الأربعاء، أكتوبر 10، 2007

موسم 2007

وبعد نجاح موسم 2006 بتألق "عماد بعرور" فى اغنية "العنب العنب"
احب ان اهدى غفير الشعب المصرى والاشقاء العرب من كل حدب وصوب... اغنية لطالما اصمت آذان الملاين فى الاوتوبيسات والميكروباصات وعربيات الفشار وغيرهم من سيارات منتصف الليل الفارغة..

افخر واعتز انا المدعوة "لستُ أدرى".. هاى هى..
بتقديم درة الدرر.. وتحفة التحف.. الجوهرة المكنونة والمطربة المصونة "هالة شعبان" فى رائعتها الخالدة "سهرانة طول الليل"

سهرانة طول الليل حيرانة فى امري
محتارة
دمعى يسيل مشتاجة يا عمرى
فين الحب الحب اللى عيشناه
فين العهد العهد اللى خزيناه


احجز كيس قطن فى أقرب صيدلية من الآن!!

هناك 20 تعليقًا:

غير معرف يقول...

شوفوا يا ناس حكمة ربنا يا سبحان الله
لما كائن حي زي ده يغني
طب و الله يا لست مش المفروض نعمل دراسات يمكن الأصوات اللي طلعت في الفايل ليها معنى

إيييييييييييه زمن

Lasto-adri *Blue* يقول...

@y7ya
tab3an leha m3na.... distorted sin wave :D
heheheeee

بينى و....وبينى يقول...

ياست لست أدرى .والله متخلنيش أعيط بقى .أحنا بقينا شعب ذوقنا فى الهابط .يعنى اللمبى وحاحا .يعنى بعرور وسعد الصغير.يعنى الشرايط الدينية الى بتحرم الهوا وعاوزة تنفى الستات الى زحل.ده بقى بالصلاة على النبى ذوق شعبنا المصون. بجد حاجه تحزن

محمود عزت يقول...

ياااه
أخيرا لقيت حد يعرف الأغنية دي بتاعت مين ؟
أناآخر لما زهقت من أم الأغنية اللي شغالة ليل نهار في التكاتك و عند المكوجي و البقال اللي تحتينا , سألت راجل في كشك بقالة كان مشغله و أنا بشتري حاجة و قاللي إنها أغنية كل الناس بيسمعوها بس محدش يعرف بتاعت مين !

و نتيجة لإلغاز الظاهرة الشديد أنا فكرت في نظرية هامة مفادها إن ليه حد مغمور أوي عامل أغنية بلا أي قيمة و لا تساوي شئ فنيا جنب العنب مثلا أو الدنيا خربانة تتشهر كده و تتسمع لعى نطاق واسع في إمبابة و بولاق و العمرانية
و توصلت نظريا على الأقل أنه ربما يتم توزيع هذه الشرائط مجانا أو دفعها إلى الناس تخليص حق
و الناس بدورهم بشتغل أي دوشة و خلاص في الطريق بالإضافة إلى الهوس الجماعي بكل جديد بيعمله بقية الناس أو مهتمين بيه وهو أحد أهم أسباب شهرة تامر حسني و عمرو دياب و هيفاء وهبي و السلام عليكم و رحمة الله و بركاته
محمود عزت
أو تي في
القاهرة

Lasto-adri *Blue* يقول...

@بينى وبينى
بس مش بذمتك.... هالة ارحم من بتوع الحياة كفر
:D
لعن الله شر المغنيين والمغنيات.. الاحياء منهم والاموات
آمين آمين...


@محمود عزت
او تى فى ايه بقى.. خليها ام عين تى فى
:D
انا اتشلييييييييييت بقى لى 5 شهور اسمع الاغنية دى لما جالى السكر بعيد عنك والضعط
الموسيقى من النوع اللى تلاقيه بيتسحب فى المكان ويوصل للجميع مهما كانت الدوشة
وجات عليا فترة كنت متأكدة ان الاغنية دى فيها الروح ومستقصدانى.. منين ماروح الاقيها شغالة
وآخرة المتمة تلزق لى عربيات كل يوم تحت البيت مشغلاها باعلى صوت ممكن تتخيله

قلت ونبى لجبها.... وافرج الناس على اشكال تخاف ما تختشيش
آل سهرانة وكلام فاضى قال
:@

عباس العبد يقول...

امال لو سمعتى الليثى فى اغنية
الدنيا غدارة
او اغنية
الست لما
....
او سمعتى عبد الباسط
فى اغنية
الزوجة الخاينة
حتعملى ايه ؟
.....
الاغنية الى انتى حطاها دى
من روائع الاغانى الشعبية
....
الليثى عامل اغنية اسمها
الست لما
اسمعيها و سلميلى على ليلى
....
او الزوجة الخاينة لعباسط
....
اسمعيهم و روقى نفسك

غير معرف يقول...

looooooool

awel mara asm3ha ya blue

meen di? :D
wada3 el fann ya waalady

B يقول...

ده ست اللى بتغنى :| !!!!
و الله فاكرها راجل لحد دلوقتى
:S

معلش لو سمحتى اتأكدى احسن الموضوع بقى مأساوى جدا :D

wa7da masrya يقول...

:) أنا مكنتش قدرة امسك نفسي من الضحك و أنا بسمع الأغنية شكرا يا إيمان الأغنية فظيعة

غير معرف يقول...

بصي يا إيمان أنا مش جاي أرخم عليكي، بس زي ما انت عارفة أنا بحب أغنية بعرور جدا بغض النظر عن صوته لأن أنا من اللي بيركزوا في التيمة الموسيقية أكتر والرتم والكلمات.
أغنية العنب متفرقش كتير عن كتير من الروايات والأشعار واللوحات الحداثية. انعدام الترابط سمة أساسية وكل واحد فاكر نفسه فنان مع شوية بروباجندا بيصدق نفسه.

بالنسبة لهالة شعبان أنا عاجبني جدا التيمة الموسيقية اللي في الأغنية بجد يعني ،وباردو بغض النظر عن صوت البنت واللعب في الصوت بالأجهزة وكده باردو تفضل التيمة الموسيقية حلوة . جربي تسمعيها كموسيقي بس.

وعموما اللون اللي فيه حزن ده هو الغالب علي ذوق سائقي الميكروباص وربما يكون سببه حالة التوحد اللي بيحس بيها سائق الميكروباص مع المغني واللي بتعبر في النهاية عن مأساة سائق الميكروباص الحياتية. يعني تلاقي أغاني بتتكلم عن الغدر والخداع والتفكك الأسري وكده زي مثلا أغنية طارق الشيخ بتاعة دقيقة حداد.

باردو مع تنحية صوت المغني جانبا هتلاقي الموسيقي والكلمات أنضف مية مرة من عمرو دياب وأي مغنية بتبيع جسمها قبل صوتها.

سمعتي حاجة لرمضان البرنس يا إيمان؟ الله يرحمه بجد أنا فاكرله أغاني جامدة. أعتقد وقت ما نزل شريط عمرو بتاع ويلوموني كان رمضان منزل أغنية عودي. شوفي الفرق لو عندك أغنية للبرنس.
لو عندك بجد إبقي إرفعيها علي البلوج عشان مش عايز أسمعها.

غير معرف يقول...

معلش نسيت حاجة
أوقات الواحد بيبقي محتاج أنه يتحرر من أسر ما يتخيل أنه طبيعي حتي يستطيع تقييم ما يتخيل أنه غير طبيعي.

كل عيد وإنتي طيبة

karakib يقول...

كم انا فخور بوجود عماد بعرور بيننا
فنحن اصحاب الريادة
و محدش يعرف اللي احنا بنعمله ده
زي بعرور .. مافيش
يا سلام
بعد ما سمعت الاغنيه دي
جريت فتحت الكليب بتاع بعرور و سمعته علشان انضف وداني
==================
المشكلة انه انا باركب ميكروباصات كتير و طارق الشيخ و بعرور و حمدي باتشان و سعد الصغير و امثالهم اصبحوا يقتحمون مساحة كبيرة من يومي
اخر مرة سمعت فيها طارق الشيخ للأسف لم اتعرف علي صوته في الشريط الجديد بتاع دقيقه حداد
فسألت سائق الميكروباص
و اذ به ينظر الي شذرا و كأني مخلوق فضائي اخضر و لعابي الفسفوري يسيل من فمي و قال لي يا استاذ ده طارق الشيخ بس البودرة بهدلت صوته

تامر الحسيني يقول...

علي فكره مش هي دي الاغنيه دي التوزيع اما بقا الاغنيه الاصليه بقا

اجارك الله
الحمد لله هما قعدو لعبو شويه في الصوت
لحد ما بقا كده

abderrahman يقول...

صباحو

http://melodayz.com/song/arabic/signel/Hala-Shaban_Fin-Elhob_MoZiKaNo.CoM.mp3
رابط مباشر
فقط لمحبي الراي والديجيهات
ومستعدين لإحياء الأفراح والرحلات وافتتاح المحلات
كل عام وانتم بخير

غير معرف يقول...

لحظة يا لست أدري بعد إذن الجميع أنا عندي رأي
الفن زي ما مطلوب منه يبقى شيء راقي وسامي والحاجات دي
هو كمان شيئ انساني
مطلوب منه يلمس الأجزاء الحساسة جوة نفس الإنسان
مطلوب منه يعبر عن الجرح
والحب
والحنين
وغيره
طيب حتقولي كاظم الساهر بيغني للجرح
وعبد الحليم
وهاني شاكر
وتامر حسني
وعدوية
عبد الباسط حمودة
وحسن الأسمر
وفضل شاكر
وسعد الصغير
كل إنسان بيميل لطريقة تعبير مختلفة
تناسب عقله وتفكيره وثقافته واهتماماته
فيه ناس مثلا معجبة جدا بشعبان عبد الرحيم لأنهم بيحسوا إنه مننا
وشعب الأربعينات
غير شعب الزمن دة
لا مؤاخذة
ولك تحيتي

FATMA يقول...

wallahy begad kont fakra el be3'aneha "ragel" w kont mesta3'raba awy ezay be2ol sahrana

غير معرف يقول...

loooooooooooooooooool
marra rkebt m3 sawwa2 taxi,
moserrrrrrr
enn e7na masme3nash lessa fann sha3by,
w ennena fe mar7alet el ta3arrod lel fann el raqy el ma qabl el sha3by :D

السهروردى يقول...

صديقنا العزيز مختار قال نص الكلام اللى كنت حأقوله
باقى الكلام بيتلخص فى
إن بعرور وغيره هو أصدق مثال لتعبير عن واقع طبقة الفقيرة المطحونة المعدمة فى مصر
أصدق تعبير عن مستوى ثقافتها
أصدق تعبير عن حالها الإجتماعى والإقتصادى على حدٍ سواء
ولذلك أى محاولة للتنكر منهم هو تنكر للواقع المصرى أياً كان صفته
ووصف الأغانى دى بالفن الهابط لا يقدم من الأمر شئ
لأنها هى دى الأغنية الشعبية وهى دى اللى بتعبر عن واقع الناس

لما كانت الناس متسواها المادى والإجتماعى أحسن من كده بمراحل فى الستنيات قدمت لنا أبو دراع والجيزاوى ومحمد طه ومحمد قنديل وخضرة محمد خضر وعبد المطلب وكارم محمود على إختلاف اللى بيقدموه من الأغنية الشعبية

مش حتكلم عن صعود عدوية وعبد الباسط حمودة ولا عن جيل السبعينات والتمانينات والتحول اللى حصل للأغنية الشعبية المصرية لأن ده حياخد وقت طويل منى جدا

بس دلوقت اللى عايز يسمع فن شعبى هو مخير بين طريقين : تراثى إنقطع صلته بطبقته اللى خرج منها فى الأصل
أو واقعى إذا جاز التعبير يعنى بيعبر عن حال طبقته الحالية
وشكراً
وكل عام وأنت طيبون

goodman يقول...

لا اعلم كحيف يطيق الناس هذا البعرور
فكلهم فى كفة وصوتة المقزز هذا فى كفة
ان صوتة بعرور فعلا

Lasto-adri *Blue* يقول...

محترمة جدا الآراء المخالفة للموضوع، واعترف انى بدأت أقتنع انه نوع من انواع الفن وان لم استسيغه فربما غيرى يعتبره بمثابة تعبير قوى عن حاله

ولكن رغم كل شئ.... لازلت اعتبرها "فن هابط" ليس له اى طعم ولا لون