الأحد، يونيو 28، 2009

زمان ودالوقت

لما كنت أصغر كتير من دلوقتى، ويمكن لحد دلوقتى، كنت بغتاظ لما أى حد كبير يتقمص دور الحكيم ويقول لى عن نصائح عليا إتباعها.. كإنه بيحرم عليا حق التجربة بالظبط.. حقى الطبيعى زيه إنه أعيش الموقف وأحكم عليه بناء عن قرارى أنا، خبرتى أنا مهما كانت صغيرة.
النهاردة قفشت نفسى وأنا بدى نفس المواعظ والحكم لحد أصغر كتير عن ما أنا دلوقتى.. كان جوايا صوت صعبان عليا يضيع من عمره تجربة أنا جربتها وعرفت إنها غلط مش صح!.. كنت بتكلم وشايفة فى عينه نفس نظرة الغيظ اللى كانت فى عينى من كام سنة، بس ما قدرت.. كملت الكلام اللى عندى قبل ما كل واحد منا يفترق لطريق.
وبعدها إغتظت من نفسى المرة دى.. وإحترت ياهل ترى أنهى الأصح؟ نشوف الوقت بيضيع من غيرنا ونسكت.. ولا نتقمص دور أبو خبرة اللى عارف الغلط م الصح؟
وياترى يانفسى ليه لحد دلوقتى بتضايقى من اللى بيتقمص دور الحكيم ، وانتى عارفة انك محتاجة كل ثانية من الوقت؟



----------------
التدوينة دى فى نفس توقيت كتابة تدوينة لعبد الرحمن عن موضوع واحد "حاجة كنا بنتضايق منها وإحنا صغيرين، وبنعملها دالوقت"

هناك 4 تعليقات:

The Count of Monte Cristo يقول...

انا زمان كان والدي بيقعد ينصحنى و احيانا يستخدم العنف عشان ماعملش حاجة معينة لكن كنت برضو بعملها لكن مع الزمن و لما كبرت بطلت اعملها

انا عاوز اقول ان نصايحنا مش بتجيب نتيجة سيبوا الناس تجرب و تغلط و تتعلم بنفسها بدل مانضيع الوقت فى نصايح

نعكشة يقول...

مش شرط
الفكرة في الاسلوب

يعني مثلاً لما الواحد بيقرا حاجة في مجلة او في كتاب
بياخد خبرة غير مباشرة

و بيرسخ معلومات في دماغة بيستعملها بعدينم

انما لما حد بيقولوا لأ متعملش حاجة باسلوب مباشر
فالممنوع مرغوب

دة رايي
بث كدهون

سلام عليكِ

سجود يقول...

انا عكسكما فلم أكن اتضايق من نصحهم لي او توجيههم
بل كنت ابحث دائماً عن الأسباب التي غالباً مايعجزون عن ايصالها لي ..
فكل شيء يُمنع عنّا او نُرغب فيه لابد ان اقتنع به وإلا اظل باحثه عن السبب وإن لم اقتنع ..
ربما اظل اغوص في تفاكيرهم وخبراتهم من حيث لايعلمون وقد اصل الى مالايقصدون واقتنع به ..
المهم ان لا افعل بدون ان لا اعلم
لست ادري..
جذبني اسم المدونة كثيراً , لانني منذ سنوات ومنذ ان امتلكت جوال مدعم بتقنية البلوتوث وانا اكتب اسمي لستُ ادري .. وإلى الآن ..
تحياتي لكِ عزيزتي

Haytham Alsayes يقول...

النصيحة عموما تجارب الغير لنا الواحد ساعات بيضايق لما حد ينصحه خصوصا لما تكون عملت حاجة غلط بس بنتعلم منها فالدين النصيحة