الخميس، سبتمبر 28، 2006

ولك أن تقول

عرفت الشيخ "حمزة يوسف" عن طريق برنامج "يلا شباب" على MBC1 من فترة، وكان يشاركه الداعى الشاب "احمد الشقيرى" (مقدم برنامج "خواطر شاب" على قناة الرسالة فى رمضان الحالى). و عن جد خلع قلبى بحديثه المبهر فى رقيه، وشخصيته السامية فى تواضعها وحلمها و تأدبها. ولانه امريكى الاصل، اعتنق الاسلام وهو فى الـــ 17، اواخر السبعينيات، فحقيقى اقدر اقول ان طريقة عرضه للاسلام بوجة النظر الغربية اقل ما يقال عنها.. رائعة وبجدارة.. وصراحة اكتر ما يعجبنى به انه بيعرض الوجه الآخر للعمله فى نقده شديد اللهجة فى اغلب الاحيان للمسلمين الحاليين..
مش دايما الغرب هو الوحيد المحتاج تصحيح الفكرعن الاسلام و المسلمين..
انما المسلمون محتاجون الى تصحيح الفكرعن الغرب أيضا..

اكتر حلقة افتكرها له، لما قال "افضل وسيلة لتعلم اللغة العربية هى تعلم الشعرالعربى"، وقتها كانت حلقات الرحلة فى الولايات المتحدة الامريكية، للحديث عن الاسلام بعد 11 سبتمبر، وكان تصوير هذه الحلقة بالتحديد فى احد المؤسسات لتعليم اللغة العربية هناك. ساعتها وقف على السبورة و كتب بيت شعر اظنه للامام الشافعى، ثم وجه للطلاب رأيه.. وشوف يا أخى، مع انى مسلمة، ناطقة باللغة العربية ابا عن جد، الا انى لحظتها تمنيت اكون مثل الشيخ حمزة فى اجادته للعربية و فهمه المستنير للاسلام...
ربنا يفتح عليه و يزيده..

والسنة دى بقى، ولتالت مرة على التوالى، يقدم الشيخ حمزة برنامج "الرحلة" على MBC1، بعد رحلته "النظرة الى الاسلام فى اوروبا" و رحلته "الاسلام فى الولايات المتحدة"، السنة دى رحلته "الى حقوق وواجبات المرأة المسلمة".. شاهدت النهاردة حلقة مع لبنى القاسمى، وزيرة التخطيط و الاقتصاد الامراتية.. وقد ايه استمتعت واستفدت، خصوصا بالحديث الجديد على مسامعى..
قال رسول الله صلى الله عليه و سلم
"من كان له بنت فلم يئدها ولم يهنها ولم يؤثر ولده عليها دخل الجنة".
صدق الرسول الكريم

اما العنوان بقى فا دا حكاية تانية خالص... برنامج تانى اسمه "بينى و بنكم" على قناة الراى و يعاد على قناة اقرأ.. شفت منه حلقة اليوم، بعد اللحاح من والدى و والدتى لانهم شاهدوا حلقة يوم امس مع الشيخ صهيب. أمريكى آخر أسلم، واصبح من اكبر الدعاة فى الولايات المتحدة الامريكية.. وحواره شيق بطريقة غريبة، يجبرك انك تنصت وتتفكر بتتدبر فى معانى كلامه.. ورحلة اسلامه و رحلة الدعوة.. يالله!
وكانت جملة "ولك أن تقول" وقت ما كان بينبه لآداب النقاش فى الاسلام، بعيدا عن الحوارات الجدلية الحالية..
شفت ابتسامته بعدها، وصوته و هو بيقول "الحمد لله"... واتثبت يعنى..


مواضيع التعبير و الانشاء لم تكن فى يوم من هوايتى ولن تكون.. لكن كل اللى اقدر اقوله لكم .. تابعوا برنامج "الرحلة" على MBC قبل الفطار.. ووبرنامج "بينى و بينكم" على الراى او اقرأ.. وادعولى على الفطار

رمضان كريم


بى اس: ممكن تزوروا معهد زيتونة للشيخ حمزة

سلاماتى

هناك 7 تعليقات:

3rby يقول...

هييه...انا الاول...يا رب بقه تشوفيني المره ديه:)

انا مش بتابع بس فاكر البرنامج بتاعه...كنت شفته مره السنة اللي فاتت تقريبا.....تعرفي والله الاسلام ده خساره في العرب...تعرفي...الاديان بتنزل لازبل خلق الله....وعلشان ينزلنا اقوي واكمل دين...يبقي ده معناه اننا ناس زبالة زبالة زبالة....الاسلام مش هايستفيد بجد من محاولات اسلمة الداخل...لانهم برضه عرب وعاداتهم وحشة زينا بالظبط...لكن لما واحد بيسلم من بره...بارادته الكامل وبدون ضغوط...بيبقيفاهم الدين حلو اوي اوي اوي...الموضوع حلو...ياريت تردي عليا في البوست اللي تحت

Lasto-adri *Blue* يقول...

الداخل مهم قوى يا عربى
:)
ومش معناه انى ح فرح لما مسيحى عربى -مثلا- يسلم.. انما ح فرح لما مسلم فهم اسلامه صح

فكرك الاسلام ح ينهض تانى ازاى لو اننا قلنا احنا مش مهم، والمهم برة؟
يمكن كتبت الكلام اللى فوق بتحسر على نفسى ... 21 سنة و لسا مش شايفة انى مسلمة نفعة لدينها و امتها

يااه..
قلبت عليا المواجع

والله بزور البلوج بتاعك يا عربى فعلا
بس غالبا مش بلاقى تعليق احطه
اعذرنى، بس حاليا حقيقى -ولو ملاحظ- مش فى موود التعليقات قوى قوى يعنى
;)
بقرأ وبس


يلا.. رمضان كرييييم

Dananeer يقول...

اول مره اسمع عنهم يابلو للاسف
المهم المواعيد امتى؟؟
على mbc
و امتى اعاده البرنامج التنى على اقرا
انا معتديش الرساله؟؟
انا مكنتش بيتفرج على حاجه غير عمرو خالد و مصطفى حسنى
ياريت لما حد بجد يشوف
حاجه تستاهل يقول

غير معرف يقول...

ربنا يهدى المسلمين العرب وميبقاش اسلام بالفطرة وخلاص

3rby يقول...

رمضان كريم...أنا مش كان قصدي تردي عليا عندي...كان قصدي تردي عليا في البوست اللي فات عندك
المهم...انا كان قصدي اننا وحشين فعلا وخسارة فينا الاسلام(الا طبعا لو اتصلح حالنا)

هاديكي مثال...انا من الشرقية اصلا وبسافر ساعات...تدخلي الجامع تلاقي مفيش مخلوق فالبلد كلها مش فالجامع....والخطيب مش فاهم حاجة وعامل فيها شيخ علشان الناس تحترمه بعد ماكانوا بيدولوا علي قفاه....والناس قاعدة تسمع....يخلصوا صلاة من هنا وتلاقيهم(استغفر الله العظيم)بيسبوا الدين جوة الجامع...تخيلي وصلت انهم يسبوا الدين جوة الجامع...وتلاقي الواحد من دول طالعله زبيبة صلاة بس قاعد ياكل في مال قرايبه اليتامي...ويتكلم في حق ديه ويشتم في ده...مشكلتنا اننا فاهمين الدين صلاة وصوم وقرائة قران وبس....الدين المعاملة....والله باحترم ناس كتير مابتصليش اصلا...اكتر من شيوخ كتير...ورمضان كريم يا بلو

Lasto-adri *Blue* يقول...

برنامج يوسف حمزة بيجى على حدود تلاتة ونص على
MBC1
وماعرفش لو له اعادة

وبنامج بينى وبنكم بيجى قبل آذان العشاء عندنا على اقرأ

وفى برنامج رائع لشيخ خالد الجندى بيجى قبل الفطار بالظبط ويكمل معانا واحنا بنفطر على قناة اقرأ

وبرنامج خواطر شاب، بيجى على الساعة 11 الا ربع على الرسالة.. بس حقيقة لسا ماشفتوش لحد دلوقتى، ومع الأسف

غير معرف يقول...

نفسي أعرف اتابع حاجة على التليفزيون
كتير بحس إني خارج الزمن بشكل غريب
شكرا لتبيهي للبرامج دي و هادعيلك أكيد بس يا ريت تدعيلي كمان أعرف أشوف حاجة من اللي قلتي عليها