الجمعة، أبريل 22، 2005

هيه هيهي هيه

أولا كل سنة و إنتم كلكم كلكم طيبين بذكرى المولدالنبوى الشريف.. والله بعودة الأيام..

ثانياً.. مش عارفة إزاى نسيت ذكرى رحيل عمى الكبير.. و حبيبى الأول *وشكله الأخير* .. صلاح باشا جاهين!!
يمكن لحالة الغم اللى كانت كتمة على نفسى فى الفترة اللى فاتت.. و يمكن لإنشغالى بأمور الدنيا و مشاغلها.. و يمكن لضعف ذاكرتى من ناحية الأرقام.. و يمكن بقى، و دا اللى غالبا السبب، لأنى مبحبش الاحتفاء بذكريات الرحيل و كدة.. *والأعجب تلاقيهم بيقولوا فى الإذاعة و التلفزيون==> إحتفال برحيل فلان!!*

على العموم، أنا عايزة أشكر إذاعة الأغانى المصرية لأنها فكرتنى.. رغم انه على رأى الست *فكرونى إزاى؟! هو أنا نسيته!!*
و بشكرهم كمان على اللمحات اللى اقتطفوها من برنامج "جرب حظك" مع الإذاعى الكبير "طاهر أبو زيد" و اللى كان مستضيف جاهين فيها..

قال جاهين فيما قال:

* الليل هو نهار إسود
* و المرأة هى رجل منحرف جداً..
* أما لما إتسأل عن صلاح جاهين.. قال إن السؤال دة مهضمهوش.. أصل فيه دهن كتييير..
و عجبى



و قرأ بعض رباعياتى المفضلة:
الدنيا أودة كبيرة للإنتظار
فيها ابن آدم زيُّه زى الحمار
الهم واحد .. و المَلَل مشترك
و مفيش حمار بيحاول الإنتحار
عجبى!!
دخل الربيع يضحك لقانى حزين
نده الربيع على إسمى لم قلت مين
حط الربيع أَزهاره جنبى وراح
و إيش تعمل الأزهار للمَيتين
عجبى!!

و على فكرة غنى كمان أغنية "البيانولة".. معلش مش لاقية الكتاب دلوقتى.. * ونبى حد يشوف لى حل فى الأزمة السكانية المكتبية للكتب بتاعتى.. خلاص الكتب إحتلت كل الأماكن و دلوقتى إفترشت الأرضية!!! و بقيت عشان أضلع كتاب.. ولا كإنى ببحث عن منجم ألماس فى مجاهل أفريقيا!!*


عموما بمنسبة هذا المولد يوجد برنامج سواريه قولو هيه
هيه هيه هيه

دى اللة الكبيرة يا عمى و العالم كتيره
ماليين الشوادر يابا م الريف و البنادر



سلاماتى

هناك 7 تعليقات:

غير معرف يقول...

تدعو الحركة المصرية من أجل التغيير
(كفايــــــــة)

جماهير الشعب المصري للتجمع الساعة ( الواحدة ظهراً )،

يوم الأربعاء (27أبريل2005) في 13 محافظة.

تحت علم مصر.. دفاعاً عن مستقبل أفضل لأبنائهم،

ودعماً لمطالب الحركة بتشكيل

(لجنة وطنية لصياغة دستور جديد للبلاد،
وحكومة محايدة لإدارة البلاد لفترة إنتقالية، وللإشراف على أية إنتخابات).

للإستفسار عن أية معلومات ، يرجى الإتصال برقم 0106398897

مصراوى يقول...

كل سنة وانتى طيبة والليلة الكبيرة بك خير، ويارب تلاقى مكتبة تلم كل كتبك، رغم إن ده هو المستحيل الرابع، واسألى مجرب

Shex يقول...

كل سنة و انتي طيبة يا لستُ أدرى

و كل سنة و عم صلاح دايما معانا برباعياته الخالدة

فلان الفلانى يقول...

شعبان عبد الرحيم يدشن حملة الانتخابات الرئاسية بـ كليب مؤيد لمبارك
جريدة القدس العربى 2005/04/22

فى تطور سياسي وفني مهم فاجأ المطرب الشعبي (المكوجي السابق) شعبان عبد الرحيم الجماهير المصرية بأغنية جديدة مصورة (فيديو كليب) يدعو فيها مباشرة لانتخاب الرئيس حسني مبارك لفترة رئاسية جديدة (خامسة) دون تفكير، حيث لا يوجد شخص افضل من مبارك يقدر علي تحمل مسؤولية

Ahmad El-Saeed يقول...

kol sana we enty tayeba ya setty we rabbena yefreg azmet el kotob beta3tek de ... we ed3oly kaman enn ana at7'arrag we a7'las (Ekmenn ana handasa bardo :-)) ) ...

Lasto-adri *Blue* يقول...

أنا شيفة إن البلوج بتاعى بقى لوحة إعلانات.. واحد بيدعو لمظاهرة و التانى مش عاجبو أغنية.. و ما خفى كان أعظم

والله يا بتاع المظاهرة.. أنا سبت الاعلان بتاعك عشان حاجة واحدة بس.. إنى بكره الرقابة على المصنفات الفنية و الحكر على عقول البشر.. فمحبتش أعمل زى الناس التانية و أعتقل تعليقك
إلا إنى بقلهالك أهوه : أنا مليش فى المظاهرات و الملصقات و كفاية و بتاع.. مليش فى السياسة من الآخر
فمن فضلك.. المرة الجاية يتعلق بحاجة ماشية مع الموضوع.. يا همسحلك الكلام دة
و شكرا

Lasto-adri *Blue* يقول...

عايزين يخرجوا الواحد عن شعوره..

مصراوى >> شكله فعلا المستحيل الرابع مع إنضمام كتب جديدة اليوم للمكتبة !!!

شيكس >> و إنت طيب.. أكلت الحلويات ولا لسا؟

ميمو >> أنا عجبنى البلوج بتاعك.. و هعلق قريب إن شاء الله.. بس لما أفضى شوية.. لكن رغم كل دة
أنا بستعجب.. إنتو عايزين إيه بظبط.. حددوا أهدفكم
يعنى عايزين ديموقراطية ولا تشيلو الريس؟؟
بمعنى آخر.. لو فعلا عايزين ديموقراطية.. و راضيين إنه ينزل فى الانتخابات الجاية.. يبقى شعبان يغنى.. أو حمدان حتى مش فارقة لأنه كدة كدة هينجح و بجدارة.. و صدقنى مش هتكون كوسة..
الشعب البسيط زى شعبولا إللى لا يعرف يقرأ ولا يكتب هيقول كلمته اللى سامعها من الاذاعة و التلفزيون

أحمد >> كل اللى أقدر أقلهولك و أفكر بيه نفسى.. الشدة على الله.. و اصبر صبرا جميلا


و دمتم يا حضرات