الخميس، يونيو 16، 2005

تعارف

-- جاوبنى، ليه بتضحك كل ما أقول : أنا معرفش هويتى..؟!
-- لأنه غير منطقى
-- قول لى المنطقى..
-- ع الأقل إنتِ مصرية
-- و إنتَ كمان مصرى
-- لكن إنتِ "فلانة الفلانية"
-- غيرى ألف "فلانة الفلانية".. و غيرهم مليون ليهم يوم ميلادى.. فين الإختلاف.؟
-- إنتِ مسلمة
-- و إنتَ مسلم و أختك مسيحية
-- عندك الإسلام أكتر من "لا إله الا الله".. إنتِ كررتى كدة
-- وإفرض.. يفضل الإسلام إنتماء مش هوية
-- و إيه الفرق؟!
-- الفرق إنى بشعر بإنتمائى لقوانين وجدتها الأنسب لمعتقاداتى الشخصية، رغم إنى ما إخترت أتولد مسلمة.. زى إنتمائى لعائلتى و إسمى
-- و إن إخترتى؟!
-- عمرى ما فكرت..
-- فكرى..
-- ظنى ح أختار نفسى تانى
-- يبقى كلامك مجرد سفسطة
-- لأ دا حقى فى تكوين شخصيتى.. حقى فى إكتشاف نفسى
-- ما إنتِ نفسك
-- و إنت لسا بتضحك كل ما أقول : أنا معرفش هويتى.. جاوبنى، إزاى تقول أنا أكون أنا.. هل ملامحى المألوفة ولا فكرى المنسوج من أفكار ناس سبقونى؟
-- نصحتى دورى على نفسك بنفسك
-- لكنى تايهة.. قول لى "أنا مين"..
-- إنتِ واحدة
-- واحدة إيه؟
-- واحدة أخرى...


و أظل لستُ أدرى
سلاماتى

السبت، يونيو 11، 2005

حلم

أعرفتَ أننا كنا معاً ليلة أمس
و هديرُ الليل يهدأ سكونه الموحش..!!
رأيتُكَ رحالاً تائهاً حتى الثمالة
غريباً عن نفسِكَ كنت
شارداً فى طرقات من متاهات خوفِك..

شاهراً سيفَكَ كنت.. تصارع ظلَك
حتى سقطت عن جواد أسود، لم تمتطيه أبدا

هرعَ قلبى مهرولاً.. يضُمُكَ لذراعيه
و يهدهد أنفاسَكَ بآهاتٍ تزلزلُ أعماقى
حتى أطبقتَ أجفانٍ حديثة العهد بألوان الحياه

آهٍ على فارس، أفنى عمره فى جنح الخيال

و عبثاً حاولتُ أُلملم بقايا طيفٍ يحملُ فى طياته عبقَ سنينٍ ضائعة
فأغمضتُ عينى أنا الأخرى.. و رأيتُكَ
رأيتُكَ فى ركنٍ آخر
شاهراً سيفَكَ فوق جوادٍ أسود..
و الليل يثنى بهديره المخملى كحريرٍ مسدل
مرصع بلآلئ متناثرة
و خيطٍ من القمر المستحيل..



سلاماتى

الأحد، مايو 29، 2005

من ألحانى المفقودة

يا.. اللحن ده سمعته كتير جدا.. و رغم إنى معرفش إسمه، إلا إنه عالق بذهنى بشكل مخيف..
أنا ح أحاول أوصف اللحن كما أشعر به، لعل أحد يساعدنى..

"" كلما سمعت أصابع العازف ترقص فوق أوتار البيانو.. أحسستُ و كأننى فى حلم على جزيرة.. أو مكان أشبه ما يكون لجزيرة.
أمشى حافية القدمين و أنا أحاول إجتياز أوراق أشجار الموز الكثيفة عن يمينى و شمالى.. فى منظر غاية الروعة لخيوط الشمس الممتدة من أعلى و المتسللة من بين الأغصان المتشابكة.. أحاول جاهدة تفاديها عن عينى فأغمضها، لأجدنى فى زورق صغير وسط بحيرة رقراقة..
و بينما الماء ينساب من بين كفوفى، أرى إنعكاسات الضوء كأنها أحجار بلورية تداعبنى باسمة.. لأكتشف فجأة أن ما الزورق إلا سحابة تحملنى من فوق العالم..!! ""

حد عرف اللحن إسمه إيه؟!


عموما كل سنة و الإذاعة المصرية طيبة.. 71 سنة مروا بسرعة.. رغم إنى ملحقتش إلا آخر حقبتين، إلا إنى حاسة إنى أعرفها من زمن بعييد ..
أمد الله فى عمرك و حفظك و رعاك..
و بالأخص إذاعتى " البرنامج الأوروبى" *البث الإنجليزى* و "البرنامج الموسيقى"..

آخر حاجة بجد.. أنا بعتذر من أصدقائى اللى أهملت وعودى لهم..
إعذرونى.. فوقتى المخنوق و المقارب لشفى الإحتضار، ما يزال يحتفظ ببعض الرمق ليداهمنى على أرض معركتى، بوابل من الإمتحانات المسيلة للدموع..
و السلام ختام


سلاماتى

الخميس، مايو 26، 2005

بياض

قالت: صف لى اللون الأبيض؟
قال: لون الحليب
قالت: كيف هو لون الحليب؟
قال: كالشمع حين يبكى
قالت: لم أصل بعد!
قال: القمر فى ليلة ليلاء
قالت: من هو القمر؟
قال: ذو اللون الأبيض
قالت: اللون الأبيض؟!
قال: كصفاء قلبكِ..
قالت: الآن فقط رأيته..

ضريرة تحاور معلمها فى الفلسفة، بليغة هى الأسئلة، حين تتكشف عن نور القلب.

نهيل مهنا
شاعرة و قاصة فلسطينية

سلاماتى

الخميس، مايو 19، 2005

شكراً اصدقائى

كلما ضللت الطريق، وتعثرت خطواتى فأخطأت.. أشعر بخوف يتملكنى، يعتصر نفسى و ينقضُ على أفكارى.. فأقف حائرة فى وسط الطريق.. لاأعرف ماذا أفعل؟!
و اللوم، كل اللوم، يقع على عفوية مطلقة إلتصقت بالطباعِ منذُ الصغر..
ولأنى لم أكره شيئا فى حياتى بقدر أن أتسبب فى ضيق إنسان.. وإحساسى المميت بالإختناق كلما إقترب ميعاد نطقى بالإعتذار
فآثرتُ الصمتَ قرارى الوحيد..

ووجدتُنى فى عالمى الخاص و الخاص جداً.. أتنقل من محطة إلى محطة وألهو و أعيش و افكر و أتأمل و أنظر على العالم الآخر بعيون أصدقائى الخياليين جداً جداً


و حان وقتى لأتعرف على أصدقاء آخرين.. عندها تعرفتُ على جانب خفى منى، أُهملَ أو أهملته أنا و أخفيته و طمستُ معالمه بيدى..
و بدأت أخطأ من جديد.. و كلما أخطأتُ أهرب مذعورة، ألتجئ لهم..
" إحمونى.. إنصحونى ماذا أفعل..؟"
و يأتى الرد دائما واثق من نفسه.. " و ما الجديد.. إنطلقى و تعلمى الحياة.. و إعرفى نفسك.."

أقف الآن و أنظر لسنين طوال ورائى و أتسائل.. ترانى من كنت سأصبح لو كنتُ بدأتُ من تلك الأيام، عندما إلتجئت للصمت و لذتُ إليه خيارى الوحيد.. أترانى كنتُ سأظل تلك الطفلة العفوية، قليلة الحنكة و الخبرة و الإحتكاك.. أم ترانى كنتُ سأصبح غيرى.. ولا أعرف كُنَتِها؟!


أرجع و أنظر أمامى.. فأرى طريق.. و أرى أيادى صديقة تبسط لى أشعة الشمس البعيدة.. و أشعر بأمل يلُفنى و يخضع لى نسمة لطيفة، تحملنى إلى شاطئ آخر.. فى رحلة إلى إكتشاف أعماقى..


سلاماتى

الأربعاء، مايو 18، 2005

قلبى مليان كلام


أنا شاب لكن عمرى ولا ألف عام
وحيد ولكن بين ضلوعى زحام
خايف ولكن خوفى منى أنا
أخرس ولكن قلبى مليان كلام
عجبى!!


وقعدت فى ركنى و فردت أصحابى أمامى.. نعكشتهم و فركشتهم ، كعادتى كل ما أحتار أى كتاب أختار.. و بعدين أبدأ إعادة ترتيبهم.
أيوة كدة، القصص و الروايات فوق بعض * يووووه نسيت أرجع كتاب "خان الخليلى" لصاحبتى، معلش أنا بتعبكم معايا، بس حد يفكرنى ارجعه يوم الإمتحان الجاى*
أما الكتب الفلسفية و التحليلية النفسية، فمنبوذين على جانب.. و أعداد " مجلة العربى الكويتية" بقى متعدش.. دا تل لوحده اصلا.. أصله تجميع أعدادها عندى هواية، كل ما ألاقى أى عدد حتى و لو عفى عليه الزمن.. ولا يهمنى و أشتريه
و جينا للجد، كتب الشعر.. دى لوحدها مصيبة..
بستغرب ليه مكنتش مهتمة بالشعر قبل كدة.. و كنت بعتبره ضرب من الجنون إنى أقعد أقرأ ديوان لشاعر.. كنت بفتكر إنه كلام فاضى و تخيلاتى أوهمت ليا إنه كله كلام فى الحب و تخاريف أخرى
*مع العلم إنى مدمنة روايات بعيد عنكم.. هاهاها.. الله لا يوريكم
*

إلا إن أول نقطة تحول فى حياتى بدأت فى يوم كده، كنت بمر بفترة عصيبة *يو ترن* .. و حصل إنى فقد كل أمل.. أصبحت كل أحلامى باهتة المعالم، مفتقرة لحمرة الحياة.. حتى الحياة ذات نفسها إفتقد طعمها، و جمال صنعة الخالق سبحانه و تعالى.. * أعتقد إن إبتدأت من الأأيام دى و قلمى تحول للون الغامق!!*
المهم يعنى، فى ليلة من ذات الليالى و أنا كنت قاعدة مع نفسى فى البلكون * انا و النجوم و مش هواك* و فى حالة من حالات الإنعدام، حالة من اليقظة المشبوبة بنوع من تعجب الطفل أول ما يفهم * أنا مين، أنا فين، و إنتوا مين من الآخر..*
و بديهى.. *إحم*.. الراديو كان بيور جانبى..
الساعة كانت تمام الثانية إلا خمس دقائق صباحا، و إذا ببرنامج " لحظات مرهفة "
“Fragile moments”
و إللى كانوا بيختتموا بيه بث البرنامج الأوروبى لفترة من الزمن،
طلت عليا واحدة من أروع الألحان اللى سمعتها أذنى، رغم إنى معرفش إسمها لحد دلوقتى.. و فى الأمام قاد الأوركسترا صوت ملائكى لواحدة من أحب المذيعين إلى قلبى * "أمنية بدر" لو حد عارفها * و بدأت تقرأ بعض الأبيات الإنجليزية.. سبحان الله يا جماعة، إحساس غريب و عميق تغلغل فى نفسى كدة.. سيف سرى فى عروقى فجأة.. و إنبهرت لما عرفت إنها رباعيات الخيام..

و كانت أول و آخر مرة أبكى فيها بالشكل الهستيرى ده.. * فعلا كانت آخر مرة، و دى حكاية تانية، رغم إنها بعيييييييدة قوى..*
مش عارفة بالظبط اللحن فى الخلفية ولا صوت المذيعة.. ولا إنى كنت عايزة أبكى صديقتى و بحرقة.. الله أعلم
كل إلى أعرفه إنى بكيت بجد.. و بدأت مرحلة إدمان أخرى.. إدمان رباعيات عمر الخيام *بعيد عنكم بردو.. و الله لا يوريكم كذلك* اللى كانوا يعرفونى وقتها عانوا معايا فى المرحلة اللى تبعتها، كنت بأصر إنى أبعت لهم مقالات كنت بكتبها بنفسى عن عمر الخيام * رغم دعواتهم عليا المتلاحقة..هاهاها.. كانت أيام*.. رباعيات الخيام بالنسة لى مش شعر و بس، لكن فلسفة سامية و حب الحياة.. و أنا كنت محتاجة اللى ياخد بإيدى و يقولى "الدنيا مش كلها ناس بتموت"


لكن عمرى ما جربت نوع آخر من الشعراء.. قلتلكم، الخيام بالنسبة لى ماكنش بس شاعر، إنما نور.. أو حاجة محتجاها تفتح عينى ع الدنيا.. لحد ما فى يوم كنت قاعدة اسمع إذاعة أم كلثوم.. و لفت نظرى سطر بين كلمات الأغنية

فما أطال النوم عمراً
ولا قصر فى الأعمار طول السهر

عجبنى الحكمة من ورا البيت إلا إنى طنشت خالص، لإعتقادى إن أكيد شوقى ولا حافظ اللى كتبهم للست..
ولكن العجب الحقيقى لما سمعت الأغنية فى فرصة أخرى مع قريب ليا ليه فى أغانى الست قوى، و إكتشفت حاجتين خطيرتين عنى من مصادفة ظريفة..
أولا: إن ودانى بتلطقت اللحن قبل الكلمات.. بتلتقط الصوت قبل الإسم و يمكن الشكل..
يعنى ممكن أكلمك مرة و أعرف أجيبك من بين ميت مليون.. بس بصوتك.. و ممكن أكون ناسة إسمك و حتى شكلك.. و دا اللى حصل مع الأغنية دى.. لحنها لزق فى ودانى، و رغم إنى سمعتها ميت مرة *ع الأقل* إلا إنى أول مرة ألاحظ السطر إياه.. و من غير ما أعرف إسم الأغنية
ثانيا:
أما المصادفة بقى فهى إن الأغنية إسمها "رباعيات الخيام" ... * هاهاهاها.. يعنى حب من أول نظرة بالعربى و الإنجليزى.. أهو دا اللى ممكن أقول عليه: وما الحب إلا للحبيب الأولِ*
** القلب لا يمكن أن يخطأ إن أصدق حبه... حكمة العدد..**

و قلبت الإنترنت راسا على عقب، و ما وصلت إلا لبضع الأبيات اللى تغنت بها أم كلثوم فى رائعتها.. و عرفت الأهم إنه رامى اللى ترجمها للعربى.. فدورت عن ديوان لرامى يحتوى هذة الخالدة.. و ما لقيت إلا كتاب غلبان ترجمة حرفية للترجمة الإنجليزية، و مع الأسف..

أما تانى محطة فى حياتى...
يااااااه أنا كتبت كل ده.. مش قلتلكم " قلبى مليان كلام "
بصوا هقولكم المرة اللى جايا بقى.. أما أروح أنام شوية.. يمكن أنفع

بى إس: نعتذر عن العطل الفنى فى البوست السابق، على إنكم لاحظتوا إننا عدنا إلى مسارنا الطبيعى
نأمل عدم التكرار فى المستقبل
بس إنتو قولو يا رب...
And lets start the *yalahwi* campaign :D :D ;-)

سلاماتى

الاثنين، مايو 16، 2005

كلمة

-- تسمحولى أقول كلمة ؟

-- ... !!

-- طب شكراً
يــالهـــــــــــــــــووووووووى
بس خلاص