السبت، يناير 19، 2008

You've made my day

وأول ما يخبطنى هوا الصبح وأنا بعدى الشارع، ماشية فى طريقى وأقرر فجأة ألتفت ورايا، فألاقى أمى فى الشباك بتقرأ آية الكرسى فى سرها وتتمتم بأدعية عشان ربنا يحفظنى من شر الطريق... سمعتها وهى بتقرأهم قبل كدة لأخويا وبفرح لما أشفها بتقرأهم ليا... فأبتسم وأشاور لها بايدى.. وفى لمحة احس كإنها باشارة اديها ترد عليا من بعيد..

ولما أمر على الجنينة اللى ما بين الشارع والمحطة وألاقى عم حسن.. عم حسين؟.. عم على!.. بحب أفتكره باسم عم على.. رجل عجوز فى السن، بعد بهدلة العمر والدنيا.. جه وعاش فى الجنينة تحتنا.. فى عز الشتا أوالحر تلاقيه فارش ع الأرض وقاعد هناك.. ومن تكرار ما بعدى عليه، عرفنى.. وكل مرة يشوفنى يدعي لى "ربنا يسترك ويرزقك بابن الحلال يا بنتى.. ويكون لك سند طول العمر".. أتلخبط وأتكسف.. ولحد النهاردة ما أعرف ارد اقول له ايه غير انى اضحك له، ضحكة بتاعته بس..

ولما اقعد جانب الشباك فى الأوتوبيس وتيجى سيدة كبيرة فى السن تقعد.. اتآخر لها حبة او اساعدها على انها تقعد.. فتبص لى وتقول "ربنا يخليكى لأمك"..... ولما أحب انزل والسواق يدعيلى "على مهلك يا بنتى.. مع السلامة".. من غير ما أفكر ان كنت اعرفه ولا اتقابلنا قبلها ولا اول مرة ولا ممكن اشوفه تانى ولا هى آخر مرة... من غير تردد أقول بصوت عالى "ربنا يكرمك ويخليك لأولادك"...

امشى فى طريقى.. واعدى بقيت الشوارع والبيوت... اخبط فى خلق الله وأدب على أرضه الواسعة.. وأنا حاسة بمفهوم جديد...
الدنيا مش انى اكون عيشاها... انما بتنفسها مع ناس زى كل دول...

سلاماتى

هناك 12 تعليقًا:

بثينــــــة يقول...

حساسة وجميلة
متهيألي اقدر اعتبر نفسي اكتسفتك متأخر أوي

إنـســـانـة يقول...

الله

احاسيس ومعانى بتحصل وبتفرق معانا اوى

الحمد لله رب العالمين


احيكى على الروقان اللى طالع من المدونة .. جميل بجد ربنا يكرمك

Epitaph يقول...

:)

and you made me..SMILE

tota يقول...

Hi blue , it has been along time
أنا بجد حسيت اني مابسوطه و أنا بنقرا الكلام اللي كتباه .... دايما بيعجبني يا بلو ... عايزه أعرف أخبارك ايه ؟

The Eyewitness يقول...

حلوة جداً وأنسانية جداً...

مـــهـــا يقول...

علشان كده وجيه عزيز قال : " مفيش حياة إلا عند غيرك ..تعيش فى خيره و يعيش فى خيرك "
:)))
بوست عالى :)

Abdou Basha يقول...

يوم جميل، يستحق أنك تسجلي أحداثه، أصل مش كل الأيام بتبقى كده ولا تأثيرها بيبقى كده
:)

Gid-Do - جدو يقول...

بلو

هى دى مصر... مفيش ناس زى ناسها

يَحيى المِصري يقول...

البوست ده عالي أوي يا بلو

Mido يقول...

خليكي مبسوطة :)

نون يقول...

sweeeeeeeeeeeet :)
ahamm nas f 7ayaty (hena y3ny) sawwa2 el CTA w bta3 el garayed ..

قليل من التفكير يقول...


شعبنا الطيب