هابى يعنى سعيد..

أممم.. الصراحة مش متأكدة إيه اللى فكرنى بالحادثة دى.. بس أنا فكرة لما مرة واحد قال لى إنى فتاة غامضة.. و صعب إن حد يعرف عنى حاجة
بس أنا جاوبته بالنفى القاطع و قلت : إنى كتاب مفتوح للى عايز يقرأ.. لكن المشكلة إن الصفحات فاضية
فرد عليا.. لاء.. أكيد فى حاجات مكتوبة.. و لو بالحبر السري

لكن الصراحة.. أنا مش متأكدة من حكاية الحبر السري دى.. لأن أنا مش لوحدى اللى صفح كتابى فاضية.. إنما دا جيل كامل يا سادة..
جيل ماشى تايه.. لا شايف مستقبل يحلم بيه.. ولا ماضى مشرف يغنى على أطلاله.. ولا حتى حاضر يختاره أو يقدر يغيره.. منهم اللى إنزوى مكفى على الكمبيوتر يكلم أى حد بعيد عن الواقع اللى عايش كل فصوله كل يوم.. يعيش حياة إختارها إفتراضيا يعنى.. و منهم اللى خدها من قاصرها و عاش حياته برده ، بس بليالى الأنس تدق على بابه..

و لنفرض جدلا إنه مكتوب بالحبر السرى.. بذ متكم دى تبقى حياة..!!
مدام بالحبر السرى تبقى ليا وحدى أنا.. حاجات مينفعش حد تانى يشاركنى فيها.. طب يبقى فين المجتمع و الناس!!؟

آه آه آه.. كل ما أفكر بعد الكام سنة اللى بدرسهم دول ممكن يحصلى إيه.. نفسى بتنسد..
لنفرض إن ربنا فتح عليا و جالى شغل.. – قادر يا كريم تفتح الأبواب المسدودة.. و تقربنا من اللى يفكها فى وش خلقك-- طب و بعدين!!
حَ عيد نفس الطريق اللى أجداد أجدادى مشيوا فيه؟ و لحد دلوقتى أبائنا مشيين فيه!!

عموما.. أنا لا مكتئبة ولا حاجة.. بالعكس.. الامتحان النهاردة كان مية مية * ما شاء الله.. الله أكبر*
لكنى فكرت.. أخرت الامتحانات التعجيزية.. أو حتى الامتحانات الهايفة فى كلية زى الهندسة.. ممكن تودينا لحد فين؟

عموما.. لو فاكرين صديقى اللى عرّفنى على عمى الكبير *صلاح جاهين*.. هو برده اللى عرفنى على الزجل دة لواحد اسمه *عمر نجم*..

أنا مش نبى
لكن بسعى عشان أكون يادوب بشر
من يوم مع الدنيا وعيت
و أنا مش سعيد
و كان مدرس الإنجليزى فى الصعيد
رجل كشِر
يصرخ.. يا عيال.. سعيد يعنى هابى
نصرخ وراه الكلمة
تخرج من حلوقنا على الشفايف
ولا عمرها دخلت قلوب

العدل من الدنيا إختفى
و أنا مش سعيد
أنا مش هابى*

* إياكم حد يسأل إيه العلاقه بين اللى كتباه فى الأول و الشعر دة..*