الأحد، أبريل 27، 2008

عشان بدى أتكلم

من أسوء أنواع الأحاسيس، لما تحس كإن عقلك "بيأكلك". عمال تفكر فى كل الإتجاهات، وفرضت كل الإحتمالات، ومخك مصر على إنه مش عايز يريحك من التفكير. مع إنه موضوع أبسط من كل التعقيد أو يعنى ما يستاهل كل دا الإهتمام.

ويظل الأسوء من كل دا ودا، لما تلاقى فى عز إحتياجك للكلام، بيفقد الكلام قيمته. بتكون عارف ومتأكد إنت نفسك تقول إيه، ورغم كدة مابتعرفش تعبر صح، أملا منك فى إيجاد حل أكثر واقعية من الكلام. لكن الكلام بيسكت، والحل ما بيتوجدش. مخك مشغول ومن كتر شغله مش عارف يوقف لفه لحظات، تفرغ شحنة من التفكير وترجع تفكر تانى مش مهم. المهم تخف الحمل عن عقلك. لكنك -لا إراديا- كإنك غاوى تعب وسادية متأصلة فى شخصية سعادتك منذ الصغر.

بجد إحساس مقرف. خصوصا لما تلاقى حد حوليك نفسه يخفف عنك، لكنه مش قادر، أو مش عارف يعمل ايه.
كإنك بتتقتل مرتين فى نفس الوقت.. مرة عشان تعبك.. ومرة عشان تعب غيرك لتعبك.


لو كان فى الدنيا زرار refreash... أعتقد -فى حالتى دى- كنت إرتحت..


----------
بى إس: وحشتنى سلاماتى

إذن..
سلاماتى

هناك 7 تعليقات:

NoOR يقول...

نفسي في زرار refreash جدا بس ياريت بقي يبقي في زرار restart

هاجيب مالاخر

محمد عبد الغفار يقول...

المجهود البدنى ممكن يكون حل

Lasto-adri *Blue* يقول...

@noor
بس أنا مش مستعدة أفتقد أشياء جميلة فى حياتى بزرار
restart :(


@ محمد عبد الغفار
ولو كان المجهود البدنى أحد أسباب الحالة دى... تفتكر يكون إيه الحل؟
:(


منورين عندنا

محمد عبد الغفار يقول...

انا اقصد الرياضه المنظمة

Dina El Hawary (dido's) يقول...

انا متفـقة مع محمد عبد الغفار يا لست، يعني لما بطلعى طاقة في حاجات رتيبة عقلك عادة بيقف عن اللف
جربي الرياضة بس مش المشي عشان المشى فرصة قوية للتأمل والتفكير
عارفة إيه كمان: الحاجات اللي محتاجة تركيز زهني محدد زي الكلمات المتقاطعة والسودكو وماشابه

إبـراهيم ... يقول...

حلووووو قووووي قوووي البوست ده يا إيمان، وحسيته جدًا ، أنا أوقات بفكر نعمل لنا مش بس ري فريش، لأ ، أوف لاين كمان، زي اللي عامله على طوووول ف الماسنجر !!!

تحيااااتي، وأشكرك بشـــدة

خالد كامل يقول...

اولاً مدونتك انا كنت دخلتها صدفة مكنتش لسة دوست فى موضوع التدوين و كدة و هى مدونة جميلة قوى

اما بالنسبة لموضوع زرار ريفريش ... فبالنسبة ليا لو كان في زرار ريفريش كان هيبقى بايظ ... اصل الفقرى هيفضل طول عمره فقرى
تقبلى مرورى