الجمعة، نوفمبر 25، 2005

حالة غريبة

اليومين دول ناس كتير قالوا إنى بقيت غريبة. بضحك وأدمع من غير سبب واضح. حتى أنا بقيت مستغربانى. كل كتاباتى من نوع عمرى ما كتبته من قبل أو كتبته وهربت لما قطعت الورق. عمرى ما حاولت أكسر الحاجز الداخلى؛ وأقاوم رغبتى فى إخفاء كل معالم شخصيتى أو ملامح أطياف أفكار ودعابات خيالاتى. حتى فى أحلك لحظات مرحى كنت بدارى. كنت بحاول أبعد الناس عن مملكتى البعيدة وأسبابى الصغيرة. وغالبا كان حتى أقرب الأقربين ما كانوا يعرفوا إن كنت سعيدة أو مخنوقة. مبسوطة أو متنرفزة. والصراحة كنت بفرح بحالة الخصوصية اللى معتمة على حياتى. كنت بفرح إنى ملكة فى أرض مجهولة للجميع معلومة لشخصى وحده. أملك وءأمر وأنهى وأطوف وأحلم وحدى.
إلا إن اليومين دول الفرح بيبان فى عينونى. ونفسى السعادة تغطى العالم كله. نفسى أقول للعالم أنا فوق السحاب. نفسى أصرخ للناس تقاسم بسمتى وتشوف الدنيا بنجوم أول مرة تظهر فى سموات مملكتى. كلام غريب! لكنه حقيقة اليومين دول. الحقيقة اللى حاولت أنكرها بينى وبين نفسى. لكن أرجع و أفرح زى الأطفال لما أشوف اسباب سعادتى. وزى الطيور لما تلاقى أغصان تظلل عليها حر الصيف وأوراق تحميها المطر تلاقى عيونى بيتنطط فيها ضو. أفتكر لحظات إتولدت فى عمرى الجديد وأتمنى بكل جزء فيا.. أتمنى إن العمر كله يفضل اليومين دول.

هناك 11 تعليقًا:

غير معرف يقول...

بتفكرينى بمقطع من اغنية لام كلثوم دايما بغنيه لما اكون سعيد

مقطع معبر قوى عن حاجات جوانا

ابتديت دلوقتى بس احب عمرى
ابتديت دلوقتى بس
اخاف للعمر يجرى


لكن برضه للملكة الخاصة سحرها الذى لا يقاوم

Mr-Biboooo يقول...

ده كان انا بس سهى عليا

Ahmed Shokeir يقول...
أزال أحد مشرفي المدونة هذا التعليق.
Ahmed Shokeir يقول...

أولا
سعيد بالحالة النفسية العالية اللى إنتي فيها

ثانيا
مبروك عودتك للتدوين بالبلوج العربى

ثالثا
هى كده الدنيا بترمينا كل يوم من حال إلى حال المهم نعرف نتعايش مع جميع الأحوال

رابعا
تعبيرك عن حالة الفرح بكلمات زى الأطفال السحاب الأغصان الطيور بتدى إحساس بالحالة

خامسا
سلامو عليكوا

Lasto-adri *Blue* يقول...

anonymous:
تصدق إنك بجد جبت المقطع اللى فعلا بيعبر عن حالتى دلوقتى..
كنت أتمنى لو أعرف إنت مين؟

mr-bibooo:
طب بركة إنك كمان مبسوط

Ahmed shokeir:
ياأهلا يا أهلا بيك..
وعليكم السلامم ورحمة الله وبركاته

غير معرف يقول...

مقدرش أقولك غير : ربنا يزود فرحتك و يعيشك فى اكتر سعادة ممكنة طول عمرك :D

Unknown يقول...

خلى اللى جواكى جواكى متطلعيش اى حاجه منه بره عيشيه لوحدك وبس عشان مافيش ولا حته منه تنقص.. حيبقى طعمه احلى كتييير

Lasto-adri *Blue* يقول...

Sheryos"
thank u for the wish again and again

Moia:
أنا إتعلمت اشارك الفرح مع الناس.. بس قريب قوى.. والحق يقال.. طعمه كدة بقى أحلى بكتييييير وأنا شايفة الناس حوليا كلهم مبسوطين ويايا

Mr-Biboooo يقول...

لا اله الا الله هو انا المفروض افهمك ازاى انا نسيت اعمل لوج ان انا يا ستى والله العظيييييم انا

اناااااااااااااا


مش هعمل كده تناى هعمل لوج ان قبل ما اعلق

Lasto-adri *Blue* يقول...

لووووووووول
معلش يا
mr bibooo
موسم إمتحنات و الواحد بيتنح

islam yusuf يقول...

مش عارف ليه مش عارف ليه؟ دا المبتدألأغنيه لعلى الحجار مش عارف ليه انا مفتقد الحاله النفسيه اللى انتى فيها نفسى أحس بالسعاده فى يوم من الأيام اللى جايه بس خايف أما الواحد يكون سعيد بيقول اللهم اجعله خير...قولتيها؟