تنويعات على لحن صامت

من ساعة ما الدراسة خلصت وانا مش عارفة يومى بيخلص ازاى؟
يعنى بصحى الصبح متأخر شوية، قول على 11 او 12 مثلا... ولحد الغدا مابعرف انا بعمل ايه.. بجد والله ما بعرف الساعات بتعدى على ايه.. وفى معظم الايام مابتغداش.. وبرضو مابعرف انا باكل ايه حتى! .. لا ملتزمة بمعاد فطار ولا غدا.. والعشاء بقى غالبا افتكاسات بحتة.. افتح اى موقع، واشمر لاول وصفة الاقى مقادرها عندى..
بعد الغدا يا بنام، يا بغسل المواعين يا بقرأ يا بقعد على الكومبيوتر يا بنشر الغسيل.. يا معرفشى بعمل ايه بالتحديد.. بس هو اكيد فى شئ بيتعمل والا الساعات اليومية دى كلها بتروح فين؟؟..
اقلب الاركان اللى عرفتها على الانترنت بحثا عن وظيفة مثلا.. او نقاش شيق اشترك فيه.. او بوست لطيف على اى بلوج...
اكتشفت بلوجز كتير اليومين دول ولا كانى من البلد دى.. اسماء اول مرة اشوفها!.. بفتكرنى بحاج عجوز وعمال يكلم أحفاده.. "هييه.. دنيا لها العجب.. فين ايام ما كانوا 50 بلوج بالكتير ويوم ما واحد يفتح جديد نعمل له زفة"..
اه، لاء.. ماتخافش على "نادى الكتاب" المحندق.. ماشية على معدل مش بطال.. الحمد لله...
بس وايه كمان؟
كلام فى التليفون.. ماليش فيه
شات على الانترنت.. وقليل جدا ان ماكنش انعدم
خروج.. مابخرجش
نادى.. مابروحش
افراح.. مابتعزمش
شوبنج.. مابحبش
اصحاب.. ومابسالش
حتى أنا نفسى افوق لنفسى بقى.. ولكن مابفقش..

اعترف.. أنا انسانة "أناوية" بالدرجة الأولى.. واغلب وقتى بقضيه حاليا لوحدى دون الاحساس بالشفقة على نفسى او الاشتياق لاى فرد مهما كان!.. عايزة اسمع حد بيتكلم... بفتح الراديو او اسمع كتاب مقرووء.. ولو حبيت اتكلم بكلم نفسى او اروح اجر شكل اخويا.. يعنى الواحد ممكن يتصرف بدون اللجوء لحد..

يهل الليل.. وابدأ فى الفرجة على التلفزيون.. يااه.. بقى لى زمن ماتبعت حاجة.. بشوف منى ومعتز والجزيرة.. مم.. وارجع للكمبيوتر تانى.. اعمل اى حاجة الا الحاجة اللى اقول انى عملتها بجد!
انام على تلاتة مثلا عشان اصحى متاخر شوية، قول على 11 ولا 12 مثلا.. وانا بسال نفسى هو نفس السؤال... اليوم بتاعى.. بيخلص ازاى؟

عن اذنك بقى لما الحق انشر الغسيل..

سلاماتى