الجمعة، يوليو 22، 2005

حاجات وحاجات




فى حاجات عند كل واحد فينا معتقدش ممكن تتخيل حياتك من غيرها؛ مع إنك ولا مهتم بيها أصلاً. عندك صوت الأذان، وصريخ المنبه بتاعك الصبح، غير كباية الشاى أو النسكافيه مع فطارك، والميكروباص أو الأوتوبيس *صديق الكفاح*، ودش ساقع بعد يوم عصيب، والكيبورد، وأقلامك ومكتبك، وحتى الريموت كونترول.

وبرضو فى حاجات هى اللى بتلون حياتك بسبع ألوان الطيف مرة واحدة. مثلاً إنك تقع على كتاب معتق كنت بتدور عليه من فترة، أو إنك تلطقت إذاعة جديدة على موجات الراديو *لو إنك مدمن زيى *، أو إنك فى يوم زهقت م الدنيا وقرفها فقررت تتمشى ساعة عصارى ع كوبرى قصر النيل أو تروح الاوبرا، ولا ترجع م الشغل مرة تلاقى روايح محشى ورق العنب والفتة أم خل وتوم وملوخية طاظة جيالك م مطبخ الحاجة، ولا إيه رأيك لما تفضل أغنية تزن على ودانك وفجأة تسمعها بالصدفة وإنت معدى جانب محل معلى الراديو أو تسمعها فى شريط وإنت راكب عربية صاحبك.

لكنك دايما دايما بتنسى الحاجات الصغيرة دى. دايما تلوم الناس والأهل والعيشة ع اللى عايشنها. -والحق أقول- إنت وأنا السبب الرئيسى والعامل المباشر فى إن البلد بقت عيانة. إنت وأنا ناسيين الحاجات الصغيرة وبنركز على اللى ع الرفوف وإدينا مش طيلاها.

صحيح البلد تعبانة، وصحيح الحالة بقت فى نزعها الأخير، إلا إننا ممكن نستمتع بالحاجات الصغيرة اللى ممكن تغسلنا من همومنا كلها. وعلى رأى المثل الإنجليزى : إهتم بالحاجات الصغيرة ح تلاقى الحاجات الكبيرة إهتمت بنفسها*..
ونصيحة منى كبروا الدنيا والناس ع الآخر.. صحيح أنا من فصيلة الناس برضوا، إلا إنه عن تجربة : الناس ما بيجى وراها إلا وجع الراس.

المثل الأصلى:If you care for the pennies, the pounds will care for itself.*


أنا كدة أرضيت ضميرى.. سلاماتى

هناك 7 تعليقات:

littilemo يقول...

دى اعراض شيخوحه مبكره

shady يقول...

كلام كبير
بس اعتقد ان دى فعلا اعراض الناس اللى جابت اخرها ذى حالاتى
المفروض الشباب اللى ذى حالتنا يحاربوا علشان يغيروا الواقع المر بتاعنا
لكن باين انهم عرفوا يخلصوا علينا
كفايه كده الواحد جاله اكتئاب

Nefsy يقول...

ساعات احب حاجات ميحبهاش غيرى
فى الريحه فى الجيات بغنى مع طيرى
عجبنى أوى أسلوبك وحبك للحاجات الصغيرة اللى مليا علينا حياتنا .. عجبنى شكل البلوج بتاعك الجديد :)

ألِف يقول...

أنا ممكن أستغنى عن صوت الأذان اللي خارم ودني دلوقتي حالا (راجعي وقت التعليق علشان تتأكدي :)

Lasto-adri *Blue* يقول...

Little mo:
يا ريت تكون شيخوخة و أفوق الإفاقة الأبدية بقى وأخلص

Shady:
عندك حق والله.. أنا فعلا مكتئبة وبحاول أطلع وأطلعكم معايا بأى شكل

Nefsy:
شكرا ع المجاملة الجميلة بتاعتك

ألف:
أممم.. كل واحد وراحته.. لكنى مستحيل أستغنى عن صوت الأدان بصوت محم رفعت أو غيره اللى بيطربونا صاعة المغربية بذات فى رمضان

S H E B A K يقول...

صوت فيروز أول ماصحى
اول فنجان قهوة فى اليوم
الشوارع فى الشتا الصبح
الشيكولاته و افلام الكارتون
الميه الساقعة فى يوم حر مووت
و الموسيقى اللى بتحبها فى حفلة لايف

Lasto-adri *Blue* يقول...

Emad:
جميل قوى إنك عارف الحاجات اللى بتبسطك.. ويارب دايما