الاثنين، مايو 09، 2005

قلبى كدة طول عمره حزين

كنت واقفة تحت أشعة الشمس الحارقة، وحدى ع المحطة..
وقلبى حزين..
كان نفسى أبكى.. و أبكى جدا بصوت عالى، وسط الناس و الزحمة..
هو قلبى كدة.. طول عمره حزين... حتى لو تسمع ضحكة قوية.. إعرف إن وراها دمعة مستخبية. و يمكن أغرب حاجة إن فى أحلك لحظات همى، بيطلع أحلى ما عندى من القفشات و التعليقات الساخرة.
كوميديا هزلية بتقوم فيها نفسى بدور البطولة المطلقة، الوحيدة و الفردية.. من غير ممثلين ولا مشاهدين ولا كاتب ولا سناريو و حوار ولا إخراج
هى الحاكم و المحكوم ، و الحكم : أكبت جماح مشاعرى
عشان أبكى، يبقى لازم أهرب و أبعد لبعيد.. أقفل ورايا باب.. و أقعد أنفلق من البُكى وحدى

وليه لما أمسك قلمى لجل أكتب.. يقف فى وشى يعاندنى
-- لأ مش هكتب
-- بقولك إكتب
-- لأ قلت مش كاتب و ورينى شطارتِك
-- من فضلك ريحنى و إكتب

و يكتب.. لكن بأى لغة إلا العربى..
هو كمان فرض عليا أهرب.. هو كمان حكم عليا أقفل ورايا باب و أفضفض وحدى.. بلغة بعيد عنى و أبعد عن لغة المحطة

و إستسلمت للقلم.. كتبت صفحة و بعدين قطعتها..
و كتبت غيرها.. و قطعتها
كلمت نفسى.. و رفضت ترد عليا
حاولت أبكى.. و مقدرتش.. أنا عايزة أبكى وسط الناس و الزحمة.. أنا عايزة أكسر الباب اللى حبسنى.. أنا عايزة أبكى و غيرى يسمع
أنا عايزة.... أنا عايزة أقابلنى أنا..

أو كان الصبى الصغير أنا؟
أم ترى كان غيرى؟
أحدق.. لكن تلك الملامح ذات العذوبة
لا تنتمى الآن لى
و العيون التى تترقرق بالطيبة
الآن لا تنتمى لى..
صرتُ عنى غريباً
ولم يتبقى من السنوات الغريبة
إلا صدى إسمى
أمل دنقل من الورقة الأخيرة "الجنوبى"
الدستور – العدد السابع

بى إس : أنا نويت أكمل ع البلوج التانى.. لجل إنى أعاند قلمى و أعلى صوتى أكتر..
و قلمى يقول اللى يقوله.. أنا نويت أملى الكون صرخة قوية.. بأى لغة كانت.. بأى حالة كانت..
أنا نويت أكمل مشوار البحث عنى.. و طظ فيك يا قلمى
سلاماتى

هناك 4 تعليقات:

Eman M يقول...

To7fa!
Your way is realy touching and deep.

Dina El Hawary (dido's) يقول...

الله :) دي كميلة أوي و كوكو

A nice post indeed ... keep the nice inspiration

Dina

Lasto-adri *Blue* يقول...

i'm soo happy i'm having new names on my blog.. that is so cool really.. expecially they are all fellow femal bloggers.. H.U.R.R.A.Y

Eman & Dido.. thanks alot LADIES.. your words are taking me up to cloud number 9.. that is so very highly appriciated

steli.. what can i say.. as great as always.. keep it up..

Muhammad Aladdin يقول...

الله
:)
قلبي كده علي طول حزين
تنفع عنوان قصيدة و الله