الأربعاء، أغسطس 16، 2006

عمار يا مصر.. عمااار

ورحت.. ورحت النهاردة أرض المعارض...
طب بس آخد نفسى وأتكلم... خلاص.. مش قادرة احدد مكان كعاب رجلى... ونفسى فى طشت مية بملح... وأه مخدة.. وسرير.. وطبق أكل.. أصل أكل دة حكاية منفصلة (ح قولها ماتخفش).. وايه .. وايه.. طب بص.. أنا ح بدأ من الأول..
لما قرأت موضوع عند نيرو ونورا عن التطوع للمساعدة فى فرز وتعبئة المساعدات للشعب اللبنانى، طقت فى دماغى اشارك.. (أهوه أحسن من ما بقنع نفسى بالاكتفاء بالجزيرة وكام كلمتين تعبنين مواساه للشعب).. المهم... جمعت صحبة لا باس بها واتفقنا نروح يوم الأربعاء (أيوة اللى كان النهاردة)...

بظبط الساعة واحدة كنت فى أرض المعارض (كالعادة متأخرة نص ساعة عن أصحابى).. بس ما تدقش.. أول ما دخلت من البوابة كنت متخيلة الدنيا زحمة بقى وكدة (آل يعنى عشان السياحة والتسوق).. انما هششششش.. مافيش مخلوق غير "Stereo" تعبان (دا بفرض انك ح تدخل من بوابة صلاح سالم).. وبعد نقعة معتبرة فى الشمس، وصلت مع أخويا قاعة 3 .. هناك بقى معرفشى.. بس استغربت.. كنت فاكرها صالة أصغر من كدة.. زحمة وكئيبة بقى وناس مبهدلة وبتاع.. طلعت لاء بالعكس.. اغلب اللى موجودين شباب جامعات شكلهم يفرح القلب.. والهوا هناك معرفش ليه ريحه خفيف كدة على القلب..
فى الأول كنا حوالى 30 فرد بنشتغل فى ركن الملابس (بنقوم بفرز الملابس.. الجديد فى كراتين لوحده ح يتبعت للبنان.. والمستعمل لوحده عشان يتوزع داخليا فى مصر...) وكان فيه ركن المياة وركن المأكولات.. وركن الأدوية.. وركن الحبوب.. الخ.. وكان فى كل ركن من 5 الى 10 أفراد.. على حسب ما بيتطلب العمل..

أول ما رحت ماكنش فى شغل كتير قوى.. فدلقونى على ركن الملابس... بالظبط كنا مقسمين نفسنا، مجموعة للبس الرجالى والحريمى و الأطفال... نعد عدد القطع اللى بتتحط فى كل كرتونة، ثم يجى ناس ورانا يلزقوها ويكتبها عليها من برة.. وهلم جر.. بس لاء... شفت المعاناة فى القسم دة الحقيقة.. الناس كإنها بتفتح الدولاب وترمى كل اللى فيه!! يعنى تصوروا وسط اللبس ممكن تلاقى أدوية.. وممكن تلاقى لبس افراح (نصيحة ما تستغربش.. لانك لو كملت معايا فى الكلام ح تكتشف ان كان فيه لبس داخلى مستعمل !!! ) فاتقرفت الحقيقة.. اصل يعنى ما ضاقتش الدنيا عشان تبعت حاجة طلع عين اللى جبوها وتقول معونة!! وياعالم.. لو هدوم ماشى.. انما داخلى!!!!
ماعلينا... شوية كدة وحولت على ركن الأدوية.. وكان مش بطال الحقيقة.. فرزنا الادوية وعملنا كراتين بالحاجات وكله ألسطة.. بس الشئ اللى لفت نظرى حاجتين..
1. كان فيه ادوية بتيجى مستعملة -قليلة الكميات قوى الحقيقة- (اكيد اكيد من اصحاب الغيارات الداخلية المستعملة برضو.. لا شك)
2. أووف... فى شلة هناك رغاية قوى ومش بتعمل حاجة.. وتتصور وتاكل بس !!

كام نص ساعة كدة ولقينا الناس وقفت شغل.. وحبة اتلموا على اول الصالة.. فى ايه يا اى حد؟!.. طلع التلفزيون بيصور... ولجل الصورة تطلع حلوة، اولا لبسوا (فعل ماضى مبنى للمجهول) مجموعة من المتطوعين تى شيرتات عليها علم لبنان.. ثانيا خلوا (مبنى للمجهول برضو.. آل يعنى) مجموعة تطلع نفسها نفس الكراتين اللى كنا منزلنها من العربية النص نقل اللى قبلها.. عشان التلفزيون يصور و الناس بتنزل من على العربية !!!! (فعلا.. شعبنا شعب عريق)
الأكل دة بقى حكاية تانية خالص... ما أصلنا نفسه الشعب العريق...
واضح ان كان فيه ناس عارفة من قبل كدة ان فيه اكل بيوصل.. فتلاقيهم اتجمعوا على الباب فى الانتظار قبل الهنا بسنة (وأنا أسأل نفسى.. همه مش بيشتغلوا ليه!!) *هبلة من يومى.. وآل ايه رحت أكمل شغل*.. بس.. وصل الأكل.. ومستنين ايه ؟؟؟!!!!!!!
هجوووووووووووووووووووووم.. شوروروم بوروروم... فينيتوا يا عبد العال
بقى أنا يا حبة عينى الهفتانة الوقعانة التعبانة الشغالة من أول اليوم ما حدش يعزم عليا بعلبة بسكويت حتى..
*بركاتك يا ست الحاجة.. فطرتينى كويس والحمد لله*..

بعد الغدا بقى.. بدأ الشغل اللى على أصله.... Yuppieeee
مثلا مثلا نقول ح نعمل كراتين 30 كيلو سكر الواحدة.. يبقى فى مجموعة تلصق الكراتين.. ومجموعة تعبئ.. ومجموعة تقفل ومجموعة تحمل.. وهكذا.. خلصنا فى ساعة السكر و الرز والدقيق... وكان فى مجاميع تانية مع العصاير.. والمكرونة و المعلبات.. الخ الخ.. هنا بقى انا انبسطت قوى.. خصوصا لما كنا بنعمل صفوف وكل واحد يناول اللى جانبه.. لاء احساس مختلف

كان فيه ناس واقفة تصور بالكاميرات الديجيتال.. وكنت بمنى نفسى يكون حد اعرفه يبعت لى الصور.. بس .. مممم.. انا معرفش حد (بفرض انهم بلوجرز زيي زيهم) ... كان نفسى اجيب صور معايا والله.. لكن العين بصيرة واليد قصيرة (الحرب الجاية ان شاء الله.. هههه).. بس عن دلوقتى ياريت اللى ورا يبعت.. ولو كان فيه بلوجرز صوروا يبقى بلاش ندالة واتحفونى بحبة...

مم.. فى الآخر الحقيقة تعبت.. وأخويا اتهد من كتر الشيل و الحط.. وآخرنا بقى دوش مية ساقة وننااااام... رحنا جرينا عجلنا على الساعة 6:30 كدة للبيت ضررررر.. (وقتها كان العدد وصل لى 50 او 70 فرد موجودين فى الصالة)
واحنا ماشيين للمحطة قال لى أخويا وقلت له "لازم ح نيجى تانى"
مش مفاجيع والله.. الحاجة ح تفطرنا تانى.. مجرد فقط للاحساس المختلف..



بى اسات كتيييير:
* اللى ناوى يجى يبقى يجيب اقدم شئ عنده يلبسه.. وللبنات بالذات.. كوتشى يا أمى وبنطالون جينز غامق عشان ح تتبهدلى.. ولو انتى من النوع بتاع أنا اركب تاكسى آه.. مايكروباص لأ.. يبقى أحسن لك.. وحفاظا على مرارة الخلق أقعدى فى بيتكم
* لو رايح وفى نيتك تروح من أجل الشغل وللشغل يا نعيش.. يبقى إمسك أعصابة أو يحطها فى تلاجة.. فى حبة بيروقراطية مصرية على حبة كسل.. على حبة تناحة على حبة لكاعة تخلى الشغل اللى بيخلص فى ساعة يخلص فى ساعتين (هنا القاهرة مش لوكسمبورج)... لكن سواء كدة او كدة.. كان فى ناتج يفتح النفس برضو..
* لو انت جعت فى النص يبقى عندك حل من اتنين.. يا تجيب أكلك معاك.. ودة أكرم لك.. يا تجيب حد عريض المنكبين ضخم الجثة يشارك فى الهجوم... او فيه حل أوقع حقيقى.. انسى بطنك وريح بالك
* العملية ينقصها نظام بجد.. دا اكتر شئ كل اللى اجمع عليه الناس كلهم... فبرضو استهدى بالله واحمد ربك انك لقيت شئ تشارك فيه من اصله
* نصيحة سيبك من جروب المشرفين.. ح تتعقد.. معرفش دول اساسا جاين يعملوا ايه... (بلاش نم بقول لك ..)
* هات اصحابك وروح.. اللمة ظريفة والله وبتفتح نفسك ع الشغل
* ماتفكرشى تروح ناحية السياحة والتسول نهائيا..


.. ممم... معانديش شئ آخر افتكره دلوقتى... بس بجد بجد بجد يا جماعة روحوا هناك واشتغلوا... ح تشوفوا شباب يفرح.. رايح يشتغل كإن لبنان بلده وأكتر...
خلونى اقول ان دول لو مسكوا البلد.. صدقونى كان حالنا اختلف من زمااااان

يلا.. لقاءنا يوم السبت لما أروح تانى ان شاء الله.. ولو لقيت زيادة ح قول.. وادعولى اجيب صور

تمنوا لى نوم هادئ بقى
سلاماتى

هناك 23 تعليقًا:

غير معرف يقول...

السلام عليكم .. يا اهلا وسهلا بأختنا بلو اولا انا قرار حر المهم يا بلو عشان نوصل لصلب الموضوع الإبداع اللى انتى مش واخده بالك منه هوا كالتالى: إنك بجد تحسى انك بتعملى نهضة فى الفكر مش هقولك انتى تعملى مثلا حاجه زى افلاطون ولا ارسطو ولا حتى ابراهيم الفقى انا هقولك شىء صغير اوى انك تكونى فعلا راضية عن اللى بتعمليه بحيث انك تشعرى بجد انك بتأدى رسالة جميلة تستحق كل التقدير يعنى مثلا انا اه مش زيك فى الكتابة يعنى مقالاتى كلهم 14 وكنت من اشد اشد ناقدى الحكومة وفعلا عملت معادلة صعبة وبقيت انتقد نفسنا احنا والمجتمع لأن المجتمع هو السبب وراء تضليل وتخريب الحكومة لعقولنا ولكل ما نملك وانا بكده مش بقولك انى مبدع لكن بسير على الطريق بتاع الإبداع ولو شوفتى اخر مقالاتى هتحسى بالفرق عن اول مقالات دا اللى اقصده من الإبداع وعن مسئلة العندليب العندليب محبوب من ملايين مش مشكلة انك متكونيش من محبيه وآخر شىء معلش طولت عليكى إنى بحب اكون من مفيدى الشخص اللى بهتم بكلامه لأن اى انسان عاقل يقول إن النقد البناء احسن خمسين مرة من الإشادة الىل بيبقى بعدها خمول وركون على العموم ربنا يكرمك ويوفقك واشكرك على تنور دى بجد انتى بتعرفى ازاى توظفى كلامك وحق الرد مكفول مع الف سلامه(بالمناسبة عمار دا اسمى ) بس فى شده على العين مش فتحه زى عمار يا مصر معلش صدعتك

ZanGooLaaa يقول...

اول مرة اسمع عن موضوع المساعدات ده و بجد كان نفسي اكون موجود معاكم .. و طبعا الواحد في الآخر هوه اللي مقصر في المشاركات دي .. بس نعمل ايه الكليه مطلعه عنينا :)) ربنا معاكم و يكرمكم ان شاء الله


بالنسبه لموضوع التلفزيون و الصور :) مفيش فايده .. المصريين اهمه ههههه

The Eyewitness يقول...

أولاً انا بفرح لما بسمع عن ناس بتشارك بحاجة ذي ده وبالروح آلي أنت بتحكي عنها.
ثانياً شكراً على النصائح عشان انا ناوي أروح الأسبوع الجاي. وأهم نصيحة بالنسبة لي موضوع هدؤ الأعصاب ده عشان انا دمي بقى بيتحرق بسرعة بذات مع عدم النظام، عشان كده انا دمي تقريباً محروق طول الوقت.
أنشاء الله المرة الجاية توفقي في أخذ صور.

غير معرف يقول...

موضوع جميل فعلا لكن كبير ياريت تبقى تلخصى يا لست وتحاولى فعلا تعرفى ان مش ممكن حد يقرى الكم دا كله دا انتى اذاعة راديو متنقلة ايه دااااااا يا بنتى ههههه معلش بقى انا متغاظ حبتين عشان اللى ربنا غضب عليه وقرى الموضوع كله جاله صداع كبير لكن بجد موضوع جيمل ربنا يوفقك يارب وان شاء الله نشوفك دايما فى عمل الخير

Captain L.J.Silver يقول...

Wallahy ba7awel aqne3 fe so7aby ba2aly keteer we mafeesh 3`air wa7ed bas 3ayez yeegy !!! lamma zehe2t we 2olt maneesh raye7
:s

Gid-Do - جدو يقول...

تحية واحترام ليكى واخوكى على اللى عملتوة والعمل التطوعى هو اللى خلى امريكا بالصورة اللى هى عليها دلوقت
والسلبيات بتتحسن مع الوقت الف شكر على اللى عملتوة

Nerro يقول...

أختي كانت هناك امبارح..مش عارفة صورت و لا لأ يا لستو...بس هنبقي هناك النهاردة ان شاء الله.

nora younis يقول...

أنا هاروح السبت كمان.. خلينا نتقابل هناك ونشجع بعض.. وفقا لنصايحك أنا هأروح بعد الغدا وهأشوف ايه نظام أخويا واصحابه

Nesrina يقول...

أنا رحت امبارح فعلا و رحت يوم الحد الفات و الفرق كان كبير جدا، امبارح ما شاء الله، كله كان بيشتغل و بيشيل و بيساعد بعض و كانو منظمين جدا، أنا هروح النهاردة تانى إن شاء الله

Deeeeeee يقول...

أول مرة من زمان مابقاش واقفة كده مكتوفة الايدي....هو صحيح انا كل عضلاتي مش شغالة بس الموضوع يستاهل و ان شاء الله نروح النهاردة و بكرة و بعده

dr_shadow يقول...

انا برضه كنت هناك إمبارح .... وبرضه رايح يوم السبت .. وكمان معايا صور !!!!

فيه مجموعه منهم لسه مطلعتهمش من على الموبايل .. بس فيه مجموعه تانيه طلعت ومجموعه تالته صورها بلوجر معرفه ...

دى لينكات الصور
http://mosho.egyblogs.com/3.gif
http://www.m7abib.com/lebanon/2-flags.gif
http://www.m7abib.com/lebanon/place1.gif
http://www.m7abib.com/lebanon/place2.gif

فيه صور تانيه نازله قريب ان شاء الله ... ويوم السبت هاعمل حسابى فى الكاميرا واغرق البلوجز صور :)

سامية يقول...

يا بلو يا جميلة .. مش عارفة أقول لك إيه. إنت بميت راجل والله! ان شاء الله أول ما نخلص الأمسية حتلاقيني معاكو ويا ريت حتى نبقى ننسق ونروح مع بعض

وان كان على عدم التنظيم واللخبطة.. معلش.. كلنا متعودين على كده. المهم ان في الآخر تتطلع حاجة مفيدة حتى لو المجهود (بسبب عدم التنظيم) مضاعف

El Masry يقول...

Great Stuff Blue,

bas kan elmafrood te2ooley ene elnasaaye7 elly nasa7tahalek kanet mofeeda :P
Just kidding. yalla me7tageen motatawe3een ya shabaab :)

ana sa3eed.

Lasto-adri *Blue* يقول...

عمار
استمتعت بقرائة تعليقك.. متشكرة
وتنور فى كل وقت يا عمار بالشدة
;)


zangoolaaa
هو انت شكلك طب كدة
ربنا معاك.. المهم النية.. والمهم برضو تكون فعلا مشغول.. مش مكسل
:P


the eye witness
لاء حقيقى نصيحة.. مش بس عشان المساعدة دى.. انما فى حياتك.. امشى واسحب وراك تلاجة اعصابك.. عشان الشعب اصاب بحالة من البلادة و البلاهة والتناحة غير طبيعية



anon
انت بجد ضحكتنى من جوة كدة
عشان انت اجدع واحد شفته عامل
crap sandwitch
فى تعليقه صح... بس اقول ايه بس.. انا الرغى هواية ساعات لما اكون رايقة زى دلوقتى كدة
عينى ححاول اقصر و أجيب م الآخر الفقرة المقبلة


captin
روح لوحدك يا أخى
الله!! تلاكيك


giddo
همه بس يدوا الشباب الفرصة يا جدو.. وصدقنى ح نبقى حاجة تانية
بس تقول ايه... ربنا ع الظالم و المفترى


nerro
كنت عايزة اروح النهاردة كمان عشان اشوفك.. بس يلا حصل خيير

Lasto-adri *Blue* يقول...

nora
طب رائع واله.. ما نعمل لبس موحد لكل اللى ح يروحوا يوم السبت عشان ع الأقل نقدر نميز بعض
يااااه.. ما أجملها مناسبة انى اعرف ناس زيكم



nesrina
اصحابى اللى راحوا برضو قالوا ان فيه فرق..
ربنا معاكى يا نسرينا ومع كل المتحمسين زيك



deeeeeeeee
البنت دى بميت راجل اساسا
دى كانتو اقفة اديهاعلى ايدىفى الشغل يا جماعة وماقلكومش.. من كتر التعب قعدت على الأرض جانبى بهدومها....
يا الله.... قد ايه الناس معادن
فرحانة بيكى قوى يااحلى ديهايا فى الدنيا



dr shadow
هو انت اللى كنت واقف تصور
اولا متشكرة ع الصور
ثانيا ربنا معاك ان شاء الله
كان شغل الولاد الحقيقى يومها مشرف



سامية
طب والله بجد يبقى رائع.. ننسق ونقابل كل بنات البلوجز دفعة واحدة بقى هناك
...
ح تنبسطى عموما
قوى


el masry
مش عارفة انا نسيتك فى الكلام ازاى
:$
لاء بجد.. هو اللى قال لى موضوع البس اقدم حاجة عندى عشان ما بهدلشى لبسى.. واللى نصحنى اروح بدرى بدرى عشان الاقى شغل
مم.. كالعادة رأيك فى محله
:)

ادم المصري يقول...

ياعيني
هي دي المعونة اللي عمالين يفضحوا بيها لبنان في الجرايد


هههههههههه

nefertiti يقول...

mawdo3 yefra7 fe3lan.. nefsy ashof 9owarek enty :P
have a nice day ya amar

Abdou Basha يقول...

أولا أنا بشكرك جدا على انك كتبتي على الموضوع ده مهما كانت ظروفه، لإن النشاط التطوعي غير الجانب الخيري اللي فيه ليه جانب اجتماعي مهم..
أنا كنت بفكر أروح فعلا.. بس أساسا عشان أكتب عن الفكرة .
يمكن أروح بكرة السبت.. مش متأكد
شكرا جدا يا ايمان على البوست ده

Me2 يقول...

بصراحة و بالرغم من كل العيوب اللي بنعاني منها كمصريين
لكنك أثلجتي صدري المولع من كتر الحموضة اللي جاتلي من حرقة دمي :)
و ربنا يكرمك على مجهودك و يكرم الجميع
ياريتني كنت في القاهرة علشان أقدر أساعد ولو إني مش متأكدة إن جوزي كان هيوافق بس بردو النيه مش وحشة

طموح بلا حدود يقول...

بصراحة انا باحيكي علي عملك التطويعي وروحك الجميلة في سرد الاحداث بس انا كنت عايز اسالك سؤال هو الاكل كتير علشان اجيلك هناك ولا ايه النظام
خلاص خلاص

high_staff يقول...

هلا انا اسمى ندى جديده فى عالم التدوين وعايزا اعمل انتشار لمدونتى بس مش عارفا ازاى ممكن تساعدنى
www.satiagraha-x.blogspot.com

3rby يقول...

انا عايز اسال علي حاجة مهمة...هو الواحد يقدر يروح لحد امتي؟.....يعني هايفضلوا فاتحيين باب التطوع لحد امتي....اصلي نفسي اروح...ياريت بلاش ندالة وحد يرد عليا مرة في البلوج ده بليييز

Lasto-adri *Blue* يقول...

ahlan bek ya 3arby :)

والله مافيش ندالة ولا حاجة.. انا بس كنت برة وكدة
المهم، على حد علمى تقدر تروح لحد يوم 8 سبتمبر

بس فى حاجة جديدة ياريت لو تتصل قبلها عشان دلوقتى الأعداد بقت كتيرة، فامش كل الناس بتستمر

او حل افضل.. تروح من بدرى عشان تلحق شغلانة