السبت، نوفمبر 24، 2007

ياترى يا زمن.. بتروح على فين؟

اتضايقت النهاردة وانا بحاول ادعبس فى ذاكرتى عن تواريخ قديمة.. ومالقتهاش.. ولا افتكرتها..
أخدت كتير عشان الاحظ قد ايه التواريخ دى كانت فى يوم مهمة فى حياتى.. ولسبب مجهول تاهت وسط كراكيب الايام..

يناير: بداية معرفتى بافراد المشروع مع محاولة اختراع مشروع اصلا.. (لول!)
22 يناير: ليلة امتحان الـ ASIC
2-7 فبراير: الاقصر واسوان
23 ابريل: يوم الـ funday بعده خروجة الدفعة
27 أبريل: يوم التصوير الجماعى للدفعة
8 يونيو: آخر امتحان تحريرى واعتقد كان معمل
10 يونيو: آخر امتحان شفوى وعملى
11 يونيو: آخر خروجة للدفعة
12 يوليو: مناقشة المشروع
26 يوليو: النتيجة وبعدها خروجة لبنات الدفعة
28-30 يوليو: ايام الــ EED
16 سبتمبر: شهادة التخرج المؤقتة
22 أكتوبر: اول يوم بجد
17 نوفمبر: آخر خروجة مع أصدقاء المشروع

يمكن تكون تواريخ لا تمثل لاى حد غيرى أى معنى... لكنه يبقى السؤال.. ياترى الأيام اللى بتخلص دى بحلوها أو مرها.. بتروح على فين؟؟

سلاماتى

هناك 11 تعليقًا:

غير معرف يقول...

أنا فاكر
:)

bluestone يقول...

يمكن بيروحوا في اكتر من مكان
في مخازن الذاكرة
اللي ليها طريقة عجيبة جدا في التخزين
احيانا ممكن الواحد ينسى احداث مهمة جدا وتواريخ مهمة في حياته
ويفتكر احساس ما في لحظة عادية من سنين
بتحصلي كتير ..

اني بنسى حاجات مهمة جدا واحداث فاصلة في تاريخ حياتي
وبعدين افتكر طعم اكلة بحبها كانت جدتي الله يرحمها بتعملها بطريقة خاصة
او افتكر احساسي او رد فعلي تجاه كلمة حد قالهالي من 15 سنة مثلا ..
حاجة عجيبة

اما الذكريات المهمة فبتروح في خزينة الذاكرة اللي فيها زي ما بوصفها دايما حاجتين
شكمجية الذاكرة
وسلة قمامة الذاكرة برضه

شكمجية الذاكرة
للناس
واللحظات
والتواريخ
والمواقف
الحلوة اللي سابت اثر في حياة الواحد
البني آدمين اللي وجودهم زرع وردة جوانا

وسلة القمامة أو مزبلة الذاكرة على غرار مزبلة التاريخ
فدي لكل من لا يستحق أن نتذكره ولكننا نتذكر الألم الذي تسبب فيه

Yasmine Adel Fouad يقول...

بصى

انا عارفه معنى التواريخ دى كويس اوى
و ماتقلقيش التواريخ مش بتختفى تماما
ممكن بتتنسى مع الوقت
بس اول ما ترجعيلها بتفتكريها


مش هتنسى الناس
بس مش عارفه
يعنى انا مش واحده من الناس اللى بعد الجامعه قالت ياريتها ترجع تانى
انا مؤمنة ان علاقتك بالافراد
اه لاجل مشاغل الحياة بتقل لكن لو عايزة تفضلى على اتصال هتفضلى

الايام لازم تفوت لقدام
دى سنة الحياة
و ده جميل
و مفيش حاجة احلى من ان الذكرى تكون حلوة و مرة
مش حاجه صافيه و بس
الوشوش للعملات بتدى طعم حقيقى للشئ

باركيلى بقى علشان كتابى هينزل بكرة ان شاء الله

هستناكى فى حفلة التوقيع
سحر و كل جروب كالتشر جاى ان شاء الله

البرديــــــة المصرية يقول...

بتروح زى الموجة ما بتروح
تبدأ رحلتها من شط وتتلاشى عند الشط التانى , وتتبعها موجة أخرى ... وهكذا

هذه نعمة من الله , لاننا بنتعرض لايام ضغط ومرار وتعب وبنستنى اليوم يعدى بسرعة طمعا فى يوم اكثر هدوءا

....أو أكثر سعادة ...

Unknown يقول...

فعلا عندك حق .. ساعتها بيبقى اهم حاجة فى الوجود التاريخ ده وازاى اليوم ده يعدى ويبقى كويس .. بس بعدها خلاص بيروح وبيتنسى والحياة بتستمر

مع ان ده غريب شوية بس فى الذكريات اللى مش كويسة - ربنا يبعد عنك اى حاجة مش كويسة - بيبقى الموضوع ده نعمة كبيرة جدا

الحمد لله على كال حال
:)

غير معرف يقول...

awalan ana 7assa beeky gdn la2eeny bat7'add keteer awyy lamma 2ala2yee ayaam gatt w a7daas mohemma 3adet w nesettha...le daraget enny bansa el tawaree7'...
w ba2eet a2ool enn yemken rabena beynaseena el a7daas aw el tawaree7' 3ashan lamma afteker add ehh kol 7aga bet3addy w betetnesy yemken delwa2ty 7alan fe el la7za de a3raf enn koll 7aga bet3addy w enn lazem a7'od el karraar el sa7 delwa2ty 7alaan...7atta law s3b a7'doo..3ashan keda keda hat3ady w hatetnesy...

Nouran يقول...

بيلفوا علشان يرجعوا تاني
اه صدقيني تيجي ايام كدا مفيش حاجه حلوة وبعدكدا الايام الحلوة ديه بتيجي تاني :)

abderrahman يقول...

هذه التواريخ ستخزن في الذاكرة، لكن السؤال هو متى سيتم استدعاءها، وماذا سيحدث حين يتم تذكرها؟
أعتقد هذا يتوقف على حالة الانسان وقت التذكر
**
العنوان ضرامي جدا.. فكرني بأغاني ميادة الحناوي وعزيزة جلال ووردة، حاجة كده تعود إلى عام 1982
:)
**

محمد العدوي يقول...

حلو السؤال

بتروح على فين ..



بتستناك على الناصية أكيد

كل الود

لحظة تأمل يقول...

بتروح على فين؟؟ .. هو ده اللى احنا مش عارفينه

بس اللى انا متاكدة منه اننا حتى لو نسينا التواريخ لايام مهمة قوى فى حياتنا

من غير ما نحس احساسنا بالايام ديه هو اللى بيخلينا نكمل الايام اللى بعدها

ممكن ما نفتكرش التواريخ
او نعيش ايامنا وننسى ذكرياتنا لوقت

بس هى جوانا من غير ما نحس بتشجعنا وبتقولنا اول ما تتعبوا هتلاقونى موجودة اساعدكم فى انكم تكملوا

وتقولوا كان فى ايام حلوة وجاية ايام احلى

Lasto-adri *Blue* يقول...

هى اكيد بتروح على حتة
حتة حميمية بما يكفى انها تستحمل لحظات زى دى
حتة من غير لا زمان ولا مكان.. لكنه بالتأكيد.. عالمى المفضل



-------------

شاكرة كل فرد اجهد نفسه دقيقتين للتعليق..
وأعتذر بشدة عن عدم التعليق على كل تعليق بمفرده
:)
التمس منكم العذر