مجرد يوم تانى

للسكون أكتر من نوع.. سكون يسبق العاصفة.. وسكون يتبع العاصف وسكون لانك مش لاقى حاحة تعملها.. انما السكون للسكون ذات نفسه أصبح نادر الوجود فى الأيام الحالية بشكل مخيف! و ح قول لك على حاجة.. جرب فى يوم - انت رايق فيه - تستجم لوحدك فى جنينة... صدقنى اول شئ ح تلاقيه حبة عيال بتلعب بصوت عالى... او بيبى لابس الكوتشى اللى بيصوصو دة.. ( نفسى أفهم ايه لازمة الصوت اللى فى الكوتشى ؟؟!!!).. وان كانت الجنينة ولا النادى فاضى من العيال –فرضا لظروف الامتحانات- يبقى اكيد اكيد اكيد ح تلاقى حد موبيله بيرن.. او حتى هو ذات نفسه بيتكلم بصوت يسمع حى شبرا !!
سيب المكان واتمشى فى الشارع... مش ناوية احكى لك عن الازعاج اللى ح تلاقيه من الاتوبيسات والعربيات وبياعين الفول وبتوع العيش وبتاع الأنابيب... إلخ... وان فرضا فرضا يعنى مالاقتش كل دول.. يبقى ح تلاقى محل ولا اتنين مشغالين الاستريو على اعلى حاجة ولست أدرى ما السبب لحد دلوقتى.. دا انا لسا امبارح بمشى جانب محلين كدة. والاتنين مشغلين شريطين لعمر دياب على أعلى صوت.. طب حد يفهمنى النظرية لما انتوا الاتنين مشغالين نفس الشخص بيغنى.. يبقى ايه لزمة شريطين مختلفين وفى نفس الوقت.. ولا هو تقطيع ازعاج كمان!!!!

ساعتها ح تفكر ترجع بيتكم عشان تستمتع براحة البال لقليل من الوقت... ترجع.. تفتح الباب وترمى المفاتيح على اقرب طرابيزة وتمسك الريموت تقلب بين المحطات.. وراح تنخنق بجد المرة دى بسبب ازعاج من نوع تانى ومن غير صوت.. ناس بتخانق بعض عشان النووى.. وغيرهم بترول وغيرهم السيطرة والقوة وهلمَ جر... نصيحة اقفل التلفزيون ولا وجع قلب وروح اوضتك وشغل الراديو... بس نصيحة برضو متواضعة.. ابعد عن اكبر مصادر الازعاج فى القرن العشرين محطة نجوم زفت ونيل زفتين.. وسيبك من القاهرة الكبرة مملة.. وسيبك من برج العرب مملة اكتر... بص روح على البرنامج الموسيقى.. ح تلاقى حبة ناس رايقة بتلعب حبة نوتات من العالم الآخر.. بس فى أمل تستجم.. وامسك كتاب فى ايدك وسمى بالله بقى... لووول.. الفكرة انه ح يجى على حظك ان معرفش مين يكسب فى ماتش ايه.. وبيب بيب أهلى.. او عروسة بتتجوز او عريس بيخطب فالشارع قالب زيطة و زمبليطة.. وان مافيش اى من هذه الأحداث البالغة الأهمية فى شارعكم.. يبقى الشارع العمومى ح يقف او ان المجارى تطفح او اى شئ تانى يخلى العربيات بتخانق بعض زمامير وحوارات الناس "ما تفتح ياعم" والبوابين يتلموا بقى وهيييييييييه.....

بص ساعتها اقفل الشباك.. وان سمعت حد فى بيتكم بيتخانق اقفل الباب.. اقول لك.. اقفل اى حاجة ممكن تشوفها او تسمعها او تشمها مفتوحة.. وحط على راسك مخدة وروح اتخمد وحاول تقنع نفسك انك نايم... على الله مايجيلكش كوابيس

تصبحون على كل ازعاج وضوضاء ووجع دماغ وقلب وفشة وكلاوى..
سلاماتى