الأربعاء، يوليو 26، 2006

*بعيدا عن لبنان للحظة.. هنا القاهرة


النهاردة استغربت لما شفت هيئة لتمثال "رمسيس التانى" واقفة فى "ميدان التحرير" بتمام الساعة الواحدة ظهراً.. لان المعتاد بالنسبة لى أشوفه فى ميدان "رمسيس" أو ميدان "محطة مصر" –كما كان يطلق عليه سابقا- أو فى ميدان "الجلاء" فى طريق صلاح سالم المتجه للمطار.. و لما رجعت بيتنا و شاهدت الجميلة دائماً "منى الشاذلى" فى برنامجها "العاشرة مساء" مع أحد الضيوف الافاضل –مع الأعتذار فلا يحضرنى اسمه حالياً-.. وعرفت انه مجرد صب خرسانى بنفس وزن تمثال رمسيس الحالى.. (83 طن للتمثال.. و30 طن للقاعدة الجرانيتية..) وسيستخدم البناء الخرسانى فى التجربة الثانية لنقل تمثال رمسيس الأصلى من ميدانه الى ميدان "الرماية" أمام المتحف المصرى الكبير (على مسافة قريبة من أهرامات الجيزة والمقرر افتتاحه فى 2009) بعد التجربة الناجحة الأولى لنقل قطع صخرية فى نفس وزن التمثال.

وبغض النظر عن الدوافع لنقل التمثال.. سواء للحفاظ على صحة وسلامة سيادته.. او للحد من التلوث البصرى فى المنطقة.. وبغض النظر عن الاستعدادات المهيبة لنقل سعادته.. واللى ستتكلف –على أقل تقدير- 6 مليون جنية مصرى لا غير –خالصة الضرائب والحجوزات- .. الا انى بتساءل مين أذن بالنقل؟؟؟
أنا كمواطنة مصرية أباً عن جد.. وكما هو منصوص عليه فى الدستور المصرى ليا حق انى (أبعبر) عن آرائى ومشاعرى وأفكارى... ورغم كدة.. ماحدش أخد رأيي فى هذا الموضوع!!! لأنى رافضة –بكلى- رفض نهائى نقل رمسيس من مكانه ولأى حتة فى البلد .. حتى وان كان بيتى.. !!
ميدان رمسيس يمكن من أحب الميادين لقلبى .. رغم زحمتة وتلوثه وخنقته وتكدسه وعشوائيته الا انه مثال حى للحياة المصرية.. من محلات الفول والطعمية.. لمحطة مصر .. لموقف "أحمد حلمى" وثقافة الميكروباص.. وكبارى عبور المشاه الغير مستخدمة واصرار المصرى على (اقتحام الشارع).. والمدخل لميدان التحرير والأوبرا والاسعاف.. ومحكمة مصر.. ومبنى جريدة الجمهورية ونقابات المهندسين والتجاريين.. ومترو الأنفاق وكوبرى 6 أكتوبر.. ورمسيس الثانى واقف صامد فى المنتصف.. بتشرق عليه شمسنا فى الفجرية وبتغرب ونسمات العصرية.. بيشير لعظمة الانسان المصرى وصلادته أمام نكسات الزمن..
لا أتخيل انى ممكن أعدى الصبح على ميدان "محطة مصر" وآخد لى (كام قفا) فى الزحمة المعتادة للطريق المؤدى لميدان التحرير.. أقابل المتحف المصرى.. ثم تختلط عروقى بالنيل وأتأمل الأوبرا وحديقة الحيوان ثم جامعة القاهرة والأهرامات... من غير ما أصبح على جدى ومن غير ما أطل عليه ولا طله !!

طب.. وبغض النظر عن اللهجة العاطفية فى كلامى.. عندى تساؤل آخر عن جدوى النقل..؟!
فهى ليست المرة الأولى التى تطلع فيها الحكومة باحدى عجائبها (الخزعبلية) من مشاريع (مفتكسة).. وإحنا (ولا الضالين.. آمين) !!
سمعنا عن مشروع "أبو طرطور".. وسمعنا عن مشروع "توشكى".. ومدينة الانتاج الاعلامى .. وغيرها من المشاريع والتعديلات القانونية واللوائح... ويوم يقولوا ستدر الدخل او ستمنع معرفش ايه.. تانى يوم يقولوا (وللحيثيات الفلانية التى لم تأخذ فى الاعتبار.. فشل المشروع!!)
على فكرة الموضوع دة بيفكرنى بمعونات تجميل القاهرة اللى أغلبها بيتوجه لبناء الرصيف الحيلة اللى كانوا لسا هدينه بالمعونة اللى قبلها!!

طب وان حصل واستثنيت الحكومة رأيي الفرد.. وفكرت تأخذ برأى الأغلبية.. اراهن ان 50 مليون من الـ70 مليون مصرى ح يقولوا "لاء" للنقل.. حتى وان لم يزوروا ميدان رمسيس فى حياتهم..!! لانه فى الأصل رمز يفهمه كل مصرى دون وعيه وبعيد عن ادراكه..

ثم فى سؤال تانى.. أيهما أفضل ولماذا.. نقل التمثال بـ 6 مليون جنيه.. أم..
6 مليون جنيه لتنظيف وتجميل الميدان و (استحمام) رمسيس افندى وبناء مساكن جديدة للشباب بدل الزحف العمرانى القاتل لأجمل ميادين القاهرة؟!
صحيح رمسيس ركن فى قلبى.. انما مصر هى قلبى.. والنيل شرايينى.. والمصرى نبطه..
أنا مش زعيمة.. لكنى فى الأصل مصرية... وأزعم انى ممكن أقول "طظ" لرمسيس ذات نفسه لو ان راحته فيها سفه من غير نفع يذكر..

آخر سؤال بيلح عليا بجد.. بعد ما يعزل رمسيس من ميدانه.. هل سيبقى اسمه "ميدان رمسيس المعزل".. أم "ميدان محطة مصر".. أم "ميدان مبارك**"؟؟



للعلم:
* كتبت الموضوع يوم 24 يوليو..
** بقول ميدان مبارك تبعا لاسم محطة مترو الأنفاق هناك..


سلاماتى

هناك 19 تعليقًا:

عبدالرحمن يقول...

تعرفي إني حاولت أكتب عن الموضوع من أكتر من سنة، وبعتت لبريد الأهرام (لم ينشر) على أساس إنها شكوى مواطن، لاني عرفت وقتها إن مكان التمثال حيكون فيه جنينة... بس كده
وطلبت إنه يكون فيه مسابقة زي سمبوزيوم النحت، لنحت تمثال جديد على المواصفات الفنية للدولة الحديثة في مصر القديمة...
لكن .....!؟
***
رمسيس....
ده ملك عظيم بجد، ممكن الناس تختلف حواليه، لكن هو يستحق انه يكون الميدان باسمه.
ازاي يبقى شارع رمسيس، وميدان رمسيس .. من غير تمثاله ..
**
أكيد فيه حاجات كتير أهم الواحد ممكن يتكلم عنها اليومين دول عن لبنان وأحوال مصر... بس اللي بيحصل ده اهانة لملك من الملوك بدون سبب، الملك ده مش أقل من عبدالمنعم رياض أو نجيب محفوظ... أو طلعت حرب .
**
أتمنى يكون فيه تمثال بديل أعظم من السابق ... بدل الحجارة الجرانيت اللي بتضيع في أعمال محدش بيفهمها .

Captain L.J.Silver يقول...

Awwalan b2a ana sem3t enn ramsees II zat nafso geh le 3ammo 7os fe el 7elm we 2allo ya 7oss ana te3bt men el za7ma we el2araf ...3ayez a3`ayar gaw ...walla 2asdek b2a en el rayyes kaddab ????we ba3dain enagazat we mashroo3at el 7akooma akbar be kteer men en nas zayyena testaw3ebha ??wla fakra ennek hatfakkary a7san men el 7okoma b2a kaman ? da e7na ne7med rabbena 3la el rayyes we el 7okoma we 3la Jimmy kaman ,,,we yeg3alo 3amer ! :))))))))))))

Epitaph يقول...

wala ana m3 el na2l..w 2olt keda mn zaman..7'alas..ba2a kefaya ba3za2et floos..wala howa tabzeer w 7'alas..mn kotraha ya3ni

tela2y 7aytla3 le 7ad sabooba 7elwa mn el leila di

eb2y tamniny 3aliki))

Lasto-adri *Blue* يقول...

عبد الرحمن
أتمنى يكون فيه تمثال بديل أعظم من السابق ... بدل الحجارة الجرانيت اللي بتضيع في أعمال محدش بيفهمها .
أيوة ونبى .. لحسن بحاول افك الخط فى الحجارة عجيبة الهيئة اللى بتتحط فى بعض الميادين دون جدوى
ماليش فى الفن المعاصر دة
بس تفتكر لو شالوا رمسيس ممكن يحطوا مين ومعتقد ن بعض الأقلية انه يوازى رمسيس فى هيبته وانجازاته وطول فترة حكمه؟؟
:D


Captin
كلامك بيفكرنى بافلام يوسف شاهين
ماحدش بيفهما غيره.. وحتى ده مشكوك فى أمرها
** اقثد الكلام عن المشروعات طبعاً**
ههههه
على فكرة.. اسمك الجديد طويييييييييل قوى


epitaph
وانا والله بقول كدة فى عقل بالى برضه
اصل بجد حد يجيب لى اسم مشروع او قانون اطبق فى السريع الا ما كان من وراها مصلحة
<<

Captain L.J.Silver يقول...

Mahwa da bardo nafs el 2esm el 2adeem elly kan fe live journal ! we ba3dain howa feeh "JAZEERAT KANZ" men 3`air Silver ? :))))

Timmy يقول...

انتي بتتريقي علي انهم هيسموه ميدان مبارك ..... طيب اقري الخبر ده في المصري اليوم

http://www.almasry-alyoum.com/article.aspx?ArticleID=24989

إطلاق اسم «مبارك» علي ميدان رمسيس بعد نقل التمثال

محمد أبو زيد يقول...

إيه ده ؟
إنتي بتقري الكف ؟
عرفتي ازاي انهم هيسموه ميدان مبارك
النهاردة الصبح ببص في المصري اليوم اتفزعت لما عرفت انهم هيسموه كده فعلا
لكن قلت لنفسي همه يمكن عايزين يسموه كده على اعتبار ان مبارك فرعون برضه

ربك يبعتله موسى

Lasto-adri *Blue* يقول...

محمد ابو زيد
والله لما فكرت لقيتنى اجيبها كدة او كدة.. يبقى الحل الأمثل لاسم ميدان بددل رمسيس.. يبقى اكيد مبارك.. خصوصا وان المحطة هناك فعلا اسمها مبارك... بس يا ترى يا هل ترى الحكاية دى جت صدفة ولا متدبرة؟؟


Timmy
يالهوى... دا انا بجد كنت بتساءل بجد
وطلع حقيقى

محمد أبو زيد يقول...

يعني هيه جات على الميدان
ما هو كل حاجة مكتوبة ومتدبرة
بس أنا ممكن أقولك ليه كل حاجة بيسموها باسم مبارك
عشان ابنه لما يمسك الحكم ما يغيروش اللافتات ، ترشيدا للنفقات طبعا، كل اللي هيعملوه أنهم هيكتبوا جنبها : وولده جمال

The_invisible يقول...

With no long experience in life, when they call the square 'Mubarak's square' after getting rid of Ramses is not the fault of Mubarak himself as the fault of the group of hypocrites who have zemam elomoor and those who take decisions and so...
They keep hypocracy thinking that it saves their positions ...God help us

Steliano Ponticos يقول...

so why are they moving temsal ramsees el tani?

الغـــــــــــــريب يقول...

على فكره الموضوع ده عامل قلق كلام فى سركم أنا سمعت أن الملك رمسيس زعلان وناوى يدخل الأنتخابات الجايه بيقول مستخسرين فيا ميدان ،وكهنة المعبد وكمان الأله أخناتون بيوزعوا منشورات على ورق بردى وناويين يعملوا مظاهرات هم وسكان مدينة طيبه الاملك مينا بيحزر من تدخل أجنبى من جهة ملك الحبشه وملك النوبه بس الخوف بقا من الأمن المركزى يقبض على قدماء المصريين ومعاهم كام واحد من المدونين ربنا يستر على الشرقاوى وكريم
بس أحتمال الست كونداليزا ريس تتدخل خاصة أنها بتقول أنه مــخــاض ميدان رمسيس جديد ،بس الجماعه السعوديين بيقولوا ده صنم كسروه وناس هناك بتقول ده شيعى صراحه الكلام كتير
بس الواضح أن رمسيس عامل قلق بوقفته فى الميدان ربنا يستر على أبو الهول سلام بقا أرجع للتابوت بتاعى

BaTaBeeT يقول...

3la fekra ana seme3t 7war midam mobarak da mn aktr mn 7add!!
shaklaha 7ateb2a keda
w ma7atet mobarak bta3et el atr
w ye7oto fil nos temsal l mobarak

salamtek !!

Raed يقول...

طيب لم لا يوضع التقليد هناك في المكات باء عوضا عن البهدلة يا ستي : سيبي المقاول يعيش

Eman M يقول...

ميدان مبارك
ما هى دى الخطة فعلاَ

Ensan يقول...
أزال أحد مشرفي المدونة هذا التعليق.
The Eyewitness يقول...

تصدقي حكاية أسم الميدان ديه مجاتش في دماغي قبل كده. المصيبة لتكون كل الحركات ده عشان موضوع تسمية الميدان ده. ملحوظة قوية وحلوة وطبعاً ذي ما أنهم مخدوش رأي حد في نقله - آلي انا مش معطرد عليه بالأخص لو كان هيخدم الناحية المرورية بآي شكل من الأشكال في الميدان - أكيد مش هيخدوا رأي حد في التسمية الجديدة.

The Eyewitness يقول...

يظهر أن الخبر أتأكد
http://news.filbalad.com/News.asp?NewsID=14515

3rby يقول...

انا اول مره ادخل البلوج بس اسمه كنت باسمعه كتير...المهم...هيه ديه ثقافة الميكروباص...طظ في المصريين وخليهم يتنفسوا فحم....يعني ال6 مليون جنيه ديه مش لو اتصرفت علي تخضير الميدان مش هاتخلي الشجر اكتر من البشر اللي زي النمل....اراهن ان فيه فلوس من تحت الترابيظة لمسؤل كبير...نسبة يعني...زي صفقة عمر افندي....او يمكن يكونوا هايبنوا قصر جديد للحمار بتاعنا هناك ومكسوفين يودوه بع البدء في البناء...زاتعودنا علي حاجات غريبة لدرجة ان الغريبة مابقتش غريبة