.jpg)
عارف لما تصحى الصبح وعلى غير العادة نفسك تكون مبسوط وهافف عليك أى شئ يحصل النهاردة يخليك فرحان؟..
تغسل وشك وتبص فى المراية حبة وانت بتسال نفسك ليه النهاردة مش عيد ميلادك مثلا، وحد.. أى حد.. يرن عليك جرس الباب بهدية ولا مفاجأة محضرها لك؟.. مع انك عارف انه حتى لو النهاردة عيد ميلادك، آخرك حد يكلمك يقول لك "كل سنة وانت طيب" ويمكن حتى رسالة محفوظة مبعوتة لك FWDed.. وزى كل سنة بعد ما اليوم يخلص، تمنى نفسك السنة الجاية بحد يرن جرس الباب..
وتفضل السنة الجاية مابتجيش..
تقعد تشرب فنجان القهوة بتاعك ولا الشاى باللبن اليومى، وانت نفسك فى حد.. أى حد.. يرفع سماعة التليفون عليك دلوقتى ويسال عن أحوالك.. وتقنع نفسك انه أكيد محدش ح يكلمك دلوقتى.. وازاى يكلمك وانت قافل تليفونك اصلا.. مع انك عارف انه حتى لو مفتوح محدش ح يسأل عليك.. بس انت عامل نفسك ناسى عشان نفسك تكون النهاردة مبسوط..
طول الطريق للشغل ولا الكلية تفضل بتدور بين الأرقام على موبيلك على رقم.. نفسك فى حد.. أى حد.. تكلمه. نفسك تفضفض زى الفكرة القديمة فى الأفلام، تقعد على الشيزلونج وتتكلم مع حد تكون معاه مرتاح.. مش لازم تكون مشكلة ومحتاج نصيحة.. ولا حتى انك نسيت الكلام برة براويز "صباح الخير"، "مساء النور".. "سلامو عليكم"... ونفسك تجرب الكلام من جديد.. لاء.. لان عندك حاجات كتير جواك عايز تقولها وتسال عنها.. وحد يسمع.. بس حد يسمع.. مش عشان انت نفسك فى حد يسمع... برضو لاء... بس لان الحد دا نفسه انك تتكلم وهو يسمع..
بس عارف.. أراهنك وانت نازل من الأوتوبيس ولا المايكروباص... ح ترجع تقفل موبيلك تانى.. وتتحجج.. مش عشان مافيش حد.. بس انت اللى مش عايز تتقل على حد..
وتمشى.. تمشى شارع.. وراه شارع.. وتدخل يمين وتلف شمال.. وتطلع سلالم سليمة ومكسرة... وتمسك ترابزين ملاه التراب.. وتشوف وشوش.. وشوش كتير حوليك.. فيهم اللى بيضحك لك.. واللى مكشر.. والمهموم.. واللى مش شايفك.. واللى شبهك.. وانت تفضل ماشى تمنى نفسك تكون النهاردة بس مبسوط..
تغسل وشك وتبص فى المراية حبة وانت بتسال نفسك ليه النهاردة مش عيد ميلادك مثلا، وحد.. أى حد.. يرن عليك جرس الباب بهدية ولا مفاجأة محضرها لك؟.. مع انك عارف انه حتى لو النهاردة عيد ميلادك، آخرك حد يكلمك يقول لك "كل سنة وانت طيب" ويمكن حتى رسالة محفوظة مبعوتة لك FWDed.. وزى كل سنة بعد ما اليوم يخلص، تمنى نفسك السنة الجاية بحد يرن جرس الباب..
وتفضل السنة الجاية مابتجيش..
تقعد تشرب فنجان القهوة بتاعك ولا الشاى باللبن اليومى، وانت نفسك فى حد.. أى حد.. يرفع سماعة التليفون عليك دلوقتى ويسال عن أحوالك.. وتقنع نفسك انه أكيد محدش ح يكلمك دلوقتى.. وازاى يكلمك وانت قافل تليفونك اصلا.. مع انك عارف انه حتى لو مفتوح محدش ح يسأل عليك.. بس انت عامل نفسك ناسى عشان نفسك تكون النهاردة مبسوط..
طول الطريق للشغل ولا الكلية تفضل بتدور بين الأرقام على موبيلك على رقم.. نفسك فى حد.. أى حد.. تكلمه. نفسك تفضفض زى الفكرة القديمة فى الأفلام، تقعد على الشيزلونج وتتكلم مع حد تكون معاه مرتاح.. مش لازم تكون مشكلة ومحتاج نصيحة.. ولا حتى انك نسيت الكلام برة براويز "صباح الخير"، "مساء النور".. "سلامو عليكم"... ونفسك تجرب الكلام من جديد.. لاء.. لان عندك حاجات كتير جواك عايز تقولها وتسال عنها.. وحد يسمع.. بس حد يسمع.. مش عشان انت نفسك فى حد يسمع... برضو لاء... بس لان الحد دا نفسه انك تتكلم وهو يسمع..
بس عارف.. أراهنك وانت نازل من الأوتوبيس ولا المايكروباص... ح ترجع تقفل موبيلك تانى.. وتتحجج.. مش عشان مافيش حد.. بس انت اللى مش عايز تتقل على حد..
وتمشى.. تمشى شارع.. وراه شارع.. وتدخل يمين وتلف شمال.. وتطلع سلالم سليمة ومكسرة... وتمسك ترابزين ملاه التراب.. وتشوف وشوش.. وشوش كتير حوليك.. فيهم اللى بيضحك لك.. واللى مكشر.. والمهموم.. واللى مش شايفك.. واللى شبهك.. وانت تفضل ماشى تمنى نفسك تكون النهاردة بس مبسوط..
هناك 14 تعليقًا:
يصبحك بنعيم الله يا ستنا
إيه الشعر اللى ع الصبح ده؟
لا بجد
" وتطلع سلالم سليمة ومكسرة..."
"وتفضل السنة الجاية مابتجيش.."
كلنا ذلك البنى آدم على فكرة ولا استثناء
وصباحك ده أدفى من كوباية الشاى باللبن اللى بأشربها دلوقت
يعنى انفع فى الشعر يعنى.. ولا أخلينى فى الهلس دا؟؟
صبحك انت اللى اصفى من اللبن الحليب يا سهرودى باشا
:))))
ربنا يبسط كمان وكمان وادعيلي اشوف اليوم
تحياتى
على فكرة انتى جامدة جدا
وصباحورد وفل
ومدونة حلوة اوى وقولتى حاجة انا كان نفسى حد يقولها
انا هبقى اقولك صباحو فل وكل حجات الصباح ولا تضايقى يستى
أكتبى زى ما تحبى.. كله رايح فى رصيدك
مادام الناس بتحس المكتوب فعليا وتاخد وتدى معاه بجد، ليه تقولى عليه هلس ؟ أهم شئ لا تستهلكى
وربنا يزيد فرحك وسعادتك أكتر وأكتر
:))
مع ان المكتوب مش بيعبر عن سعادة على فكرة
مش عارفة ليه كدة
بالعكس.. دا حالة من الملل.. ومحاولة للتغيير للانبساط.. ويفضل الانبساط مابيجيش
!!!
اييه دا امال انا رحت فيين؟
هزعل منك كده
ربنا يسعدك دايما يا ايموو ويبسطك كمان وكمان
كنت عايزة اكتب الكلام ده النهاردة
قريته حسيته طالع مني .. قوي
بس للأسف انا مبعرفش اقفل التليفون
مساكي كراميل يا ستي
نفسك تفضفض زى الفكرة القديمة فى الأفلام، تقعد على الشيزلونج وتتكلم مع حد تكون معاه مرتاح.. مش لازم تكون مشكلة ومحتاج نصيحة.. ولا حتى انك نسيت الكلام برة براويز "صباح الخير"، "مساء النور".. "سلامو عليكم"... ونفسك تجرب الكلام من جديد.. لاء.. لان عندك حاجات كتير جواك عايز تقولها وتسال عنها.. وحد يسمع.. بس حد يسمع.
تعرفى انى حتى النمر الغريبه بقيت بخاف ارد عليها
و حتى اللى مش غريبه
مش غريب اوى ان على قد احتياجنا لحاجات كتير على قد ما برضه بنبعد عن الحاجات دى
صديقتي..
تقريباً انا عشت حاجة وعشرين سنة من عمري اللي كله حاجة وعشرين سنة وانا بعمل كل الحاجات اللي حصل ف اليوم الواحد دا، امشي وامشي وامشي واقفل موبايلي وتليفوني وودني وامارس وحدتي بشبه سعادة مضطرة..
بس يمكن دا لاني انا عن نفسي كائن بيتوق للحب ، والحب هو الشيئ الوحيد القادر على انه يبقى الشيزلونج والسعادة والفرحة واعياد الميلاد واعياد السنة وكل فرحة الدنيا والفضفضة وكل حاجة..
بجد مبسوطة اني شفت البلوج بتاعك .. الاكتر من رائع بتلقائيته
ana mesh 7a3allaq 3al case di,
ana 7a3allaq 3la ennik betekteby 7elw w ka2enn afkarik leeha ree7a momayyaza tal3a men 2albik mobasharatan leena...
انا كمان نفسي أكون مبسوطة , و نفسي في حد يكلمني ..
و بنرفض الواقع عشان نقدر نعيش , و نكابر عشان نوهم إننا مبسوطين
و نكلم روحنا عشان ما ننساش الكلام
....
i believed this post because it is what i face everyday,it is exactly what is happening to me and the others ,hoping things unexpectable
البوست ده تحفة يابلو :)
إرسال تعليق