وتكون أسرة وتمشى زى ما إنت عشان تخلف غيرك بنفس تفيكرك... وتجبرهم على كلية الهندسة عشان برستيج أهلك
2. ماتدخلشى الدوامة أصلا، وتفضل بتتكلم يا إما عن أمجاد ماضى مش موجود اساسا، أو تتكلم عن مستقبل ح تبدأه بكره.. والعجيب إن بكرة مابيجيش
3. يا تعرف نفسك..
4. يا تقصر الطريق وتنتحر زى طلاب الثانوية العامة.

كدا أو كدة، لازم نعرف إن نظامنا التعليمى الحالى فاشل وبشهادة كل اللى اتخرجوا منه "فى الفترة دى"... وإن كان هو شئ لا مفر منه بسبب غباء اللى بيفكروا لنا.. يبقى ع الأقل نوحد أسباب الغباء ونبدأ إحنا نفكر بطريقة منطقية..
سواء الأهل يقللوا الضغط على أولادهم ويحاولوا يساعدوهم من بدايتهم على إكتشاف مهارتهم وأحلامهم وحياتهم الخاصة، أو الشركات تبدأ فى مساعدة الطلاب والخريجين على الإحتكاك بالحياة العملية أكتر، مع السماح للعمل لغير الحاصلين على شهادات عالية، زى الدول المتقدمة...
يا إما الحكومة تلحق تلم نفسها وتحكم شعب غيرنا، عشان نحكم نفسنا من جديد على نضافة..


فتكم بعافية... وسلاماتى

هناك 36 تعليقًا:

غير معرف يقول...

وخلصت خمس سنين الكلية، وفقدت معاها أشياء جميلة كتير.

آه عارفهم الخمس سنين دول
:D

لو إتكلمنا عن التعليم عندنا محتاجين مجلدات أنا لما فكرت في حوالي 20 سنة من عمري تعليم حسيت إن أنا صندوق كل مهمتهم إنهم يحشروا فيه المعلومات بغض النظر عن مدى إستفادتي إيه بامعلومات دي قبل الكليه و خلالها درست مواد كتير بس كان في حاجة غريبة جدا إني مزاجي أوي في المذاكرة ماجيبش تقدير أو درجة عاليةة غير في مادة فعلا بحبها

أنا بكره التعليم في مصر أوي
:(

Bella يقول...

يعني لازم تقلبي على المواجع يابلو

المشكلة في مصر مش في التعليم وبس

التعليم له عيوبه اللى محتاجة اصلاح ضروري ويبدو ان الاصلاح في ظل هذه المنظومة الفاسدة لن يحدث في المدى المنظور بل على العكس سينحدر المستوى اكثر تمهيدا لتحويل التعليم كله لتعليم خاص لمن معهم فلوس فقط وليس لمن يحبوا ان يتعلموا وهذا موضوع محتاج كلام كتير

اما الشق الثاني من المشكلة فهو شق مجتمعي

وهو نظرة الاهل والمجتمع كله للشهادة في حد ذاتها رغم ان العمل يكون مختلف عن التعليم ولكن الشهادة ينظر لها الجميع على انها جواز المرور من مكانة لمكانة أخرى ومنظرة ووسيلة لترديد العبارة الشهيرة مش عارف بتكلم مين

وهكذا

يعني حياتنا كلها عبارة عن سلسلة مترابطة من الاخطاء التي تصب كلها في صالح تخلف اكبر للمجتمع وتدني في مستوى تفكير المجتمع لدرجة ان يقف الاهل ليبكوا مع ابناءهم امام شاشات التليفزيون ليتشاكوا من صعوبة الامتحان

تصوري ان يصل الامر بالاهل وتدليل الابناء وعدم تعليهم الاعتماد على النفس لدرجة ان الابن الشحط وهو داخل الجامعة وماشاء الله طول الباب تذهب معه الست الوالدة لدفع مصاريف الكلية وتخليص الاوراق وكأن ننوس عين اهله مش ح يعرف يتصرف في دي كمان

ماذا تنتظري من هكذا مجتمع

اذا لم نغير من اسلوبنا في الحياة فلن ينصلح لهذا البلد اي حال

والكلام بالتحديد موجه للاهالي الذين يخنقون الابناء برعايتهم المرضية التي تصل لحد التكبيل

يمكن ارجع تاني لما مزاجي يتحسن

تحياتي

أحمد الديب يقول...

أستاذتنا القديرة
أحييكي تحية خاصة جدا جدا على البوست ده

المرحلة الأصعب من الحياة، بتبدأ بعد الكلية بالظبط. ومش لصدمتك وإنت بتبدأ مرحلة البحث عن عمل وتكوين أسرة. إنما محاولتك للبقاء أصلا. محاولتك لمعرفة نفسك. تعرف إنت مين وبتحب إيه وعايز أيه وايه اللى فى إمكانياتك.. وأخيرا وليس بآخر.. إزاى تبدأ دلوقت. ودلوقت يعنى مش بعد يومين ولا ساعتين.

وضعي يشبه وضعك لدرجة تثير الشك.. بس أنا جبت 97.5 ودخلت صيدلة لأنها مش طب :)

الآن أنا في مرحلة الذهول.. بقالي 3 شهور تقريبا .. لكن أنا اخترت الاختيار التالت.. أعرف نفسي.. وقريبا يا لست أدري ح أقوللك أخباري.. فإما سأجد ما أبحث عنه.. أو سأجن..! أستبعد أن يسحقني الترس لأنني أكرهه بشدة.. وأستبعد الإنتحار لأني خلصت ثانوية عامة للأسف..

آسف على الفضفضة الكتير.. وتحياتي لبوست يجب أن ينشر بالجرائد الرسمية وغير الرسمية.. ولمدونة عرفت معها لماذا يوجد التدوين..

أحمد الديب

غير معرف يقول...

عزيزتي
"ms. Blue"

تعرفي إن فيه طريق خامس؟؟
واللي إنتي بتعمليه دلوقتي....وأعرف غيرك بيحرصوا علي المضي فيه

هو طريق المجرب
واللي مش عايز غيره يجرب

أنا حاسه جدا إنك واللي زيك...هتعملوا كتير أوي يعني
طالما بدأتي تفكري كده....بس اصبري...وكل فعل كان أوله فكرة....هي اه فكرة رقيقة
I mean "fragile"
لكن هتقوى...لأني شايفة ان اللي عايزين يغيروا بعد ما يتغيروا...بدأوا يلاقوا بعض

ربنا معاكي ومعانا....وتحياتي

بنت القمر يقول...

طبعا عمرنا ما كلنا لحمه ولا شربنا بيس عندك ها نهرج بقا:))
انا فعلا يقيني هو ان لازم
تنسف حمامك القديم قبل ما تركب الجديد مش ها ينفع ابدا تغيير اكره الحمام ولا لمبه السقف
اقصد طبعا النظام الحكومي العقيم
طب لما بتوع الهندسه تقدير جيد مش راضيين عن نفسهم امال بيتوع اداب تقدير مقبول يعملوا ايه علي عالاقل بيحملوا نفسهم سوء اختيار الكليه نفسها
لانها بلا مجال عمل محدد وحريجيها رغم انهم بيدخلوها بمجاميع عاله الا انهم بيحصوا صفر من فرص العمل وبيتساووا باي حد تاني
ليهم ربنا بقا

Amour يقول...

بصي يا بلو.. والله أنا شخصيًا كنت فاكر حياة الجامعة لونها بمبي زي ما بابا أستاذ الجامعة كان بيحاول يصورهالي وأنا في ثانوي علشان يبقى عندي حافز.. وبعد ما دخلت صيدلة عين شمس، ولقيت إن تعليم الجامعة وحضور المحاضرات والكتابة ورا الدكاترة وتعب القلب دا كله مش كفاية ولاحظت إن لعبة الدروس (اللي بقى اسمها في الجامعة كورسات علشان الشياكة)زيها زي ثانوي، ابتديت آخد بالي إن المنظومة بكل سياساتها محتاجة مراجعة فورية وتغيير جذري.. نسيبنا بقى من شعارات تطوير التعليم الجامعي ورفع مستوى أعضاء هيئة التدريس.. حتى تطوير التعليم الثانوي فكرة مش قد كدة

الفكرة، إن مع تدهور مستوى المناهج واللي بدوره بيأثر على التركيب العقلي والنفسي للشباب اللي داخل الجامعة بيخلوا الشباب ماعندوش استعداد لأي شغل سواء في الجامعة أو بعده.. شباب بلا طموح أو دافع مستحيل يقدم حاجة مفيدة..

حاسس إني مليان غل وقرف من الحال وزهقت من كتر ما اتكلمت مع ناس كتير في الموضوع دة وحرقت أعصابي بلا أدنى استجابة أو رد غير:
"يعني هو إنت اللي هاتصلح الكون لوحدك"

AD sabry يقول...

agmad post ya blue

bella
ana mowafaak ala kol kelma koltaha
especially our parents makes us so fragile.
bus meen yesma2

Nouran يقول...

الحمدلله جالي احباط كده:)
بس ليه انا بحس ان ممكن ابقى حاجة و حاجة كبيرة كمان بعد ما اخلص دراستي و بقيت احلم احلام كبيرة وعايزة احققها كلها
هل علشان الواقع صعب ومر خلاص محلمش و افضل واقفه كدا ابص لاختيار من الاربعه اللي مش لاقيه ولا واحد فيهم يناسبني ولا اعمل ايه :)

غير معرف يقول...

my first comment here :), since i've just graduated 10 days ago :), u're totally right, l 2enne alhamdolellah da5alt saydala 3'asben 3anne l 2en mayenfa3sh banat t5osh handasa :S msh 3arfa ezzay :S, el mohem ana alhamdolellah ba7awel a5od sekka 3 tane ba3d ma eddamart, bass bardo ahle beywadone 3ala sekka 1...w shkle hamshe feha :(, w bad3e rabena eno y7a2a2 4 !

sorry 3ala el tatweel, i come a lot to your blog it's really great :)

ody911 يقول...

عزيزتى لست أدرى
دة إذا سمحتيلى بتلقيبك بعزيزتى

يمكن مش بسيب تعليق دايما بس سعات ببقا عاوز أعلق
المرادى عاوز أعلق وأقولك إنى متفق معاكى أكيد فى مسألة التعليم فى مصر أو مشكلة التعليم فى مصر


ثانيا أنا من وجهة نظرى شايف إنى الشباب المفروض تدور فعلا على إللى هما عاوزينو مهما كانت التحديات وأكيد هينجحو

صدقينى
أنا تجربة حية
والفضل لله سبحانه وتعالى
بعد ما خلصت الجامعة
بكالوريوس تجارة
تقدير مقبول


رحت بقة ودورت على نفسى
بدأت فى كورسات فى المجال إللى بحبو
مجال الكمبيوتر
وبعد تعب 4 سنين
بدون عمل

الحمد لله أشتغلت بقالى 3 شهور فى شركة كبيرة بتوفيق من ربنا والحمد لله
بس وصلت وأثبت للى دارو فى الترس مع غيرهم إنى قدرت أوصل للى أنا عاوزو
بشوية مجهود أو بمجهود كبير


رأى هنا إنى مفيش مانع ناخد شهادة من الجامعة بس بعد الشهادة أتفرغ بقة شوية لنفسك وسيبك من برستيج العائلة


عادى بقة
أودى

Lasto-adri *Blue* يقول...

@ يحيي المصرى
ومين بيحبه؟
بس عارف أنا مش متأكدة إن كنت بكره الكلية فعلا ولا عادى
أصلى حاسة إنه مش فارق.. كل الجامعات المصرية محصلة بعضها.. يمكن هندسة بس اللى فيها حبة تشغيل دماغ.. ورقابة..
جايز.. ومش عارفة

Lasto-adri *Blue* يقول...

@ Bella
إنتى معاكى حق فى كل اللى قلتيه
بس لازم يكون فى حل..
وشايفة إن ابسط حاجة ممكن أى حد يعملها إنه يبدأ يبحث بنفسه عن نفسه عشان يرتاح
الأهل مش ح يتغيروا.. ع الاقل فى الفترة دى.. ولا التعليم كمان زى ما قلتى.. بس ماينفعش نقعد ونقول طب وح نعمل ايه

الموضوع دا كل ما أفتكره بتخنق.. وبصراحة معرفش ممكن أعمل إيه مع ولادى حتى..
بس اظن ح سيبهم يبدأؤوا الرحلة مع نفسهم.. فى أغلب الأحوال

منورة يا بللا طول عمرك
:)

Lasto-adri *Blue* يقول...

@ أحمد الديب
أستاذة إيه وبتاع إيه بقى.. ماتخلى البساط أحمدى
:D
صدقنى وضع 99% من الطلبة يشبه حالنا.. حتى اللى مقتنع إنه ماشى صح.. هو بيضحك على نفه.. لإن اغلبنا ماتعودش يسأل نفسه هو عايز غيه بجد
إنت حتى لما بتشترى لبس، بتكون محدود باللى يحدده لك اهلك.. مابالك بمستقبلك
:)

أه دخلت هندسة من غير إجبار من اهلى، وكان ممكن ادخل أى كلية تانية.. بس أغامر إزاى وأنا مش عارفة العواقب عاملة إزاى.. وإه يرضيهم.. وإيه اللى ماشى فى السوق.. وإزاى اصلا أقنع نفسى إننى ممكن اختار لنفسى ولا أنا أنفع فى ايه أحسن

إحساس بالتخبط، ويابختك... ع الأقل بدأت تدور ع الطريق

Lasto-adri *Blue* يقول...

@ Nada Ali
:)
اسعدتينى بكلامك يا ندى.. حسستينى إنى بعمل حاجة.. مع غنى طنت فى قمة إحباطاتى وأنا بكتب
بقيت أحس غن الكلام ما له معنى أو لزمة فى زماننا..
الناس بتتكلم ومحدش بيسمع.. دوشة وخناق وزعيق.. وإحباطات مستمرة
يمكن يكون فى أمل... من وقع كلامك لازم اصدق إن فى أمل..
يارب تكون حقيقة، مش سراب

Lasto-adri *Blue* يقول...

@ بنت القمر
ياخبر يا خير.. إنتى عمرك ما اكلتى لحمة ولا اخدتى بيبسى من اللى عندى فى الكشك! يادى الكسوف يادى الخيبة
نعزمك المرة الجاية مع 30% القادمة
:D

بس يا أمانى مش عايزة اصدق إنه مافيش أمل..
نسف الحمام فى مجتمع نايم بلا هوية ولا قضية زينا.. صعب.. ولو إنه مش مستحيل.. وأكيد ح يحصل
إنما لحد ما يحصل.. بجد بجد.. لينا ربنا

Lasto-adri *Blue* يقول...

@ Amr Ehab,
طلع الغل والقرف دا وإتكلم
عشان لو ماقدرناش نعمل حاجة ع الأقل ما نشلش فى نفسنا ونموت...
المناهج قديمة.. ومعامل مكسرة.. والقاعات غير صالحة للغستخدام الآدمى.. والدكاترة مستبدة
صحيح فى غستثناءات بس مش دى القاعدة العامة
ياااه.. يمكن دكتور ولا إتنين اللى أفتكرهم بالخير لحد دلوقتى وادعلهم عشان حسيسونى بمعنى يعنى إيه دكتور أب.. إنسان تحترمه من برة ومن جوة حتى لو بيشرح كلام فارغ.. إنما عنده خبرة وإنسانية
نادر ما تلاقى دكتور دلوقتى عنده إنسانية

أنا قرفانة... بس بحمد ربنا إنى نفدت.. الدور والباقى عليكم... ربنا معاكم.. وإنت، ماتفقدش الأمل.. إتكلم

Lasto-adri *Blue* يقول...

@ AD Sabry,
الله يخليكى ويهنيكى.. رافعة معنوياتى دايما
:)
أه معاكى حق.. بيللا طول عمرها حكيمة..
وأكيد اهلنا ليهم دور فى نشأتنا.. بس تفتكرى همه كل السبب؟

Lasto-adri *Blue* يقول...

@ Nouran
إنتى فعلا إخترتى الإختيار التالت بأحلامك
أنا مش بقول إن كل المهندسين مش ح يطلعوا مهندسين عشان مجبرين عليها أو دخلوا الكلية من غير تفكير
بالعكس.. فى ناس نفسها أصلا الهندسة
وإنتى محظوظة منهم.. عشان عرفتى إنت عايزة إيه وليكى رايه وتوقعات للمستقبل
ما تحبطيش.. الكلام دا اللى حاسيين إنهم تايهين فى حياتهم... ومش قادرين يحددوا ممكن يبداؤوا منين

الطرق كلها دايما مفتوحة.. بس تعرفى أنهى طريق -صح- تختاريه

Lasto-adri *Blue* يقول...

@ Sara Atwa
منورانى يا سارة.. بس لاء.. ماتخليش حد يدمرك أبدا!
إدى نفسك فرصة.. وإعرفى شغل الصيدلة.. يمكن يعجبك.. مش دايما الأهل بيجبروا الناس وساعات بيشوفوا مصلحة ما بعيدة عننا
بس فى نفس الوقت ما تطلبيش من ربنا رقم 4.. حرام يابنتى... صحتك يالدنيا كلها
إنما دورى على نفسك
إنتى عارفة إنتى عايزة إيه؟
لو عارفة يبقى غمشى فيها واحدة واحدة... دلوقتى مربوطة عشان مثلا معكيش فلوس تكفى إستقلالك.. إصبرى حبة

أنا دلوقتى فى المرحلة دى... ولو إنى بدأت أعرف أنا ممكن أكون إيه
إصبرى

Lasto-adri *Blue* يقول...

@ ody911
فينك من زمااان قوى
:)
دلوقتى بان كنت مختفى ليه.. ربنا يقويك.. أنا فعلا سعيدة وفخورة بمثال زيك
عندك حق فى كل كلمة قلتها وربنا معاك تستحمل باقى الطريق

freeSoul يقول...

you know, the problem when you start very late to search for your real existence is in the person still value the what so called "achievements" of his previous life, he doesn't understand that those achievements doesn't really belong to them, worthless and can and should be easily dropped to be able to move freely, we don't have the guts to change direction easily, to move to the unknown and leave the simple stupid way we were forced to enter.

only a brave person would be able to dump everything and have a clean start.

NoOR يقول...

كنت ناوي اتفاعل معاكي و ادرس و أحلل لكنك قتلتيني في أخر سطر لما قلتي الحكومه تلحق نفسها و تحكم شعب تاني و احنا نحكم نفسنا الصراحه لغايه دلوقتي بقع من كتر الضحك


لكن وبخلاف ه>ا احب اقول رأي بجد في الموضوع ده

أنا كنت فاكر نفسي من الناس اللي قالت لأ و حاولة تغير لكن وبصراحه شديده ومن الاختيارات بتاعتك


فيتبقى لك عزيزى أربع إختيارات ما لهم خامس:
1. تنضم لنفس الترس، وتدور على شغل وتكون أسرة وتمشى زى ما إنت عشان تخلف غيرك بنفس تفيكرك... وتجبرهم على كلية الهندسة عشان برستيج أهلك
2. ماتدخلشى الدوامة أصلا، وتفضل بتتكلم يا إما عن أمجاد ماضى مش موجود اساسا، أو تتكلم عن مستقبل ح تبدأه بكره.. والعجيب إن بكرة مابيجيش
3. يا تعرف نفسك..
4. يا تقصر الطريق وتنتحر زى طلاب الثانوية العامة.


لقيت اني و بكل صدق طلعت نمره اتنين ايون نمره اتنيييييييين

شكرا ....علي ه>ا البوسط اللي قد يكون سبب في محاولتي الانتقال من نمره اتنين اللي نمره اربعه

قصدي تلاته معلش

micheal يقول...

لكل اللي خلص الثانوية..كفارة يا اجدعان بس أنا عنددي سؤال مجنني..هو إحنا بلد العباقرة عشان المجاميع كلها تزيد كل سنو وخليكي فاكرة أنها لن تهبط هذا العام رغم الدموع اللي شفناها في الجرائد
تحياتي

غير معرف يقول...

طرحتى مليون مشكلة والله فى كلامك البسيط والقليل ده
لكن والحمد لله مقترحتيش حل ولا واحدة منهم .
وأهمهم مشكلتك انتى .
اللى انتى مش عارفاها اساسا لأنك ماشية فى الحياة مش عارفة انتى عايزة ايه .
بتمنالك النجاح ويارب تلاقى نفسك فى حاجة حلوة.

Lasto-adri *Blue* يقول...

@ freesoul
i wish I would be this free.. but its hard in a cruel world like ours..
There isn't any starts.. but illusion of a new one..
lel asaf!

Lasto-adri *Blue* يقول...

@NoOr
:D نمرة أربعة دا لبتوع الثانوية خلاص راحت عليك
ماقدمكش غير تلاتة.. يا تلاتة
:D

Lasto-adri *Blue* يقول...

@Michael
تهبط مين بس
دا كان زمان وجبر
بعدين أصلا اصلا المشكلة مش المجاميع.. المشكلة ثقافة القطيع!

Lasto-adri *Blue* يقول...

@بنت مصرية
ح عتبر تعليقك مشاركة فى الموضوع.. مش هجوم..
مافيش حد عايش مش عارف هو عايز إيه.. مش لازم اللوحة النهائية.. بس الخطوة الجاية.. لازم تكونى عرفاها كويس والا ح يكون فى مشكلة

لو ح أتكلم عن نفسى.. فأنا فعلا عارفة أنا عايزة إيه للمرحلة الجاية.. ودا اللى بعمل عليه

مش مهم بعد كدة نجحت ولا فشلت.. مش قضية حد غيرى

عموما أتمنى بس يكون الكلام اللى فوق نفع حد.. ولا أى حد.. عدى هنا
:)

سنتيمتر من الحنان يقول...

العزيزة لست أدري: هذه مشكلة كليات القمة اللي بتطلع في الآخر قاع. أنا خريجة طب وعانيت مع نظامنا التعليمي لكني كنت محظوظة لأن لدينا عدة تخصصات نختار منها فيما بعد فاخترت الطب النفسي لأني كرهت من الصم والتلقين. فليبدأ كل منا بنفسه وبمحيطه الصغير يمكن نغير حاجة
أسماء شهاب الدين
asmablindspot.blogspot

Rana يقول...

أول ماشفت البوست قلت لنفسي هنرجع تانى لوجع الدماغ اللى استهلكنى 4 سنين فى الكلية والخامسة فى الطريق!
بعد تفكير توصلت لنفس النتيجة اللى فى الكومنت اللى قبلى ،فعلا الطب بيدى فرصة اختيار.
كان عندى عقدة ذنب لأنى مش بذاكر ومش بجيب تقدير ومش حابة حاجة خالص،فى نفس الوقت كنت بحس بالذنب برضه لأنى بقرا وبسمع موسيقا يعنى مش مستريحة فى الحالتين،
الجديد:أيقنت انى داخلة فى العشرينات قدامى الدنيا بحالها لا هينفعنى حد من اللى ماشيين جنب الحيط ولا وسط القطيع..وبقيت مابعملش اى حاجة الا لما أبقي عايزة أعملها،لو طلع فى دماغى أخرج وعندى امتحان كمان يومين ...وماله،أسمع موسيقا بصوت عالى بالليل مش مهم،ماجبتش تقدير بس سافرت وقريت وكتبت وعرفت ناس وأماكن جديدة،حتى المستشفيات خدتها فسحة من غير مذاكرة وناوية أكمل مادمت مبسوطة!

bent يقول...

elmoshkela elakbar ba2a lamma teb2i 3arfa kowayes awi enti 3aiza eah zaie. ana kont 3aiza handasa w mesh 3aiza 3'irha w lamma da7'alatha kan nezam elta3lim fiha we7esh gedan. 7atta elhanadasa tel3et nazari we 7efz w tasmi3 filemte7an bas. w ba3d matet7'aragi tla2i kol e3lanat elsho3'l 3aizin mohandes, walad ya3ni. w tfdali t7awli w t7awli w ma7adesh yerda yesha3'lek.fila7'er tla2i en elsnin fatet w enek ma3andkish ay 7'ebra w ma7adesh hayerda ysha3'alek wenti bent w mesh 3andek 7'ebra. fa tkarari te3'ayari el- career w tdawari 3ala ay 7aga tania bet7ebiha w tebda2i men elawel :)

bent يقول...

ah nesit a2olek enni kont daiman ba2ool ya rithom kano katabo 3ala handasa lelregal fakat. kao raya7ona w kont da7'alt tadbir manzeli ba2a. ahi 7aga mofia bardo :))

Lasto-adri *Blue* يقول...

@سنتيمتر من الحنان
إنتى جبتى اللى فيها
نبدأ بنفسنا أكيد ح نغير المحيط اللى حولينا
سلامى لكى عزيزتى

Lasto-adri *Blue* يقول...

@أكوانى
تكوين الشخصة أهم وأصعب بكتير من تكون مستقبل مهنى
ممكن نكون آلات عاملة.. لكن صعب تلاقى شخصية مفكرة وواعية لدنياها
سيبك من كل وجع القلب.. طول ما إنتى ماشية على الطريق اللى بتحبيه.. يبقى ح تكتشفى نفسك وتحبيها
:)

Lasto-adri *Blue* يقول...

@Bent
فهماكى لإنى كمان هندسة
بس دا مش داعى إنهم يكتبوا عليها للرجال فقط.. لأ أبدا.. لازم البنات تبقى مهندسات زى ما الأولاد مهندسين
الهندسة فن.. وفنها يخليكى تفهمى كل الفنون الأخرى بدرجة تفتخرى بنفسك فيها
:)
ماتقلقيش.. ح تلاقى الشغل صدقينى.. المهم بس تكونى نفسك.. وتكونى مقتنعة اللى إنت عايزة تعمليه
ومالكيش دعوة بكلام الناس.
ممكن تتكلمى عن دا فى يوم كلنا ليلى على فكرة
عشان دى نوع من المشاكل اللى موجودة فعليا فى المجتمع
سعيدة بيكى يا بنت

bent يقول...

hahaha
begad da7ktini. 3ashan da kan zaman ba2a. ana akbar menak ba 7abba 7elwin keda. and I already hanged my career. bas ma3edtesh ktir 3an elhandasa, w 7aga ana ba7ebaha gedan, mate2la2ish.
w 7ekayet lelregal fakat de tarya2a 3ala elli kont bashofo.
bas ana 3omri makont 3aiza ab2a ay 7aga 3'ir mohandesa tool 3omri ba2ool hatla3 mohandesa.
kont had7'olha keda keda 7atta law lelregal fakat :))