السبت، أغسطس 05، 2006

الرجوع للأمام.. لحظة لو سمحت

بيان هام لكل قوى الشعب العاملة: ابحث مع الشرطة على أى نقود من فئة العشرة قرش وسلمها لأقرب موقف..

كنت رايحة الكلية –عقبال عندكم- اقدم تظلم فى النتيجة.. وإذا بى أقرأ على اللوحة الزجاجية الأمامية للأوتوبيس:
الأجرة موحدة
1,10 جنيه

طب أنا سايقة عليك النبى تقولى آخر مرة شفت فيها فئة العشرة صاغ؟؟!
المهم اتوكلت ع الفتاح وركبت.. وللزحمة المتوقعة –حتى لو زاد البنزين 500%- وقفت جانب السواق والحقيقة هو أكتر واحد صعب عليا.. اللى يديه الــ 5 جنيه او 10 جنيه ويقول له فك.. وكمان ايه بيطالب بحقه فى بباقى الــ10 صاغ!!! (شفت الافترى..) السواق كان ح يعيط.. محدش بيبعت 10 صاغ.. واللى يرد يقول "ياااه دا قديم قوى".. ودا السبب اللى خلى بعض الأصوات تتعالى فى الأوتوبيس مطالبة بتعويضات عن الخسائر المتوقعة فى القريب العاجل لعدم توافر فئة الـ10 قرش معاهم.. مما يدفعهم الى التبزير والاستغناء عن الــ15 قرش المتبقية من أقرب عملة ورقية وهى الربع جنيه..

وعلى هذا الأساس عندى اقتراحين أحب أن أناشد بيهما وزير المواصلات..
أولا: يتغير مضمون الاعلان كالتالى..
الأجرة موحدة
1,10 جنيه
ويقبل المساعدات
العينية والمعدنية

على اساس اللى مش معاه 10 قرش ممكن يدفع فى شكل لبان .. بونبونى وشيكولاتة بقى ونرجع لنظام المقايضة... ولبنتك بالموز.. لاء بتاعتى بالنعناع.. وفكرة نقسم... الشيكولاتة اللى بالبندق تبقى بقيمة اتنين شيكوبون بالتفاح..

ثانيا: يصرف "كيس صرة دنانير" لكل من يلحق يبدل 10 قطع من فئة الـ10 قرش فى اقرب موقف.. خصوصا وانى سمعت –بينى وبينك- –من مصادر موثوق فيها- ان فى عملات معدنية من فئة الجنية والنص جنيه قريبا بالأسواق...


وفى الآخر ح قول كلمة لعل وعسى حد يفهم (!!) .. مابلاش الضحك ع الدقون واستعباط المصرى واستغفاله اكتر من كدة .. ح تقول لى البنزين غلى والسولار بقى فى السما و اكل العيش مر وبجرى على سبع عيال.. يبقى لما تبص بص لفوق وسيبك م الفكة.. ادخل شمال وخليها ربع جنيه..
ساهم فى رفع قيمة المواطن المصرى... وخلى شعار المرحلة القادم
ليه تدفع 10 قرش.. لما ممكن تدفع 25


أه قبل سلاماتى... أستودعكم الله الذى لا تضيع ودائعه
فاصل ونواصل


سلاماتى

بى اس: اقتراح آخر لوضع لوحة ترجمة للجهلة اللى زيي فى كل اتوبيس كى استطيع التعامل مع السواق لما يحكيلى عن الريال و البريزة ..
.
.
أب ديتز: اتنشرت *هنا* فى بص وطل

هناك 30 تعليقًا:

Captain L.J.Silver يقول...

hiiiiiiii,ezzayak ???gamda 7ekayet el 1.10 deeh ....maho tab3an el3alam elly foo2 yo7otto fe kershohom el malayeen we ye3`allo el banzeen we el solar we el baid we yeseebo el 3`alaba elly zayena yet7`an2o 3la el bareeza we "elsheln" - we heya 3omla qadeema kanat tosawy 1/20 men el genaih elly asasn a7`roh ezazet pepsi delwa2ty- ....we rabbena ye7`allylna el rayyes we el 7okoma we Jimmy we mama suzan we yeg3alo 3amer !!!!!


P.S: I replied to the last comment u send me which was a week or even more than a week ago ,check it out if u havent yet ; ) ....we mesh 3ayez aday2ek bas el tazallom da zay 2elleto ,asl ana megarrab :))))))))

أحمد يقول...

لا انت لسه بقي مش شفتى الجنيه الفضه العملة المعدنية الجديدة
انا من يومين راكب ميكروباص بديت للتباع ورقة خمسة جنيه
لقيته ادانى ثلاث عملات معدنية كل واحد جنيه

قلت له طيب ما تحطهم في صرة احسن يا ابن الهاشمي

لوووووووووووول

غير معرف يقول...

TOOOL 3OMRY A2OOOOOL....EN BALADNA ABR....HOMMA KHALOOOHA ABR...YA 3EENY 3ALEEEKY YA MASR....WAHSHAAANY...BAS MA2DARSH ARGA3....MOSH 3AYZA ADEFEN FE ABR ...WE ANA SAHYA....

radwa

Haitham يقول...

تعلن خيمة صرافة المعلم الدهل عتهانة عن وجود مخزون كبير من صرر البرايز والشلنات لكل من يريد أن يفك على أن يكون الحد الأقصى للفك جنية واحد نظرا للطلب الكبير ويفك تسع برايز من النوع الفضي والبريزة الفاضلة تمن الصرة القماش / الوسطاء يمتنعون / يمكن استخدام خاصية الحمام الزاجل في الارسال والاستقبال

عك عك عك وتعالى هنا وفك

ody911 يقول...

على فكرة الزنب زنبى أنا علشان دى وشوش يا بنتى ,, أول ما أشتغلت البنزين والجاز غيليوا وبالتالى ال300 ج إللى المفروض آخدهم ويفضل منهم بقيت أصرف عليهم
وعااااااااااااااادى بقة
ومفيش أودى

karakib يقول...

واحدجنيه وعشره قروش
اللي ما حدش يعرفه انه الجنيه الورق هيتلغي و عملات الجنيه الفضه و النصف جنيه بالفعل موجودين ... معايا شويه منهم الجنيه شبه اليورو مع الاعتذار لليورو و النصف جنيه شبه الشلن ...
طبعا لما الورق يتلغي انا هسيب المحفظه الجلد اللي اشتريتها قريب و كنت فرحان و هاضطر اجيب كيس قماش شيك ابقي احطه في جيبي اللي قدام علشان مش هينفع اقعد و في كيس فضه في جيبي اللي ورا ...
جميل اوي اوي اوي موضوع الجنيه و بريزه لانه هو ده اللي كان ناقص علشان يصعبوا علينا العيشه هي تفاصيل صغيره لكن تخنق و الحمدلله انا عندي حصاله فخار مليانه برايز و ريالات و شلنات فيها بتاع 30 او 40 جنيه دلوقتي هكسرها اكيد و ابتدي استخدمهم و شكرا لمن عودني علي هذه العاده ...
انتوك

abderrahman يقول...

هو الاتوبيس ده نقل عام "هيئة"..؟؟

كلمه يقول...

loooooooooooooooooool
gamda elteneen....awel maaarh elsara7 asma3 7war el 10 sa`3 da
bas de mesh wel maeh el7ga teb2a keda ...am faker lma kan kees elchipsy be 40 2ersh
wel pps be 60 2rsh
bas de awel mrah asma3ha fel mowasalat
elbld ba2et to7fa walhy ...terga3y bel salama

Dina El Hawary (dido's) يقول...

Looool ...
تصدقي ضحكتني يا لست أدري ... و الله احنا حالنا بقى يضحك فعلاً

islam yusuf يقول...

ياااه هوا لسه فيه حاجه اسمه ابريزه
أنما مش فاكر آخهر مره مسكتها امتى

لكن ده فعلا يدينا أمل و ده مؤشر جيد لظهور هذه العملات النادرو التى ستعطى للمواطن قيمه متحفيه و سياحيه
حيث سيعرض هذه العملات للسائح و اللى ما يشترى يتفرج و البصه بربع جنيه

كان معكم من وكالة اللأنباء الماليه
شلن ابن بريزه

غير معرف يقول...

هم يضحك وهم يبكي

maxxedout يقول...

أنا معايا فى حيبى دلوقت 10 جنيه عشرات صاغ
ممكن ابيعلك ال 10 صاغ ب 15 قرش

محمد أبو زيد يقول...

نفسي أحمد نظيف وسامح فهمي يركب أتوبيس 926أو أي اتوبيس بيعدي ع الجامعة

ده هياكلوا ضاااااااارب

Deeeeeee يقول...

Ana mesh shayfa 7aga 3'areeba... el7okouma elmasreya 3'alet el mowaslaat 10% bss baynama zawedet ogour elmowazafeen wel 3omal elmet3ayeneen 2abl sanat tamaneen 200% 3an elmoratab elassasy elli et3ayenoh beeh.. ya3ni lw 7ad *sa3et-ha elarkaam di kanet mantekeya* met3ayen masalan b-30 geneeh... ahoh keda melbab lel-taa2 ba2a beya7'od zeyada 3ala morataboh 30 geneh... w Allahumma la 7assad! W tub3an e7na 3arfeen el 30 geneh fi elzaman elli e7na fih da te3mel eih! 3amaar ya MASR!

غير معرف يقول...

والله مش عارف بجد ليه انتى بتكتبى موضوعات فعلا فيها ترفيه بدون ابداع انا حيران جدا فيكى يا لست ادرى مش عارف عجبنى اوى احساسك فى موضوع الميكروباص فى الدستور لكن انتقدتك بشدة عشان بعيدة تمام البعد عن الإبداع فى موضوعاتك بجد مش عارف اقولك ايه غير انك تدخلى وتشوفى المدونة بتاعتى وتقوليلى هل انا فعلا اللى من الطبيعى انى انتقدك لأنى غلط ولا انتى اللى فعلا غلط ولا انا وانتى صح ولا ايه مش عارف اقولك غير حيرااااان البلوج اهى على العموم http://www.2arar7or.blogspot.com/ واشكرك على كل حال

عوليس يقول...

احنا بتوع الاتوبيس ياخوانا

Ahmed Shokeir يقول...

لمن يبحث عن الإبداع

الكتابة الساخرة في حد ذاتها إبداع

وبعدين العنوان لايخلو من ذلك

لقطة حلوة يالستو ولكن توقفت عند التظلم من النتيجة ، ياريت تحكيلنا الحكاية

Unknown يقول...

ماذا تريد يابن ابى بلتعة
الم اعطك كيس النقود
- لا يا سيدى لقد أخذه حيي بن الأحطب
بكم هذه الحاجيات يا بن ام مفضوحة
بعشرة دنانير
اسكت ثكلتك امك
انا بقول ايه
ده انا رجعت
لأيام الجاهلية

تحياتى

Dina El Hawary (dido's) يقول...

والله يا لست أدري الموضوع واضح أنه معمم في كل أنحاء المحروسة
امبارح رحت مكتب البريد اجيب نموذج تجديد جوار سفر .. قيمة النموذج 55 قرش فكة لوسمحتي كما قالت الموظفة على الشباك
منين بقا نجيب الـ 5 قروش دي
طبعاً الله أعلم و الحل إنك تدفعي باقي الربع جنيه صدقة كده
يعني أنا مش عارفة اللي بيحطوا القيمة دي بيبقوا بيفكروا إزاي و لا بيفكروا أصلاً و لا لأ .. و لا احتمال بيستهبلوا قصداً
يعني المعني في كرش الشاعر بقا

farida يقول...

ليه ندفع اقل لما ممكن ندفع اكتر
و ليه نكسب اكتر لما ممكن نكسب اقل
ده هدف الحكومه الجديد
أسفه ده الهدف القديم جدا
الهدف الجديد هو
و ليه ممكن نعيش اكتر لما ممكن نعيش اقل
لأنه من الملاحظ إصابة الكثيرون بأمراض قلبيه و سرطانيه خطيره نتيجه لسياسة حرق الدم المتبعه
و ربنا مع الغلابه

الأميره أوسه يقول...

زمان كان فيه عمله أسمها نص فرنك
هو أنتى بتكتبى فى الدستور
طيب ممكن تكتشفينى
أنا كاتبه بوليسيه
أسمى
أوسا كيرستى
ونشرت حتى الأن ثلاث قصص و أتنين بنطلون
يارب يكونوا نشفوا
العواف

شيمـــــاء يقول...
أزال أحد مشرفي المدونة هذا التعليق.
Polka Dotted يقول...

LOL hehehehe
7war targamet el rial wel bariza wl shelen da ana 3an nafsy ba3anee menno :D
w 7war el 10 sa3' fe3lan byermy 3la rob3 geneh...aslek mesh 7atedelo el rob3 w testanee el 15 ersh !!
wel geneh wel nos geneh fe3lan mawgood..law 3aiza ab3atlek ;)
post gamed mooooooooot

Lasto-adri *Blue* يقول...

captin
ahlan bek
sorry do not know fen el last comment deh, can u give me a link plz?


احمد
ههههههه
تصدق نفسى اشوف الجنيه الفضة دة.. بيقولوا شكله جامد مووت


radwa
وحدووووه


haitham
انا لو اشتغلت سمسار فى الحوار دة.. اكسب كتير؟؟


ody
طب انت عندى هنا بتعمل ايه؟


karakib
طب ايه ما تجيب شوية


abduo basha
هو اخضر.. مش عارفة بقى نظامه ايه


كلمة
yeah to7fa moot el balad wallahi :D


dido
اه والله..

Lasto-adri *Blue* يقول...

islam
اهلا يا ريال
بجد ممكن دلوقتى تبيع الــ 10 قرش بربع جنيه


bosbos
ما عادى بقى


maxxed
اهلا بالسوق السودا


epitaph
hehe


محمد ابو زيد
انا بقول كدة برضو
يمكن عشان كدة نظيف ساكن فى 6 اكتوبر بعيدا عن الضوضاء وعامة الشعب


deeee
عمرى ما سمعت عن زيادة 200% ديه
بس يا ع الرحمة
يوم ما يزودوا يفتروا
ديييي.. لهو انتى جبتى موضوع 200% دة من كتب الخيال العلمى؟؟


anon
مش عارفة ايه وجهة نظرك فى الابداع و الاحساس
يعنى ... انا وصلت لحكمة اعذرنى لو قلتها فى وش اى حد
بس أخيرا بقيت بكتب عشان انا عايزة اكتب.. مش عشان حد عايز يقرأ
يلا ح زورك فى القريب ان شاء الله


tarek
voila, i did ;)


عوليس
واللى ورا يبعت.. اللى ورا يبعت

Lasto-adri *Blue* يقول...

ahmed
لما أعرف نتيجة التظلم باذن واحد أحد اقول عن الحكاية مع انها مافيهاش حاجة قوى
:]


ابو امل
اهلا بك فى الأراضى اللستو أدرية يا ابن الملوح


dido
بظبط زى فلوس السنة الردراسية
37 جنيه و 20 قرش
حاجة مستفزة الحقيقة


farida
اهلا بيكى.. ومبسوطة انك نورتينى بالزيارة
فعلا حاجة تحرق الدم


aoosa
بكتب فى الدستور؟
قلبك ابيض يا بنتى
انا آخرى انشر شراب جنب البنطلون بتاعك
ههههههههههه


الغريب
الله يكرم اصلك
بس مشاكل مين
والله ما بكتب فى الدستور... ولا شفت مناها مليم احمر
مجرد كام بتاعة كدة اتنشرت.. برو عتب بس


batabeet
اه ونبى ابعت صرة


epitaph
10 صاغ.. يعنى ناقص 5 قرش
انا لو منك ارفع دعوة قضائية عليه مطالبة بالتعويض
ههههههههههه

Captain L.J.Silver يقول...

la2 3ady el mawdoo3 mesh me7tag link wala 7aga : )))))...enty konty sa2lty a a7`bar el nateega fa sa3et-ha ana raddait we 2olt : " lessa matel3etsh we keda ....we sa2ltek sa7ee7 enty me7`alasa walla ray7a rab3a zay 7alaty " ..bas keda fa enty mashofteesh el reply dah ...we by the way ana neg7t we gebt gayyed : )))))))) ....belzabt gayyed !

Lasto-adri *Blue* يقول...

ya salam,, da e7na zomal ba2a
ana tal3a Bsc isA,, w gbt gayed bardo :D

shake hands then

Captain L.J.Silver يقول...

a dah bgd ???da 3la keda e7na once konna dof3a wa7da 7a2ee2y FORSA NEDEEFA fe3lan : ))))))))) ...bas ew3y te2oly ennek fe Tebbia kaman ....! keda ana momken ye7sally 7aga !

Shake hands !

abderrahman يقول...

أيوه حصل
كانت البداية مع أبو 160 قرش
وحاليا أبو 110 في تقدم