محلى الوصال للى انتظر

-- فاكر يا صاحبى لما قلت لك ان الدنيا زى الكورة الشراب.. لازم يتحط شراب على شراب.. واحد نضيف وعشرة ريحتهم تجيب لقاع الأرض، بس عشان الكورة تتعمل كورة وتفضل طايرة فى الهوا..
بقول كلام مالوش لزمة؟
-- ...
-- عندك حق.. بس انت عارف.. معرفش ليه مشتاقة أكلمك زى زمان.. بس مش لاقية كلام.. عارف تانى.. مش عشان انا ماعنديش كلام مش لاقية كلام اكلمك بيه.. ابداً.. دا عشان من كتر الكلام بقى ملوش لزمة.. دايما كنت بتفهمنى من غير ما اتكلم.. يمكن لانك ساكن فى مخى فبتقرأنى.. ومع انك لسا فى مكانك الا ان انا وانت مش زى الأول.. ومعرفش ليه..
-- ...
-- زى ما انت مش ح تتغير.. تسيبنى اتكلم وانت ساكت.. انا بحب سكوتك وسكونك.. بيهدينى.. بس النهاردة عايزاك تتكلم.. عايزة اعرف بتفكر فى ايه وفى مين.. كفاية عليا اسمعك بما انه مستحيل اشوفك.. اشوفك؟.. تصدق انى اتغيرت فعلاً.. من امتى كنت بهتم بالشكل.. فاكر لما كنت بقول لك عن كرهى للتلفزيون عشان بيجيب مسح مخ، والراديو والكتب روعتهم فى تخيل ادق التفاصيل.. أصل بحب تفاصيلى قوى.. صحيح اوقات كتير مش بتخيل البنى آدمين بنى آدمين طبعيين.. وأوقات أكتر بطلع عن النص واعيش انا جواه.. لكن الشئ المشترك، انه رغم عمرى ما رسمتك، بس كان لك دور معايا دايما.. لما اكون تايهة كنت اعملك دليلى.. ولما اكون فى الاوضة اكلمك وتسلينى.. ولما اكون وسط الناس اشهدك ع الناس وتضحكنى عليهم....
السكوت مش دايما علامة رضى.. ممكن علامة قهر واذلال.. وممكن لانه مافيش كلام.. وممكن لانه بينا لغة حوار غير باقى اللغات.. فاكر السطر دا..
“O Mr. Webster can not define, what’s been said between your heart and mine. And you say it best, when you say nothing at all.”
نفسى اصدق انه ممكن يحصل.. نفسى؟.. ممم... نفسى فى حاجات كتير يا صاحبى.. نفسى يبقى نفسى فى شئ ويتحقق.. ونفسى يبقى نفسى فى شئ ويتحقق وما تمله نفسى.. ونفسى نفسى تبطل يبقى نفسها فى شئ.. ونفسى ... لاء.. مش نفسى.. مش عارفة..
-- ...
-- "فاكر لما كنت جانبى.. والنسيم لاعب غصون الشجر".. فاكر الاغنية دى؟ فاكر اول مرة سمعناها سوى؟ كان يوم بليل.. كان عمار الشريعى بيقدم "غواص فى بحر النغم".. ماكنتش اعرف اسمها.. كنت زى اى حد معرفش غير سطر "والموجة تجرى ورا الموجة عايزة تطولها.. تضمها وتشتكى حالها من بعد ما طال السفر "... نفسى ابقى الموجة دى دلوقتى.. واكلمك واقول لك واحكيلك.. بس احنا مش زى الأول.. وأنا معرفش ليه... انت دايما ساكت.. وأنا أتخيلك قدامى وأسكت.. عدوة صمت.. أو لاء.. فيروس فقدان هوية كلام.. أو لاء لاء.. كلام بقى زى الهم ع القلب، كتره بيوجع زى قلته تمام.. وانا وانت لسا عايشين رغم طول السفر..
اشوفك على خير يا صاحبى..


بى اس: العنوان من أغية "فاكر لما كنت جانبى" أم كلثوم، رياض السنباطى وأحمد رامى
أما السطر الانجليزى فهو من أغنية “You say it best when you say nothing at all” للمغنية Leanne Rhymes