السبت، ديسمبر 01، 2007

حالة روتينية

انا زهقت من انى افتح كل يوم الصبح بلوج ما وألاقى "الحرية لمعرفشى مين".. كانها موضة
كل يوم واحد يتحبس عشان حد يعمل عليه حملة..

انا زهقت من شكل تاج السلطانية اللى كل واحد فرحان به وهو مش عارف ان اساسها كلمة انجليزى يا بشر Tag
محدش قال انها سلطانية تلبسوها!

انا زهقت من صفحة نعى جرنال الاهرام اللى بدئت تتسحب على البلوجات....
الله يرحم الجميع... انما مش مستوعبة مدى اهمية طلب الدعاء كل يوم لجوز مرات ابن عم خال حماة بلوجر..
وكإن الدنيا وقفت مابتمشيش

انا زهقت من طلبات استجداء التعليقات فى البلوجات
وكانه هو الهدف اساسا من عمل البلوج.. انك تكتب عشان الناس تعلق..
وشوية وقلبت على سباق!

انا زهقت من المزايدين على كل قضية ويفكروا ويتمحصوا ويمحصوا ويتفحصوا... وكل واحد فاكر نفسه ابو العريف.. وهو يعنى يامولاى كما خلقتنى.. زيي زيه... ما نفرقيش بالمنظر اللى يخليه يتمنظر ويتنطط ع الخلق..

انا زهقت من صور الدباديب والبنات اللى معرفشى حالهم عامل كدة ليه، اللى كل حد مالى به كل كلامه.. وكانه بقى من عالم آخر..
وأنا جيت الدنيا ازاى؟!

انا زهقت من كلام الحب والهيام اللى بسمعه واقراه واشوفه فى كل ركن فيكى يا دنيا وكانه الامل السامى المتعالى لكل واحد ولا واحدة فى الحياة
و من غيره لا تستقيم البشرية!

انا زهقت من اللى فاكرين نفسهم حامى حمى الدولة وهمه اللى شايليين على دماغهم هموم الوطن وواخدين فى وشهم وزاعقين..

انا زهقت من حلقات الاعلانات الغير مدفوعة الاجر.. وكانه اصبح الـ Theme العام لمعظم المجاملين لأشياء مش فاهمة ايه مدى جدوتها للانسانية..

انا زهقت من الناس اللى بتفهم بجد.. ولها رؤية... ليه كل واحد اختفى معالمه وتاه؟
انتم فيين... اصحوا بقى


انا زهقت من البلوجات ع المبلوجين..
بقت حالة روتينية مالهاش اى طعم.. اقوم بها من باب العلم بالشئ.. لا اضافة ولا استمتاع
مجرد مقارنات بالية بين حال زمان وحال دلوقتى

كفاية بقى... أنا زهقت


------------
بى اس: رغم انى زهقت من تقريبا كل حاجة.. الا حاجة...
كل واحد او واحدة بيعدى هنا ويرمى سلام فى امان.. او حتى مايرميش ولا يطمن...
لكن مرحبا لاداءكم المحترم على مدى عمر البلوج.. (أكيد عارفين نفسكم، وانى بتكلم عنكم)
خلونى فى لحظة صدق.. اشكركم..
بيكم.. ممكن يكون مجتمع تدوينى افضل!

هناك 22 تعليقًا:

Unknown يقول...

Unfortunately, what you wrote here is so damn true!

غير معرف يقول...

بلو
أخبارك إيه يا لاستو

عندك حق بس ناس كتير و أنا منهم ماصدقت تلاقي مكان تقول فيه كل اللي هي عايزاه

:)

يساري مصري يقول...

يسلم فمك
انت قولتي اللي بقالي فتره نفسي اقوله و خصوصا بقى خكاية "free XXXXX "
و آخر واقعه حصلت ساعة مظاهرة شارع الهرم الفاشله
واحد اتمسك هوب عملو بانر و رجع يحكي عن التعذيب و الضرب و اللي حصله و شطح و نطح و قال كسرولي ضلعين و ادوني بنج و اتحمروشوا بيا
و أكتشف انه طلع بعد ماتمسك بنص ساعه و روح و كان قاعد على الفيس بوك
و مفيش داعي لذكر اسماء يتضح انه مدعي لإجتذاب تعاطف البعض و صنع شهرة المكافح

هذا هو حال الخراء اللي وصلناله
و تحياتي ليكي

Zeinobia يقول...

و انا كمان زهقت

عدى النهار يقول...

وليه الواحد يسيب نفسه توصل بيه لحالة الزهق دى

Unknown يقول...

التعليق بالموافقة على هذه التدوينة سيكون صك النجاة و ختم الاستثناء و الإعفاء من قائمتك الخاصة بمسببي الزهق.
و حاتلاقي الناس اللي بتزهقي منها بترد و توافقك على كلامك و انتي مش قادرة تقولي لهم حاجة !
عارفة ليه ؟.. عشان سطر الاستدراك المهذب اللي انتي حاطاه في الهامش.. دمرتي بيه التدوينة كلها :(

غير معرف يقول...

hehe .. a bit late don't you think

كلمه يقول...

loooooooool
enty lsa fakra :D
ya shee5a dol kano 3ayzeen ye3mlo GAM3YA lel bloggers :))

البرديــــــة المصرية يقول...

هونى عليكى
ده أمر طبيعى , البلوج حتى الآن يعتبر مجرد مكان يقوم كل شخص بتفريغ ما بنفسه من كبت أو أفكار أو أحلام وربما عقد نفسية

وطبيعى ايضا انك تشوفى سلوكيات زى اللى قلتيها

لكن كل ده لا يجب أن يدعوكى للزهق
بل يدعو للرفق بهؤلاء ومحاولة توعيتهم بأن هناك أشياء أفضل يمكن استخدام البلوج فيها

عباس العبد يقول...

انا سبقتك يا لست ادرى
و كتبت انى زهقت من الحملات و الاعلانات و البانرات
و حملات المثقفين
انا معاكى فى كل الى انتى قلتيه
.......
متيجى نعمل حملة انا زهقان منكم
و نعمل بانر
نكتب عليه
الزهق لزهقان

bluestone يقول...

ومين سمعك يا لستو

Mongey يقول...

حلو اوي البوست ده علي فكره دخل دماغي
بس انا شايف ان الي المفروض يتقال ان خلاص التدوين خلاص اخد مساره الطبيعي عكس البداية لما كان عددكم قليل و كده فكان يصح يقال مدون انما دلوقتي لا تصح الكلمة دي الا علي المدونين الجامدين زيك كده
اتمني تكوني فهمتي قصدي
و اتمني انك تكوني بخير

سلام

Mustafa Rizq يقول...

أنا مش فاهم انت مزعله نفسك كدا ليه.. طب ما كل حاجة ف الكون بتبقى مملة و روتينية بعد شوية... لأنها ببساطة ما بتبقاش هيا... و لأننا كدا.. بشر

و بعدين مخنوقة من مكان، ماتكونيش فيه... المسألة بسيطة، مش بسيطة قوي.. بس يعني، ممكن

عارف ان كلامي ممكن يكون مش ف وقته خالص دا طبع غير انه سخيف.. بس و الله لو تخطينا كل ما هو مؤقت و انتبهنا لما هو انساني، دائم .. فقط لكل حقيقي، ستكتشب الأشياء طعمها و ألوانها من جديد

سلامي

Layla يقول...

المشكلة في الروتين فعلا

احيانا كتيرة الواحد بيتوقع الموضوعات الجديدة اللي نزلت في مدونات بعينها قبل حتى ما يفتحها ويقراها

abderrahman يقول...

طب أنا دلوقت الفضول هيموتني فعلا، خصوصا بعد البي إس
ياريت تحددي اسماء بعينها
O-O
UUU
**
إنتي عايزة الصراحة بقى
أنا أكتر حاجة زهقت منها، بعض مدونات المثقفين والأدباء
**
وبعدين انتي زعلانة من الدباديب والحاجات البناتي دي ليه، هو انا بكرهها موت بس برضو، أعتقد دي اكسسوار يعني
:)

لحظة تأمل يقول...

مش عارفة ليه معرفتش امسك دموعى لما قريت اللى انتى كتباه

يمكن عشان زهقانة وبتلكك

بس كمان لانك لما قلتى كده حسيت انى هفقد حد فى المدونات دايما بيعبر عن اللى بحسه واللى بتمنى اقوله

لما قريت كلامك دخلت على كتاباتك القديمة عشان ادور فيها على السعادة اللى مستخبية جواكى وبقى مكانها دلوقتى شوية زعل .. ادخلى عليها ودورى على لست ادرى فيها

بس لازم كمان تدافعى عن الفكرة اللى انتى دايما عبرتى بيها عن لحظات فى حياتك بحلوها ومرها وده بانك تكتبى وتكتبى دايما من قلبك

اسفة على الاطالة ومش عارفة اذا كان كلامى هيكون ليه تاثير عليكى او لا

بس اتمنى انك دايما تكونى فى سعادة وامل

karakib يقول...

انا شايف الحل سهل و بسيط

يا جماعة :)
احنا لازم نصمم بانر كبير اوي و نعمل حملة للتضامن مع اللي بتقوله لست ادري :) ههههههههههههههه
=================
=============
=========
=====
===
=
بعيد بقي عن الهزار
ليكي حق يا لست ادري علي فكرة

بنت القمر يقول...

والنبي عسل
وبحبك لله في لله
يمكن عشان طيبه
ويمكن عشان اسمك علي اسمي
ويمكن عشان زهقانين من بعض
احلي شئ في ما كتبتيه هو ان في توارد افكار كبير مع افكار ناس تانيه
بجد زهق
في عندك شيمو ماتت وبهلول وبهلوله
و واسكندراني اوي بينعي حد برضه قريته ماتت
ووحمله سمينه وحملتين مضادين
اه عندك حق
اما بقا حكايه التعليقات حكايه بس والله انا بحب اعلق علي ناس عمرها ما كتبت عندي والعكس بيحصل
ملاقيش حاجه اكتبها لناس مستديمه التعليق عندي
عادي بس الزهق الاعظم من الانيونيموس اللي بيدخلوا يشتموا هنا وهناك ويجرحوا شعور وعيون القراء الحمدلله انا لسه متشتمتش لحد دلوقت بس برضه بتلاقي كدا عند الاخرين تحياتي
عشان مزهقيش اكتر

Bahz.Baih يقول...

مع أحترامى الشديد للى قعدوا يشجعوا ... هو مش انتم كمان عاملين نفس البانارات و الاعلانات مدفوعه الاجر و اللى مش مدفوعه... انا عن نفسى عاملها و حاطط ساعه و بجاوب على التاجات اللى بجيللى ..و لا هو القضيه اللى بتدافعوا عنها هى النبيله و باقى القضايا هى اللى هجص ...و من حق كل بنت صغنونه تدافع عن دبدوبها.. لكن معلش يا لستو بس هوانت زعلانه ليه و لا زهقانه من ايه ... ماللى يعمل يعمل و اللى يتفرج يتفرج .. و اللى عايز يغلق ما يعلق و اللى مش عايز السكه اللى تودى

كنت متفق معاكى فى موضوع غياب مدونات اللى بتناقش قضايا ... بس ماهم برضه زهقوا من الهوهوا (صوت الكلاب الزهقانه)

ثم و فيها ايه يعنى لما يعملوا جمعية للمدونين ... وماله هم مش برضه ناس و من حقهم يتجمعوا ... عايز تبقى معاهم ... قشطه .. مش عايز .. برضه براحتك ...أحلى حاجه فى مملكه جوجل انها سايبا الناس على حل شعرها ... محدش طالبك علشان تفتح مدونه انك
تقدم كارنية الجمعية

و لتحيا مدونتى أبقوا تعالوا زرورنى

Lasto-adri *Blue* يقول...

@Tarek, @Zeinobia, @Memo, @كلمة , @Bluestone, @Marvel, @ Karakib,
بصراحة معرفتش اعلق اقول ايه... كفاية انا متفقين مع بعض
:D


@يحيى المصرى
اه.. قول اللى نفسك فيه بس مش لازم تكرر نفسك عشان تعرف تكون نفسك يعنى والناس -اللى منهم واحدة زيي- تتقبلك
!

@يسارى مصرى
زمان لما اتعملت عشان مالك وعلاء وحتى كريم او شرقاوى.. كان فيها طعم
انما من بعد بالظبط "عبد المنعم"... يعنى تقدر تقول من بعد هوجة الاخوان اللى حاصلة بقت عملية مملة جدا ومزتفزة
وكان الناس مابتصدق تزيط


@عدى النهار
ماهو من الغلب


@Sherif
وافق او تعترض.. اظن انها ماتقرفشى الا للشخص قدام نفسه
كل واحد علق او معلقشى... مجرد انه قرأ الكلام وشاف تعليقات غيرى زهقوا من نفس اللى زهقت منه
يبقى عنده حرية الاختيار فى اللى هو عايزه بعد كدة
واظن ان واحدة زيي مش ح تزود ولا تأخر عند أى حد.. خصوصا وانى للاسف مش من النوع كثير التعليق.. لانشغالى اغلب الوقت
والتمس لى العذر.. انما ماينفعشى امشى الطش فى الناس زى البوست دا من غير ما استدرج نفسى واشكر اللى يستحق
:)


@البردية المصرية
:)
الفكرة انه مش من اختصاصى ولا حقى انى اصح حد يعمل ايه فى البلوج بتاعه
انت مثلا حرة تتكلمى عن كذا او كذا... بس ليا الحق برضو انى اعترض واقول انى زهقت من كذا او كذا.. فاهمة قصدى؟


@عباس العبد
اعمل حملة "ضد الحملات" وانا اعمل حملة "ضد حملة ضد الحملات".. وهلم جر.. لول
مش ح نخلص كدة يعنى
:P


@Mongey
حرام عليك.. انا مجرد ماشية جنب الحيط.. وبتفرج ع اللعبة من بعيد
انما بينى وبينك... اطالب باسقاط لقب "مدون" عن كلنا ونبقى مجرد.. "مفضفضاية" ودمتم


@M.R.
كل شئ بيبقى ممل بعد فترة دا حقيقى
لكنه مش اجبار.. دا اختيار
ومن حقى برضو انى اشتكى لو شئ تاعبنى... مابحبش اشيل فى نفسى كتير
:D


@Abdou Basha
عايزنى يعنى اريحك واقول لك انك منهم؟
:P
طب مش ح ريحك يا عبد الرحمن ومش ح قول.... لان كل حد عارف نفسه.. حتى مجهولين الهوية اللى ساعات بيعلقوا عارفين نفسهم وكلهم يستحقوا البى اس دى
واه.. مابحبش الدباديب


@لحظة تأمل
ماعاش ولا كان اللى يخليكى تعيطى ابدا
انا كمان مش عارفة السعادة راحت فين
بحاول امسكها جوايا لكنها بقت زى الفراشة.. بتطير واحنا بنجرى وراها
ماتدمعيش أبدا
:)


@بنت القمر
ماتفكرنيش بالتعليق... بجد التواصل مع الناس اجمل ما فى الحياة
لكنه ساعات بيقلب على روتين
واول ما يقلب روتين.. يصبح ممل ويفقد معناه...
مابقتش اعرف ممكن اقول ايه.. ومش عارفة العيب فين
حتى حالة الزهق.. مش عارفة العيب فين
العيب فى البلوجات ذات نفسها ولا فى استقبالى لها؟
وعلى فكرة.. فى مجهولين كتير تفرحى بتعليقهم اكتر من اللى باسمهم.. عشان ساعات بيكونوا بيعلقوا عشان عايزين يقلولك شئ ليكى وبس.. مش لاغراض تانية.... مش دايما بيشتموا
:)
عن نفسى.. بحبهم قوى
انتى اللى سكر بقى


@Bahz Baih
جوجل يسيب الناس تعمل اللى هى عايزاه.. هو حر
:D
انا مش جووجل
وزى ما انت لك حق تكتب.. انا ليا حق اعلق... اشجع.. او انقد
وفى اشياء مش عجبانى.. ح قول انها مش عجبانى
وانت مالكش عندى حاجة زى ما انا ماعنديش حاجة عندك
يعنى مش لازم تقرأ وان قرأت مش لازم تنفذ
:D
وعلى فكرة برضو.. انا فعلا زهقت.. وكويس انك فكرتنى بموضوع جمعية المدونين دى كمان عشان اقول لك انى كمان زهقت من الكلمة المستفذة دى
تسلم لى.. وسلم ع البحر
:P

Bahz.Baih يقول...

أوكى ... هسلملك على البحر اللى انا عارف انه هو كمان متنرفز دلوقتى هو كمان
ماعلينا ... هو انا برضه كنت زهقان و انا بعلق و معجبنيش أن الناس كلها عماله تقول أه و الله ... بجد عندك حق ... أيه ده أنت كمان زهقانه .. دانا زهقان ... علشان كده انا زهقت من أن الناس زهقانه و هى مش ناقصه ... علشان كده عارضت لأجل المعارضه فى بعض الاحيان و خلاص ... شكراً على سعه صدرك ... مع أن جوجل بيدينا الحق ده

يلا سلام
:D

mostafa rayan يقول...

وانا والله كمان اتخنقت وزهقت زيك
عارفة انا ساعات كتيربقول لنفسي ان الشات والمدونات دي مش بيعملها غيرالناس الفاضية بجد احنا عندنا وقت فراغ فبنشيت وبندون وبنقول بنعبر عن رأينا والكلام دة لكن في الحقيقة احنا بنضيع وقت
وللأسف الوقت دة احنا ممكن نستغله ف يحاجة احسن من التدوين والحاجات دي
علي الأقل نقرأ قرآن ولا نعمل صلة رحم او اي حاجة ناخد بيهل ثواب
ربنايهدي