الأربعاء، أبريل 18، 2007

استاذنوا يرحمكم الله


يعنى حقيقى مش لاقية كلام أقوله، لانى تعبت من كتر الكلام فى هذا الموضوع.. بس مش معقول كل كام يوم اصحى الصبح على خبر من شخص ما –بالصدفة- ان فيه بوست اتنشر من ع البلوج فى صحيفة ولا مجلة ما وانا آخر من يعلم!
الفكرة مش عارفة اعمل ايه اكتر من كدة؟! .. كاتبة عندى بالصريح:
Copyright © Lasto adri 2004-2007
جميع الحقوق محفوظة كافة المواد المنشورة في هذا الموقع محفوظة ومحمية بموجب قوانين حقوق النشر والملكية الفكرية.
لا يجوز نسخ هذه المواد أو إعادة إنتاجها أو نشرها أو تعديلها أو اقتباسها لخلق عمل جديد أو إرسالها أو ترجمتها أو إذاعتها أو إتاحتها للجمهور بأي شكل دون الحصول على إذن كتابي مسبق .

والحمد لله ايميلاتى فى كل مكان، وفاتحة التعليقات 24 ساعة على مدار الإسبوع.... والدى اس ال (حمدا للاله) بلا انقطاع.. يعنى لو واحد فكر بس يسال.. بعد اقل من نص ساعة ح يلاقى الرد!
والموضوع مش موضوع غرور.. فاكرة نفسها الكاتبة الأديبة ولا معرفش ايه.. ابدا.. حتى يا أخى فى أغلب ظنى انى ح وافق على النشر على طول طالما ماعنديش اعتراض على الصحيفة او المجلة.. وحتى ماتخفش.. مش ناوية اطالب بأجر... إعتبرنى يا أخى محدثة شهرة ونفسى أحتفظ بنسخة من المنشور!

يعنى دا الواحد لو فى بيته، وداخل أوضة مش بتاعته.. من حق الناس عليه انه يستأذن.... واخد انت بالك معايا؟ لو الرجل فى بيته... يعنى اقول ايه أكتر من كدة... ولا هى الأخلاق من النوع دا خلاص.. اختفت مع باقى معالم هذا الزمن..



بى إس: دا بخصوص نشر "حديثه لى" امبارح على "المصرى اليوم" ولولا بعض الاصدقاء قالوا لى.. ماكنتش ح عرف حاجة اصلا.. وياعالم كان ايه فين تانى وانا لا أدرى!


اجيبلك منين نفس يا سلاماتى

هناك 17 تعليقًا:

Ahmed Shokeir يقول...

ههههههه

والله أول ماشفتها إمبارح بالليل قلت اكيد هاتولعي الدنيا

انا عارف الموضوع ده بيفرق معاكي اد إيه ؟ وخصوصا غني عارف غنهم مش بيستأذنوا عشان برده خدوا حاجة من عندي وكتبوها وشفتها وانا على القهوة بالصدفة

بس الامانة بيكتبوا اللينكات صح من غير أي أخطاء

Lasto-adri *Blue* يقول...

لاء كتبوا اللينك بتاعى غلط
http://lasto_adri.blogspot.com
ولولا مصرى قال لى .. ماكتش ح عرف
لان لحد دلوقتى ماطلتش اى نسخة
!!!

انا بجد نفسى بس اللى نشر دا يقرأ الكام كلمة دول.. يمكن تأثر فيه ويبدأ يستاذن الأول

gemyhood يقول...

المسئول عن نشر المدونات و الكتابة عنها فى المصرى اليوم

كلمنى من فترة و طرح الفكرة انهم عايزين يعملوا شبه ( تيكرز ) للتدوين

او مجمع بص على صحيفة اهتمامهم الاول بالمدونات اللى مش معروفة و الهيئات العليا للتدوين

الموضوع و مافيه و انقله على سبيل الامانة مش اكتر

ان الفكرة بتدور حوالين مقاطع من مدونات مختلفة معظمها او اكثرها مش بتكتب سياسة المقطع من ثلاث الى اربع سطور اشبه بمجمع او تيكرز لاخر التدوينات و المصرى اليوم عاملة كدة فى الصفحة الاخيرة مع الجرايد و نقلها تصريحات الشخصيات العامة فى الجرايد التانيه

علشان كل واحد ياخد حقه و بصراحة احنا مبهدلين المصرى اليوم الفترة الاخيرة يكفى ان الواحد يكتب انا مش عايز المصرى اليوم تاخد مقاطع من عندى لان اكيد صعب جدا على جرنال يومى يستأذن مع كل تدوينة جديدة لمدون فى كل يوم و كل عدد بمعدل خمس لسبع مدونيين فى اليوم

الجانب المشرق : نعتبرها اعلان غير مدفوع الاجر يوميا لسبع مدونات او أكثر

gemyhood يقول...

سورى الكتابة اتلخبطت هما مش مهتمين بالهيئة العليا للتدوين

Lasto-adri *Blue* يقول...

جيمى هود.. اولا شكرا ع التوضيح
ثانيا لو اللى بتقوله فعلا صحيح.. ماشى يبقى شكرا للمصرى اليوم

بس برضو اعذرنى... انا مش عايزة اعلانات عن البلوج بتاعى
مش غرور ولا كدة.. بس فعلا.. دى مش طريقتى فى الحياة
:S

ماعلينا.. ايا كان مش بطلب كتير... مجرد حد يجى ويستأذن
وان كان الاستأذان صعب قوى كدة يبقى فى حل من اتنين
يا بدل الصحفى اللى ماسك الموضوع دا.. يبقوا اتنين مثلا.. واحد يختار والتانى يتابع
او يلغوها اصلا

والسلام معاك

Alaa يقول...

هما خدوا النص كامل ولا اقتبسوا جزء؟

و الجزء القتبس زي ما هو ولا مشوه؟

و ذكروا المصدر ولا لأ؟

قانونا من حقهم الاقتباس بدون اذن طالما ذكروا المصدر (و في رأيي المفروض يكون من حقهم اعادة النشر بدون اذن طالما ذكروا المصدر).

Lasto-adri *Blue* يقول...

لاء -للامانة- همه نشروه كاملا.. ومافيش تحريف ولا اى شئ.. وحتى كتبوا المصدر..
صحيح العنوان اتكتب غلط.. انما اعتقد النية خير

وياعلاء حقيقى -عن نفسى- مش ح مانع النشر بتاتا (لانى مابكتبش اللى مابيتكتبش يعنى.. يعنى اقصد مش الفظيعة اللى حايفة ع الابداع).. بس ع الاقل يبقى عندى خلفية
ولا انت ايه رأيك؟

Alaa يقول...

عاوزة القانون ولا رأيي؟

رأيي أن طالما ذكر المصدر و لم يشوه العمل يبقى براحتهم و من غير اذن و حتى في حتة تشويه العمل متساهل و متسامح لو الغرض مش التلخيص أو التصحيح و لكن عمل جديد معتمد بشكل ما على الأصل (زي غناء كلمات مختلفة على نفس اللحن مثلا).

يعني أنا رأيي أن الملكية الفكرية بمعنى التحكم التام لصاحب العمل في انتاجه و ضرورة استئذانه ضارة جدا جدا و بدل ما أشرح الفكرة لو حد مهتم حاول تبصوا على كتب الثقافة الحرة للورانس ليسيج
http://www.free-culture.cc/

ده رأيي، القانون بيقول غير كده بيقول مسموح بالاقتباس فقط مع ذكر المصدر و مفيش أي ضرورة للاذن، و في حالة الأعمال البسيطة جدا أو قصيرة جدا بحيث ينتفي معنى الاقتباس مسموح باعادة النشر بدون اذن طالما ذكر المصدر برضه.

بما أن التدوينة قصيرة و نشرت كما هي مع ذكر المصدر يبقى أنا مش شايفهم لا غلطوا أخلاقيا و لا قانونيا.

طبعا حجة أنهم مش فاضيين يستأذنوا دي لا معنى لها. أنا بقول مش مطلوب يستأذنوا مش ميقدروش يستأذنوا.

Noran يقول...

:(
ولا يهمك ....بس مفكرتيش تبعتى إميل حتى تهزائى فيه الكاتب الصحفى السرققك ؟؟؟؟

Lasto-adri *Blue* يقول...

علاء: متشكرة قوى ع الايضاح... وهو حقيقى انا مااستخدمتش لفظ السرقة او اى شئ من هذا..
هو بس طلبى الاستأذان فقط من الباب الأخلاقى حتى... او حتى بلاش استاذان يا سيدى.. كفاية الاقى ايميل ولا تعليق ان هذا الشئ ح ينزل فى يوم كذا جرنال كذا.. ولو عندى راى آخر ع الأقل الاقى وسيلة اتناقش بيها معاهم
افرض انى مش عايزة حاجة تنزل فى الجرنال الفلانى بالذات.. تفتكر انه مش من حقى؟


نوران: لاء مافكرتش فى التهزيق.. لانه زى ماقلت.. اظن النية خير..
انما عشمى انه من نقل الموضوع يتفهم فكرة الاستأذان
ومين عارف.. يمكن اكون السبب فى تغير طريقته للافضل .. على ما اظن
:)

Alaa يقول...

هو اللي بقوله أنه أه قانونا ملكيش حق تعترضي على الجرنال ده بالذات طالما العمل قصير جدا (لأنها بتعتبر اقتباس من منظور القانون).

أما مسألة ليه لازم تفكري في الموضوع كقاعدة عامة مش كحدث مرتبط بكتابتك انت بس، نفترض مثلا أني عاوز أقتبس جزء من أدبيات الحزب الحاكم عشان أوضح نقطة عن فساد فكرهم و جم بحجة الملكية الفكرية و رفضوا يدوني الأذن؟

يبقى هنا اتنقلنا من حماية الملكية الفكرية لتكميم الصحافة (و ده مثال حقيقي تلفزيون فوكس رفض يسمح لمخرج فيلم تسجيلي أنه يستخدم حوار اتعمل مع الرئيس بوش الحجة القانونية كانت الملكية الفكرية لكن في مخاطباتهم الرسمية وضحوا أن السبب الحقيقي هو أن الحوار بيظهر بوش بشكل مش كويس).

ody911 يقول...

طيب خلاص بدام كتبوا المصدر
وكمان الموضوع بالكامل


يتموا جميلهم بإيميل يقولوا فيها هينزل إمته وخلاص

بلاش حته يسأزنوا فى نزلولو


ولا إيه رأيك ؟؟

عادى بقة

أودى

gemyhood يقول...

الموضوع اخد اكبر من حجمه لان و لا دة مقتبس و لا نقل و لا اعادة انتاج

دى مجرد فكرة هما عاملينها لنشر فكرة التدوين و الاعلان بشكل غير مباشر عن المدونات

و اظن ناس كتير محتاجة يتنقل منها و لسه مدوناتهم مش معروفة .. يبقى حرام نظلم الناس دى و نخلى الموضوع قاصر على اللى مدوناتهم اتعرفت و خلاص

المفروض اننا نشجعها على الاقل كل يوم الناس بتعرف 7 مدونات جديدة و اظن دة انجاز فى حد ذاته
انا واحد من الناس ممكن اكتب للمصرى اليوم ببلاش فى سبيل انهم يدعموا المدونيين بالشكل دة

و بالرغم من اعتراضنا على اداء المصرى اليوم بس دة مايخليناش نقمع فكرة زى دى لمجرد ايميل استئذان يا بلو الفكرة و مافيها ان الصوت يوصل و السلام

و لازم نفهم حاجة ان ثقافتنا لسه مش واصلة لموضوع الملكية الفكرة يعنى لو هاندن فى مالطة ماحدش هايسمع و المتضرر

يكفى بس انك تقولى انا مش عايزة الاعلان دة و متشكرين و خلاص

=======================

بالنسبة لفكرة السرقة بوجهة عام

هاديكى مثل صغير جدا علشان تعرفى انا استسلمت خلاص للموضوع دة ليه ؟

اعملى سيرش على المقتبس دة كدة

" أجمل لحظات العمر حين تستيقظ في الصباح "
اتفرجى بقة فى جوجل على كمية الصفح على الانترنت اللى منشور فيها النص كامل و ياريت كدة و بس لا دة بأسامى ناس تانيه

دة كلمتين من جزء فى كتاب انا كاتبه ( ايامها كنت تدينت فترة و كتبت عن كدة )

و مش كدة و بس لا دة متسجل فى الشهر العقارى من سنة 2000 و متسدد ليه رسوم و معايا وصل بكدة

و تم نشره على النت بعد تسجيله فى الشهر العقارى بشهرين او ثلاثة طيب قوليلى انتى ارفع قضية على كل دول ازاى ؟؟؟؟ دة عددهم كاسر الاصفار الاربعة

الموضوع بقدر غباءه لكن فعلا مانملكش غير مصمصة الشفايف او مثلا نقعد نشتم فيهم غير كدة مش هانقدر نعمل اى حاجة للأسف

gemyhood يقول...

بصى خلينا متفقين ان الناس مش بتنقل الا الكلام الكويس و دة عزائك الوحيد انهم كدة بيقدروكى حتى لو بيسرقوكى

لان دة انترنت و الكلام بيسبح فى الفضاء :D

وجربى كدة تعملى سيرش على كلمات من ماضيعك او عناوينها و هاتعرفى انا بقولك ايه ممكن تلاقى حاجة كدة مثلا

Results 1 - 10 of about 21,200 Arabic pages for أجمل لحظات العمر حين تستيقظ في الصباح . (0.22 seconds)


صباحك زى الفل

Mohamed A. Ghaffar يقول...

نوع من انواع قلة الأدب
ولكن احسن من غيهم على الأقل بيشيروا للمصدر

أحمد غربية يقول...

يا جيمي أنت عميتها في الآخر لما كتبت "و لازم نفهم حاجة ان ثقافتنا لسه مش واصلة لموضوع الملكية الفكرة يعنى لو هاندن فى مالطة ماحدش هايسمع و المتضرر"

انا متفق معك و مع علاء و عارف أن بلو مش واخدة موقف متطرف، لكن ما يتفع تككون الذريعة هي العبارة ال أنت كتبتها دي.

يعني لو ما فيش أمل لدفع الناس في التفكيير في تغيير سلوكهم، يبقى لازمته مجهودك و انبساطك بانتشار المدونات.

فهمت قصدي؟ خيابة الناس مش مبرر لأن أنت ما تعملش و ما تلحش.

waddah يقول...

عزيزتي... أنا لا أدافع عن أحد قد تتهمينه بأقتباس أو حتى سرقة ولكن لي وجهة نظر أرجو نقاشها
في عصرنا كل النصوص والمدونات والكتب والمجلات والدوريات والصحف وكل الميديا أصبحت متاحة في الأنترنيت... لا أظن أنه يوجد ضير في الإقتباس من مكان لآخر ولكن أشدد على وجوب الإشارة للمصدر عند حدوض ذلك، ولكن هل الملكية الفكرية هي فعلاً ملكية لشخص دون سواه ويمنع نقل أو نسخ أو إقتباس أي نص أو فكرة؟!!!؟
كتاباتك رائعة وكلما وجدت تعليقات تهاجم كتاباتك وكلما أصبحت كلمات الهجوم أقذر كلما رأيت بكلامك جرأة نفتقدها في مجتمعاتنا
شكراً لك
شكراً لكتاباتك