الخميس، مايو 10، 2007

ياصباح الخير

اتسألت امبارح عن أجمل تعليق وصلنى على "لستُ أدرى"... ومن غير تفكير لقتنى بفكر فى تعليق قديم من العزيز دايما "واحد من مصر" (*)..
إنتِ يا بنت يا لست أدري لازم أقولك إن كتاباتك دايماً دايماً بترسم علي وشى إبتسامة و لولا إني مش في موود سعادة كنت قلتلك إنها بتخليني سعيد ،عارفة ليه؟ لأني باشوف فيها براءة و شقاوة و حماس البدايات(اهتمى إنك تحافظي عليهم) ، باشوف فيها الفراشة اللي بتحكى عنها،اللي زيك هما اللي بيلونوا الدنيا بمبي بمبي


ورجعت بى الذاكرة سنتين فاتوا مش عارفة ازاى.. يااه فاكرة أول مرة قرأته.. فضلت ابتسم بعدها يمكن اكتر من اسبوع.. وكل ما امل.. اجرى على جهازى.. افتح الصفحة واقرأه مرة واتنين وعشرة.. احساس حلو قوى ان حد يقول لك شئ يفرحك على غفلة..

يمكن دلوقتى حماس البدايات فتر.. ويمكن الشقاوة والبراءة ضاعت وسط الزحمة... ويمكن الفراشة تعبت من كتر اللف والدوران.. بس فى آخر اليوم واوقات فى اوله.. افتكر الناس والكلمات اللى عدوا عليا على طول عمرى الصغير.. والاقينى مش عارفة ازاى ممكن يقوم الواحد الصبح وقلبه حزين.. وحوليه فى الدنيا ذكريات بسيطة.. بس رائعة كدة..


بى اس: (*) ومش عايزة أنسى انه الوحيد -لحد الآن- اللى شاركنى كره الجبنة.. وحب فريد الاطرش..

سلاماتى

هناك 11 تعليقًا:

shaimaa يقول...

انا كمان بحب فريد يا ايمي

Mukhtar يقول...

بحبه وباسمعه دلوقتي وأنا باكتب. وهاقوم أكل جبنة كمان شوية زي كل يوم :)

Dananeer يقول...

لسه يا بلولو
كفاه انك و انتى قايمه الصبح بقلب حزين
رسمتى ابتسامات

اخبار الشفوى ايه

Dananeer يقول...

يا صباح النور على البنور و الفراشات صحيح
:)

مصرى يقول...

بلو إزيك

تصدقي أنا كمان مابحبش الجبنة و باحب فريد
تيجي نعمل نادي للي مش بيحبوا الجبنة و بيحبوا فريد
:D

Abdou Basha يقول...

جبنة !!
وفريد الأطرش !!

يا ريت لو فيه بطاطس شبيس، وتامر حسنى
تبقى حاجة جميلة جدا
:)

واحشاني كتير كتاباتك

Lasto-adri *Blue* يقول...

Shaimaa..
ياعينى على فريد

Mukhtar..
ليه كدة بس.ز ماكنا كويسين.. لازم تقول لى ح تاكل جبنة
:S

Dananeer..
الله يكرمك يا بيبو... حمد لله الامتحان عدى بقى على خير اظن

masry..
اه.. كنت بفكر اعمل نادى كدة.. بس اصدقائى احبطونى

ِAbdou..
وماكنش العشم
تامر! انا اسمع تامر
ليه
:S

Mohamed A. Ghaffar يقول...

صباحك سكر

santakarim يقول...

momkan ashark?! ana bamot fi algabna we mabte2sh fareed alatrash :-D
ana momkan asma3 algabna we masm3sh fareed alatrash :-D

ماشى الطريق يقول...

بس متقوليش الشقاوة و البراءة راحوا
إنتى عندك كام سنة يا بنوتة إنتى؟؟؟
أنا برضوه والله إتبسطت جداً من التعليق بتاعه عليكى
إنتى من الناس اللى روحهم الحلوة بتبان فى الكتابة بمزاجهم أو من غير مزاجهم

Lasto-adri *Blue* يقول...

mohamed..
:)
صباحك اكتر سكر

Karim..
افتكر ان انت اللى اعلنت الحرب
:@

ماشى الطريق
الله يكرمك زى مانت بترفع من معنوياتى دايما
والله يا ماشى انت واحد من الشخصيات العزيزة فى المجمع التدوينى ولو انى مابعلقش عندك.. بس تأكد انى متبعة روحك الحلوة على طول