الأربعاء، يوليو 18، 2007

أحلى سنين العمر بيننا تمر

النهاردة كان أول مقابلة حقيقية ليا فى شغل.. مابين اللخبطة حبة والثقة حبة والأمل حبتين ماعرفتش انام بليل..
أظن عادى..

امبارح كنت بكتب بوست طويل عريض عن انه مش لطيف احساس الفراغ.. ولا لطيف انك تصحى الصبح مش عارف يومك راح يمشى ازاى.. ح تنام.. ح تخرج.. ح تاكل.. ح تقعد.. لا شغلة ولا مشغلة.. تقلب ما بين صفحات الجرايد والانترنت.. تبعد المجلات عن نظرك وتقفل كل الكتب اللى قدامك ع المكتب.. وتحول قنوات الدش واحدة واحدة مع سينفونية تثاؤوب متواصلة فى الخلفية.

أصل من ساعة ماخلصت آخر امتحان فعلى فى حياتى الجامعية -يوم الخميس اللى فات- وانا عايشة فى هذا الفراغ..
عارف زى ما تكون مربوط فى ساقية وفجأة حد قال لك "النهاردة أجازة اعمل اللى نفسك فيه".. تأكد ان أول سؤال راح يجى على بالك "يعنى ايه اللى نفسى فيه؟".. كانك نسيت يعنى ايه يبقى نفسك فى حاجة انت عايز تعملها عشان انت عايز تعملها من غير سبب وجيه.. لا حد طلب منك تعمله ولا المفروض انك تعمله ولا الظروف جبراك انك تفكر فيه...

وقت المشروع كنت بفكر انه لازم افصل شوية وأبعد عن مجال الدراسة وأبدأ استعيد لغتى الفرنسية.. ففكرت اكمل قراءة اللى معرفش وكام كتاب المركونين على رف المكتبة .. وأرجع أكتب تانى ع البلوج.. وفكرت اتفرج على التلفزيون.. وفكرت أخرج وألعب أيروبيكس.. وفكرت اقابل اصحابى اللى صلتى بيهم تقريبا اتقطعت من ساعة ما دخلت فى دوامة الكلية.. وفكرت انى أرجع أرسم تانى.. وارجع أشتغل بالابرة.. وأسمع الراديو زى زمان.. وأتكلم فى التليفون... وأتعلم الطبيخ وتنضيف البيت...
كنت بمنى نفسى أتعلم ازاى استمتع بالوقت..

ساعتين بعد آخر امتحان.. وساعتين بس.. كانت كفاية عشان اتأكد ان الفراغ ممل.. وانك لما تبقى قاعد ولا عارف ح تعمل ايه بوقتك أكثر ملل.. وراح يصعب عليك قوى تقضيه من غير هدف..
من غير ما أحس لقيت ايدى بتغلبنى.. وسبت كل خططى وبدأت أدور على شغل!

خرجت من باب مكتب المقابلة وأنا تقريبا محبطة... واحد من الممتحنين قال لى "شكرا على وقتك" وأنا فى مخى بقول.. "وأنا عندى ايه دلوقتى غير الوقت".. الوقت اللى كنت بتمنى انه يطول بس كام ساعة عشان الحق اخلص تقرير ح سلمه ولا مشروع بكمله ولا فكرة بنفذها.. دلوقتى هو عندى بس مش عارفة اشيله لوقت تانى..
ياه.. علاقتى به عمرها ماكانت رائعة.. طول عمرى بكره الاعيبه معايا... يطول وقت الانتظار والملل.. ويقل وقت الاحتياج.. وكانه ضدى...
تفتكر هو فعلا بيعاندنى؟ ولا هو الشئ اللى فى ايدينا اللى بيدي للزمن عمقه؟

فى طريقى للبيت فضل سؤالى الأثير فى سطر من أغنية يرن على ودانى
(*) "ياترى اللى بيعيش الزمن احنا؟
ولا الزمن هو اللى بيعشنا؟"
وأنا بسأل نفسى فى هو الوقت ميت سؤال وسؤال تانى.. "هل وياهلترى".. معرفش ان كنت عملت كويس ولا لاء.. ومعرفش ان كان الممتحنين ناوين يقبلونى ولا لاء.. ومعرفش ان كنت متسربعة ع الشغل من دلوقتى زى ما اهلى بيقول لى ولا لاء برضو.. انما رغم كل شئ طلعت من النهاردة بشئ.. دلوقتى عندى بوادر ملل.. وفى نفس الوقت.. ومعايا وقت..

سلاماتى

بى إس: (*) من أغنية "زى الهوا" لعلى الحجار والعنوان شطر آخر من نفس الأغنية.

هناك 11 تعليقًا:

Amr Ibrahim يقول...

الف مبروك التخرج
اللي عندك ده شعور طبيعي
هتحسي بالندم علي الوقت ده لما تشتغلي
هتقوللي يا ريتني استمتعت بيه
ربنا يوفقك
و ان شاء الله تشتغلي شغلانه رائعه تستحقينها

عدى النهار يقول...

مبروك التخرج وأتمنى لكِ التوفيق إنشاء الله

abderrahman يقول...

الفراغ!!؟
اسمحي لي أن أسدد عباراتي في الاتجاه المعاكس
إنتِ في نعمة
تمتعي بها إلى حين
فسيأتي زمان لايدرك فيه الانسان معنى الفراغ أو العمل
سيظهر الفراغ في وقت العمل، ويظهر العمل في وقت الفراغ
**
مبروك التخرج، طمنينا على النتيجة
تحياتي
نوسترداموس
لوووول

Shorom Borom يقول...

mabro0o0k el ta5arrog


el moshkela ennu el koleyya bet7otilnaa ahdafnaa

this week lazem report kazaaa

b3do e3mlee kaza w heyya sa2yaa

mat3wdnaash nesoo2 3arabeyya b nafsenaa ya3nee

ibn_abdel_aziz يقول...

كنت عامل زيك اول متخرجت
وقلت ياربي ايه الملل ده

قوم فجأة اشتغل ومن ساعتها مش شايف قدامي

وبكدة انتهت قصة بني ادم اخر
:)

Just kidding

مبروك

iRamy يقول...

try to make the best use of this precious FREE time because once you are on the job track, you will find it is too hard to get some of it

and Congratulations in advance !!

وســط البلــد يقول...

.
مبروك التخرج يا ستي

أيام الجامعه بتفضل ذكري و بتهيأ لك انها أفضل شي بيحصل لك

لكن صدقيني و عن تجربه ، كل يوم في العمل يوم جديد ولما يمر بتفضل ذكراه حلوه


خصوصا مواقف التقديم ع الوظايف


الله يوفقك


وسط البلد
.

Dananeer يقول...

شفتى يا بلو
قلتلك حاتقولى فين ايام الكليه

بعد ما سبت الشغل قلت حاعمل كل اللى كان نفسى اعمله لحد ما الاقى شغل تانى

من كتر الفضا بتكرهى حتى اللى بتحبيه
زهق زهق زهق

و لا بيت عاجب و لاشغل عاجب و لا كليه عاجب

البنى آدم ده عجيب

Less than perfect يقول...

ده بالضبط نفس شعورى من ساعة ما خلصت المشروع....

أنا من الناس اللى لما يبقى عندى وقت كتير مابعملش فيه حاجة فى حين لما يبقى ورايا مليون حاجة بنتج أحسن...كل واحد و طبيعته


كل أصحابى بيقولولى انهم هيريحوا بعد المشروع فحين ان انا زى الشطورة بفتح جرنال الجمعة و بدور على الوظايف الخالية...بعت الCV
لتعبان بتاعى لكذا مكان

No Response...بس لسه

لو ماعملتيش كويس فى المقابلة دى مش مشكلة...هتعملى أحسن فى اللى جايه ان شاءالله....تحياتى

MoonLightShadow يقول...

tool 3omry 3andy nafs el sho3oor.. kol ma yb2a waraya 7agat keteer.. 2a2ool fien el wa2t wana 7a3mel 7agat keteeer.. lama el wa2t byegy.. bansa kol elly kan nefsy a3melo..

bas ana ba2olek aho.. just enjoy doing nothing.. later on you will be wishing for couple of hours just to do nothing and relaaaax.

Anyways, Rabena ywafa2k :)

Lasto-adri *Blue* يقول...

الله يبارك فيكم كلكم..
انا فعلا نجحت الحمد لله.. وفى مهمة البحث عن وظيفة
إدعولى بقى

:)