الأحد، فبراير 24، 2008

أصدقائى التانيين

من فترة طويلة لاحظت مدى إعجابى بالأدوات المكتبية. نوتات كبيرة وصغيرة.. كشاكيل ملونة.. أقلام حبر ورصاص.. برايات، اساتيك.. مساطر.. كله عندى له مكانته الخاصة. ولحد دلوقتى تلاقى فى مكتبى أقلام وكشاكيل من ايام المدرسة.. ما إستعملتش.
ضعف يمكن.. حب تملك إحتمال.. فقط، كل اللى متأكدة منه إنه إقتناءها بيجلب لى سعادة غير طبيعية، وأرجع ع البيت فخورة بنوتتى الجديدة.. مرة ورا مرة، نوتة فوق نوتة، المكتب حاله يتلخبط.. والدولاب يتكركب.. وماما تتكهرب.. والبيت يبدأ ثورة تنظيفية لإستيطان الكراكيب.. وفى وسط كل ثورة من الثورات وأنا فى أشد الإقتناع بأهمية كل ورقة فى حياتى طبعا طبعا، أضطر فى آخرة المطاف ألملم كل الحاجات فى حتة شنطة صغيرة..

بحب ملمس الورق الأبيض، بسطور خفيفة.. أمشى عليها من غير ما تجبرنى على إشارات.. أطلع وأنزل براحتى.. خطوطها بتساعدنى أكمل سور جنينة بيتنا فاردة دراعاتى للهوا يخبطنى كدة هوه.. أتنطط وأتشقلب.. وأرجع تانى من أول السطر..

الاقلام دى لها قصص تانية خالص!..
مش همه عندهم هواية تجميع الطوابع والعملات؟ أنا بقى هوايتى تجميع الأقلام.. عندى علبة فيها أقلام من كل مكان زورته أو مؤتمر حضرته وقدرت اقلب لى قلم من بين الزحمة.. تخيل بتفكرنى بموقف مع كل كلمة تتكتب ع السطر؟.. بحب الوانهم الملخبطة، وأشكلهم اللى مش مِرَكِبة.. وذكراياتهم المنعكشة.. بحسهم شئ مهم جدا جدا، وطبعا طبعا، مش أى أى اللى يفكر يطلب يستلف..

لاء ولا الخط..
فى خط واضح، ولطيف.. القلم يجرى ورا أفكارك جرى.. وفى قلم غامض، ومش صريح، يجبرك تفكر فى مبتدأ الفعل وآخره.. فى قلم يموتك، يحبس نفَسَك قبل ما يتولد.. وقلم تحسه بيندهك، بيكلمك ع الورق أو يحسسك إنك محتاج تكلمه.. بيكون أوقات أقرب لك من صديق أو رفيق أو قريب.. وأوقات بيكون القلم على دا الورق السبب إنك تعرف أجمل ما عندك..
بس إنت غالبا ما بتعرفش..

فى تانية إعدادى طلعت من الأوائل مرة، فأهدانى والدى قلم سنون روترنج لونه فرانى ميتاليك.. دخلت به كل الإمتحانات بعدها عشان بتفاءل..
فى إعدادى هندسة، وقع من الشنطة فى أوتوبيس نقل عام.. دورت عليه كتير.. وكنت مستعدة أدفع فيه كل اللى حيلتى ساعتها لكنه إختفى.. حزنت عليه زى ما يكون أول مرة اعرف معنى كلمة "الإفتقاد"..

هو أكيد ضعف قدام الأقلام والورق.. ريحت الورق الجديد بتجلب تفاؤل.. والورق القديم بتجلب نشوة للمكان والزمان.. والأقلام بتطرح معنى جديد كل يوم.. مزيج من الراحة والإمتنان.. وأشياء مش دايما بتتلمس.. لكنها دايما دايما، بتتحس...


سلاماتى

هناك 36 تعليقًا:

بنت الصالحين يقول...

ايه ده غريبه اوي
اول مره اشوف حد بيحب الاساتيك والبراياتوالحاجات دي

بس وصفك حلو اوي
حسستيني فعلا بحبك ليهم

حلو اوي التدوينه واحاسيسك فيها
سلام

Bongo يقول...

تجميع الحاجات المكتبية دي هواية فعلا

نوت و اساتيك و برايات :D

تدوينة لذيذة و البلوج كله رقيق


تحياتي

غير معرف يقول...

الله
أسعدتينى بجد
:)

FATMA يقول...

الاشياء اللي مش دايما بتتلمس بس دايما دايما بتتحس هي كل الصدق

FATMA يقول...

حلوه اوي حركة البنج النصفي دي مكنتش فاكرة ان حد هيتجرأ يعملها في مصر

AD sabry يقول...

i was somthing like that,
untill i start to write at
the computer,i liked it
more,an forgot about
pens & papers.

عدى النهار يقول...

وصفك جميل لكنه أثار عندى سؤال.. ياترى بتعملي ايه فى القلم الرصاص لما سنه يتقصف والقلم الجاف لما حبره يخلص أو وهو فى أنفاسه الأخيرة ، ولا مش بتسيبيه يوصل للمرحلة دى؟ ، والورقة لما تمليها كتابة وتلاقى نفسك بعد كده
مش حابة اللي كتبتيه

Eman M يقول...

انا معايا فى الشغل لحد انهاردة قلمى السنون الروترنج الكحلى، من سنة أولى كلية
يعنى حوالى 11 سنة
ماسكاه فى إيدى أهو :)

بنت القمر يقول...

التعلق بالاشياء افضل من التعلق بالبشر
القلم عمرة ما ها ينكر جميلك
ولا النوته ما هتكون جاحده
بوست جميل

Mo93abS يقول...

كثير هي تدويناتك التي أحتاج أن أعلق عليها و لا أعرف ماذا أقول
لكن اليوم أكتفي بأن أقول
تدوينة لزيزة :)

لحظة تأمل يقول...

احلى حاجة الاصدقاء التانيين دول
تعرفى انا كمان عندى الهواية ديه
بعشق كراساتى اللى لسه عندى
واقلامى .. بس اللى اخدتهم جايزة او فى مناسبة خاصة

وكمان بحب اخلى ليا ذكرى من كل مكان برتبط بيه او ناس بقعد معام فترة
حتى ولو كانت حاجة صغيرة ورقة او تيكت على كراسة او استيكة كنا بنشخبط عليها

احساسك من القلب عشان كده وصل للقلب بسرعة

تحياتى واعجابى

حسام يقول...

على فكرة الأدوات دي علاج جامد جدا
انا بكون كئيب شوية أو مش في المود بدخل المكتبة أقلب في الاقلام وأخواتها وأطلع بشروة صغيرة وانا منشكح جدا ومزبط
مكنتش فاهم السر ومازلت بس لقيت أكتر من حد زينا كده :)

وأنا كمان يا إيمان إم إديت أختى لما دخلت فنون جميلة السنة دي القلم الروترنج اللي معايا من ثانوية عامة يعني من 14 سنة :)

غير معرف يقول...

:D eh daaaaaaaaaaaaa we have this in common :D
and i call them names (A)

Dina El Hawary (dido's) يقول...

:):)
وأنا كمان وأنا كمان

غير معرف يقول...

خوطرك رائعة فعلا
يسعدنى تشريفك لمدونتى وعمل تبادل إعلانى
- فى إنتظار مراسلتى
http://almwagaha.blogspot.com/

ريحانة يقول...

عادة مش بعرف اسيب تعليق ع كل تدوينة اقراها
بس المرة دى لمسنى الكلاماوى
انا كمان كده على فكرة بس من غير اساتيك وبرايات يعنى الاقلام والنوتات بس
خصوصا النوتات
حبيت اقولك انك روعة
وبس

Lasto-adri *Blue* يقول...

عاشقة الفردوس
كلنا بنحب حاجات "ما" صغيرة ومع كل إختلافتنا.. الا إن حبنا للأشياء الصغيرة واحد
عشان كلنا على بعضنا إنسان.. وبنعشق الفردوس
:)


Bongo
تحياتى أنا ليكى
بس عايزة أقول لك على سر
وأنا بلف على البلوجات من كام يوم كدة عديت على البلوج بتاعك... تانى يوم أصحى ألاقيكى معلقة عندى!
صدفة رائعة


أحمد
وإنت أسعدتنى بسعادتك
:)))


توتة توتة
بنج إيه دا يا توتة؟ مش فاهمة
معرفشى ليه، بس صورتك دى بتفرحنى قوى قوى كل ما أشوفها.. خليكى ديما حلوة


ad sabry
Computers got their charm as well.. bas forgetting papers.. I think eno, na.. never :)


عدى النهار
سؤال لطيف، بس مش ح تصدقى لو قلت لك إنى بحب أجمع الاقلام الخلصانة كمان! وبيترموا بعد عناء من زعيق الست الحاجة
وفى الغالب بحتفظ ببعضهم .. مش عارفة إشمعنى
والورق بقى.. بحب أكوره قوى أما يتملى كلام
جربى كدة.. بيكون طيب وسهل التكوير عن الورق الفاضى


eman m
طب ما إحنا حلوين مع بعض.. ليه نغيظ بعض بقى!
يااه.. لحد دلوقتى بزعل لما أفتكر قلمى .. تفتكرى هو فعلا حنين للقلم.. ولا عقلنا اللى بيكبر صورة أى شئ سبناه من زمان.. عشان يحسسنا إننا فوتنا أشياء عظيمة؟


بنت القمر
واضح إنك إتأذيتى من حد قريب
:(
بس البشر مش كلهم أندال كدة يعنى يا قمر ولا ايه؟


mo93bs
:D
امال لو كانت تدوينة عن الأكل كانت ح تبقى إيه
:PPP


لحظة تأمل
متشكرة يا لحظة
وربنا يديم عليكى اللحظات الحلوة كمان وكمان


حسام
من 14 سنة
وانا ضيعته بعد أقل من 5 سنين
وااااء
بس هو علاج سحرى.. وياليه شراء الكتب والبقالة
:D
مش عارفة السبب برضو


نون
u call everything names :D .. i wonder what for?


Dina
وإنتى كمان وإنتى كمان
:)))


الحزين لهموم الوطن
متشكرة لزيارتك أيها المهموم.. وأعتذر عن التبادل الإعلانى.. لإمتناعى عن كافة صوره منذ أمد بعيد


ريحانة
الله يركمك يا ريحانة ويزيدك من عبير الرياحين كمان وكمان
:))

سيكولوبيا *حكايات من العيادة النفسية يقول...

جميلة اوى التدوينة دى
فيها روح طفولية جدا
وفى نفس الوقت عقلانية جدا
حبك ليهم حب غريب وجميل
وله اكتر من معنى

تحياتى ليكى

ana ga3an يقول...

انا بس حبيت اسلم عليكي
فترة بقالك مختفية
وربنا ما يوقفلك براية

غير معرف يقول...

I know this is irrelevant, but I was wondering for some time now where did your Greader go. I am a big fan of it, and I am disspaointed since you removed it. Are there any solutions to that problem?

Lasto-adri *Blue* يقول...

Dear Anon,
No No, I didnt remove it..
may be you can try this link again.. it might work, who knows :)

http://www.google.com/reader/shared/user/09658043528347980045/label/fl-alb

غير معرف يقول...

Thanks, you can't imagine how much I am releived. But my question is, you used to have a link at the top of your home page called Greader, I can't see it any more, so do I have to write the URL every time I want to acces the page, regards

Lasto-adri *Blue* يقول...

Defiantly not!...
See for you I've just added
أماكن فى القلب
on the left side bar..
Anytime you wish to read the Greader link... click on "read more" under that title
:))

I might change few HTML stuff.. but in general, you'll have this option left as it is forever isA..

thanks for reminding me :)

Lasto-adri *Blue* يقول...

سيكولوبيا
:D
أنا لستُ أدرى ولستُ سيكولوبيا
:P
منورانى... وهو كل واحد أكيد جواه طفل زى ما جواه عاقل.. المهم يحافظ على الطفل ما ينساهوش.. ولا ايييه؟


إنت جعان
الله يبارك فيك يا أخى العزيز
مش عارفة ليه الناس بتقول عنى مختفية مع انى اهوه
:D
عموما ألف ألف شكر.. ونزورك قريب
;)

ahmed mefrh يقول...

السلام عليكم
بصراحه هوايات غريبه اول مره اشوف حد بيحب يجمع الاقلام بس نعمل ايه النفس بقى وما تريد

تحياتى ابو مفراح

micheal يقول...

يا نهار أبيض...ده أنا كنت فاكر نفسي الوحيد اللي عنده الهوايه دي...بس للامانه بطتلتها من بعد إعدادي بس بتفكرني بأيام حلوه
أنا كنت كمان اتغاظ أوي لو غطا القلم راح
:)
تحياتي لكي

micheal يقول...

يا نهار أبيض...ده أنا كنت فاكر نفسي الوحيد اللي عنده الهوايه دي...بس للامانه بطتلتها من بعد إعدادي بس بتفكرني بأيام حلوه
أنا كنت كمان اتغاظ أوي لو غطا القلم راح
:)
تحياتي لكي

على باب الله يقول...

عندي نفس المرض ده للأسف

و فعلاً زي مايكل كنت فاكر أني الوحيد اللي بيعمل كده

: )

---

غير معرف يقول...

:-D
انا كماااان عندي نفس الهوايه دي امي بتسميها مرض بس ولا يهمني
انا برده عندي قلمين سنون معايا من سنين واحد كنت برسم بيه ودا مكنتش ادخل اي امتحان رسم من غيره لو مكنش يبقي معايا معرفش اعمل اي حاجه هوا دلوقتي متشال بس ببص عليه كل حبه كده والتاني بقي مبيطلعش من شنطتي بكتب بيه كل حاجه واي حاجه يعني القلم دا لو بيتكلم هيحكي حكاوي كتيره كتبها
وعاشها معايا ربنا يخليهولي
:-)

semsem يقول...

الحمد لله
اخيرا
لاقيت حد عنده نفس الهوس بالادوات المكتبيه

انا كمان بحب الاساتيك واسكالها والاقلام والكشاكيل الملونه

:)

غير معرف يقول...

LOOOOOOOL aiwa i call them names l2an they dun leave me, dayman m3aya...
fa they r my most critical friends :D

إنسان || Human يقول...

أنا زيك بعشك الأقلام بس الرصاص

watan يقول...

يا سلام ..

لقيت حدا اشاركه هالهواية الغريبة

الدفاتر والاقلام عشقي الخاص كل واحد اله تاريخه وحياته وكل واحد اله هوايته ومزاجه... وصعب اروح على اي مكان بدون ما اوقع بحب واحد جديد وطبعا اعمل طوشة واروحهمع ي ع الدار

كون بخير:)

نهى جمال يقول...

بالعكس شي مش غريب

من حق اي حد يعنز بأي شيء طالما فيه احساس بينه وبين الشيء ده

أنا معنديش حب احتفاظ الاقلام بشكل خاص
لكن فيه اقلام مميزه بحب تفضل معايا وقت اطول

بس اللي بحب احتفظ بيه صور الاماكن ، وطبعا تذاكر الموصلات لمكان او مشوار مميز أو يوم ليه ذكرة معينة سواء موجعه او حلوة

وطبعا الورد بحب اجيب الانواع الغريبه منه واجففها في كشكول او بتكون هدية من حد فبحتفظ بيها

تعرفي بحس ان الانسان علشان يزود انسانيته لازم يتفاعل مع كل الجماديات اللي حواليه انها شيء بيحس او شيء منه

رغيت كتير
بس امتعني الحميمية اللي بينك وبين اشيائك

تحية

سلسبيل يقول...

اولا البوست جميل اوي
لاني انا كمان بحب الاقلام والكراريس والورق الفاضي واسلام بقي لو فيه الوان..صراحه مابعملش بيهم اي حاجه...موهبتي ف الرسم صفر محترم..بس بحب اشوفهم..واشم ريحتهم زي مانتي بتقولي..بتديني احساس بحاجه مش عارفه اوصفها ...يمكن حب تملك فعلا!!!!
فيه مركز لبيع ادوات مكتبيه للمكتاب الكبيره ف شارعنا...مساحته كبيييره اوي..والارفف فيه مليانه رزم كراريس وعلب اقلام رصاص وحبر وجاف والوان باستيل وبرايات ومساطر ووووو...كتيييير ...مترتبه بصورة مستفزة..وحلوة بشكل يغيظ.....بحب اوي اقف قدامه..من غير اي سبب
بتخيل كل يوم وانا باعدي عليه..كام حكايه ممكن تتحكي علي ع الورق الفاضي ف الكشاكيل دي كلها..كام قلم ممكن يكتب كام فكره طقوا ف دماغي ف نفس الثانيه..كنت باحلم ادخل جوه ووسط الناس كلها افرش ع الارض ورق اسكتشات الرسم واطلع الالوان واملاها شخابيط مالهاش اي معني..بس نفسي اعمل كده..
صحيح هيبقي منظري بايخ بقي ويقولوا مين المجنونه دي وبتاع...وماله يعني هو مين فيهم عاقل

معلش علي الرغي بتاعي..بس انتي اللي فكرتيني ..استحملي بقي :D

مها يقول...

ياااااااااه التدوينة دى عنى .. كأنك بتحكى عنى ..بس القلم اللى ضاع منى كان كحلى مش فيرانى .. والنوتات .. والبرايات .. هوايتى الأثيرة .. وأحلى حاجة إنى عرفت النهاردة إن فيه ناس مجنونة بيها مثلى أنا .. مثلى أنا