الاثنين، أبريل 13، 2009

يا وطن مسكون بالخوف والعنف

اتفرجت -زى ما اتفرج غيرى وغيرى- على حلقة العاشرة مساء لمناقشة مشروع قانون تقدم به نائب الى مجلس الشعب، للموافقة على إذاعة تنفيذ حكم الإعدام على التلفزيون المصرى. وبصراحة ذهلت مش بس من إقتناع سيادة النائب برأيه المتفتق عن ذكاء مريخى جديد من نوعه.. بل أيضا لخبر الموافقة المبدئية على مشروع القانون -وبالاجماع- من قبل باقى نواب مجلس الشعب.. بالاضافة الى الإبداع اللى ظهر فى الإتصالات التليفونية واللى استقبلتها منى الشاذلى على الهواء..

من امتى اعتنق المصرى العنف؟.. الشعب المتسامح الكريم أصبح بلا مقدمات فى أبهى صور التطرف والعنف والفاشية؟
كنت أتصور يكون اقتراح المتصليين يدور حول تعديلات فى القانون للردع المذعوم مع الحفاظ على مبادئ الإنسانية.. لكنه وللأسف، الردود جاءت محطمة لكل أمل..
دائرة العنف الممارس على المواطنين مستمرة فى الإتساع وللأسف بإيد المواطنين أنفسهم. المدير وموظفيه، الأب وأولاده، عدوانية المجتمع على أفراده، البلطجة، الفساد، السرقة، الإغتصاب.
ثم يأتى النائب ليتحفنا بإقتراحه.. وأسأله: أنهى ردع يا سيادة النائب فى دولة ليس فيها سيادة للقانون! أنهى ردع وأسباب العنف الإجتماعى موجودة وتتكاثر..
هل سالت نفسك اين هو الأمن الإجتماعى حاليا؟ هل خطر على بالك سؤال "من اين يأتى العنف"؟ هل عندك أولاد عشان تقول "بيتفرجوا على افلام رعب فمش فارق لما يشوفوا الإعدام"؟!
أنا ح تجنن من دا كلام! إزاى شخص مثله المفروض إنه مندوب عنى فى المجلس؟.. وإزاى باقى الأعضاء مثله على نفس الدرجة من الغباء الإجتماعى؟

هل الحل هو الهرب؟ هل الحل هو "ترقيع المجتمع" بدل من البحث عن اساس المشكلة؟ هل الحل هو خلق أجيال مشوهه نفسيا؟ هل الحل هو ان نتجاهل دور المؤسسات الرقابية والتعليمية والتربوية؟.. أم الحل يا سيادة النائب هو أن يبقى الوضع على ما هو عليه بدون تواجد امن اجتماعى حقيقى فى مصر، وإختزاله فى أمن سياسى تبع افراد؟!
وما هو الردع بوجهة نظرك السديدة؟ هل الردع هو ترويع المواطنين، بدلا عن تأمينهم، لأنهم -ولسوء الحظ- مواطنون درجة تانية، يعيشون فى هذه البلد التى غاب عنها كل وجوه العدالة.. فأصبح أهلها من اصحاب الشمال.. أو الشمال جدا.

ياسيادة النائب اتقى ربنا فى الشعب دا، وانسى ولاءك السياسى وفكر مرة فى مصلحة البلد دى وحل مشاكلها. فكر فى طريقة للخروج من أزمة البطالة اللى خرجت الى الآن الآلاف من البلطجية والحرمية والمرتشين والنصابيين والمغتصبيين والمتزوجين عرفى.. بدل ما تفكر فى ترويع شعب مرعوب أصلا..

مافيش لأمثالكم سلاماتى

هناك 22 تعليقًا:

عباس العبد يقول...

ربنا يستر
العنف بيزيد فى البلد و النائب بيقترح ردع العنف بمزيد من العنف !! . حاجة جميلة جداً الصراحة
مش عارف دى نظرية fight fire with fire و لا الراجل قصده إيه ؟
لأ و فى ناس بتنادى ب"هبة جماهيرية عنيفة " تبيد من امامها كل فساد
ربنا يرحمنا

mido يقول...

صعب تطبيق القانون ده

اذا كانوا رفضوا اخذ أعضاء المغتصبين بعد اعدامهم يبقى حيعدموهم علنى ؟!!

karakib يقول...

did you see ahmed zaky's film ... al horoub ??

islamz يقول...

شوفى اذا كان الناس وصلوا لهذا الانحدار من التفكير واللامبالاة يعنى متعطشين يشوفوا الاعدام على الهواء مباشرة زيه زي اي مسلسل يبقي منستغربش من الشباب اللى العنف بقي اسلوبهم ولا من طريقة الاستفزاز اللى بقي اسلوب الناس الطبيعى فى الشارع انك تلاقى الناس بتستفز بعض .. انك تلاقى الناس بتتلكك لبعض .. بصراحة مش عارف ايه الحل ..

غير معرف يقول...

مش عارف بس متخيل حد ممكن يقول إن يا ريت تنفيذ الحكم يكون بالحرق حيا عشان تكمل متعة المشاهدة

3aziz 3eni يقول...

دي البدايه بس لسه التقيل جي بعدين
ربنا يستر علينا من امثال هؤلاء

EMAN HASSAN KAMEL يقول...

ربنا يستر علينا هما حيودونا لفين اكتر من اللى احنا فيه عليه العوض ومنه العوض

Lasto adri *Blue* يقول...

@عباس العبد
لو كان فى هبة فعلا لردع الفساد بجد كان ممكن.. انما اللى مقترح عبارة عن زيادة العنف فى حالة ردع.. فى فرق بينهم.. وللاسف.. للأسف جانى الردع مفجع فى دا شعب

Lasto adri *Blue* يقول...

@mido
حتى لو مستحيل يطبق -ودا الأغلب- المشكلة مش فى تطبيقه او لا.. المشكلة فى الموافقة المبدئية عليه!
كلام زى دا لام يغلق عليه الدرج من بابه

Lasto adri *Blue* يقول...

@karakiib
no.. whats in it?

Lasto adri *Blue* يقول...

@islamz
الحل ان صوتنا يطلع ونوقف الناس دى عند حدها.. النائب دا وأمثاله
ع الاقل نعترض بصوت عالى

Lasto adri *Blue* يقول...

@يحي المصرى
أهو دا اللى كان ناقص!
كنت ح لطم بالبلدى ساعتها يا يحيي

Lasto adri *Blue* يقول...

@انت تسأل والكمبيوتر يجيب
شكرا على دعوتكم الكريمة، وسأحاول متابعتكم فى اقرب فرصة

Lasto adri *Blue* يقول...

@3aziz 3eni
ياخوفى من مرحلة الانحدار الأخيرة.. مش عارفة مصر رايحة على فين!

Lasto adri *Blue* يقول...

@EMAN HASSAN KAMEL
لازم نعترض بصوت عالى.. دا اللى فى ادينا دلوقتى
ونعترض على كل شئ مش صح فى البلد.. مش بس القانون دا.. عشان اللى بيحصل دا كتير قوى

Eng. Abeer Fayed يقول...

ربنا يستر وأشكرك على مدونتك دى

http//:www.rou7albayt.blogspot.com

Me2nour يقول...

أنا معترضة يا لست على كلامك
من الآخر يا جميل بقيتي فيمينيست و من انصار ماما سوزان ده طبعا حقك
لكن قانون زي ده كنا محتاجينه من زمان مش علشان أنا دموية و بحب العنف
لكن كل اللي قرأته من مصايب بتحصل في البلد و جرائم بشعة بقت فعلا مرعبة ولازم ليها حل
وإذا كان المجرم مش حاسس بنهايته فممكن عرض تنفيذ حكم الإعدام يردع بعضهم
وخاصة النوع ده من الناس بالأخص بكل تأكيد هيتابع حاجة زي دي لأن نفسيته أساسا مش مضبوطة
طبعا انا سبت نقطة إن ديننا كمان بيأمر بكده و هدفه ردع الناس عن الإتيان بمثل هذه الأشياء
سبت الموضوع ده على جنب علشان أنا متأكده إن الأمر مجاش من ناحية الدين و إن إنتي ممكن تقوليلي إشمعنى دي هنمشيها حسب الدين
مش معنى إن بلدنا إسما إسلامية و فعلا علمانية ... إنه لما ييجي حاجة توافق الدين نرفضها
هو السؤال.. مادام ده امر رباني في الأساس يبقى ربنا أعلم بفايدته مننا
و بالتالي ليه نرفضها إحنا كبني آدمين
أنا عايزة اللي يقتل يتقتل و اللي بيسرق يتقطع إيده
يا شيخه ده بره بيطالبوا بقطع يد السارق عقابا ليه.. نقوم إحنا نقول دموية و عنف!!!
أنا بخاف امشي في الشارع واحد يطلعلي بسنجة و يموتني علشان لابسة دبله دهب هو عايز يسرقها و بخاف على أولادي يتخطفوا و هما رايحين المدرسة وواحد يفتح بطنهم علشان ياخد اعضائهم يتاجر فيهاوده خبر قريت زيه لسه من كام يوم
وفي الآخر تقولي دمويةوعنف
متهيألي الأمر محتاج إعادة نظر منك تاني

Lasto adri *Blue* يقول...

متهيألى يا مى تو الموضوع محتاج اعادة نظر منك.. وليس له علاقة لا ماما سوزى ولا بانى فيمنست.. (دا ان كنت اصنف كدة اساسا)
انما لو ح نتكلم بالمنطق.. الفساد الجريمة انتشرت ليه فى المجتمع؟ عشان الناس محبة للجريمة بطبعها ولا عشان فى ظروف خارجية ساعدت فى الفساد؟
لما المخدرات فى ايد الأطفال قبل الكبار.. يبقى ما تستعجبيش لما طفل كمان يحاول التحرش..
لما الشباب اتخرج وعاطل.. ماتستعجبيش انه يغتصب لان ظروفه مش سامحة انه يعيش بالحلال ويتجوز ويكون له بيت زى مخاليق ربنا
فى فساد فى المجتمع.. ماينفعش نردعه بفساد اكبر منه..
وبعدين أنا مش خايفة على مشاعر المجرمين.. ليه مفترضة ان دا دافعى؟.. ان كنتى ترضى أولادك يتربوا على منظر اعدام على التلفزيون.. فأنا مارضاش لأولادى كدة. أربيهم ع الخير والترغيب فى حياة افضل.. مش ترهيب يجيب لهم خلل نفسى عشان نردعهم بمناظر دموية! بأنهى منطق؟ وبأنهى منطق معتقدين ان الشممامين والحشاشيين والقواديين بيتفرجوا ع التلفزيون أصلا ولا لما ح يتعرض الإعدام ح ينتظروا المعاد عشان يتبعوا!

بعدين أنا أحب طبعا الشريعة الاسلامية تطبق فى بلادنا.. بس لما يكون القائمين على البلد فاهمين تسامح الاسلام اسلا.. مش شايفينه حتة طرحة ولحية وتقصير جلباب.. ولو عايزة تشوفى تطبيق حالى، عندك السعودية وافغانستان وايران تشوفيهم عشان تفهمى يعنى ايه المسلميين الحاليين أبعد ما يكونوا عن سماحة الاسلام اللى خلت الرسول -صلى الله عليه وسلم- يقول لمن اعترفت على نفسها بجريمة الزنا، انها تذهب حتى تضع مولودها.. ولما رجعت تانى قال لها ربنا حليم ستار.. لكنها اسرت وبالتالى أمر الرسول بالرجم..

فين السماحة دى دلوقتى يا مى تو؟ فين الفهم الصح للاسلام بجد؟ فين الرافة فى المجتمع والعدالة؟
قبل ما نتكلم عن حقوقنا فى أمننا.. نتكلم عن واجبتنا الأول.. مش الساكت عن الحق شيطان أخرس؟ فين احنا من ٢٨ سنة سيبنا المفسدين يعوثوا فى الارض فساد وشر مستطير.. خايفين فى الجحور .. تركنا الحبل ع الغارب.. وبدل ما نفكر ازاى نحل بجد.. جايين نرقع حياتنا عشان الفساد يزيد اكتر ومعدل الجريمة يقفظ لفوق

الموضوع لا هو حبى لماما سوزى ولا انى فمنست زى ما قلتى ولا عشان حتى بحب الغرب.. واللى حقيقى مش عارفة على أى اساس افترضى كل دا..
لكن الحكاية انى قررت افكر قبل ما أقفز لاستنتاجات عاطفية مندفعة.. بدل ما أمشى عللى علمهولى آبائى وأجدادى بلا تفكير.. الإسلام دين التجدد واعمال العقل.. ودا بالظبط اللى بحاول اعمله

Me2nour يقول...

أول الغيث قطرة يا بلو
لو فضلنا مستنيين الدين يتطبق صح في كل جوانبه يبقى مفيش حاجة هتتعمل
وانا قلت في ردي إني عارفة إن الموضوع مجاش بمنطق ديني
بس إيه المانع إنه مادام يطابق الشريعة إننا نشجعه
وتفتكري أيام الرسول لما كانوا بيقطعوا الرقبة بدل ما يشنقوا بحبل الناس وقتها طلعوا دمويين؟؟؟
ومين قال إن ده هيخلق جيل دموي لمجرد إنهم يشوفوه... مش ده ممكن يولد الخوف و الرهبة في القلوب من عمل أي حاجة تؤدي للفعل ده ده بافتراض إن الموضوع الناس هتابعه و كأنه مسلسل مستنيينه
هو نسبة الجريمة في السعودية قد إيه و نسبة الجريمة في أمريكا اللي بتطبطب على الناس قد إيه
وكمان حاجة إشمعنى اللي بيقتل بيعمل كده و فساد مجتمع إيه اللي بيتسبب في كده
قصدك تقولي إن كل الناس اللي مش لاقية شغل بتقتل و بتسرق و بتشم و بتتحرش و تغتصب
أكيد لأ فيه ناس حالها أسوأ من اللي بيعملوا كده و بالرغم ن كده عايشين بعيد عن المشاكل دي
وفيه ناس حالها أفضل مليون مرة بتشتغل ومتجوزة و ماديا مستريحة و بالرغم من كده بتتحرش و بتسرق و بتقتل
كفاية كلام عن المجتمع الفاسد لان الفساد موجود في كل مكان و زمان و لكنه نسبي و بالرغم من كده عمري ما أقبل بيه كسبب للجريمة.. لكنها نفسيات ناس بيتحكم فيها الطمع و الجشع
و سببه إن عينهم بقت دايما تبص لفوق و تتمنى اللي في يد غيرها بدل ما تبص للي تحت و تحمد ربنا و تحاول تعمل اللي تقدر عليه علشان تبقى أحسن من غير طمع
السبب إن الناس عايزة تبقى بالدبلوم و معاها عربية فيراري من غير تعب
والبنات عايزة تتجوز مليونير بالرغم من إنها خدامة و أبوها بواب و بترفض الصنايعي و الصنايعي عايز يكون ليه نصيب في المزة اللي ماشية في الشارع بتتكلم عن الحرية في لبس اللي يعجبها من غير متشوف مسئوليتها عن اللي بيحصل
ومش الحكم اللي إمتد 28 سنة هو السبب
ده الناس نفسها اللي وحشة لان الدش و النت فتح عينهم على حاجات مكانوش يعرفوها و كعادة الشعب ده بيجري ورا الموجة بدون تفكير و ده اللي خلى الشعب غير راضي
أيوه بتكلم عن الرضا اللي مبقاش موجود في نفس أي بني آدم لأنه ماشي بمبدأ إشمعنى
إشمعنى امريكا... إشمعنى جاري... إشمعنى إشمعنى اللي جايبانا لورا
الحالة الوحيدة اللي ممكن أرفض فيها عرض حاجة زي دي...إنها هتخلي الناس تتعاطف مع المجرم
لكن أولادي يشوفوه... ليه لا علشان يفهموا مبدأ الجريمة و العقاب
ماهم بيشوفوا حاجات كتير إسمها للاطفال و بتولد العنف أكتر من إنهم يشوفوا تنفيذ إعدام
الفرجة على ماتش كورة ممكن يتسبب في جريمة
عزيزتي كفاية نحشر حال بلدنا في كل حاجة
نبدأ بنفسنا البشرية الأمارة بالسوء الأول و بعدين نفكر في اللي حوالينا

Me2nour يقول...

نسيت أقولك إن موضوع فيمينست كان تهريج بس واضح إنه كان تقيل شويه :)
أصل ماليش في الهزار

Lasto adri *Blue* يقول...

عزيزتى مى تو.. أختلف مع رأيك شكلا وموضوعا..
وحال البلد محشور لوحده من غير ماحد يحاول يحشره.. ما انتى وأنا الا عناصر فى المجتمع اللى بيبنى دى بلد..

حال المجتمع باظ أول ما غابت العدالة الإجتماعية..
وبالنسبة لنسب الجريمة فى السعودية وأمريكا.. لو عندك احصائيات ياريت تشاركينا بها.. دا بإعتبارك إنى اصلا معتبرة أمريكا نموذج يحتذى به وانى مقتنعة ان السعودية جنة الله فى الأرض؟!

مش ح طول عليكى عزيزتى.. بس دا رأيي المتواضع..
الإعلان عن إعدام فى الصحف.. أو عرض الإعدام فى مكان عام .. ماشى! من منطلق كل واحد حر، اللى عايز يستمتع بالمشهد.. يتفضل يروح...
انما عرض فى التلفزيون.. لأ..

وأحب اطمنك .. رغم انى مش بتاعة قانون ولا أفهم فيه.. بس إعتقادى الأكيد ان القانون دا مش ح يطبق.. لانه لا يمت للشريعة الإسلامية الأصيلة بصلة.. والإعتراض ح يكون من وزارة العدل و دار الإفتاء..
والايام بيننا والتعليق موجود

ومافيش مشاكل من الهزار.. ولو انى كنت مستغربة يتقال عليا فيمنست منك..

لقاؤنا مع مناقشة القانون

Me2nour يقول...

يا عزيزتي فيمينيست دي كانت هزار خالص
وما من إمراة إلا و كانت فيمينست حتى لو لم تعترف بذلك و أولهم انا :)
أما عن تطبيق القانون من عدمه مش هتفرق معايا حقيقي و إن كنت أفضل تطبيقة
طبعا إختلافنا في هذا الأمرلا يفسد للود قضية
ولولا إننا أصدقاء و إن كان مجرد صداقة نظرية على النت :) مكنتش رديت على الموضوع من الأساس
أرجوا تفهمك للامر لأني شعرت بقدر من الضيق منك بسبب ردي
وآسفة على الإطالة يا جميل