الثلاثاء، أكتوبر 30، 2007

سوناتا شتوية

السنة دى اول سنة اشتاق للشتا.. معرفشى... بس حاسة وكإننا السنة دى على معاد.. ودلوقتى فترة الانتظار..
من كام اسبوع اما الدنيا شتت فجأة، والرعد والبرق ماليين السما... كإن حد رجع لى قلبى تانى.. فقضيت الليلة دى فى الشباك بأتملى فى شكل الشتا..
تانى يوم الصبح لما نزلت كنت من جوايا منعنشة.. كإنى مغسولة جديد.. مع ان عمرى ما فرحت بالشتا قبل كدة.. ولما جزمتى اتبهدلت من بركة ماية صغيرة فى الشارع، ما اتضايقتش.. بالعكس.. مشيت ادندن...
"I'm singing in the rain, just singing in the rain.
What a glorious feeling and I'm happy again."

يااه.. من زمان وانا نفسى البس بووت وبالطوا.. وامسك شمسية وامشى اخبط برجلى ع الارض تحت المطر.. املى الشمسية والف والف واغمض والنقط نازلة على وشى..
تفتكر فى احساس اجمل من كدة؟

همم... تفتكر انه لان السنة دى اول سنة ابدأ شتا من غير لا دراسة ولا مذاكرة ولا امتحانات فلجلها متشوقة اشوف طعم فضا الشتا؟
انا فعلا مش عارفة...
اوقات كتير بحس بملل كئيب.. هو بالظبط بالظبط احساس غريب..
يعنى فرحانة انى اخيرا خلصت سنوات الدراسة.. لكن.. مفتقدة الكلية.. هو مش بالظبط بالظبط الكلية.. انما الشتا وانا مكنونة مع الدفعة فى المدرج..
تصدق انها كانت ايام حلوة؟!.. وللأسف ماحاولتش استمتع بيها.. عدوا هوا..
مفتقدة الدفعة قوى.. كلهم واحد واحد وواحدة واحدة.. حتى اللى متعرفتش عليهم.. الا بجد.. انا ليه ماتعرفتش عليهم المدة دى كلها؟.. ياترى مين اللى بعد سنة لسا فاكرنى ومين اللى نسانى؟.. مين يا شتا؟.. دا نا حتى مفتقدة انه يتقال لى بكرة تسليم مشروع وابات تحت اللحاف على صوت الراديو مقفقفة...
ولما اصحى واشم هوا البدرية مع كباية الشاى باللبن وصوت "محمد رفعت" على اذاعة القرآن الكريم.. ولا لاء لاء.. لما كنت استنى الاوتوبيس والسما مش عايزة تسكت ولا حتى الهوا راضى يحن عليا بنسمة دفى!..

تصور اول مرة الاحظ ان عمرى ما لبست كوفية؟!
طول عمرى نفسى فى واحدة ملونة.. صوف له وبرة ضخمة وشراشيب.. ومعاها الطاقية بقى وايه... عيشاك للآخر يا شتا!
معرفشى ليه عمرى ما فكرت اشترى واحدة.. لاء هو مش بالظبط بالظبط برضو.. عشان انا فعلا فكرت.. ولكن فى الحقيقة خفت شكلهم مايلقشى عليا مع الطرحة.. مش ناقصة تبقى الدنيا عندى زحمة..
بس عارف حاجة؟.. السنة دى ح شترى كوفية ملونة والبسها.. وح أشترى بووت وبالطو وامشى ادندن فى الشارع
I’m singing in the rain.. tararaaa…. In the rain.. in the rain..

بس يا شتا تعالى... وشوشنى بقى وبلاش بخل.. رخ مطرك رخ.. ونزل تلجك لو عندك مايهمكش... انا راضية بك كدة ومتشوقة اشوفك السنة دى عن اى سنة... لمرة واحدة عايزة اجرب طعم الفضا.. ولك عليا اوعدك مش ح شتكى ولا اقول لك بطل ولا م البرد مقفقفة...
:)

سلاماتى

الثلاثاء، أكتوبر 16، 2007

بسيطة

ربما هى ابسط كثيرا مما كنت اتخيل.. وربما هى حلوة الروح أكثر بكثير عما كنت اقول..
وربما ليس لها اسباب.. لأنها هى، بكل ما فيها، تأتينا على غير الاسباب والمواعيد..
لحظةٌ واحدة وترى العالم عكس ما كنت تعرفه.. ارحب وانقى وابهى..
لا تلتفت وراءك طويلا، ولا تبحث عن شذرات ظلال..
اترك نفسك، واركض لمنابع النور..
لحظةٌ أخرى وتصبح كل الوجوه مألوفة وملفوفة بابتسامةٍ معزوفة لا تعرفُ لها عنوان..
ابتسم معهم واضحك لهم وعليكم..

انما تأتينا السعادة دون دق بيبان القلب.. فقط لتملئ صفحة الفرح.. افراح..


----------
اسمع: الفرحة -- محمد منير

الأربعاء، أكتوبر 10، 2007

موسم 2007

وبعد نجاح موسم 2006 بتألق "عماد بعرور" فى اغنية "العنب العنب"
احب ان اهدى غفير الشعب المصرى والاشقاء العرب من كل حدب وصوب... اغنية لطالما اصمت آذان الملاين فى الاوتوبيسات والميكروباصات وعربيات الفشار وغيرهم من سيارات منتصف الليل الفارغة..

افخر واعتز انا المدعوة "لستُ أدرى".. هاى هى..
بتقديم درة الدرر.. وتحفة التحف.. الجوهرة المكنونة والمطربة المصونة "هالة شعبان" فى رائعتها الخالدة "سهرانة طول الليل"

سهرانة طول الليل حيرانة فى امري
محتارة
دمعى يسيل مشتاجة يا عمرى
فين الحب الحب اللى عيشناه
فين العهد العهد اللى خزيناه


احجز كيس قطن فى أقرب صيدلية من الآن!!

Nice quote

الأربعاء، أكتوبر 03، 2007

Untitled


My O My! Congratulate me right now on the spot. I just made a perfect home-made-pizza.. except for missing some pickles :$ .
mm.. what else.. I had a strange dream last night.. that I travelled china due some work keda.. when I woke up amazingly I remembered the whole dream .. that’s strange because I usually don’t dream and even when I do, I don’t remember anything..

I’m not feeling good.. I feel sad for a reason or not.. I just feel bad keda …
I want to make something new.. meet knew people and go out.. mm… God….
Well I’ll just go now..
bye

الثلاثاء، أكتوبر 02، 2007

باقى م الزمن ليلة

دنيا بتعيد نفسها.. بتجمع عشان تفرّق.. وتفرّق عشان محدش عارف الخير فين.. وانت نفسك تبقى راضى ومش عارف تجيب الرضى منين..
بليل كل يوم بتحلم ببكرة جاى احلى م النهاردة... وبكرة يبقى النهاردة.. والنهاردة لساه زى ماهو وبكره ماهو جى..

يقولوا لك فكها.. دى الدنيا ليلتين وتعدى.. وتانى يوم تلاقيك انت اللى بتقولها للى قالها واللى قالها يقولها للى ماقلها وترجع تقولها ويقولها ويقولوها لكم سوا.. وهى زى ما هى...
ليلتين بطّول..

كنا مع بعض كلنا امبارح.. سهرنا مع بعض زيكوا... اكلنا مع بعض.. اشتغلنا مع بعض.. حلمنا ويا بعض ولبعض..
عديت ليلة.. ليلة واحدة من العمر وكل اللى شاف طريقه شاف طريقه وغاب.. اللى اسافر.. واللى راح الجيش.. واللى اشتغل واللى اتجوز واللى مات.. وكله.. كله قال "اشوفكم قريب"..
وقريب ناقص له من العمر ليلة..
وبكره تعيد الدنيا من تانى نفسها.. وبكره يبقى النهاردة اللى كان علم الغيب.. وانتظار الغيب صعب.. وانتظار المعروف اصعب.. اصعب واوقات بيوجع قوى.. بيألم قوى... ويجيلك صاحب جديد يقول لك من جديد.. هانت.. فات م الزمن ليلة...