الاثنين، سبتمبر 24، 2007

حديثه لى

وقال لى صديقى الفيلسوف ذات ليلة ليلاء..
"عارف يا صاحبى.. الدنيا مش بتنور عشان الشمس صحيت وقالت لنا صباح الخير.. لكن عشان الشمس صحيت واحنا فتحنا الشبابيك. ولا حسينا بالسعادة مرة عشان حبة ادرينالين.. لكن يا صاحبى عشان نفسنا نكون مبسوطين. ولا عمرنا حسينا بالجمال عشان بس الدنيا جميلة.. لا.. يبقى قدامك ولا تشوفه أو تشوفه ولا يهنالك وتلاقى العيشة ع اللى عايشنها أقرب منها للجحيم..

فى مرة كدة جرب وانت لسا طالع من اجدعها خناقة اتوبيس.. واضحك.. ممكن نخليها كفاية ابتسامة بسيطة... بس امشى بعدها وانت رافع راسك لفوق وبص ع الدنيا من منظور كريم الشانتيه.. ابيض ومسكر واخف منه ع الجاتوه مافيش.. يدوب فى بقك ولا كانك تعبت فى عمايله او دفعت دم قلبك فى شراه..

زيك تمام.. يوم.. يومين.. تلاتة، عشرين.. وهب.. ماتلاقيش..

عارف يا صاحبى... لو انت مش صاحبى ولا انا صاحبك.. بينى وبينك.. ماكانشى راح يفرق معايا كتير.. كنت ح دور لى على صاحب تانى انعيله همى واشجانه.. اتفلسف عليه حبة... واترحم عليا حبة.. واهوه، المهم فى الآخر صحبة الطريق.. وأما ع الالوان فمش محتاجة لا مرسم ولا فنان.. محتاجة رشة زوق على دماغ نضيفة.. و ملعقة "شمس" طالعة من غير شباك.."

----------
وحديث له آخر لى..

هناك 7 تعليقات:

ماشى الطريق يقول...

الله عليكى يا لستُ أدرى
أيه الحلاوة دى
:)
أتمنى إنك تكونى بتستمعى بقراية قمر على سمرقند زى مانا إستمتعت بيها
:)
و كل سنة و إنتى طيبة معلش متأخرة شويتين

Unknown يقول...

:)
استمتعي بالأغنية دي معاها

http://klamsema.blogspot.com/

السهروردى يقول...

ياأخشى التدوينة حلوة من غير صديقك الفيلسوف اللى بأقوال العلماء شغوف ولا فى ليلة ليلاء والنونو بيقول واء دى كمان
:))

غير معرف يقول...

بوست جميل والسعادة فعلا زي الشمس اللي مش ممكننشوقها إلا لو فتحنا شبابيك القلب

أبو ضحى يقول...

ليه تحفظ واحد على البوست الجميل ده
اللى انا اعرفه ان الادرينالين ملوش دعوة بالسعادة

تحياتى

بينى و....وبينى يقول...

الله عليك أو عليكى يالست ادرى .ايه الجمال ده
كلام ولا المارون جلاسية ولاونى عمرى مدقته
بس بردو الكلام مفيش اسهل منه والفلسفة والتفلسف ياسيدى وماله .بس للاسف التطبيق مش سهل ابدا .ومجرد فتح الشباك عشان نشوف الشمس الحلوة دى بيكون صعب على ناس كتيير
تحياااتى لروحك العاليه اوى اوى

Lasto-adri *Blue* يقول...

@ ماشى الطريق
اه.. حلوة قوى قمر على سمرقند... وجديدة كدة
وانت طيب يا ماشى
:)


@ محمد ثروت
اغنية ايه؟


@ السهرودى
اهوه بقى اللزمة نعمله ايه؟
عموما هو بدأ يهكع وشكله ح يروح فيها قريب
:D


@ مصطفى سمير
افتح افتح كل الشبابيك



@ ابو ضحى
هندسة بقى وماليش فى الطب
:(
بس هو الهرمون اللى جه فى دماغى وانا بكتب... عموما منكم نستفيد طبعا



@ Karamala
بص هو فعلا صعب.. بس الفيلسوف قال كدة.. وخلينا نحاول.. ليه لاء؟
;)