السبت، أبريل 01، 2006

مخنوقة مش أكتر

لاء دا مش رجوع.. لكنى ح تكلم بصوت عالى يمكن حد يسمعنى..

من فترة وأنا حاسة انى مش مظبوطة.. حاجات كتير بتحصل وأنا عاملة نفسى مش واخدة بالى، بس من جوايا بجد مش فاهمة فين الصح وفين الغلط!
حاولت كتير أهرب، لكنى كل مرة بهرب منى ليا.. وأبدأ متاهة ما تخلص.. مهما رحت ولا جيت فكرى دايما على قدى، ونظرى للشئ محدود لاتجاهات اربعة.. مهما رحت ولا جيت أنا فى الآخر انسانة ولازم أغلط.. لكن جاوبنى لحد امتى ح فضل أصدق انى بغلط فى حدود طاقة البشر!!

"كثرة الضحك تميت القلب"
مش عارفة مين اللى قالها لكن دلوقتى انا مؤمنة بيها اكتر من اى وقت فات، لانى كل ما اتلخبط اضحك.. وارجع اضحك.. واضحك تانى.. وانا فى الحق بضحك على نفسى ومن نفسى..
مرة زمان كنت كتبت ان جوايا اكتر من شخصية.. وكل شخصية مختلفة لحد التناقض مع الشخصية التانية، وكملت حياتى بقلب واحدة وفكر واحدة وأفعال واحدة تالتة بعيدة كل البعد عنهم..
ومن غير ما أحس برضو لقتنى بحكى لاول واحد اشوفه قدامى لأنى فى لحظتها كنت شبه قربت للجنون.. "كثرة الضحك تميت القلب".. ايوة صح قوى... وكثرة الفكر تشل الفكر برضو.. وللمصادفة قال لى نفس الاجابة اللى كنت متوقعاها..
"كن مع الله.. تجد الله معك"

عارفة انى اتغيرت بشكل مريع فى فترة قصيرة.. طول عمرى وأنا بعيدة عن الناس، وأقول بخاف أخسر حد.. لانى –ولحد دلوقتى- بخاف اصحى الصبح ما ألاقيش حد أتمنى اقابله.. ومالاقيش حد استنى يقول لى صباح الخير.. بخاف لما ازعل مالاقيش حد ممكن اعيط معاه وأحكى كل اللى بيا.. عشان كدة كنت ببعد وأقنع نفسى انى كدة ح فضل معاهم على طول والى الأبد..
لكن بعد فترة اكتشفت انى فى اكبر وهم ممكن اعيشه فى حياتى.. حتى لما قربت من ناس كتير.. كل يوم قبل ما أنام أحس انى بزداد وحدة على وحدتى..
لما تحب ترضى جميع الأطراف... تأكد انك فى النص ح تنسى حق نفسك عليك..
قلتها كلمة ومش ح نساها.. "انا بقيت منتشرة وكتير عليا قوى"! وفى لمحة بعدها حاسيت انى محتاجة اسيب كل حاجة وأختفى فى التو واللحظة عن هنا..

صدقنى بجد كل شئ حصل فى لمحة.. كنت واقفة ومبسوطة جدا مع الناس اللى حوليا بس جت لى فكرة.. مين فى كل اللى حوليا ممكن ينفعنى فى يوم من الأيام؟ مين من كل دول اللى ممكن يكمل معايا. مين ممكن يساعدنى لما اقول انى بقع؟ ومين فى كل دول لو فكرت اروح له وأحكى كل الكلام اللى تاعبنى ممكن يسمعنى ويقاومنى على نفسى بالحق!!
ساعتها ظهرت لى الحقيقة المرة ان كل السعادة اللى شيفاها مجرد شئ فلسو.. ومافى حد منهم كلهم باقى عليا ، وساعتها برضو عرفت الفرق بين "بلو" و "أنا" الانسانة..
"بلو" دى واحدة بتاعة لحظتها.. تحب تعيش على كيفها من غير ما حد يقول لها لاء.. الناس بتحبها لان مافى حد منهم حاول يطل طلة صغيرة على "أنا" من جوة.. كلهم ناس طيارى من برة برة.. انما اللى ممكن يفكر فى يوم يكمل معايا هو اللى ممكن يحب "أنا" الانسانة.. واللى مع كل أسفى كنت بحاول أوئدها بإيدى عشان الناس الفلسو اللى حبوا "بلو"!

قول لى فاهم أى حاجة؟!

بس عمركش حسيت انك بتتنقل من سيئ لأسوأ؟ عمركش مرة حسيت انك بتقع وشايف نفسك من فوق عمال بتصغر قوى فى نظر نفسك؟ عمركش مرة حسيت انك وحش قوى وحتاج تقابل نفسك تخانقها او حتى تخنقها ؟
أهه أنا كدة دلوقتى.. حاسة ان نفسى محتاجة تتربى من أول وجديد.. حاسة انى لازم أبدأ أغير نفسى بنفسى من دلوقتى مش من كمان لحظة..

قفلت كل اللى حوليا وقمت أتوضأ وأبدأ صفحة جديدة بإخلاص داخلى.. وتخيل!.. تخيل انى نسيت بتوضأ ازاى؟!!
ولما فقت ورجعت لقتنى بسأل "ح قابل وجه كريم بأى وش؟ وش "بلو" اللى بكرهها بكل شبر جوايا... ولا بوش "أنا" اللى مش فاكرة ملامحها؟"
بعد ما هديت مسكت المصحف أقرأ.. ومن غير ما أحس فتحته على الآية دى
"ومن أعرض عن ذكرى فإن له معيشة ضنكاً ونحشره يوم القيامة أعمى" طه آية 124

ولازم اعترف انى شايفة نفسى أعمى من أى لحظة عدت قدامى.. أعمى من ما ممكن اى حد يتخيل
عامية عن الحقيقة وان كانت واضحة.. عامية عن الحق لحد ما لسانى اتخرس.. وعامية عن ابسط حقوق نفسى عليا
تخيل كمان انى وصل بيا حالة فى اللخبطة الى انى مش عارفة أولويات حياتى!!

ممكن تستعجب على كلامى.. لكن دا اللى حصل.. عمر ما فى شئ تحكم فى حياتى أيا كان نوعه او جنسه او شكله.. كل حاجة كنت برميها ورا ضهرى وبمشى.. إنما اليومين دول الدنيا وخدانى و بقيت حاسة ان الحمل بقى تقيل قوى عليا.. ومهما فكرت انى قوية بلاقينى فى الآخر انسانة ضعيفة وذليلة قوى.. ومهما افتكرت انى منتصرة، فأنا لسا فى الآخر منهزمة ومغلوبة على أمرى.. ومهما حسيت انى كبيرة.. لسا فى اللى أكبر منى هو وحده اللى باقي لى مهما اتغيرت الدنيا واتبدل البشر..

يمكن أكون خلص كلامى اللى عندى.. لكن يفضل فى الآخر متبقي لى كلمة أقولها من جوة قلبى وبأعلى حسى
"يــــــــــــــــا رب"

هناك 21 تعليقًا:

DeadinLife يقول...

على صوتك شوية عشان مش سامعك أووى

Bent Masreya يقول...

خللى بالك من نفسك يا... يا انتى

وانتى عارفة انتى مين :))

غير معرف يقول...

جوايا اكتر من شخصية

جملة سمعتها من كل بنت قابلتها فى حياتى

kalam يقول...

عارفه انتى بتقولى كلام كويس اوى
وتصدقى او ما تصدقيش انتى مش حاله فرديه
انا مش عارف بالظبط سنك كام
بس انتى واضح انك فى مرحله اى حد عنده فكر ونفس لوامه بيعدى بيها فى حياته
ساعات بتكون فى فتره المراهقه وساعات بتتاخر شويه لاوائل العشرينات
انتى هيبقى عندك اسئله كتير معظمها حوالين نفسك اللى انتى اكتشفتى فجاه انك مش عارفاها او مش لاقياها او مش عاجباكى
الفتره دى بتعدى وبتنتهى بحاجه من اتنين
يا تلاقى اجوبه وتعيشى فى سلام وتحسى انك خلاص فهمتى نظام الدنيا ماشى ازاى
يا اما بتضيعى تماما وتفرطى بالكامل والعياذ بالله

لكن افضل صوره ممكن تنتهى عليها المرحله دى
ان تلاقى الاجوبه كلها والامان كله
بين ايدين ربنا
لو ربنا كرمك وان شاء الله هيحصل زى ما انا شايف
هتلاقيه معاكىوبيرشدك فى كل حاجه من اول هتاكلى ايه النهارده لحد هترشحى نفسك للرئاسه ولا لا

ربنا يكرمك ويهديكى للى يريح قلبك الجميل

*~Daisy~* يقول...

:D 7elwa enn kol el banat bey2oolo keda di...

Eman enty etsabbebty enny kott sure enny etgannent, amma la2eit el post be taree7' 1st april,
7asseit enn da kan a7'er daleel fadelly :D

we bel nesba le kalamik da,
di 3adatan beteb2a awwel 7'atawat el wosool le makan mo7'talef... fa mat7'afeesh...
ya3ny el ensan amma beytooh, 7atta law mawselsh lel makan elly howwa 3ayzo, beyewsal lel taree2 elly rabbena 3ayezhoolo, so dun worry ;)

Aladdin يقول...

واضح - فعلا - إن كل واحد له "حظ" من اسمه .. وفي حالتك من "أساميه"!!!

الاكتئاب حفرة عميقة الغور تسحبك أكثر لأسفل كلما تركت "نفسك" لها، مررت بهذه المرحلة من قبل ولم يخرجني منها إلا "نفسي" و(وطبعا لطف الله بي)..

ليك رب اسمه الكريم يا "انتي" على رأي بنت مصرية!!!

Ghada يقول...

إيه يا "إيمان" ده..
أنا دمعت لما قريت كلامك.. قلقتيني عليكي يا بنتي..

مش عارفة إيه اللي حصل عشان يوقعك كده، لكن أنا مؤمنة بيكي..
وباتفق كمان مع ابو فروة في موضوع إن كل واحد ليه حظ من اسمه.. إلا هو إنت اسمك الحقيقي إيه؟
;)

الافغانى يقول...

علي فكرة كتير مننا حاسس الاحساس دة ولو دا كل المزعلك فيبق عودا حميدا ولو مش كل اللي مزعلك يبقي اكتبية وسعتها هتقولي بنفسك انا رجعت

زبادي يقول...

انا عايز اكلمك انتي النهاردة مش بلو ومع ان بلو هي اللي عرفتنا عليكي لكن معلش مش وقته
بصي يا ستي انتي الان في قت محتاجة فية كل اللي بيحبوكي من قلبهم .. دوري الان علي اللي تعرفي انة بيحبك لنفسك ومن غير اي حاجة وح تلاقي انا عارف لانك محتاجة بس سندة بسيطة قوي وترجعي زي الفل واحسن من الاول لان انتي الان قدام نفسك ولازم تطلعي من الموضوع دة كسبانة نفسك لان التصالح مع النفس هو مفتاح الراحة صدقيني اكتبي في ورقة اللي مش عاجبك في نفسك وواجهيها وغيري كل شهر حاجة منها واية الحلو فيكي واكتبيه علي الحيطة وكل يوم تشوفية وقبل ما تنامي كمان .. اللي عايز اقوله ممكن تخسري الناس كلها بس ماتخسريش نفسك وماتجامليش حد علي حسابك واعملي اللي انتي عايزاة في الوقت اللي انتي عايزاه وقولي لنفسك انا صح
..... والله انا ماعارف كتبت اية بس دة اللي طلع في اللحظة خدي منه اللي يعجبك والباقي ارمية في الزبالة المهم انك ترجعي وانتي كسبانة نفسك ومتصالحة معاها
ربنا يصلح حالك وحالنا

Eman M يقول...

أكيد فيه على الأقل واحد(ة) بيحبوكى علشان "إنتى" .. أكيد

sin_wave يقول...

بس عمركش حسيت انك بتتنقل من سيئ لأسوأ؟ عمركش مرة حسيت انك بتقع وشايف نفسك من فوق عمال بتصغر قوى فى نظر نفسك؟ عمركش مرة حسيت انك وحش قوى وحتاج تقابل نفسك تخانقها او حتى تخنقها ؟

أنتى اللى بتقولى الكلام ده.... أنا مستغرب جدا من كلامك ، مجرد تفكيرك فى محاسبة نفسك ده شيىء كويس و سيدنا عمر كان بيقول كيف الاقى ربى بس ده مش مبرر لليأس أو الأحساس بأنك شخصية مزيفة أو متصنعة ...كونك أصبحت دليل لناس تانية مش معناه أنك لازم تكونى زى ما الناس عايزة لأن ده مستحيل .... و مش معناه انك أتغيرتى بشكل مريع و تذكرى اننا لو لم نخطأ لأخذنا الله و أتى بقوم يخطئون و يستغفرون.....أخرجى من الحالة ده و أرجعى لينا علشان وجودك مهم على الأقل بالنسبة لناس كتيرة زيى

islam yousef يقول...

انا بقيت منتشرة وكتير عليا قوى"!

مش عارف أبدأمنين أو أقول ايه لأن الموضوع أكتر من القواله
هوا ايه اللى حصل أو ايه اللى بيحصل
مش عارف انتى جالك القلب توصفى الحاله دى ازاى , انتى مش عارفه ايه اللى ممكن تعمليه فى اللى بيقرا

انتى استفزتينى ,ده مش معناه ان انا هاعترض على كلامك ,او هامنك من الفضفضه
اللى هيا الحصن الأخير للحيا فى عالم بدأ
يتلغى منه حاجه اسمها الشفاه
تخيلى ان الناس ما شيه و مالهومش بق
ده اللى الواحد بيحس بيه الوقتى

مش هاقولك كلام فلسفه أو أقولك انتى فى حاله وجوديه ,
و مش هاقولك إرجعى للأستاذ سارتر فى كتابه الوجود و العدم
إحنا فى الوقت ده مش ناقصين كلكعه
لأن الكتب بدأت تدوخنى , كتر القرايه قلب نافوخى

تخيلى ان نتى دخلتى كل فكره تقريها جوا عقلك ,و إن كل فكره كائن حى بيصارع للبقاء , ايه ممكن يكون شكلك ساعتها
بيتهيئلى مش هايكون ليكى شكل
هاتبقى بدون ملامح لأنك مش انتى
إيه اللى انتى عملتيه فى نفسك , البدايه للى انتى فيه ده كانت منين و من امتى
ماتحاوليش تشتكى , حاولى ما تكونشى فضفتضك شكوى , لأنك مش حتلاقى الحل عند حد
لأن الحل عندك انتى , جواكى ,دورى , اتعبى فى التدوير , بصى للى بيعانى أكتر منك , هتلاقى ان اللى انتى فيه مش شر , ممكن يكون خير
أتمنى لك ان تهتدى لنفسك

السهروردى يقول...

غادة ماكنش قصدى قالت أنها فكرت فى إسم مدونتها أنت فكرتى فى إسمك المستعار بلو
الأمريكان بيقولوا أن الأزرق و محبى اللون الأزرق ناس وحيدة و دائما مكتئبة و حزينة
إسمك بيمثلك بشكل أو بأخر

وقفت بين شطين على قنطرة
الكدب فين و الصدق فين يا ترى
محتار ح اموت ...الحوت خرج و قال
هو الكلام يتقاس بالمسطرة ؟

الشك ، الشك صايبك تخلصى منه

فى نوع من الإكتئاب غريب شوية
أن فى إنسان بستحمل بيستحمل بيستحمل و يضحك و يضحك و يضحك
و فجأة تأتى القشة التى تقضم ظهرك و ظهر البعير

عادى أنتى حترجعى للحياة و حتعيشى زى ما كنت عايشة مع بعض الحذر و الجروح التى تنسى لكنها لا تذهب
كل اللى أقدر أقولهوك
حاولى تجدى نفسك و تتصالحى معاها و تهاوديها لأنها محتاجة مهاودة و راحة

santakarim يقول...

i wanted to say what "kalam" already said, bas i wanna add "balance" it's all about balance ...
madam 3andk alsha7'syat de kolha, yab2a anty batstri7y fi 7ta fi alnos, take ur time, dory 3aliha...
rabna yawf2k...

new kid in the block يقول...

hi I wrote you email and still belive I can help you

El Masry يقول...

عزيزتى بلو

تللك الدعوات التى طالما اسمعها من امى :

ربنا يحبب فيك خلقه ....ربنا يكفيك شر اللى ما يتقى شره...ربنا يحققلك كل ما تتمناه .

لم اجد اثمن من تلك الدعوات اهديها لك ردا على تلك المدونه .


ربنا معاكى ...و احنا معاكى كمان


انا مش سعيد

aiman يقول...

وَنَفْسٍ وَمَا سَوَّاهَاِ...
فَأَلْهَمَهَا فُجُورَهَا وَتَقْوَاهَاِ

Mr-Biboooo يقول...

لو كل مرة بتخسرى حاجة من نفسك
المرة دى فرصة واضحة ليكى عشان تكسبى نفسك


سبحان الله

فعلا اقرب اليك من حبل الوريد

انتى عندك فرصة فعلا عشان تفتحى صفحة جديدة و شهادة ميلاد جديدة

يالا استغليها

soso يقول...

يالله , انتي عارفه بكيت من كلامك
يالله !
حسيتك جالسه تحكين عن اللي جوايا بكل التفاصيل .. كل التفاصيل بدون مبالغه
مشاعر تمنيت اعبر عنها سنين , قلتيها هنا
بكيتيني والله
حاجات في نفسي كثيره , حنفجر منها مش قادره اتحمل اكثر من كذا
اصعب شيء تحتاجين احد يطبب عليك ويكون جنّبك ومش لاقيه
ولما كنتي بيوم تهتمين انتي بالعالم كله ,, مالقيتي احد يهتم فيك ويقرب منّك بأصعب اوقاتك

يارب لطفك بقلوبنا

غير معرف يقول...

حالتى زى حالتك بالظبط
وكلامى عن نفسى هوه هوه كلامك
شايلة هم كل حاجه لان كل حاجه مشيلانى همها
وبيتهألى انى الوحيدة اللى بتتعب ف الدنيا دى وياريتها ف الاخر بتلاقى اى نتايج لتعبها ده

انا مخنوقة اوى اوى
وكل ما احاول اطلع من خنقتى اطلع سم وانزل مترين
بتمنى الموت عشان ارتاح
يمكن يكون فيه راحتى اللى ملقيتهاش ف نفسى ولا ف اهلى ولا ف اصحابى ولا حتى فى حبيبى اللى اتجوزته ومش عارفة احس باى راحة معاه رغم انه اختيارى

كل اللى متأكدة منه انى حد كويس وانى لو مش كويسة مكنتش حسيت بالحزن ده كله ف الدنيا السيئة اللى احنا عايشنها

انا ما ببطلش محاولات عشان اطلع
نفسى ما احزنش تانى بقى
نفسى حتى حزنى يبقى له شكل ثابت عشان اقدر اغيره وافرح لانى كل ما اغيره يتغير شكله ,, كأنى بحارب عدو خرافى بالف شكل .... كل اللى اعرفه ان دوام الحال من المحال
وصحيح انا بقالى تلات سنين بصارع
بس للاسف لسه ما موتش عشان ابطل احاول احسن عيشتى طول ما انا عايشة

ربنا يخفف عنا ويلطف بينا وبعبيده كلهم ويزرع ف قلوبنا الخير لو مفيهاش ويجازينا عنه

غير معرف يقول...

فعلا
يـــــــــــــــــــــارب
حقيقى ممكن تكون الناس كلها شايفينك ناجح وبيحسدوك وهما ميعرفوش حاجة عنك غير انك انسان او انسانة بشوشة بتضحك وضحكتها شهدلها الناس بانها جميلة بس بتخبى اكبر احساس بالفشل والضياع وكمية كبيرة من الحزن
وان مقولة ان كثرة الضحك تميت القلب معى غير حقيقية فلو مات قلبى لما تعذبت على الرغم من كثرة الضحك الذى يتستر خلف انين الحزن فلا احد يشعر بك وان كان حولك العالم كله ورغم ذلك لا تيأس من رحمة الله فان مع العسر يسرا ان مع العسر يسرا فقد يحدث تغير ما كن دائما فى انتظاره يغير من ذلك الالم ويذيقك طعم العسل ويزيل المرارة فى حلقك

يـــــــــــــــــــــارب