الاثنين، فبراير 12، 2007

حبة كدة وكدة

صحيح أنا طولى زاد شبر ونص ولبست نضارة وشوية وقربت أتخرج. وينفع أفتح حساب فى البنك، لولا مشكلة أجيبك منين يا فلوس. واقدر ادخل لجنة انتخابات واصوت "يالهووووى"، ومين عارف مش ممكن سنة ولا اتنين وابقى اول من "لا تدرى" وأترشح.
لاء وحاجات تانية كتير.. ما انا –وبلا فخر- من اللى تقدر تقول عليهم "البكر الرشيد"..

انما ولحد دلوقتى مافى مرة لقيت فرصة أدخل فى المناقشة المهمة حامية الوطيس.. مين أجمد فى الاتنين مازنجر ولا جرنديزر، وتلاقينى بقول بكل ثقة... "جرنديزر دا كان فتى أحلامى"
وهب ثوانى تلاقى الخناقة هياها عليت والناس سخنت، وكل واحد يقف يدافع.. "6 مليار يقولوا مازنجر هو الحل" ومن بعيد.. "يا جرنديزر يا اما بلاش.. واحد غيره مايلزمناش"

وآخرة المتمة بعد ما تنفض القاعدة وأروح بيتى.. أول ما أصادف مرايا فى طريقى... هب.. أقع م الضحك..



ماقلتليش صحيح.. تفتكر فعلا مين أجمد... مازنجر ولا جرنديزر؟؟

هناك 16 تعليقًا:

أحمد يقول...

ههههههههه
حلوه أنك تصوتى و تقولى
"يالهووووى"

جرنديزر طبعا لأنه كان مستورد
ماكنش صناعه محليه زى مازنجر
ده غير أنه كان حر مش عاجز عن
الطيران زى مازنجر أفندى

NoOR يقول...

أنا سمعت اشاعه من مصدر موثوق منه ان مازينجر و جريندايزر اتحدوا وبقي اسمهم ماذينكايزر

lockash أحمد تمام يقول...

أولا ميرسي علي تعليقك في البلوجر و يارب ماتكونشي الأخيره.
ثانيا:فيه شخصيه انت ناسياها "أفروديت" دي كانت عامله شغل جامد مع مازنجر مع انها كانت بتجيب لنفسها وجع الدماغ و كان دايما هو اللي بيخلص المواضيع.ولأن الأنطباع الأول يدوم ف مازنجر هو اللي في القلب..

غير معرف يقول...

لوووووووووووووول

بجد الموضوع ده و أنا صغير خد مننا نقاش كتير جد أيهم أجمد مازنجر و لا جريندايزر هذه هي المسألة

:D

Unknown يقول...

Grendizer is the best it had a logic story and real heros but I always thought Mazinger is a comic that has been done in no time and with no thinking even the song.

Lasto-adri *Blue* يقول...

@ مبرمج حر
مش معقول ماتعرفش يالهووووى دى
:D
دى من اهم العلامات البارزة فى طريق هذا البلوج

@noor
والله سمعت الاشاعة دى.. بس عيب
القديمة تحلى

@sherif
:D no comment

@lockash:
انت تانى واحد يقول لى مازنجر
:S

@masry
بس ماقلتش معانا ولا معاهم؟

@hechkok
هوه دا الكلام ولا بلاش

Dananeer يقول...

دى اخره
ASIC
مش فاكره اوى بصراحه
بس انا باعشق الكرتون
فكله شغال
يمكن كنت باحب الكلاسيك كارتون اكتر
:)

وحشتينى
حمدالله على سلامتك يا لستو بالعربى

عبدالرحمن يقول...

ودا سؤال برضوا ...
جريندايزر لو مسك مازنجر دا هيفرتكه
سلام بقى ... جريندايزر إنطلق ..فووو

bluestone يقول...

مازنجر مازنجر وإلا فلااااااااااااا

مازنجر طبعا
دي مش محتاجة اي نقاش ولا جدل سوفسطائي ولا تنظير

جريندايزر ده مين

مازنجر طبعا يا جماعة
ده كان جامد جدا
وبيهزم كل الوحوش الاليين
بالقبضتين المدمرتين
والطيارة اللي بتخرج من مخه
ومعاه المزة افروديت اللي كانت بصراحة مالهاش لازمة

بس مازنجر
لانه هو الخيار الاستراتيجي للبروليتاريا
والنخبة في آن واحد

غير معرف يقول...

انا اشجع كابتن ماجد الصراحة

مازنجر طبعا يعني
يا اما مش لاعبة

Ayat يقول...

مش عاوزة كلام .. جراندايزر طبعاً .. ده كان فتى أحلامنا كلنا يابنتى .. قوليها بقلب ولا يهمك .. :)

salateenoo يقول...

أكيد طبعا جريندايزر :)

خصوصا ان الدق فليد كان جامد جدا .. وبيني وبينك انا كنت بحب هيكارو ... وكنت بغير من كوجي عشان كا بيحبها ...

عللي عللي بطل فليد ...
هيا قم يا جريندايزر ..
فالخطر يزيد..

فكرتيني بأيام لذيذة

karakib يقول...

أكيد و لا مازنجر و لا جرندايزر
الحوووووامه يا ماهررررر
كانت بتفكرني بالمعلمه فضه
التمسسساحححه يا حمووووو
لا بطل الا البطل
بطوط !! و سوسو و لولو و توتو
هما الأجمل دائما
و عم دهب و عبقرينو
و الجدة بطه و لوز
بأختصار
بطوطة و عائلته
و دليل الكشافه
و خزنة عم دهب
و سوبر بطوط

غير معرف يقول...

بصراحة أنا كنت باحب توم أند جيري
جدا جدا جدا جدا
و مازلت باحبهم
بس إسترخمت توم أند جيري كيدز
القدام كانوا أحلا
و كانت بتعجبني أوي الحلقات اللي فيها الفار الصغير اللي كان لونه رمادي

Lasto-adri *Blue* يقول...

@Dananeer:
آند يو بالعربى
بس ازاى مش فاكرة.... دول كانوا علامات بارزة على الطريق يا بيبو

@ عبد الرحمن
دايسكىىىىى

@ Bluestone
لاء بقى... كدا ح نخسر بعض يامريان
كفاية شكل جرنديزر وهو لابس القناع وراكب البتاعة اللى بتلف فى الانبوبة دى.. ولا رشدى أباظة
ياما اتمنيت ابقى مكان هيكارو
:$
يادى الكسوف

@ Epitaph
اصلا من كام شهر اتفرجت على كابتن ماجد على سبيس تون وكان اسمه الشبح.. تخيلى؟!
بس دا كان ممل قوى يا ابيى.. ممكن ياخد حلقتين بيشوط نفس الكورة.. ولا بسام الل كان معاه.. يع

@ME
انتى صديقتى العزيزة برضو بس معلش مش ح نقطع على بعض
شفيلك حد تانى.. معتقدش ان فى اليابان ينفع أربعة زى عندنا
:P

@ salateeno
انت كمان بتحب هيكارو؟ طب انضم للشلة.. اعرف كتير زيك
:P

@ karakib
كدة اوف سيد يا كراكيب
الملعب فى البوست دا لمازنجر وجرنديزر
ممكن مرة فكرنى فيها افتحها لعم دهب وبطوط

@masrey
نقول جرنديزر يقول توم آند جيرى!
بس بينى وبينك.. مين فينا كان بيحب الكيدز.. دول كانوا هبل... وعلى راى شريف فوق
الدهن فى العتاقى



م الآخر كدة ح نسك الدكان ..واى حد يقول مازنجر على برة.. ح نرش
:PPPPP
محدثتكم من الأراضى اللستُ ادرية الدكتاتورية العظمى

قلم جاف يقول...

بحب اتنين سوا ، يا هنايا في حبهم : مازنجر وغرندايزر!

الموسيقى الياباني المصاحبة للمسلسلين ألذ.. الذ.. ألذ! متعة حقيقية الموسيقى اليابانية في السبعينيات بأوركستراها الكاملة وآلات النفخ وروحها الطفولية ، حتى لما تسمعها في ختام فيلم دموي زي "اقتل بيل"!