الجمعة، مايو 13، 2005

الركن الرابع

شئ مخيف إنك تقعد لوحدك، قافل عليك باب أوضتك.. وحاسس بغربة
تقف و تمشى شوية، تلاقيك بتدور فى دايرة صُغيرة. فتزهق و تعد الأركان الأربعة " واحد.. إتنين.. تلاتة.. أربعة...."
تستنى حبة، وما تسمع صوت ولا حتى همسة.. فتحس إن الدنيا بطولها و عرضها، هى الدايرة و الأركان الأربعة.. و ترجع تعد من ركن تانى " واحد.. إتنين.. تلاتة.. أربعة...."
و تكتشف صدفة إن العد إنتهى !!

تستعجب إنك أول مرة تلاحظ : الحيطان كلها زى بعضها.. حجم واحد و الملل مشترك.
حتى الساعة اللى بتدق طول عمرها.. تنتبه أخيرا إن دقاتها برده زى بعضها
الساعة واحدة هى أربعة.. نهار إن كان أو ليل.. صيف حرّان أو مستخبى فى شتا

ع المكتب ح تلاقى الأبجورة واقفة تبص لتحت.. و تفتكر إنها كدة من يوم ما جبتها..
فتسأل نفسك : "هى ما بتزهقش ؟!! "
أما ع الناحية التانية من المكتب، ح تلاقى أقلامك تضحكلك بصوت عالى و تقولك : "تعالنا إن كنت تقدر.. إمسكنا و جرب.."
لكنك راح تهرب.. و تدوَر وِشك للركن التانى، ولاّ يمكن التالت.. مش هتفرق.. لإنك أكيد هتشوف شباك واقف صامد و صامت.. فتقوم و تفتحه، و تتأمل لبرة شوية
لكن لا ح تشوف حد ماشى، ولا عربية تتمخطر.. حتى القمر مختفى بقى له يومين، ح تحسبهم سنة.. و تشوف النجوم إتجمعوا و الشجر فى صفوف عزا، من الأرض للسما..
فَكّر تُصرخ.. حتى الصدى ح يرفض يرد عليك..
وقتها.. ح تحس إن الكون و الفلك و إنت و أنا مجرد كورة.. بيتلعب بيها فى ماتش من غير زمن.

فتتخنق، و تنفلق، و تقفل الشباك.. و تروح تحط هَمّك ف كتاب
وصدقنى ح تستعجب إن الكتب كمان كلها زى بعضها.. تمانية و عشرين قطعة مكعبات و بتتشكل على كل معنى، و لون واحد.. إسود منقط.. و خلفية بيضا مزهزهه أو باهتة.. كله حسب بختها..
تمام زى سبع نغمات سلم و قالوا عنه موسيقى.. كونت ألف لحن.. و مليون أغنية لسه مستنية..
تسمعها ساعات و ساعات من عمرك، جيالك من بعيد أو قريب.. تمزق سكون ليلك، بسكون له نكهة مختلفة.. فتتمللمل شوية و تروح ترمى الكتاب و تخرِص الراديو.. و تبدأ تحرك صوابعك بحركة عصبية.. و فجأة يجى على بالك إن كباية الشاى بردت.. و القهوة فقدت طعمها..

و فى نفس اللحظة هتلاقى صفحة قدامك تنادى عليك.. فتعافر و تطول قلمك و تبدأ مرحلة الشخبطة..
مرة دايرة و مرة خطوط مموجة..
و فى الآخر تطلعلك الرسمة : نفس الأركان الأربعة
واحد.. إتنين.. تلاتة.. و تنتهى على فجر جديد، قبل الأربعة....


سلاماتى

هناك 16 تعليقًا:

freedom يقول...

أيتهاالرائعة والمتألقة
واصلي عناق الاحساس بورق الكتابة
واصلي المقاومة فى هذا الزمن الردئ
واصلي أرجوكى
فنحن لم نعد نملك سوى الكلمات
ندافع بها عما تبقى من حب ومن حرية
guevara75.blogspot

wa7ed mn masr يقول...

الدنيا أوضة كبيرة للإنتظار
فيها إبن أدم زيه زى الحمار
الهم واحد و الملل مشترك
و مفيش حمار بيحاول الإنتحار
عجبى,,,

غير معرف يقول...

Encourssss....

That was ladies n' gents, another smashin hit by lasto..

U've such a magnificent control over your words n writting mode...
Though i can't find a reason for such despair n' boredoom but try n' get over it coz EXAAAMs 're on the way..

i dunno how could such a talent say that i may 've what it takes ??coz frankly, u're like a gazillion light years ahead of me ..

plz go on..
totalled...
sheryos..

N.B: u're askin abt totalled ??
well it can go both ways.
either as in the meanin of the total of smthn or as in damadged or wrecked (thx for Need For Speed's UnderGround)....

Lasto-adri *Blue* يقول...

freedom >> thanks alot for the nice comment..
i liked ur blog as well...


واحد من مصر >>> يااا بقالك مدة مجتش عندنا.. حمد لله ع السلامة..
على فكرة دى من أحلى الرباعيات و أحبها لقلبى

sherif >> i dont switch my mood that way :D .. its simply all blogs "bayta" :D
thanks wallahi, but um not that talented..
ur push, would let me continue isA..
salamati

wa7ed mn masr يقول...

لا يا ستي أنا باجى علطول بس مش دايماً بيبقى فى صحة إني أعلق..

AZ يقول...

ليه يابنتى الكأبه دى
مين قالك ان الحيطان فاضيه وشبه بعض
معقوله مش فاكره كل حيطه عليها ايه من ذكرياتك..ز ده كفايه الشباك بس لو قعدتى تفكرى هتلاقيه مليان ذكريات
يوم اما وقفتى فيه وانتى مامتك رباكى علقه سخنه
ويوم اما حققتى نجاح فى حاجه وجريتى تفتحى الشباك يدخل نور وهوا يونسوكى
يابنتى الاربع حيطان مليانين بس انتى اللى بتنسى :)

MoonLightShadow يقول...

Very Very nice.. though it might sound that you were depressed.. but still it's very well written. I just like your style of writting, I feel as if you are expressing my own self.

But..

I agree with AZ, the room, the walls are never empty. They've got a lot, it all depends on where are you looking from.

Cheer up my friend :)

Lasto-adri *Blue* يقول...

Steli >> da ana?!!
heheh.. 5ada3oka fa kalo :D

واحد من مصر >> المهم اننا اتطمنا على صحتك

AZ>>
لا كآبة ولا حاجة والله يا بنتى
بس هى بتيجى معايا كدة فى الأوت دايما و تبان كئية
بس تعرفى حاولت أفتكر حاجة على الحيطان اللى عندنا و ملقتش
أصلنا لسا معزلين جديد
:D :D :D

Moooooony >> yaaaaaaa, wa7shani gedan wallahi..
i am glad u like what i write.. its my pleasure all the time,you know that..

Lasto-adri *Blue* يقول...

thanks friend..
after exams i 'll go to "soor el azbakya" and search 4 it..
if i couldn't find it, i know now whom to ask ;)

anyways.. waiting for that summery as well
bas el mohem mat3atalaksh
cheers

Ghada يقول...

جميل يا بلو ..
أعذريني إذا اتأخرت عليكي في الرد .. كنت "متوعكة" حبتين.
"الركن الرابع" خاطرة جميلة .. عرفتي تدخليني في الموود زي ما بنقول
..
كمان خدت بالي إن عندك أذن موسيقية..عندك كلمات موزونة
:)

لي ملاحظة صغيورة يا بلو .. حسيت بتضاد شتتني شوية لما قريت كلمة " تتمخطر" .. جنب "صفوف عزا
فاهمة قصدي؟
أوعي تبطلي كتابة ..متابعاكي

Lasto-adri *Blue* يقول...

بجد شكرا ليكى يا غادة إنك علقتى

أيوة عندك حق فى موضوع التضاد دة..
بس يمكن يكون لو أخدناها من ناحية إنه حتى مش هيشوف حاجة مفرحة؟!

مش عارفة..

بس هاخد بالى من النقط دى
إن شاء الله

Lasto-adri *Blue* يقول...

أه و ألف سلامة عليكى

محمد هشام عبيه يقول...

لو بصيت لبعيد شوية أكيد هتلاقي ركن خامس..طازج وجديد ونقي لم يلوث بعد ..دعك من الحوائط والجدران والأركان الاربعة ..وابحثي عن الرقم النجاة..خمسة

Lasto-adri *Blue* يقول...

هو عشان 25 سنة و بتاع بقى الركن الخامس؟!!

لا أنا عمرى ما شفته
;) :P

محمد هشام عبيه يقول...

لأ ..هو موجود بقى..أنا شفته بعنيي دول وأنا مكملتش عشر سنين..مالوش علاقة بخمسة وعشرين سنة ولاديالو..عموما الركن الخامس بيقبى مداري ورا الركن الرابع أو الثالث أو الثاني أو الأول..بص هدي الأركان الأربعة وهتلاقيه...

Guevara يقول...

في تشابه في الحالة فعلاً .. عشان كلنا بنمر بنفس الظروف مش أكتر