الاثنين، أغسطس 28، 2006

.. حصل من يومين

-- تعرفى ريحتى المفضلة؟ [سألنى بعد قراءته لموضوع Smells عند Maxxed out]
-- مم.. ندى الصبح؟
-- لأ
-- يبقى ريحة الورق القديم..
-- بظبط!!
[...]
-- تعرفى زمان كان إخواتى الأكبر منى من عشاق الألغاز و "تختخ ولوزة"، فتلاقى فى شقة الاسكندرية آلاف منها. وأنا صغير كنت اقعد أدور على الألغاز، وألاقيها دايما فى أماكن صعبة.. تحت السرير، مستخبية وسط كراكيب قديمة... بس مع السننين قلبت ورق أصفر و مع ريحة البحر والرطوبة ورحلة تاريخ طويل.. ومع الهوا بقى تديكى احساس بــ"عبق محبب للنفس"..
[فكر قليلا ثم قال..]
-- اكتبى كلامى فى بوست
-- عنى ولا عنك!
-- للعجب عنى.. بس ما تجبيش سيرتى.. يعنى زى خواطر كدة
-- لاء انت ح تكتبها أفضل.. وأحطها تحت اسم "ذكريات صديق"
-- معاكى حق.. بس انت عندك التعبير
-- صدقنى لاء.. انت ح تكتبها أحلى
[....]
-- مين اللى كتب Smells؟
-- Maxxed out.. مدون مصرى بيدرس فى فرنسا
-- ياحرام.. ربنا معاه
-- ياحرام؟
-- الغربة.. أى مكان تحسى فيه الانعزال ولو كان فى بفرلى هيلز ح قول "ياحرام"
-- دلوقتى نفسى أبعد بعيد مش مهم فى أى حتة ولو دارفور.. بس أكون وحدى
-- فاكرة كلام د. أحمد خالد توفيق اللى بعتهولك عن مصر؟!
-- لاء
[يغيب لحظات ثم يأتينى بالموضوع..]
قالت برنادت ذات ليلة لعلاء و هى تعد الشاى:
-- هل مصر بلد جميل
فكرت قليلا ثم قلت :
-- لا ادرى انا لم اتساءل قط ان كانت امى جميلة ام لا انها امى وكفى لنقل ان ملامحها تشعرنى بالألفة و الراحة
-- لكنك فررت منها اعنى مصر لا امك طبعا
-- هناك لحظة تجدين نفسك عاجزة عن اضافة او تغيير شئ كل ما تكرهين لا يتبدل وكل ما تحبين يتم تدميره بعناية و دقة عندها تشعرين بالاحباط و تتساءلين : لماذا لم يحبنى هذا البلد كما احببته؟ ثم تشعرين بالياس و تفرين و الامر فى النهاية يتلخص فى ان خلاياى مصرية سواء اردت او لم ارد
و ساد الصمت

كنت احلم احلم بصوت الشيخ (رفعت) يقرا القران قبل الافطار فى رمضان احلم بطبق الفول المعدنى مع رغفين و بصلة على عربة يد، بالذات على عربة يد، رائحة الطباق من مقاهى الحسين، صوت خرفشة الثوم فى المطبخ ضمن طقوس اعداد التقلية، رائحة التقلية ذاتها، النيل وقت العصر، الشاى على الفحم والذرة فى الحقل، (زينات صدقى) العانس الابدية وحاجب (فريد شوقى) الايسر، مباراة الاهلى والزمالك مذاق الدوم فى اثناء العودة من المدرسة.
من الغريب ان هذه الاشياء تثب الى ذهنى تلقائيا حين اتكلم عن مصر لا يثب الى ذهنى الكرنك و النيل و الهرم كما علمنى مدرس التعبير فى المدرسة و لكن عشرات التفاصيل الصغيرة التى لم اتخيل الحياة من دونها قط و لو تحدثت عن التقلية فى موضوع التعبير لنلت صفرا.

إن وطنك هو المكان الذى إرتديت فيه أول سروال طويل فى حياتك.. ولعبت أول مباراة كرة قدم.. وسمعت أول قصيدة..و كتبت أول خطاب حب.. وتلقيت أول (علقة) من معلمك أو خصومك فى المدرسة.. وطنك هو المكان الذى ذهبت فيه للمسجد أول مرة وحدك.. وخلعت حذائك متحديا صديقك أن يقف جوارك لتريا أيكما أطول قامة.. ووطنك هو أول مكان تمرغت فيه على العشب فى صراع دام مع صديق لدود من أجل فتاة لا تعرف شيئا عن كليكما..!

-- أنا بحب اى حاجة مصرية قوى.. اكيد عارف.. بس برضو نفسى اسافر قوى قوى
-- عارفة لان البنك اللى بشتغل فيه multinational، اتعرض عليا كتير اسافر دبى.. ورغم نفسى أخوض التجربة بس مش قادر.. مشكلتى انى شديد التعلق بالأماكن والاشخاص.. صعب جدا فجأة كدة اسيب مصر.. وناسها وأهلها وأهلى فى سبيل "حفنة زهيدة من الدراهم"..
-- بس فيه مثل يقول "كتر القسى يعلم الجفى".. ومصر.. لاء مش مصر.. العيشة بقت قاسية قوى على ناسها!!
-- مش عارف.. أنا مش متخيل حياتى من غير مصر.. بين يوم وليلة ودانى ح تسمع لهجة تانية وثقافة تانية.. وبعدين أصحابى.. دى بقى حاجة صعبة جدا!
-- اكيد.. أنا لما أفتكر انى ح عدى على ميدان رمسيس ومش ح شوف رمسيس تانى بتضايق قوى.. مابالك لو هجرت ميدان رمسيس كله!!
-- عارفة ليا واحد صاحبى اتربيت معاه، يوم ما كان مسافر ليبيا كل اصحابنا راحوا له قبل السفر .. أما أنا طلعت بحاجة اى كلام كدة ومارحتش.. رغم انى اعز أصحابه.. فى المواقف دى ضايع!!
-- نفسى اعرف اكتر.. وعمر ما ح عرف الا لو عشت ناس تانية.. مين عارف.. يمكن أحبها أكتر ويمكن أشتاق للحياة أكتر
[...]
-- أنا ح كتب حوارنا على "لستُ أدرى"
-- وأنا ح ستناه..

سلاماتى..

هناك 17 تعليقًا:

AZ يقول...

ازفت احساس فى الكون ان الواحد يتعلق بحاجه او بحد...... حاجه تقرف بجد

محمد أبو زيد يقول...

مش عارف
بس حابب في الأول أهنيكي على الحوار الرشيق
عجبتني جدا عبارة انك لازم تقولجملة "يا حرام " لما تسمع عن أي حد مغترب
ماعرفش ، هل ينفع نقولها على مصر كلها على اعتبار إن الناس كلهم اغتربوا عن ذاتهم

الغربة أنواع
فيه ناس مغتربة عن ذاتها ، مغتربة عن حياتها ، مغتربة جوه البلد ، اللي ييجي من الصعيد عشان يشتغل في القاهرة مغترب ، واللي عنده مشاكل مع مراته مغترب ن واللى مش عارف يتعامل ازاي مع المجتمع حوالية مغترب

محمد أبو زيد يقول...

أيها الغرباء
أحسنوا ضيافة حزني
فهو طيب كحمامة
هادئ كصنم
مسالم كمَيِّتٍ


إذن
حاولوا ألا تتذكروا أولادكم
ولا غبار شارعكم
ولا نكتة ألقاها جنى
فضحكتم عليها حتى الصباح
ولا القلق ينبت في أعينكم
وأنتم تنتظرون
خروج زوجاتكم من غرف الولادة
حاولوا ألا تتذكروا مقهى بلدتكم
ولا حلاقها الذي يجرحكم متعمدا
فتنزفون ضحكا
... ... ...
... ... ...
أيها الغرباء
أشعلوا في ذاكرتكم النسيان


لا تشتروا جرائد الغد الآن
ففي بلادكم تقرؤونها في موعدها
وليس في الليلة السابقة
حاولوا ألا تركلوا السيارات
فهي عنيفة كذئب
وانتم طيبون
طيبون كسحابة
سرقت منها الأجنحة

أصدقاؤكم الموزعون على المقهى
سوف يملون سريعا
ولن تختلفوا كثيرا
فيمن سيدفع الحساب
وأي طريق
يجب أن تتبعوه كي ترحلوا
ربما على المقاهي
ألا تسخر من جيمكم المعطشة
و شايكم الحبر
عليها أيضا
ألا تعيد توزيع الكراسي
حتى لا تتوهوا من بعضكم
في المرة القادمة

أيها الغرباء
اعتقد أنكم سمعتم هذه الصرخة منى من قبل
ربما لم تنتهِ من ساعتها بعد
ربما تمطرني السماء على وطن
مُنْهَكٍ كحلم
ربما يقتلنا الحنين إلى بيوتٍ طينيةٍ
وحبيبات بعيدات
بعيونٍ سوداء واسعة

Captain L.J.Silver يقول...

El7etta deeh belzat fe Safari 3agbetny awiiii.....bainy we bainek ana nefsy aggwwez Bernadet ,,,
: ))))))))))))))
Btw ..Safari is one of my favorites toooo

Amira Hassan يقول...

عنده حق على فكره..انا عن نفسي مش متخيله اني منزليش الصبح من البيت و اركب المترو و اروح على وسط البلد اقابل اصحابي و نروح الشغل و بعدين ننزل نقعد على البورصه

رغم كل حاجه مؤلمه البعد عن مصر مؤلم برضه

عمر يقول...

مهما قلت مش حقدر اوصف شعورى اول مره سافرت فيها .انا تقريبا من 93 مسافر ساعات بقعد فى مصر بس كرمتى بتوجعنى اوووى اوعى تفكرى فى حد مبسوط انه متغرب .بس لازم حاجات تموت علشان حاجات تعيش

كلمه يقول...

eltot da mwgood fe safari..2na mesh b2raha keteer bs ..leya wa7ed sa7by bezbtny fel 7gat elgmda

ma 3lenaaaa y3ni mesh da el7war :D

elpost gamed 2wy 2wy ... as usual y3ni ... To7FA

Deeeeeee يقول...

Well Blue, you can't imagine how much that post came just in time... I'm here trying "el 3'orba" for the first time, okay so its beautiful... but it hurts I cant believe how so many do it for so long... I feel like a fish out of water already... I miss too many ppl and I've only been here for a few hours... you know what my favorite smell is? The nile in the winter cold especially around February. :)

elgharep يقول...

كل ماقابل واحد صحبى يقلى عاوز اهاجر أقله على فين يقللى أى حتة المهم أنى أسيب البلد دى... للدرجة دى بلدنا بقت بعبع مش عارف أيه الشوطة اللى طلعة فى الشباب اليوميين دول أنا عارف أن بلدنا مليانا حاجات تخلينا مانطقيهاش بسببها بس لما أحنا ولادها نسيبها امال مين اللى حيصلحها ...ألأمريكان؟؟
يامصر ياحفظة قرآنك وأناجيلك وان تنادينى فى يوم انا اجيلك
elgharep:www.elgharep.blogspot.com

ody911 يقول...

عادى بقة

3rby يقول...

انا عارف انها رخامة مني بس ياريت تدخلي عندي وتقري موضوع"محدش يفهمني غلط"....وموضوع جه يكحلها عماها وقوليلي انا كده كفرت ولا لسه؟

غير معرف يقول...

يااااه دكتور احمد خالد توفيق واحد من كتابي المفضلين
وكنت متابعه كل رواياته لفتره طويله شوقتيني لكلامه

عموما انا مع صديقك اخساس الغربه صعب قوي حتى لو في بيفرلي هيلز و مهما بتخنق من البلد و العيشه برضه منستحملش نبعد عنها

Haitham يقول...

ياعزيزتي المصريون مغتربون يعيشون على ضفاف النيل او بعيدا عنه

غير معرف يقول...

” كل ميسر لما خلق له ”
فكرة التعلق بالأشياء أو حتى الإنتماء محتاجة "فطام" يمكن هو ده الحل.
لإنه احيانا التعلق بالصورة دي بيكون طفولي وملوش داعي .
مفيش حاجة تستحق، كلها أرض الله، وكلهم خلق الله

كلام بايخ مش كده ..!؟
:=)

معلش بتدرب اليومين دول إني أكون واقعي..

abderrahman يقول...

” كل ميسر لما خلق له ”
فكرة التعلق بالأشياء أو حتى الإنتماء الشديد محتاجة "فطام" أكيد ده الحل.
لإنه احيانا التعلق بالصورة دي بيكون طفولي وملوش داعي .
مفيش حاجة تستحق، كلها أرض الله، وكلهم خلق الله

كلام بايخ مش كده ..!؟
:=)

معلش أصل بتدرب اليومين دول إني أكون واقعي..
آسف

روز يقول...

فعلا الواحد ممكن يتغرب جوه بلده ووسط اصحابه , زى الاحساس اللى حاساه بقالي اسبوع كده
...
على فكرة شكرا أوي على لينكة عزف الآنون بتاعت مارسيل خليفة , نزلتها و عمالة اسمعها كتير , ليكى ثواب كبير أوي عن ربنا ان شاء الله :):):)
بجد يعنى , مش خليتينى احس ببعض الجمال الموجود فى الكون ده ؟
....
على فكرة , انتى اشتركتى فى منتدى روايات ( شبكة روايات التفاعلية ) , مش كده ؟
انا هناك , اسمي ( لورا أون ) , ابقى عدّي , ماشي ؟
....
انتى كمان بتفتكرى بالروايح ؟ أنا كمان كده

The Eyewitness يقول...

حوار قوي ومؤثر جداً...

أردت أن أضيف أن الغربة الحقيقية هي غربتنا عن ذواتنا وعن أنسانيتنا أينما كنا. الغربة أرتبطت لدينا بالبحثعن المال والحياة الماتدية الأفضل ولكن هناك أيضاً غربة هي في الحقيقة لقاء أغمق مع ذواتنا وأنسانيتنا.