اوعى السريييييع.. يكلك

افتكر والدى وهو بيقول لى من بين حكاويه على المواصلات زمان. كان فى فترة من الزمن المواصلات كانت مأساه.. مستحيل مثلا تقدر تلاقى حاجة توصلك من العباسية للعتبة او العكس.. الأوتوبيسات قليلة واللى جاى يبقى زحمة والناس خارجة منه برة!
لو ذاكرتى لسا بخيرها يبقى اظن كان فى أواخر السبعينيات.. والسادات حل الموضوع انه نزل "الميكروباصات" وسهل لها الترخيص..

دلوقتى بقى واحنا على اعتاب سنة 2008، حيث ننعم بتنوع رهيييب فى المواصلات.. جرب مرة تنزل الشارع على الساعة تلاتة او خمسة وانت طالع... وشوف حال الدنيا بقى عامل ازاى...
الاوتوبيسات تقول لعلب السردين وسعى وانا أقعد مكانك...
يعنى انا -كبنت- مثلا.. بقيت دلوقتى عشان اركب مواصلة كريمة يبقى مش قدامى غير انى أركب تاكسى... لكن واضح ان السواقين أخدوا خبر بالموضوع.. فتروح تقول لواحد "ميدان كذا لو سمحت"... يقول لك "لاء.. مش رايح".. ولو فرضا اتكرم وعبرك، اول سؤال يقول لك "ح تدفع كام".. وبرضو يسيبك ويمشى.. من غير ولا كلمة فصال واحدة.. ولو حظك يا مبخت جه وركبت من غير ما يسألك رايح فين ولا تدفع كام.. ماتستغربش كتير لو قلبت بخناقة على آخر الطريق.. عادى.. همه واحنا تقريبا اتعودنا على كدة..

حتى الاوتوبيس المكيف ابو اتنين جنيه –معرفش على ايه- والمدعو سى تى ايه (على حد تعبير اغلب طلاب الجامعة) تقريبا باع القضية وتبقى امك دعيالك لو لقيته.. وان لقيته.. تقرف من نفسك بالمنظر اللى جوة... والقذارة المعتقة اللى شال فيها الزمان وحط على ازازه.. دا غير التكييف المحروق.. والكراسى المكسرة او المقطعة –انت وبختك-...
وبرضو زحمة!

من كام سنة لما الحكومة سمحت لشركات خاصة تنزل "مينى باص" جديد السوق، بدل ما كانت حكر على هيئة النقل العام.. فرحت...
ووحياتك كلها شهر وكإنك ياابو زيد ما غزيت... الحكومة سمحت للقطاع الخاص من هنا.. وسحبت اتوبيساتها من هنا.. واللى ناب الطبقة اللى زيي مجرد زيادة الأجرة يمكن مرة ونص فى حالات كتير!
وزاد البنزين... وارتفعت التذكرة من اول وجديد.. وقلت المواصلات... واتزحمت ازيد من اللازم.. اللى خلانى النهاردة اقعد من الساعة 5 الى الساعة 7 على محطة فى انور منطقة فيكى يا محروسة.... مع ان الطريق كله من هناك لبيتى لو جاب ربع ساعة يبقى اتأخرت!!! عشان -بس- عدى ميكروباص فاضى نسبيا لانه بيطلب قتاوة ضعف التذكرة... والناس ساكتة تقول ضعف ضعف.. بس نروح..

عشان كدة... والنبى.. ومن نبى النبى نبى... بمناسبة الاعياد المقامة فى البلاد للمؤتمرات المنعقدة على حس الشعب المغلوب على امر العيش الحاف.. اسوق على كل مسؤول سيدى البدوى وسيدى القناوى وابو خطوة وابو حصيرة لو لزم..
انما ما تجوش تتكلموا عن مناصب كبيرة وتبادل سلطة ومعرفشى ايه وقاعدة البلد اصلا بايظة... دا انا بتكلم عن ابسط حقوق الانسان...
سلطة خضرا ايه.. والمواصلات سردين... والتعليم فاشل.. والاكل غالى.. والارض اتباعت.. وفوق دا كله البطالة واكلة الجو...
!!!!!!!!!!!


بى اس: فى نهاية الحلقة بقى.. بتساءل عن موضة "مواصلات" شتاء 2008... فبعد الاحمر.. والاحمر فى ابيض.. والاحمر فى ازرق.. و الاحمر فى ازرق فى ابيض.. والاخضر فى اخضر.. والاخضر فى ابيض.. و..و.....
الحكومة ناوية تصرف باقى فلوس رصف نفس الشارع على دهان نفس الاوتوبيس باللون الإيه السنة دى؟؟؟


سلاماتى وسكة اللى تروح وتودى