السبت، يوليو 01، 2006

ياواش يا واش يا مرجيحة


امبارح نزلت مع مامتى "أنجاجيه" نشترى لبس عشان فرح ابن عمى كمان كام اسبوع..
وكانت الصدمة!!!

اللبس السنة دى هباب.. والأسعار هبابين
كله عبارة عن ترتر.. الطرح ترتر... العبايات ترتر.. بلوزات ترتر او مهرتل.. شباشب ترتر.. شنط ترتر..
الرحمة من عندك يا الهى..

حجاب ايه دة اللى كله بيلمع!!!


بى اس:
تحت وطئة الظروف الراهنة.. ومستجدات الافراح والليالى الملاح.. اضطريت مأسوفة على أمرى أشترى أول ويمكن آخر بلوزة بترتر... وربنا يسامح اللى كان السبب


سلاماتى

هناك 10 تعليقات:

change destiny يقول...

هههههههه



يا ستي ترتر ترتر


صدقيني اللميع اللي في الفرح حيغطي على كل حاجة

Unknown يقول...

:)))))
حجاب ايه بقى كل سنه وانتى طيبه ... احتفظى بهدومك القديمه حتجتاجيها فى وقت عوزه احنا داخلين على ايام سودااااا.. شكلهم عايزين يلغونا من البلد بس على مين .. على قلبهم ;))

Lasto-adri *Blue* يقول...

change destiny
ابنتى دى اول مرة البس فيها بترتر.. ومش مصدقة نفسى!!!


moia
أيوة ونبى يا بنتى
لحسن دول اصلا مش باينلهم ناوين على بر
كل سنة تقليعات هباب... واللى زاد وغطى فعلا موضوع موضة المتحجبات دة
حاجة تقرف

غير معرف يقول...

الطقم ده محتاج معاه خلخال

الافغانى يقول...

علي فكرة دي يمكن فكرة عشان يحجبو دمغنا بالترتر ومنشفش المصايب البتحصل كل يوم

SaSo يقول...

عملتى زى
لما نزلت-مع مامتى بردو- شوفت نفس الترتر
ماما سالتنى "ها هتعملى ايه ياام ترتر"
بس الحمدلله ربنا كرمنى ومشتريتش أى حاجه بترتر بردو
قاطعو منتجات الترتر

غير معرف يقول...

والله يابنتى قلت ترتر ترتر ماشى هامشيها بس الوكسه الكبيره انى لما روحت أشترى وده مشبيحصل كتير طبعا لاقيت الخيبه الكبيره فى المقاسات ايه النيله ديه كله ميديم ولارج بكتيره 00 والله اشتريت الهدوم ورحت البيت قلولى ايه ده انتى هاترقصى بيهم ورحت أرجعهم ملاقيتشى حاجه جبتهم معايا تانى 00 وتقوليلى ترتر 00 ترتر ايه وانبى

Lasto-adri *Blue* يقول...

Anon
ممكن برضو.. وافتح معرض متحرك..
بس معرفناش السيادة؟!!


الأفغانى
تصدق انه ممكن فعلا
اصل لاء بص.. فجأة كدة فى هوجة محجبات فى البلد.. والناس بتتكلم فى حرمانية تاركة الحجاب.. بلابلا بلا.. وفى نفس الوقت تطلع موضة الحجاب والمتحجبات
واللى زاد وغطى.. بقى برامج زى متاع اللى على دريم دى تجيب قسم للمحجبات..
نياهاهاها


Sarwa
احم.. طب ممكن المقاطعة بعد الفرح؟


gananooor
لوووووووووووووول
دا حالى.. لان بعد آثار هندسة الفظيعة.. بقيت زى علبة الكبريت كدة فى الحجم
وحتى السمول.. اكبر منى بكتييييير
وههههههه.. منظرى مسخرة
مابالك بالترتر

Eman M يقول...

ترتر ترتر .. دى هتبقى سكر عليكى يا آنسة، هوة لبس الفرح يبقى لبس كويس من غير ترتر؟ :p

nour_aleman73 يقول...

اكيد الترتر بيكون ملفت للنظر واللى لابسه حجاب المفروض تحافظ عليه والسلام عليكم